Laef Stori

Jeova i Sefples Mo Paoa Blong Mi

MARCEL FILTEAU I TALEM STORI YA

“Sipos yu mared wetem hem, bambae yu go long kalabus.” Hemia tok we ol man oli talem long woman we mi mekem plan blong mared wetem hem. Bambae mi eksplenem from wanem oli talem samting ya.

TAEM mi bon long 1927, Quebec we i wan provins blong Kanada, hem i ples blong ol man Katolik. Samwe long fo yia biaen, Cécile Dufour, wan fultaem Kristin minista blong ol Witnes blong Jeova, i stat blong kam visitim mifala long haos blong mifala long taon blong Montreal. From samting ya, ol man we oli stap laef klosap long mifala oli tok nogud long hem. Tru ya, from we hem i stap talemaot mesej blong Baebol, plante taem polis i holem hem mo i mekem trabol long hem. Taswe, kwiktaem nomo mifala i luk se ol tok blong Jisas oli tru tumas, se: “Bambae olgeta man oli no laekem yufala nating, oli agensem long yufala, from we yufala i holem nem blong mi.”—Matiu 24:9.

Long taem ya, fulap man oli ting se i no stret blong wan famle blong Franis, we i laef long Kanada, i lego Katolik skul blong hem. Nating se papa mama blong mi, tufala i neva tekem baptaes blong kam Witnes, tufala i kasem save kwiktaem se ol tijing blong Katolik Jos oli no laenap wetem Baebol. Ale, tufala i leftemap tingting blong ol eit pikinini blong tufala blong ridim ol buk we ol Witnes oli prentem, mo tufala i sapotem mifala we i wantem stanap strong long saed blong trutok blong Baebol.

Stanap Strong Tru Long Hadtaem

Long 1942, taem mi stap yet long skul, mi stat blong intres bigwan long Baebol stadi. Nao, gavman blong Kanada i putum tabu long wok blong ol Witnes blong Jeova from we ol Witnes oli folem eksampel blong ol faswan Kristin mo oli no joen long faet. (Aesea 2:4; Matiu 26:52) Oli putum bigfala brata blong mi, Roland, i go long kalabus blong mekem ol strongfala wok, from we  hem i no wantem joen long taem blong bigfala faet blong wol.

Long sem taem ya, Papa i givim wan buk long mi, we i stap long Franis lanwis. Buk ya i eksplenem ol trabol we ol Witnes long Jemani oli kasem from we oli no wantem joen long ol ami blong Adolph Hitler. * Buk ya i givim paoa long mi blong folem ol gudfala eksampel long saed blong fasin blong stanap strong long bilif, mo mi stat blong go long ol miting we ol Witnes blong Jeova oli stap holem long haos blong wan brata. Smoltaem biaen, ol brata oli askem mi blong joen long wok blong prij. Mi akseptem, nating se polis i save holem mi mo putum mi long kalabus.

Afta we mi prea blong kasem paoa, mi kilkilim faswan doa. Wan woman i openem doa mo i kaengud long mi. Afta we mi talemaot long hem wanem we mi stap mekem, mi ridim 2 Timoti 3:16 we i se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud.”

Mi askem long hem se: “?Yu yu glad blong lanem moa samting long saed blong Baebol?”

Woman ya i ansa se: “Yes.”

Mi talem long hem se bambae mi kambak wetem wan fren we i save moa samting long saed blong Baebol i bitim mi. Ale, long wik we i kam biaen mi gobak long woman ya. Afta long faswan storeyan ya, mi harem we mi no moa fraet tumas, mo mi lanem se yumi no save gohed long wok blong prij long prapa paoa blong yumi nomo. Olsem aposol Pol i talem, yumi mekem wok ya wetem help blong Jeova. Yes, i rili impoten we yumi luksave se “paoa ya we i bigwan tumas i blong God, i no blong mifala.”—2 Korin 4:7.

