“Yufala i Mas Lukaot Gud”

“Nao from samting ya, yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem.”—MATIU 24:42.

1. ?Olgeta we oli mekem wok blong Jeova longtaem finis, oli gat wanem filing long saed blong plante yia we oli spenem long ol wok ya? Talem wan eksampel.

 PLANTE man mo woman, oli gohed longtaem finis blong mekem wosip long Jeova. Sam long olgeta ya, oli bin lanem trutok taem oli smol yet. Oli mekem olsem bisnesman ya we i faenem wan perel we i nambawan, nao i go salemaot olgeta samting we hem i gat mo i pem perel ya. Ol man mo woman ya we oli wantem tumas blong stadi Baebol, oli lego ol samting we olgeta nomo i wantem, nao oli givim laef blong olgeta long Jeova. (Matiu 13:45, 46; Mak 8:34) ?Wanem filing blong olgeta taem Jeova i no mekem ol stamba tingting blong hem oli kamtru kwiktaem long wol ya olsem we oli stap tingbaot? !Oli no harem nogud! Oli agri wetem tok blong Brata A. H. Macmillan se: “Naoia, mi gat strong tingting blong holem bilif, bitim bifo. Bilif ya i mekem se mi glad long laef. Hem i stap halpem mi yet, taswe mi no fraet blong fesem fiuja.” Brata Macmillan i talem tok ya afta we hem i spenem klosap 60 yia long wok blong God.

2. (a) ?Wanem advaes we Jisas i givim long ol man blong hem long stret taem? (b) ?Bambae yumi tokbaot wanem kwestin long stadi ya?

² ?Olsem wanem long yu? Nomata we yu yangfala no yu olfala, tingbaot tok ya blong Jisas, se: “Nao from samting ya, yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem.” (Matiu 24:42) Vas ya i sot nomo be hem i karem wan trutok we i dip. Yumi no save wanem dei Masta bambae i kamtru long hem blong jajem rabis wol ya, mo yumi no nidim blong save dei ya. Be yumi mas laef long wan fasin we, taem hem i kam, bambae yumi no save sore from. ?Long saed ya, wanem eksampel long Baebol we bambae i halpem yumi blong lukaot gud? ?Olsem wanem Jisas i eksplenem samting ya? ?Mo wanem ol pruf we oli soem se yumi stap laef long ol lasdei blong rabis wol ya?

Wan Eksampel We i Olsem Woning

3. ?Olsem wanem plante man tede oli sem mak long ol man long taem blong Noa?

³ Long plante rod, ol man tede oli sem mak long ol man mo woman long taem blong Noa. Long taem ya, wol i fulap long raf fasin mo tingting blong ol man “i fulap nomo long ol rabis fasin.” (Jenesis 6:5) Plante long olgeta oli stap bisi tumas long ol wok blong evri dei laef blong olgeta. Be, bifo we Jeova i mekem Bigfala Wota i ron, hem i givim jans long ol man blong oli tanem tingting blong olgeta. Jeova i givim oda long Noa blong prij, nao Noa i obei long oda ya. Hem i wok olsem “wan prija blong talemaot stret fasin,” mo ating hem i prij olsem blong 40 no 50 yia, no i bitim. (2 Pita 2:5) Be ol man oli sakemaot woning we Noa i stap talem long olgeta. Oli no stap lukaot gud. Ale from samting ya, Noa mo famle blong hem, olgeta nomo  oli sef, taem Jeova i mekem jajmen blong hem i kamtru.—Matiu 24:37-39.

4. ?Olsem wanem minista wok blong Noa i karem frut, mo olsem wanem yumi save talem se samting ya i sem mak long wok blong prij we yumi stap mekem?

