Jeova Bambae i No Let

“Maet yu luk se i tektaem tumas blong [vison ya i] kam, be bambae i mas kamtru long stret taem blong hem, mo yu yu mas wet long hem.”—HABAKUK 2:3.

1. ?Wanem strong tingting we ol man blong Jeova oli bin soem mo samting ya i pusum olgeta blong mekem wanem?

 “MI BAMBAE mi klaem long wajhaos blong mi, nao mi stap [“lukaot gud, mi,” NW] wet long Hae God.” Hemia nao wanem we profet blong God, Habakuk, i gat strong tingting blong mekem. (Habakuk 2:1) Ol man blong Jeova long ol yia 1900, olgeta tu oli soem strong tingting olsem Habakuk. Taswe, oli wok strong blong folem wan tok we oli harem long wan bigfala asembli long Septemba 1922. Tok ya i talem se: “Naoia yumi stap long taem we i impoten moa bitim ol narafala taem. !Yufala i luk, King i stap rul finis! Yufala nao i man we hem i yusum blong talemaot hem long olgeta man. Taswe talemaot, talemaot, talemaot, King ya mo kingdom blong hem.”

2. ?Wanem samting we ol tabu Kristin oli save talem, taem oli kasem paoa bakegen blong mekem bigfala wok afta long Faswan Bigfala Faet Blong Wol?

² Afta long Faswan Bigfala Faet blong Wol, Jeova i stanemap bakegen wan smol grup blong ol trufala man blong hem we hem i makemaot olgeta, mo i rerem olgeta blong oli mekem wan bigfala wok. Long taem ya, wanwan long olgeta i save talem sem tok we Habakuk i bin talem, se: “Mi bambae mi klaem long wajhaos blong mi, nao mi stap [“lukaot gud, mi,” NW] wet long Hae God, blong hem i talemaot samting we bambae mi go talem long ol man.” Tufala Hibru wod blong talem “waj” mo “lukaot gud” i kamaot plante taem long ol profet tok.

“Bambae i Mas Kamtru Long Stret Taem Blong Hem”

3. ?From wanem yumi mas lukaot gud?

³ Tede, ol Witnes blong Jeova oli stap talemaot woning blong God long ol man. Long sem taem, oli mas lukaot gud blong obei long lastok blong bigfala profet tok blong Jisas, se: “Yufala i mas lukaot gud, from we yufala i no save taem we masta blong haos bambae i kambak. Maet hem i kambak long sapa, no long medel naet, no long taem we faol i singaot, no long taem we san i girap. Sipos no, bambae hem i kambak kwiktaem long yufala, i faenem we yufala i stap slip. Be tok ya we mi talem long yufala, mi stap talem long olgeta man se, ‘Oltaem, yufala i mas lukaot gud.’” (Mak 13:35-37) !Blong mekem olsem Habakuk, mo blong folem tok blong Jisas, yumi mas lukaot gud!

4. ?Olsem wanem taem blong yumi i sem mak long taem blong Habakuk samwe long yia 628 B.K.T.?

⁴ Maet Habakuk i finisim buk blong hem samwe long yia 628 B.K.T. Long taem ya, Babilon i no kam wan wol paoa yet. Long plante yia, Jeova i mekem se ol man blong hem oli talemaot jajmen we bambae i kam long Jerusalem we i tanem baksaed long trufala wosip. Nating se i olsem, i no gat wan klia pruf we i soem wetaem bambae hem i mekem jajmen ya i kamtru. I no gat man i save se 21 yia nomo i stap bifo we samting ya i hapen, mo se bambae Jeova i yusum Babilon blong mekem jajmen ya i kamtru. Samting ya i sem mak tede. Yumi no save ‘dei mo taem’ we bambae en blong wol ya i kam long hem. Be Jisas i givim woning long yumi se: “Oltaem yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.”—Matiu 24:36, 44.

5. ?Wanem samting i rili leftemap tingting blong yumi long saed blong tok blong God long Habakuk 2:2, 3?