Biaen, wok blong prij mo kalabus, tufala samting ya i kam wan haf blong laef blong mi. !Hemia nao from wanem ol man oli talem long woman we mi wantem mared wetem, se: “Sipos yu mared wetem hem, bambae yu go long kalabus”! Be, ol trabol ya oli no rili had. Plante taem, afta we mifala i stap wan naet long kalabus, wan Witnes i pem rod blong polis i letem mifala i gofri.

Ol Impoten Disisen

Long Epril 1943, mi givim laef blong mi i go long Jeova mo mi tekem baptaes. Biaen, long Ogis 1944, mi go long faswan asembli blong mi, long Buffalo, New York, Yunaeted Stet, klosap long Kanada. I gat 25,000 man oli kam long asembli ya, mo ol tok oli leftemap tingting blong mi blong kam wan paenia, hemia nem blong ol Witnes blong Jeova we oli prij fultaem. Tabu we gavman i putum long wok blong prij blong ol Witnes blong Jeova, i finis long Mei 1945, mo long manis we i kam biaen mi statem wok blong paenia.

Moa mi mekem wok blong prij, moa mi go long kalabus. Wan dei oli putum mi long kalabus wetem Mike Miller, wan brata we i stanap strong long bilif blong hem mo we i mekem wok blong Jeova longtaem finis. Mitufala i sidaon long floa  mo mitufala i storeyan. Ol dip storeyan ya long saed blong spirit oli givim bigfala paoa long mi. Be biaen, wan kwestin i kam long tingting blong mi, ‘?Olsem wanem sipos sam rong tingting oli bin kamaot bitwin long mitufala, nao mitufala i no moa toktok gud tugeta?’ Long taem we mi stap wetem gudfala brata ya long kalabus, mi kasem wan nambawan lesen long laef blong mi, se, yumi nidim ol brata blong yumi. Mo from samting ya, yumi mas gat fasin fogif mo yumi mas kaengud long yumi. Sipos no, olsem aposol Pol i raetem: “Sipos yufala i stap raorao long yufala, hemia, yufala i olsem anamol nomo we oli stap kakae olgeta. Nao bambae laef blong yufala i kam nogud olgeta.”—Galesia 5:15.

Long Septemba 1945, mi kasem wan pepa we i singaot mi blong go wok long branj ofis blong Watch Tower Society long Toronto, Kanada, we mifala i kolem Betel. Program long saed blong spirit i rili leftemap tingting mo i mekem bilif i kam strong moa. Long yia we i kam biaen, oli askem mi blong go wok long plantesin blong Betel, samwe long 40 kilometa long not blong branj ofis. Taem mi stap wok long garen blong pikimap ol stroberi wetem Anne Wolynec, mi luk we sista ya i gat wan naesfala fes, be tu, hem i lavem Jeova mo i gat strong tingting blong mekem wok blong God. Mitufala i stat fren, mo mitufala i mared long Janewari 1947.

Long tu mo haf yia we oli kam biaen, mitufala i mekem wok blong paenia long London, long Ontario, mo afta long Aelan blong Cape Breton. Long ples ya mifala i givhan blong stanemap wan niufala kongregesen. Biaen, long 1949, mitufala i kasem wan leta we i singaot mitufala blong joen long klas namba 14 blong Wajtaoa Baebol Skul blong Gilead. Long skul ya mitufala i kasem trening blong kam misinari.

Misinari Wok Long Quebec

Ol misinari we oli pas fastaem long mifala long ol narafala klas blong Skul blong Gilead, oli bin statem wok blong prij long Quebec. Long 1950, mitufala wetem 25 narafala memba blong klas namba 14, i joenem ol misinari ya we oli stap finis long Quebec. From we wok blong ol misinari i gohed gud, samting ya i pulum ol lida blong Katolik Jos blong mekem trabol long mifala mo blong lidim ol grup blong man oli kam agensem mifala.