⁴ ?Wok blong prij we Noa i mekem i karem frut? Yumi no makem ol frut from namba blong man we i sef. Nating se smol man nomo i lesin long Noa taem hem i prij, be wok ya i mekem wan bigfala samting. ?From wanem? From we wok ya i givim bigfala jans long ol man blong jusum sipos oli wantem wosip long Jeova no nogat. ?Olsem wanem long ples blong yu? Nomata we smol man nomo i lesin taem yu prij, be yu stap mekem wan bigfala samting. ?From wanem? From we taem yu prij, yu stap givim woning blong God long ol man, mo long rod ya, yu stap obei long oda we Jisas i givim long ol man blong hem.—Matiu 24:14; 28:19, 20.

Oli Sakemaot Ol Profet Blong God

5. (a) ?Wanem ol fasin we oli kam antap bigwan long Juda long taem blong Habakuk, mo ol man oli mekem wanem taem oli harem profet tok we Habakuk i talemaot? (b) ?Olsem wanem ol man Juda oli soem fasin agens long ol profet blong Jeova?

⁵ Plante handred yia afta we Bigfala Wota i ron, plante nogud samting oli kamaot long kingdom blong Juda. Oli wosipim aedol, oli mekem ol fasin we i no stret, oli strong tumas long narafala, mo oli kilim man i ded. Jeova i jusumaot Habakuk blong givim woning long olgeta se, sipos oli no tanem tingting blong olgeta, bambae ol man Babilon oli spolem olgeta. (Habakuk 1:5-7) Be ol man Juda oli no wantem lesin. Maet oli stap tingting se, ‘?From wanem yumi harem sem woning ya bakegen? !Bitim wan handred yia bifo, profet Aesea i talemaot sem woning ya long yumi, be kam kasem tede, i no gat wan samting i hapen!’ (Aesea 39:6, 7) Plante lida blong Juda, oli no jes sakemaot woning ya, be oli agensem man ya tu we i givim woning long olgeta. Wan taem, oli traem blong kilim profet Jeremaea i ded, be laki nomo we Ahikam i givhan long hem. Wan narafala mesej i mekem se King Jehoeakim i kros tumas, nao hem i kilim profet Uria i ded.—Jeremaea 26:21-24.

6. ?Olsem wanem Jeova i mekem Habakuk i strong?

⁶ Tabu spirit i bin pusum Jeremaea blong talemaot bigfala trabol we i spolem Juda blong 70 yia. Mesej we hem i talemaot i strong mo ol man oli no wantem harem. Samting ya i sem mak long saed blong Habakuk. Hem i talemaot wan mesej we i strong mo ol man oli no wantem harem. (Jeremaea 25:8-11) Taswe, yumi kasem save from wanem Habakuk i harem nogud tumas, nao i krae se: “Hae God. Naoia, long ples blong mifala, ol man oli stap faet, oli stap kilkilim olgeta oli ded. Oltaem, mi stap krae i kam long yu blong yu givhan long mifala. ?Be wetaem bambae yu harem mi, yu tekemaot mifala long ol trabol ya?” (Habakuk 1:2) Jeova i kaen tumas. Hem i ansa long Habakuk wetem ol tok ya we i mekem bilif blong Habakuk i strong se: “Taem blong ol samting ya i no kam yet, be bambae oli mas kamtru i no longtaem. Olgeta samting ya we mi mi soemaot long yu long vison ya bambae oli mas olsem. Maet yu luk se i tektaem tumas blong kam, be bambae i mas kamtru long stret taem blong hem, mo yu yu mas wet long hem.” (Habakuk 2:3) Olsem nao, Jeova i gat wan “stret taem” blong finisim ol fasin we oli no stret mo fasin blong mekem i strong tumas long narafala. Sipos i luk olsem se i tektaem lelebet,  samting ya i no mas mekem tingting blong Habakuk i foldaon, mo hem i no mas lego. Be hem i mas gat tingting ya se evri dei, i impoten tumas blong “wet.” !Bambae dei blong Jeova i mas kamtru long stret taem blong hem!

7. ?From wanem profet tok i talem se Jerusalem long faswan handred yia K.T. i mas lus bakegen?