⁵ I gud tumas we Jeova i givim oda ya long Habakuk, we i mekem hem i glad tumas, se: “Ol samting ya we mi mi soemaot long yu long vison, yu mas raetemdaon ol toktok blong hem long ol flat ston. Mo taem yu raetem ol tok blong hem, oli mas klia blong man i save ridim, from we taem blong ol samting ya i no kam yet, be bambae oli mas kamtru i no longtaem. Olgeta samting we mi mi soemaot long yu long vison ya bambae oli mas olsem. Maet yu luk se i tektaem tumas blong kam, be bambae i mas kamtru long stret taem blong hem, mo yu yu mas wet long hem.” (Habakuk 2:2, 3) Tede, rabis fasin mo faet i kam antap bigwan long  olgeta ples long wol. Samting ya i soemaot se yumi stap klosap nomo long “bigfala dei blong Jeova we i mekem man i fraet.” (Joel 2:31, NW) !Yes, ol tok ya we Jeova hem wan i talem, oli leftemap tingting blong yumi bigwan. Hem i se: !“Bambae i mas kamtru long stret taem blong hem”!

6. ?Olsem wanem yumi save laef tru long dei blong jajmen we i stap kam?

⁶ ?Nao yumi mas mekem wanem blong stap laef long dei blong jajmen we i stap kam? Jeova i givim ansa taem hem i soem se ol stret man oli defren olgeta long ol rabis man: “Tok blong mi i olsem. Olgeta we oli stap mekem ol rabis fasin, bambae oli no save laef. Be olgeta ya nomo we fasin blong olgeta i stret, bambae oli save laef, from we tingting blong olgeta i stap strong long mi nomo.” (Habakuk 2:4) Long taem blong yumi, ol gavman mo ol man we oli gat fasin flas mo oli griri, oli mekem se plante milyan man we oli no gat fol, oli lusum laef blong olgeta, antap moa, long tufala bigfala faet blong wol mo ol nogud faet bitwin ol laen blong man. Defren olgeta, ol tabu man blong God we oli laekem pis, oli gohed blong stap tru long God. Olgeta nao, oli “ol man blong nesen ya we i gat stret fasin.” Nesen ya, wetem fren blong hem, hemia “ol narafala sipsip,” oli folem tok ya se: “Hae God i God blong yumi, mo yumi mas trastem hem oltaem nomo, from we hem nao i strong sefples blong yumi we bambae i stap oltaem gogo i no save finis.”—Aesea 26:2-4; Jon 10:16.

7. ?Yumi mas mekem wanem blong folem tok blong Habakuk 2:4 we Pol i talem bakegen?

⁷ Long leta we Pol i raetem i go long ol Hibru Kristin, hem i yusum tok we i stap long Habakuk 2:4, taem hem i talem long ol man blong Jeova se: “Yufala i mas mekem tingting blong yufala i longfala, blong yufala i save mekem ol samting we God i wantem. Nao bambae yufala i save kasem ol samting ya we hem i promes blong givim long yufala. Hemia i olsem we Baebol i talem, we God i talem se, ‘Smoltaem nomo, nao man ya we i stap kam, bambae i kamtru. Ol stret man blong mi we oli stap bilif long mi, bambae oli laef. Be sipos wan long olgeta i tanemraon i gobak, bambae mi no save glad long hem.’” (Hibrus 10:36-38) Naoia i no taem blong kam slak, no blong ronem ol samting long wol blong Setan, we i blong harem gud nomo long saed blong bodi. ?Yumi mas mekem wanem gogo kasem we “smoltaem” ya i finis? Olsem Pol, yumi we i stap long tabu nesen blong Jeova, yumi mas ‘fogetem ol samting we oli stap long bak blong yumi, mo yumi mas traehad oltaem blong kasem ol samting we oli stap long fes blong yumi,’ hemia laef we i no save finis. (Filipae 3:13, 14) Mo olsem Jisas, yumi mas ‘luksave se bambae yumi save harem gud.’—Hibrus 12:2.

8. ?Hu ya “man” we Habakuk 2:5 i tokbaot, mo from wanem hem i no save win?