Tu dei afta we mitufala i kasem faswan teritori blong mitufala long taon blong Rouyn, polis i holem Anne mo i putum hem long trak blong olgeta. Hemia faswan taem we samting ya i hapen long hem. Bifo, Anne i laef long wan smol vilej blong Manitoba, mo hem i luk polis wanwan taem nomo. Taswe long taem ya hem i fraet mo hem i rimemba ol tok ya se: “Sipos yu mared wetem hem, bambae yu go long kalabus.” Be, bifo we oli karem hem i go, polis i faenem mi mo oli putum mi insaed long trak wetem Anne. Taem Anne i luk mi, hem i singaot se, “!Man, mi glad blong luk yu!” Long taem ya mi sapraes tumas blong luk se tingting blong hem i kwaet gud, hem i talem se: “Sem samting ya i bin hapen long ol aposol tu, from we oli stap talemaot gud nius long saed blong Jisas.” (Ol Wok 4:1-3; 5:17, 18) Samtaem biaen, long sem dei ya, oli letem mitufala i go fri bakegen.

Klosap wan yia afta long smol trabol ya, taem mitufala i prij long ol haos wanwan long niufala ples we mitufala i mas wok long hem, long Montreal, mi harem wan bigfala noes daon long rod mo mi luk wan hip blong man we oli kros tumas, oli stap sakem ol ston. Taem mi godaon blong halpem Anne mo sista we i stap prij wetem hem, polis i kam. Polis i no holem ol memba blong hip blong ol man ya be, !oli holem Anne mo narafala sista ya! Taem Anne i stap long kalabus, hem i tingbaot se oli stap kasem samting olsem we Jisas i talem se: “Bambae olgeta man oli no laekem yufala nating, oli agens long yufala, from we yufala i holem nem blong mi.”—Matiu 10:22.

Wan taem, i bin gat 1700 kot kes agensem ol Witnes blong Jeova long Quebec. Oltaem oli jajem mifala se mifala i stap seremaot ol buk we i agensem gavman, no oli talem se mifala i no gat pepa we i givim raet long mifala blong seremaot ol buk. From samting ya, Ligal Dipatmen blong Watch Tower Society i tekem aksin agensem gavman blong Quebec. Afta long plante yia, Jeova i halpem mifala blong winim tu bigfala rao long fored blong Saprim Kot blong Kanada. Long Disemba 1950, kot i karemaot tok ya se ol buk blong mifala oli agensem gavman, mo long Oktoba 1953 kot i givim raet long mifala blong seremaot ol buk nomata se mifala i no gat pepa blong mekem wok ya. Olsem nao mifala i luk klia olsem wanem Jeova i rili wan “sefples blong yumi, hem i paoa blong yumi. Oltaem hem i rere blong givhan long yumi long taem blong trabol.”—Ol Sam 46:1.

 Wan sapraes se, taem mi statem wok blong paenia long 1945, i gat 356 Witnes nomo long Quebec. Tede, namba ya i go antap bigwan, !i bitim 24,000! Samting ya i hapen stret olsem profet tok blong Baebol i talem: “Eni tul blong faet we bambae ol man oli stanemap agensem yu bambae oli no save win, mo ol tok we ol man bambae oli talemaot agensem yu long jajmen bambae yu winim olgeta.”—Aesea 54:17, NW.

Wok Blong Mitufala Long Franis

Long Septemba 1959, mi mo Anne i kasem wan pepa we i singaot mitufala blong go wok long Betel blong Paris, long Franis. Mi lukaot long wok blong prentem ol buk. Bifo we mitufala i kam kasem Franis long Janewari 1960, wan kampani blong wol i stap prentem ol buk blong ol brata. From we gavman blong Franis i putum tabu long Wajtaoa, evri manis mifala i prentem magasin ya olsem wan buklet we i gat 64 pej long hem. Oli kolem buklet ya The Interior Bulletin of Jehovah’s Witnesses, mo insaed long buklet ya i gat ol haf we ol kongregesen oli mas stadi long hem evri manis. Long 1960 go kasem 1967, namba blong ol pablisa we oli mekem wok blong prij long Franis i kam antap, stat long 15,439 i go kasem 26,250.