⁷ Samwe long 20 yia afta we Jeova i toktok long Habakuk, ol man oli spolemgud Jerusalem we i bigfala taon blong Juda. Biaen, ol man Jiu oli bildim taon ya bakegen, mo oli stretem plante long ol rong fasin we oli bin mekem Habakuk i harem nogud. Be long faswan handred yia K.T., God i soemaot se taon ya i mas kasem bigfala trabol bakegen from we ol man blong hem oli no stap tru long God. Jeova i gat bigfala sore, ale hem i mekem rod blong ol man we hat blong olgeta i stret oli save stap laef. Long taem ya, hem i yusum Jisas Kraes, we i hae moa long olgeta narafala profet, blong talemaot mesej ya. Long yia 33 K.T., Jisas i talem long ol man blong hem se: “Taem we yufala i luk ol soldia oli stap kam plante raonabaot long taon ya Jerusalem, blong oli blokem ol man oli stap insaed, yufala i mas save we bambae i no longtaem oli save spolemgud ples ya. Taem yufala i luk samting ya, yufala we i stap long Judia, yufala i mas ronwe blong go haed long ol hil.”—Luk 21:20, 21.

8. (a) ?Afta long ded blong Jisas, wanem i save hapen long sam Kristin taem ol yia oli stap pas? (b) ?Olsem wanem profet tok blong Jisas long saed blong Jerusalem i kamtru?

⁸ Taem ol yia oli stap pas, maet sam Kristin long Jerusalem oli stap tingting se wetaem bambae profet tok blong Jisas i kamtru. Mo tu, tingbaot ol samting we sam long olgeta i mas lego blong obei long woning blong Jisas. Maet oli mas stopem sam bisnes we i win gud, from we oli gat strong tingting blong lukaot gud oltaem. ?Olsem wanem taem ol yia oli stap pas? ?Oli les, nao oli no moa lukaot gud? ?Oli talem se oli stap westem taem blong olgeta, mo se tok blong Jisas i blong ol man long fiuja, be i no stret long taem blong olgeta? Long yia 66 K.T., profet tok blong Jisas i stat blong kamtru, taem ol ami blong Rom oli kam raonem Jerusalem. Olgeta we oli stap lukaot gud, oli luksave saen nao oli ronwe long taon ya. From samting ya, oli sef taem ol ami oli spolemgud Jerusalem.

Pijatok We i Soem From Wanem Yumi Mas Lukaot Gud

9, 10. (a) ?Wanem bigfala poen long parabol we Jisas i talem long saed blong ol slef we oli stap wet long masta blong olgeta, we i jes mared, blong i kamhom? (b) ?From wanem maet i hadwok long ol slef ya blong wet long masta blong olgeta? (c) ?From wanem i impoten we ol slef ya oli gat longfala tingting?

⁹ Jisas i makem from wanem ol man blong hem oli mas lukaot gud. Hem i talem se ol disaepol blong hem oli olsem ol slef we oli stap wet long masta blong olgeta, we i jes mared, blong i kamhom. Ol slef ya, oli save se bambae masta blong olgeta i kamhom long wan naet—?be long wanem aoa? ?Long taem we ples i jes tudak? ?Long medel naet? ?Long taem we faol i singaot? Oli no save. Jisas i talem se: “Sipos [masta] i kamtru long medel naet, no long taem we faol i singaot, be ol man ya oli stap [wekap gud], bambae oli save harem gud.” (Luk 12:35-38) Tingbaot fasin blong ol slef ya taem oli stap wet long masta blong olgeta. Oli wantem tumas blong luk hem. Evri smosmol noes we oli harem, mo evri samting we oli luk long tudak, i mekem oli gat tingting ya se: ‘?Ating hemia nao masta blong yumi?’