⁸ Habakuk 2:5 i tokbaot wan “man” we i defren olgeta long ol man blong Jeova. Oltaem, man ya i wantem tumas blong kasem plante samting moa. Hem i olsem “[“beregraon,” NW] we i neva talem se, ‘I naf ya.’” ?Hu ya man ya we ‘oltaem, i stap wantem blong kasem plante samting moa’? Hemia ol politik paoa, we oli stap faet from graon we i no blong olgeta. Sam long olgeta ya, hemia politik paoa blong Fasis, Nasi, Komunis, mo olgeta ya tu we oli demokratik. Oli olsem Babilon we i wantem kasem plante samting long taem blong Habakuk.  “Man” ya, we i minim ol politik paoa, i fulumap Seol, beregraon, wetem laef blong ol stret man tu. Hem i wan “man” blong trikim ol man, we i kamaot long wol blong Setan. Hem i flas tumas, mo hem i no save ‘tekem olgeta nesen mo olgeta man oli joen wanples aninit long paoa blong hem.’ Jeova nomo i save mekem ol man oli joen tugeta, mo bambae hem i yusum Kingdom blong Mesaea blong mekem samting ya.—Matiu 6:9, 10.

Faswan Long Ol Faef Bigfala Panis

9, 10. (a) ?Wanem samting we Jeova i gohed blong talemaot tru long Habakuk? (b) ?Long taem blong yumi tede, olsem wanem long saed blong fasin blong winim mane long rod we i no stret?

⁹ Tru long profet Habakuk, Jeova i talemaot faef bigfala panis. Hemia i olsem ol jajmen we bambae God i mekem blong rerem wol ya blong ol trufala man blong hem oli save stap long hem. Ol man ya we hat blong olgeta i stret, oli ‘talemaot tok panis’ we Jeova i givim long olgeta. Long Habakuk 2:6, yumi ridim se: “Hae God bambae i panisim yufala, from we yufala i stap tekem ol samting we i no blong yufala. Yufala i stap fosem ol man blong pemaot kaon blong olgeta long yufala long bigfala mane, blong mekem yufala i kam rijman. ?Be bambae yufala i lego fasin ya wetaem?”

¹⁰ Vas ya i stap makem fasin blong winim wan samting long rod we i no stret. Long wol ya, ol rijman oli kam rij moa, mo ol puaman oli kam pua moa. Ol man blong salem drag mo olgeta we oli stap giaman blong stilim mane, oli kam rij tumas, be plante narafala man olbaot oli stap ded from hanggri. Long wol ya, wan long evri fo man oli pua tumas. Long plante kantri, laef i had tumas. Olgeta we oli wantem stret fasin long wol ya, oli talem se: !“Gogo kasem wetaem” bambae ol rabis samting ya oli gohed blong kamaot! !Be, en i klosap nomo! Yes, vison ya “bambae i mas kamtru long stret taem blong hem.”

11. ?Habakuk i talem wanem long saed blong fasin blong mekem blad i ron, mo from wanem yumi save talem se wol tede i fulap long fasin ya?

¹¹ Profet Habakuk i talem long ol man nogud se: “Yufala i stap kilim man i ded, mo yufala i stap mekem i nogud tumas long olgeta man long wol, mo long ol taon blong olgeta. Mo yufala i bin tekemaot olgeta samting blong plante man long plante kantri. Be naoia, [“bambae ol narafala kantri,” NW] oli spolem yufala, from fasin nogud ya blong yufala.” (Habakuk 2:8) !Long wol tede, ol man oli mekem fulap blad i ron blong nating! Jisas i talem klia se: “Man we i stap tekem naef blong faet, hem bambae i ded long naef blong faet.” (Matiu 26:52) Be long ol yia 1900 nomo, ol nesen mo ol laen blong man we oli mekem fulap blad i ron, oli bin kilim i ded moa long wan handred milyan man. !Olgeta ya we oli mekem blad i ron, bambae oli mas kasem panis!

