?Wanem Rod Blong Yumi Save Win?

I GAT tu yangfala man oli stap wokhad blong rerem wan spesel masin blong mekem wan impoten tes. Wantaem nomo, wan strong win i leftemap masin ya, we i no strong tumas, mo biaen i bangem long graon. Tingting blong tufala yangfala i foldaon bigwan, tufala i stanap kwaet we tufala i no talem wan tok nating. Masin ya i brok, i slip long graon, mo ol hadwok blong tufala i lus.

Samting we i hapen long dei ya, long Oktoba, 1900, hemia i no faswan trabol we Orville mo Wilbur Wright i fesem, taem tufala i stap traem blong wokem wan niufala plen. Tufala i bin spenem plante yia, mo bigfala mane finis blong wokem niufala plen ya.

Be from we tufala i no stop, tufala i gohed nomo long wok ya, biaen, traehad blong tufala i karem frut. Long Desemba 17, 1903, long Kitty Hawk, North Carolina, Yunaeted Stet, tufala brata ya i mekem wan plen we i gat enjin i flae go kasem 12 seken. Nating se 12 seken ya i sot nomo taem yumi skelem wetem ol plen blong tede, !be long taem ya hem i wan bigfala samting we i jenisim wol foreva!

Sipos yumi wantem win long samting we yumi mekem, yumi mas gat longfala tingting mo gohed long samting ya oltaem. Nomata sipos yumi stap lanem wan niufala lanwis, wan niufala wok, no yumi stap traem blong wokem wan gudfala fasin fren, yumi save win nomo sipos yumi traehad oltaem. Charles Templeton, wan man blong raetem buk i talem se: “Klosap oltaem, wan samting nomo we i mekem yumi win: hemia fasin traehad.” Wan man blong raetem niuspepa, Leonard Pitts, Jr., i talem se: “Plante taem, yumi tokbaot gudhan blong mekem samting, mo wok we man i mekem, be yumi fogetem wanem we i moa impoten. Hemia ol hadwok, mo ol traehad we oli no karem frut. Ol longfala aoa we man i spenem blong wok.”

Samting ya i laenap wetem wanem we Baebol i talem longtaem finis, se: “Man we i stap wok had, hem bambae i save rul.” (Ol Proveb 12:24) Fasin blong wok had i min se yumi gohed blong traehad oltaem. Fasin ya i impoten tumas, sipos yumi wantem kasem gudfala frut from ol samting we yumi plan blong mekem. ?I minim wanem blong gohed oltaem? ?Olsem wanem yumi save gohed blong traehad oltaem blong kasem ol mak blong yumi, mo wanem ol samting we yumi mas gohed oltaem blong mekem? Bambae yumi kasem ansa blong ol kwestin ya long nekis haf.

[Credit Line blong pija long pej 3]

U.S. National Archives photo