¹⁰ ?Olsem wanem sipos masta i kamhom long medel naet? ?Bambae olgeta slef ya evriwan, wetem olgeta ya tu we oli bin wokhad stat long eli moning, oli rere blong welkamem hem, no bambae i gat samfala oli slip? ?Olsem wanem sipos masta i kamhom long taem we faol i singaot? ?Bambae tingting blong sam long ol slef ya i foldaon? ?Bambae oli kam kros from we masta blong olgeta i tektaem tumas blong kam? * Olgeta we masta i faenem se oli stap wekap, taem hem i kamhom, olgeta nomo oli save harem gud. Ol Proveb 13:12 i rili stret long olgeta, se: “Taem man i putum tingting blong hem i stap strong long wan samting, be samting ya i no kamtru, tingting blong hem i save foldaon, be taem samting ya i kamtru, hem i glad we i glad.”

11. ?Olsem wanem prea i save givhan long yumi blong lukaot gud?

 ¹¹ Sipos masta i tektaem lelebet, ?wanem i save halpem ol man blong Jisas blong lukaot gud? Taem Jisas i stap long garen blong Getsemane, smoltaem bifo we oli holem hem, hem i talem long trifala aposol blong hem se: “Yufala i mas lukaot gud, yufala i mas prea, blong bambae i no gat wan samting i save traem yufala blong mekem yufala i foldaon.” (Matiu 26:41) Sam yia biaen, Pita, we hem tu i bin stap wetem Jisas long taem ya, i givim sem advaes long ol Kristin brata sista blong hem. Hem i raetem se: “Yumi kam klosap finis long taem ya we ol samting blong wol ya bambae i lus. From samting ya, yufala i mas wekap we tingting blong yufala i klia gud, mo yufala i mas blokem ol samting we yufala nomo i wantem, nao yufala i save prea.” (1 Pita 4:7) Yes, oltaem long Kristin laef blong yumi, yumi mas mekem dip prea we i kamaot long hat blong yumi. Oltaem yumi mas askem long Jeova blong i halpem yumi blong lukaot gud—Rom 12:12; 1 Tesalonaeka 5:17.

12. ?Olsem wanem samting we man i ting nomo se bambae i kamtru i defren long fasin blong lukaot gud?

¹² Makemgud tok ya blong Pita se: “Yumi kam klosap finis long taem ya we ol samting blong wol ya bambae i lus.” ?Yumi klosap olsem wanem? Long wol ya, i no gat wan man i save talem wan stret dei mo aoa blong samting ya. (Matiu 24:36) Samfala man, oli makem wan stret taem we oli ting se bambae dei ya i kamtru long hem. Be Baebol i no sapotem tingting ya. Tingting we Baebol i sapotem, hemia se yumi mas wet blong en i kam. (Skelem wetem 2 Timoti 4:3, 4; Taetas 3:9.) ?Wanem wan rod we i save halpem yumi blong wet blong en i kam? Hemia taem yumi luksave ol pruf we oli soem se en i klosap. From samting ya, i gud yumi luk sikis pruf we i mekem yumi bilif se yumi stap long ol lasdei blong rabis wol ya.

Ol Sikis Pruf

13. ?Olsem wanem profet tok blong Pol long 2 Timoti japta 3 i mekem yu bilif se yumi stap laef long “lasdei”?

¹³ Faswan pruf se, ol profet tok blong aposol Pol long saed blong “lasdei” oli stap kamtru stret long taem blong yumi. Pol i raetem se: “Long taem [“blong ol lasdei,” NW], laef long wol ya bambae i kam strong tumas. Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkiu, mo oli no save tingbaot God. Bambae oli no man blong gat sore long man mo oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud, oli agens long hem. Bambae oli man blong spolem ol fren blong olgeta, mo oli man we oli no kea, mo oli praod tumas. Bambae oli man we oli wantem tumas ol samting we oli stap harem gud long hem, i winim we oli stap lavem God. Long fes blong ol man, bambae olgeta oli stap folem fasin blong Kristin man, be oli no wantem paoa blong God nating long laef blong olgeta. Bambae yu no go klosap nating long ol man olsem. Mo ol man nogud wetem ol man blong giaman, bambae oli save gohed blong mekem i mowas olgeta. Bambae oli save giaman moa long ol man, mo olgeta tu oli save bilif long ol giaman toktok blong olgeta bakegen.” (2 Timoti 3:1-5, 13) Ol profet tok ya oli stap kamtru long taem blong yumi. !Ol man we oli no luksave ol saen ya, olgeta nomo oli save talem se profet tok ya i no kamtru yet! *

14. ?Olsem wanem ol tok blong Revelesen 12:9 long saed blong Setan i stap kamtru tede, mo i no longtaem, bambae wanem i hapen long Setan?