Seken Panis

12. ?From wanem Habakuk i raetemdaon seken panis, mo olsem wanem yumi save sua we ol man we oli giaman blong stilim mane, oli no save win?

¹² Seken panis i stap long Habakuk 2:9-11 (NW). Panis ya i blong “man we i stap mekem kruked fasin blong kam rijman, blong mekem gudfala hom blong hem, we i no save kasem trabol.” Ol man we oli stap giaman blong stilim olting blong narafala man, oli no save win. From we Ol Sam i talem klia, se: “Sipos yufala i luk we man i stap kam rijman, we olting blong hem oli stap kam plante we plante, bambae yufala i no harem nogud. Taem hem i ded, bambae hem i no save tekem ol gudgudfala samting ya i go wetem hem. Ol samting ya blong hem bambae oli no save go wetem hem long beregraon.” (Ol Sam 49:16, 17) Ale, makemgud waes advaes ya blong Pol, se: “Yu mas tok strong long olgeta we oli rijman long ol samting blong wol ya, blong oli no letem tingting blong olgeta i go antap tumas. Mo bambae oli no putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo, we hem i stap givim plante samting long yumi, blong yumi harem gud long hem.”—1 Timoti 6:17.

13. ?From wanem yumi mas gohed blong talemaot woning blong God?

¹³ !Tede, i impoten tumas blong talemaot ol mesej blong jajmen blong God! Taem ol Farisi  oli tok agensem ol man we oli stap singaot se, “Hae God, yu blesem King ya we i kam long nem blong yu,” Jisas i tok long olgeta se: “Mi mi talem long yufala. Sipos olgeta ya oli stap kwaet, bambae ol ston ya nomo oli save singaot.” (Luk 19:38-40) I sem mak, sipos ol man blong God tede oli no talemaot ol rabis fasin blong wol ya long klia ples, ‘bambae ol ston nomo oli save singaot.’ (Habakuk 2:11) !Taswe, i gud we yumi no fraet, yumi gohed blong talemaot woning blong God!

Namba Tri Panis Mo Hemia We i Gat Fol From Blad

14. ?Ol skul blong wol oli gat fol from wanem kaen fasin blong mekem blad i ron?

¹⁴ Namba tri panis, we God i talemaot tru long Habakuk, i blong olgeta we oli gat fol from blad. Habakuk 2:12 i talem se: “Hae God bambae i panisim yufala, from we ol fasin nogud blong yufala i kam olsem fandesen blong taon blong yufala. Mo fasin ya blong kilim man i ded, i stap mekem taon blong yufala i kam bigwan moa.” Long laef blong wol ya, oltaem fasin we i no stret i joen wetem fasin blong mekem blad i ron. Makemgud se long ol yia we oli pas, ol skul blong wol nao, oli gat fol from fulap blad we i ron. I gat ol Krused, wan faet bitwin ol man we oli talem se oli Kristin mo ol Muslim; Katolik Inkwisisin * long Spen mo Latin Amerika; Faet blong Toti Yia long Yurop, bitwin ol Protestan mo Katolik; mo tufala bigfala faet blong wol we oli mekem moa blad i ron, tufala i stat long ol kantri blong Krisendom. Hemia sam nomo long ol faet we yumi save talem.

15. (a) ?Wanem samting we ol nesen oli stap gohed blong mekem, we ol jos oli agri mo sapotem olgeta long hem? (b) ?Yunaeted Nesen i save stopem ol faet blong wol ya?

