?Yu Yu Lukluk Yu Wan Olsem Wanem?

HEM i wan man we i praod. Hem i bin kasem wan hae ples long gavman, mekem se hem i kam flas tumas from we ol man oli leftemap hem bitim mak. Be hem i no haremgud nating, from we wan narafala haeman blong gavman i no wantem givim ona long hem. From samting ya flas haeman ya i wantem givimbak. Hem i mekem plan blong spolem olgeta man aninit long rul blong gavman ya we oli kamaot long semfala laen mo kastom olsem haeman ya we i no bin givim ona long hem. !Hemia wan kruked tingting blong man we i tinghae long hem wan!

Man we i mekem plan ya, hemia Haman. Hem i wan haeman long haos blong King Ahasuerus. ?Hu ya nao we i olsem enemi blong hem we hem i wantem spolem? Hemia wan man Jiu we nem blong hem Modekae. Nating se tingting we Haman i gat blong kilimaot fulwan laen blong Isrel i bitim mak, samting ya i soem denja mo rabis frut we i save kamaot from fasin flas. Fasin blong tinghae bitim mak long posisen we hem i gat i no mekem denja long ol narafala nomo. Be samting ya i mekem se ol man oli daonem gud hem mo biaen hem i ded from.—Esta 3:1-9; 5:8-14; 6:4-10; 7:1- 10.

Fasin Flas i Save Kasem Ol Trufala Man Blong Wosip

Jeova i wantem se yumi wokbaot wetem hem ‘we tingting blong yumi i stap daon.’ (Maeka 6:8) Baebol i gat plante stori blong ol man we oli no holem tingting daon long saed blong olgeta wan mo fasin flas i winim olgeta. Samting ya i mekem se oli gat plante problem mo oli harem nogud tumas. Taem yumi tingbaot ol eksampel ya, samting ya bambae i halpem yumi blong luksave se, i krangke mo i denja blong no skelemgud tingting blong yumi.

Jona i no bin skelemgud tingting we hem i gat. Hem i wantem traem ronwe taem hem i kasem wok blong talemaot jajmen blong Jeova agensem ol rabis man long Nineve. (Jona 1:1-3) Biaen, taem wok blong prij we hem i mekem i pulum ol man Nineve blong oli tanem tingting blong olgeta long sin, Jona i kros. Hem i stap tingbaot nomo gudfala nem we hem i gat olsem wan profet, mekem se hem i luk laef blong plante taosen man long Nineve olsem nating nomo. Sipos yumi tinghae tumas long yumi wan, maet bambae yumi faenem i had blong holem wan tingting we i stret mo i klia long saed blong ol man mo ol samting we oli stap hapen raonabaot long yumi.

Traem tingbaot Usia. Bifo hem i wan gudfala King blong Judia. Be, taem hem i no skelemgud tingting blong hem, hem i wantem traem mekem wok blong ol pris we hem i no gat raet nating blong mekem. From we biaen hem i gohed blong mekem samting ya we i no stret, wan rabis sik i kasem hem mo God i no moa agri long hem.—2 Kronikel 26:3, 16-21.

Tingting we i no skelgud klosap i kam olsem wan trap long ol disaepol blong Jisas. Oli stap tingting tumas long saed blong ona mo paoa we olgeta wanwan i save kasem. Be long taem we bigfala traem i kamaot, oli ronwe mo livim Jisas. (Matiu 18:1; 20:20-28; 26:56; Mak 9:33,34; Luk 22:24) Taem oli no moa gat fasin daon mo oli tinghae long olgeta wanwan, samting ya i mekem se klosap oli no moa luksave klia stamba tingting blong Jeova mo wok we oli mas mekem folem ‘samting we God i wantem.’

Nogud Frut We i Kamaot From Fasin Blong Tinghae Long Yumi Wan

Taem yumi no skelemgud tingting we yumi gat long yumi wan, samting ya bambae i mekem yumi harem nogud mo i save spolem fasin fren we yumi gat wetem ol narafala. Eksampel, maet yumi stap sidaon insaed long wan rum mo yumi luk wan hasban wetem waef blong hem, tufala i stap toktok smosmol long tufala mo tufala i stap laf. Sipos yumi tingbaot yumi wan nomo, maet bambae yumi ting se tufala i stap jikim yumi from we tufala i stap tok smosmol long tufala. Maet tingting blong yumi i blokem yumi blong no moa ting se tufala i stap tokbaot wan narafala samting. Long tingting blong yumi, i no gat wan narafala man we tufala i save tokbaot. Afta tingting blong yumi i foldaon mo yumi no moa wantem toktok wetem tufala bakegen. Long rod ya, fasin blong no skelemgud tingting long saed blong gudnem we yumi gat, bambae i mekem se rong mining i save kam long tingting blong yumi long saed blong toktok no samting we narafala i mekem. Nao, fasin joengud we yumi gat wetem ol fren, olgeta wanwan  memba blong famle blong yumi, mo ol narafala, i save kam nogud.