¹⁴ Namba tu pruf se, yumi luk ol bigfala trabol we Setan mo ol rabis enjel blong hem oli stap mekem from we God i sakemaot olgeta long heven finis oli kamdaon long wol, folem profet tok blong Revelesen 12:9. Vas ya i talem se: “Bigfala algita ya, hem i snek ya blong bifo we nem blong hem ‘Setan’ no ‘Man we i agensem man’, we i stap giaman long olgeta man long wol, i stap lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol ya.” Samting ya i mekem se bigfala trabol i kamaot long wol. Tru ya, ol man oli stap kasem plante trabol, antap moa, long  ol yia stat long 1914. Be profet tok blong Revelesen i gohed, i talem se, taem oli sakem Setan i kamdaon long wol ya, hem i save se “i gat smol taem nomo blong hem i stap yet.” (Revelesen 12:12) Long smol taem ya, Setan i stap faet agensem ol tabu man blong Kraes. (Revelesen 12:17) I tru tumas, yumi stap luk ol bigfala trabol we Setan i stap mekem long taem blong yumi. * Be i no longtaem, bambae Setan i kalabus long bigfala hol ya we i godaon we i godaon olgeta. Nao bambae hem “i no moa giaman long ol man, blong pulum olgeta oli go krangke.”—Revelesen 20:1-3.

15. ?Olsem wanem Revelesen 17:9-11 i givim pruf se yumi stap laef long taem blong en?

¹⁵ Namba tri pruf se, yumi stap laef long taem blong namba eit “king” we hem i laswan king long profet tok blong Revelesen 17:9-11. Long ol vas ya, aposol Jon i tokbaot seven king, we i minim ol seven wol paoa—Ijip, Asiria, Babilon, Midia mo Pesia, Gris, Rom, mo Inglan mo Amerika. Jon i luk wan narafala king we hemia i “namba eit king” mo hem ‘i wan long ol seven king ya nomo.’ Namba eit king ya—laswan king we Jon i luk—hem i pija blong Yunaeted Nesen we i stap long taem blong yumi. Jon i talem se namba eit king ya “bambae i go blong lus olgeta,” mo afta long hem, Jon i no moa tokbaot wan narafala king long wol ya. *

16. ?Olsem wanem mining blong drim blong Nebukadnesa i soem se yumi stap laef long ol lasdei?

¹⁶ Namba fo pruf se, yumi stap laef long taem blong wol paoa we leg blong bigfala pija long drim blong Nebukadnesa i saen blong hem. Profet Daniel i givim mining blong wan bigfala pija blong man we Nebukadnesa i luk long drim. (Daniel 2:36-43) Ol fo defren haf blong pija ya, oli saen blong ol defren wol paoa, we i stat wetem hed (Rul blong Babilon), i go kasem leg mo ol fingga blong leg (ol gavman we oli stap rul tede). Olgeta wol paoa we pija ya i saen blong olgeta, oli kamtru evriwan finis. Naoia, yumi stap laef long taem blong wol paoa we leg blong bigfala pija ya i saen blong hem. Biaen long wol paoa ya, Daniel i no moa tokbaot wan narafala wol paoa bakegen. *

17. ?Olsem wanem wok blong yumi blong prij i givim bigfala pruf se yumi stap long taem blong en?