Taem i pas, nao bighaf blong ol misinari long Franis oli go long ol narafala ples. Samfala oli go long ol kantri blong Afrika we oli toktok Franis mo ol narafala oli gobak long Quebec. Anne i sik lelebet mo hem i nidim blong go long hospital blong oli katem hem, taswe mitufala i gobak long Quebec. Afta tri yia we dokta i givim meresin long Anne, helt blong Anne i kam gud bakegen. Biaen, oli askem mi blong visitim wan defren kongregesen evri wik, blong givim help long saed blong spirit.

Wok Blong Misinari Long Afrika

Sam yia biaen, long 1981, mitufala i glad blong kasem wan niufala ples blong wok olsem misinari, hemia long Zaire we tede, oli kolem Demokratik Ripablik blong Kongo. Ol manples oli pua mo oli safa aninit long strongfala rul blong gavman. Taem mitufala i kam, i gat 25,753 Witnes nomo, be tede i gat bitim 113,000. !Mo long 1999, 574,736 man oli kam long Memoriol blong tingbaot ded blong Jisas Kraes!

Long 1984, gavman i letem mifala i pemaot wan graon blong 200 hektea blong bildim wan niufala branj ofis. Biaen, long Desemba 1985, mifala i holem wan intenasnal asembli long taon blong Kinshasa, mo 32,000 man oli kam long plante ples long wol. Afta long samting ya, ol lida blong skul oli mekem plan blong blokem wok blong mifala long Zaire. Long Maj 12, 1986, ol brata we oli lidim wok long kantri ya oli kasem wan leta we i talemaot se loa i no agri long wok blong ol Witnes blong Jeova long Zaire. Presiden blong kantri, Mobutu Sese Seko, we naoia i ded finis, hem i bin saenem pepa ya we i putum tabu long ol wok blong mifala.

From we samting ya i hapen wantem nomo, mifala i mekem advaes ya blong Baebol i wok: “Man we hem i waes, taem hem i luk trabol, hem i haed.” (Ol Proveb 22:3, NW) Mifala i faenem defren rod tru long ol narafala kantri, blong kasem pepa, ing, mo ol narafala samting we mifala i nidim blong prentem ol buk blong mifala long Kinshasa. Mo tu, mifala i mekem prapa program blong mifala blong sanemaot ol buk ya we mifala i prentem. !Taem mifala i folem gud olgeta plan ya blong mifala, rod blong mifala blong sanem buk i wok gud moa i bitim postofis blong gavman!

Plante taosen Witnes oli go kalabus, mo plante long olgeta oli kasem bigfala kil long bodi blong olgeta. Be, nating se samfala oli lego God, bighaf blong ol Witnes oli stanap strong tru long ol trabol ya mo oli holem strong long bilif blong olgeta. Mi tu mi go kalabus mo mi luk ol nogud samting we ol brata oli fesem insaed long kalabus. Plante taem polis mo ol haeman blong gavman oli traem evri rod blong mekem trabol long mifala, be oltaem Jeova i halpem mifala.—2 Korin 4:8.

Mifala i haedem klosap 3,000 bokis blong buk insaed long dok blong wan bisnes man. Be, samtaem biaen, wan long ol wokman blong hem i toktok long polis, nao oli putum bisnes man ya long kalabus. Taem oli tekem rod blong go long kalabus, oli faenem mi long trak blong mi. Bisnesman ya i talem long olgeta se mi nao mi bin mekem plan wetem hem blong putum ol buk long dok blong hem. Polis i blokem mi long rod mo oli askem kwestin long mi long saed blong bisnes ya. Oli talem long mi se ol buk we mi putum long dok blong man ya, oli ol buk we loa i putum tabu long olgeta.

Mi askem long olgeta se, “?Yufala i gat wan long ol buk ya i stap wetem yufala?”

 Oli ansa se, “Yes.”