Olgeta we oli gat fasin blong tinghae tumas long olgeta wan bambae oli save kam man we oli tokbaot olgeta wan tumas. Oli save gohed oltaem blong tokbaot ol bigfala wok we oli bin mekem, ol fasin we oli gat, no olgeta samting we oli gat. Maet oli wantem se olgeta nomo oli toktok taem oli storeyan wanples wetem ol narafala. Oltaem bambae oli tokbaot olgeta nomo. Olgeta kaen toktok olsem ya oli soemaot se oli no gat trufala lav. Samting ya i save mekem man i kros. Taswe olgeta we oli tinghae tumas long olgeta wanwan oli save kam olsem enemi blong ol narafala.—1 Korin 13:4.

Yumi we yumi ol Witnes blong Jeova, maet long wok blong prij bambae yumi save fesem ol tok blong jikim yumi mo ol man we oli no wantem lesin long yumi. Yumi mas rimemba se olgeta fasin agens ya, oli no blong agensem yumi. Hemia i blong agensem Jeova we hem i stamba blong mesej blong yumi. Be sipos yumi stap tinghae tumas long gudnem we yumi gat, bambae samting ya i save givim nogud frut long yumi. Plante yia we i pas finis, long wok blong prij, wan brata i mitim wan man long haos we i tok strong long hem mo brata ya i tokbak nogud long hem. (Efesas 4:29) Biaen brata ya i no moa joen long wok blong prij bakegen. Yes fasin flas i save mekem se yumi kam kros kwiktaem nomo taem yumi stap prij. Yumi mas traehad blong blokem samting ya blong i no hapen. Be i moa gud blong gat tingting daon, mo askem long Jeova blong i halpem yumi blong holemtaet fasin glad long jans ya we yumi gat blong joen long Kristin minista wok.—2 Korin 4:1, 7;10:4, 5.

Taem yumi tinghae tumas long yumi wan, samting ya i save blokem yumi blong akseptem ol advaes we yumi rili nidim. Samfala yia finis long wan kantri blong Sentrol Amerika, wan yangfala boe i givim tok long Tiokratik Ministri Skul insaed long Kristin kongregesen. Taem brata we i lukaot long Skul ya i givim sam advaes we i go stret long poen we yangfala ya i mas wok long hem, yangfala ya i kros, i sakem Baebol blong hem long floa mo i wokbaot i goaot long Haos Kingdom wetem tingting ya se bambae hem i neva kambak. Be sam dei i pas, fasin flas blong yangfala ya i godaon. Hem i mitim brata we i lukaot long Tiokratik Skul, mo i akseptem advaes we i kamaot long brata ya wetem tingting daon. Biaen, yangfala ya i gru i kam wan Kristin bigman.

Taem yumi no gat stret tingting mo yumi wantem stap tinghae tumas long yumi wan, samting ya i save spolem fasin fren blong yumi wetem Jeova. Ol Proveb 16:5 i givim woning se: “Hae God i no wantem nating ol man we oli stap flas, oli stap leftemap olgeta.”

Wan tingting We i Skelgud Long Saed Blong Yumi Wan

I klia se, yumi no mas tinghae tumas long yumi wan. Be, samting ya i no minim se yumi no kea long fasin mo toktok blong yumi. No gat. Baebol i soem se ol elda, ol man blong givhan—yes be i no olgeta nomo, evriwan insaed long kongregesen—oli mas gat fasin we i stret. (1 Timoti 3:4, 8, 11; Taetas 2:2) ?Be olsem wanem nao ol Kristin oli save wokem mo holem wan tingting we i stap daon, i stret, mo i skelgud long saed blong olgeta wan?

Baebol i soem plante eksampel we i save leftemap tingting blong yumi long saed blong olgeta we oli holem wan tingting we i skelgud long saed blong olgeta wan. Beswan ya nao hemia eksampel blong Jisas we i gat tingting daon. Pikinini blong God i mas lego haefala posisen blong hem long heven, mo i kam wan man we i daon olgeta long wol blong mekem wok blong Papa blong hem mo givim laef blong sevem ol man. Nating se ol man oli tok nogud long hem, oli mekem nogud long hem, mo hem i ded long wan fasin we i mekem bigfala sem long hem, hem i holemtaet fasin blong bos long tingting mo respek long ol narafala. (Matiu 20:28; Filipae 2:5-8; 1 Pita 2:23, 24) ?Olsem wanem Jisas i save mekem samting ya? Hem i dipen fulwan long Jeova mo i gat strong tingting blong mekem wok blong God. Jisas i mekem bigfala fasin traehad blong stadi long tok blong God, prea oltaem, mo givim fulpaoa blong hem long wok blong talemaot gud nius. (Matiu 4:1-10; 26:36-44; Luk 8:1; Jon 4:34; 8:28; Hibrus 5:7) Taem yumi folem eksampel blong Jisas, samting ya i save halpem yumi blong holem wan tingting we i skelgud long saed blong yumi wan.—1 Pita 2:21.