¹⁷ Namba faef pruf se, naoia wok blong prij i kasem olgeta ples long wol finis, olsem we Jisas i bin talem se i mas hapen bifo we en blong rabis wol ya i kam. Hem i talem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:14, NW) Tede, profet tok ya i stap go blong kasem fulwan mak blong hem. I tru se i gat sam ples we gud nius i no go long hem yet, mo maet long stret taem blong hem, bambae Jeova i mekem se gud nius i kasem olgeta ples ya. (1 Korin 16:9) Nating se i olsem, Baebol i no talem se bambae Jeova i mas wet go kasem we evri man wanwan oli harem gud nius, nogat. Be, bambae ol man oli mas talemaot gud nius ya go kasem mak we Jeova i wantem. Nao biaen, bambae en i kam.—Skelem wetem Matiu 10:23.

18. ?Wanem samting i tru long saed blong samfala tabu man taem “bigfala trabol” i stat, mo yumi mas tingbaot samting ya olsem wanem?

¹⁸ Namba sikis pruf se, namba blong ol trufala tabu disaepol blong Kraes i stap godaon nating se maet sam long olgeta bambae oli stap yet long wol taem bigfala trabol i stat. Bighaf blong smol grup ya oli olfala finis, mo taem ol yia oli stap pas, olgeta we tabu spirit i rili makemaot olgeta, namba blong olgeta i stap godaon. Be taem Jisas i stap tokbaot bigfala trabol, hem i talem se: “Hae God i katem taem blong trabol ya finis. Sipos no, bambae i no gat wan man i save stap laef. Be hem i katem taem ya blong bambae i sevem ol man we hem i jusumaot olgeta finis, se oli man blong hem.” (Matiu 24:21, 22) Taswe, i klia se ol man we  Kraes i “jusumaot olgeta,” bambae sam long olgeta oli stap yet long wol ya taem bigfala trabol i stat. *

?Wanem Bambae i Kamaot Long Fiuja?

19, 20. ?From wanem naoia i impoten tumas blong stap wekap mo lukaot gud moa bitim bifo?

¹⁹ ?Wanem fiuja blong yumi? Ol nambawan taem i stap kam. Pol i givim woning se “Dei ya blong Masta blong yumi bambae i mekem ol man oli sek, olsem wan man blong stil, we i kamtru long naet.” Taem Pol i stap tokbaot olgeta we oli gat waes blong wol ya, hem i talem se: “Taem ol man oli stap talem se, [“!Pis mo seftaem!”, NW], long taem ya nao bambae bigfala trabol i save kasem olgeta, i spolem olgeta.” Taswe, Pol i talem strong long ol man we oli ridim leta blong hem se: “I no stret blong yumi slip olsem ol narafala man. I stret blong yumi wekap, we hed blong yumi i klia gud.” (1 Tesalonaeka 5:2, 3, 6) Tru ya, olgeta we oli stap lukluk long ol ogenaesesen blong man blong putum pis mo seftaem, oli tanem baksaed long samting we i tru. !Ol man olsem, oli slip we oli slip ded olgeta!

²⁰ Bigfala trabol blong spolem rabis wol ya, bambae i mekem ol man oli sek. Taswe, yumi mas wet long dei blong Jeova. God hem wan i talem long Habakuk se: “Bambae i mas kamtru long stret taem blong hem.” Taswe, i impoten tumas long yumi tede blong lukaot gud. Yes, hem i moa impoten bitim bifo.

[Ol futnot]

?Yu Yu Tingbaot?

• ?Wanem ol eksampel long Baebol we oli save halpem yumi blong lukaot gud?

• ?Olsem wanem Jisas i eksplenem se i impoten tumas blong lukaot gud?

• ?Wanem ol sikis pruf we oli soem se yumi stap laef long ol lasdei?

[Kwestin]

[Tok blong pija long pej 9]

A. H. Macmillan i bin gohed long wok blong Jeova blong klosap sikiste yia

[Tok blong pija long pej 10]

Jisas i talem se ol disaepol blong hem oli olsem ol slef we oli stap lukaot gud