Mi askem bakegen, “?Mi save luk buk ya?”

Oli karem wan long ol buk ya i kam long mi, nao mi soem long olgeta ol tok we oli stap long ol faswan pej blong hem, we i se: “Printed in the United States of America by the Watch Tower Bible & Tract Society.”

Mi mekem olgeta oli tingbaot se: “Buk ya we yufala i holem long han blong yufala, hem i blong kantri blong Amerika, i no blong Zaire. Gavman blong yufala i putum tabu long ogenaesesen blong ol Witnes blong Jeova long Zaire, hem i no putum tabu long Watch Tower Bible & Tract Society blong Yunaeted Stet. Taswe, i gud yufala i lukaot long wanem we bambae yufala i mekem wetem ol buk ya.”

Oli letem mi mi go fri from we oli no gat pepa we i givim raet long olgeta blong holem mi. Long naet blong semfala dei ya, mifala i tekem tu trak blong go long dok mo mifala i fulumap trak wetem ol buk. Taem polis i kam long dei biaen, oli sapraes se oli no save faenem wan samting nating. Ale, oli stat lukaot mi, from we naoia oli kasem pepa blong kot we i givim raet blong oli holem mi. !Polis i faenem mi, mo from we oli no gat trak, mi yusum trak blong mi blong go long kalabus! Wan narafala Witnes i kam wetem mi blong hem i save tekembak trak blong mi bifo we polis i karemaot trak ya.

Long eit aoa oli askem fulap kwestin long mi, biaen oli mekem disisen blong putumaot mi long kantri. Be mi soem long olgeta wan fotokopi blong leta blong gavman we i talem se mi gat raet blong finisim olgeta wok blong Ogenaesesen blong ol Witnes blong Jeova long Zaire. From samting ya, oli letem mi mi gohed long wok blong mi long Betel.

Afta fo yia we mifala i wok aninit long ol problem from tabu we gavman i putum long wok blong prij long Zaire, mi kasem wan soa insaed long bel blong mi mo blad i stap ron insaed, mekem se laef blong mi i stap long denja. Branj ofis i mekem disisen blong sanem mi mi go long Saot Afrika blong go long hospital mo tekem meresin, ale mi kamgud bakegen. Ol eit yia long Zaire, oli nambawan ekspiryens we bambae mifala i neva fogetem. Long 1989, mifala i muf i go long Branj ofis blong Saot Afrika. Nao, long 1998, mifala i gobak long kantri blong mifala blong wok bakegen long Betel blong Kanada.

Glad Blong Mekem Wok Blong God

Taem mi luklukbak long ol 54 yia we mi spenem long fultaem wok blong prij, mi glad tumas from we mi yusum yangtaem mo paoa blong mi long nambawan wok blong Jeova. Nating se Anne i fesem plante defren traem, neva hem i komplen be oltaem hem i sapotem mi long olgeta wok blong mitufala. Mitufala tugeta i gat jans blong givhan long plante man blong kasem save blong Jeova, mo sam long olgeta ya oli joen long fultaem wok blong prij tu. !Mi mi glad tumas blong luk se sam long ol pikinini blong olgeta ya, wetem ol smol bubu blong olgeta tu, oli stap mekem wok blong Hae God, Jeova!

Mi sua se wol ya i no save givim wan samting we i moa gud i winim ol jans mo ol blesing we Jeova i save givim long yumi. I tru, mifala i fesem plante traem, be ol traem ya oli mekem mifala i kam moa strong long saed blong bilif mo oli halpem mifala blong trastem Jeova moa. Jeova i rili pruvum se hem i sefples blong mifala, hem i paoa blong mifala, mo oltaem hem i rere blong givhan long mifala long taem blong trabol.

[Futnot]

[Tok blong pija long pej 26]

Wok blong paenia long 1947; wetem Anne tede

[Tok blong pija long pej 29]

Ol man we yumi bin prij long olgeta long Zaire oli laekem trutok blong Baebol