Mo tu tingbaot eksampel blong Jonatan, hemia boe blong King Sol. Jonatan i lusum jans blong kam king from we papa blong hem, Sol, i no gat fasin obei. (1 Samuel 15:10-29) ?Tingting blong Jonatan i kam konkon from we hem i lusum jans ya? ?Hem i jelas long Deved, yangfala man ya we bambae i rul long ples blong hem? Nating se Jonatan i olfala moa, mo i gat moa ekspiryens i bitim Deved, hem i mekem i stret nomo taem hem i gat tingting daon blong obei long oda we Jeova i stanemap mo i stap tru blong sapotem Deved. (1 Samuel 23:16-18) Taem yumi luksave wanem samting we God i wantem yumi blong mekem mo yumi rere blong stap  aninit long hem, samting ya i save halpem yumi blong ‘no letem tingting blong yumi i go antap.’—Rom 12:3.

Jisas i tijim se i impoten blong soem stret tingting mo tingting daon. Hem i tokbaot pijatok se, taem ol disaepol blong hem oli stap long wan lafet blong mared, oli no mas tekem ‘nambawan ples’ from we maet wan man we i hae moa i save kam nao bambae oli sem blong go tekem ples we i daon moa. Jisas i mekem lesen ya i kam klia taem hem i ademap se: “Man we i stap leftemap hem blong i kam haeman, bambae God i putum hem i stap daon. Be man we tingting blong hem i stap daon, bambae God i leftemap hem i kam haeman tru.” (Luk 14:7-11) Yumi waes blong holem advaes blong Jisas long tingting blong yumi mo ‘wokem tingting daon olsem klos blong yumi.’—Kolosi 3:12; 1 Korin 1:31.

Ol Blesing Blong Wan Tingting We i Skelgud

Taem ol man blong wok blong Jeova oli gat wan tingting we i stret mo tingting we i stap daon, oli save faenem trufala glad long minista wok blong olgeta. I isi blong kam long ol elda taem oli gat tingting daon blong “lukaot long ol man [“long kongregesen,” NW] blong God, olsem we man blong lukaot long sipsip i stap lukaot long ol sipsip blong hem.“ (Ol Wok 20:28, 29) Biaen, olgeta insaed long kongregesen oli harem se i isi blong toktok long olgeta mo lukaot help blong olgeta. Ale, kongregesen i save joengud moa long wan tingting blong lav, haremgud wanples, mo gat fasin tras long olgeta wanwan.

Taem yumi no wantem traem kam stret bitim mak, samting ya i save halpem yumi blong gat gudfala fasin fren wetem ol narafala. Wan tingting we i stret mo tingting daon bambae i blokem yumi blong wokem wan tingting blong kompetisin se ol fasin blong yumi oli moa gud bitim narawan no se yumi gat moa samting. Ol fasin olsem, we oli kamaot long God, oli save halpem yumi blong kea long narafala. Samting ya bambae i mekem se yumi save mekem narafala i haremgud mo yumi naf blong givhan long olgeta we oli gat nid. (Filipae:3, 4) Taem ol man oli haremsave se narafala i lavem mo i soem kaen fasin long olgeta, samting ya i pulum olgeta blong mekem i gud. ?Mo i no tru se wan fasin fren olsem ya, we man i no tingbaot hem wan nomo, i save kam olsem strong fandesen blong bildimap fasin fren? Hem i wan nambawan blesing ya, taem yumi no tinghae tumas long yumi wan.—Rom 12:10.

Wan tingting we i skelgud long saed blong yumi wan i mekem se i moa isi blong luksave ol mastik blong yumi taem we yumi mekem narafala i harem nogud. (Matiu 5:23, 24) Hemia nao i mekem se fasin fren blong yumi i kam gud, i save givhan long yumi blong stretem ol problem mo blong gat respek long narafala. Olgeta we oli gat wok blong lukaot long narafala, olsem ol Kristin elda, oli gat jans blong mekem i gud long ol narafala sipos oli gat tingting daon mo tingting we i stret. (Ol Proveb 3:27; Matiu 11:29) Mo tu, wan man we i gat tingting daon bambae i faenem se i isi blong fogivim narafala we i mekem sin agensem hem. (Matiu 6:12-15) Bambae hem i no kros long ol smolsmol slak fasin we hem i luk long narafala. Mo bambae hem i trastem Jeova blong stretem ol problem we i no gat rod blong stretem.—Ol Sam 37:5; Ol Proveb 3:5, 6.

Bigfala blesing we i save kamaot taem yumi gat wan tingting we i stret mo wan tingting we i stap daon, hemia glad se Jeova i lukluk yumi olsem ol fren blong hem mo hem i agri long yumi. “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” (1 Pita 5:5) Bambae yumi neva mas foldaon insaed long trap ya blong ting se yumi moa gud. Be, yumi mas gat tingting daon blong luksave ples we yumi gat insaed long oda blong ol samting we Jeova i stanemap finis. Ol bigfala blesing oli stap gud blong olgeta we oli kasem mak ya ‘blong stap stret taem oli wokbaot wetem God.’

[Tok blong pija long pej 22]

Jonatan i sapotem Deved wetem tingting daon