¹⁵ Wan samting we i nogud olgeta long Seken Bigfala Faet blong Wol, hemia Holokos. * Long taem ya, plante milyan man Jiu wetem plante narafala man we oli no joen long faet, oli lusum laef blong olgeta long Yurop. I no longtaem i pas, ol pris blong Katolik Jos long Franis oli talemaot se Katolik Jos i no bin agensem fasin ya blong sanem plante handred taosen man oli go blong ded long ol rabis kalabus blong ol Nasi. Nating se i olsem, jos i gohed blong agri mo sapotem ol kantri we oli rere blong mekem blad i ron. Magasin ya, Time (international edition) i tokbaot Otodoks Jos long Rasia, i se: “Jos ya we i laef bakegen, hem tu i gat bigfala paoa long wan samting we bifo, oli no agri long hem: hemia ol tul blong faet blong Rasia. . . . Klosap evri dei, oli blesem ol man we oli stap faet long plen mo ples blong ol ami. Long Novemba, long Bigfala Haos blong ol pris long Danilovsky, long Moscow, we i stamba blong jos ya long Rasia, jos i dediketem bigfala dok blong ol niuklia tul blong faet long Rasia.” ?Olsem wanem long Yunaeted Nesen? ?Hem i save blokem fasin ya blong mekem ol rabis tul blong faet long wol ya? !Nogat! Long niuspepa ya The Guardian blong London, Inglan, wan man we i winim Nobel Praes blong Pis, i talem se: “Wanem we i rili mekem yumi wari, hemia se faef strongfala memba blong UN Sekiuriti Kaonsel, oli ol faef stamba nesen we oli stap givimaot ol tul blong faet.”

16. ?Bambae Jeova i mekem wanem long ol nesen we oli laekem faet?

¹⁶ ?Olsem wanem long ol nesen we oli laekem mekem faet??Bambae Jeova i spolem olgeta tu? !Yes! Habakuk 2:13 (NW), i talem se: “!Yufala i luk! Bambae Jeova blong ol ami i mekem se ol man oli wok, be ol wok ya blong olgeta, faea bambae i kakae olgeta evriwan. Mo bambae ol nesen oli hafded long ol wok we oli blong nating nomo. !“Jeova blong ol ami”! !Yes, long heven, Jeova i gat bigfala ami blong ol enjel! Bambae hem i yusum bigfala ami ya blong spolem ol man mo ol nesen we oli stap mekem faet!

17. ?Afta we ol nesen we oli stap mekem faet oli kasem jajmen, bambae save blong Jeova i fulumap wol i go kasem wanem mak?

¹⁷ ?Wanem bambae i hapen afta we Jeova i mekem jajmen blong hem i kamtru long olgeta nesen ya we  oli stap faet oltaem? Habakuk 2: 14 (NW) i givim ansa se: “Olgeta man long wol bambae oli kasem save long bigfala paoa blong Jeova olsem we wota i kavremap solwota.” !Hemia wan nambawan fiuja! Long Amageden, bambae Jeova i leftemap hae rul blong hem foreva. (Revelesen 16:16) Hem i mekem yumi sua se bambae hem i ‘flasem ples we i olsem mat blong putum leg blong hem,’ hemia wol ya we yumi stap long hem. (Aesea 60:13) Bambae olgeta man oli lanem rod blong laef we God i wantem. Nao, save ya long saed blong ol nambawan stamba tingting blong Jeova, bambae i fulumap wol ya olsem we solwota i kavremap olgeta ples blong hem.

Namba Fo Mo Namba Faef Panis

18. ?Wanem namba fo panis we God i talem tru long Habakuk, mo olsem wanem ol fasin nogud ya oli stap kamaot long wol tede?

¹⁸ Namba fo panis i stap long Habakuk 2:15. Yumi ridim se: “Hae God bambae i panisim yufala, from we taem yufala i kros, yufala i stap mekem i nogud tumas long ol man we oli stap raonabaot long yufala. Yufala i daonem tingting blong olgeta, yufala i mekem olgeta oli sem tumas long fes blong ol narafala man. Yufala i mekem olgeta oli wokbaot olsem man we i drong.” Vas ya i stret long ol man tede. Oli stap gohed nomo blong mekem rabis fasin we i no gat wan samting i save blokem olgeta. Fasin nogud blong seks, we sam grup blong skul oli agri long hem, i kam moa nogud bitim bifo. Ol sik olsem AIDS mo ol narafala sik we oli save pas i go long narafala from fasin nogud blong seks, oli kam antap bigwan long olgeta ples long wol. Ol man naoia, oli no tingbaot “bigfala paoa blong Jeova.” Be oli tingbaot olgeta wan fastaem, nao fasin blong olgeta i kam moa nogud mo oli stap go blong kasem jajmen blong God. ‘Hae God bambae i no leftemap olgeta, be bambae i panisim olgeta. Klosap nao bambae rabis wol ya i dring long kap blong kros blong Jeova, we i pija blong samting we bambae Jeova i mekem long wol ya. ‘Bambae oli sem tumas long fes blong ol man.’—Habakuk 2:16.

19. ?Fastok blong namba faef panis we Habakuk i talemaot, i joen wetem wanem mo from wanem ol tok ya oli impoten tumas long wol blong tede?

¹⁹ Faswan tok blong namba faef panis i wan strong  woning agensem fasin blong wosip long aedol we man i katem long wud no ston. Jeova i pusum profet blong hem blong talemaot ol strongfala tok ya se: “Hae God bambae i panisim yufala, from we yufala i stap singaot long pis wud ya se, ‘!Yu wekap!’ no yufala i stap singaot long ston ya se, ‘!Yu girap!’ ?Weswe? ?Aedol ya i save singaot sam samting long yufala? !Nogat! Maet yufala i blokem hem long silva no long gol blong flasem, be hem i no gat laef nating long hem.” (Habakuk 2:19) Kam kasem naoia, ol skul blong Krisendom mo olgeta we oli no bilif long God, oli stap wosip long kros, Vejin Meri, ol aedol, mo ol narafala pija blong man mo anamol. Taem Jeova i mekem jajmen blong hem i kamtru, bambae ol god ya oli no save sevem ol man we oli stap mekem wosip long olgeta. Gol mo silva we oli blokem ol aedol ya long hem bambae i nating nomo. Hemia i defren olgeta long Jeova, God ya blong olwe. Hem i gud tumas mo ol laef samting we hem i wokem oli naes tumas. !I gud yumi givim ona long nem blong Jeova we i tabu we i tabu tumas, oltaem gogo i no save finis!

20. ?Wanem plan blong tempel we yumi gat jans blong wok long hem wetem glad?

²⁰ Yes, i stret nomo we olgeta man oli presem God blong yumi, Jeova. Yumi mas gat bigfala ona long hem, mo obei long strongfala woning we hem i givim agensem fasin blong wosip long aedol. !Be, yufala i lesin! Jeova i stap toktok yet: “Jeova i stap long tempel blong hem. Olgeta man long wol, yufala i mas stap kwaet long fes blong hem.” (Habakuk 2:20, NW) I klia se profet ya i stap tingbaot tempel long Jerusalem. Be tede, yumi gat jans blong wosip long wan tempel we i bigwan moa. Jisas Kraes nao, God i putumap hem olsem Hae Pris blong tempel ya, mo bigfala tempel ya i olsem plan blong wosip long saed blong spirit. Long wol ya, we i olsem bigfala yad blong tempel ya, yumi stap kam wanples, yumi stap mekem wok blong God, yumi prea, mo yumi givim ona long Jeova, we i stret long nambawan nem blong hem. !Yumi glad tumas taem yumi wosip long Papa blong yumi long heven wetem fulhat blong yumi!

[Ol futnot]

?Yu Yu Tingbaot?

• ?Wanem tingting blong yu long saed blong tok ya blong Jeova se: “Bambae i mas kamtru long stret taem blong hem”?

• ?Ol panis we Habakuk i talemaot oli pija blong wanem tede?

• ?From wanem yumi mas gohed blong talemaot woning blong Jeova?

• ?Wanem tempel we yumi gat jans blong wok long bigfala yad blong hem?

[Kwestin]

[Tok blong pija long pej 15]

Olsem Habakuk, ol man blong God tede oli save se bambae Jeova i no save tektaem tumas

[Tok blong pija long pej 18]

?Yu yu gat tangkiu from jans ya blong wosip long yad blong tempel blong Jeova long saed blong spirit?

[Credit Line blong pija long pej 16]

U.S. Army photo