Bodi i Smol, Be Hat i Bigwan

?BAMBAE i olsem wanem sipos yu wantem go serem mesej blong Kingdom blong God wetem ol narafala, be yu sotfala bitim mak, bodi blong yu i kasem 76 sentimita nomo? Laura i save ansa long kwestin ya. Hem i gat 33 yia, be bodi blong hem i gru longfala kasem 76 sentimita nomo. Sista blong hem, María, i gat 24 yia mo i longfala kasem 86 sentimita. Tufala oli laef long Quito, Ekwado. Bambae tufala i tokbaot ol traem we oli stap fesem long Kristin minista wok blong tufala.

“Blong kasem teritori we mitufala i prij long hem, mo ol Kristin miting, mitufala i wokbaot samwe long haf kilometa blong kasem wan bas. Afta we bas i lego mitufala, mitufala i mas wokbaot haf kilometa bakegen blong kasem wan narafala bas. Long rod ya i gat faef rabis dog i stap. Ol dog oli mekem mitufala i fraet tumas, from we oli luk bigwan olsem ol hos. Sipos i gat nid blong protektem mitufala long ol dog ya, mitufala i karem wan wud, mo mitufala i haedem wud ya samples bifo we mitufala i go long bas, blong meksua se i gat wan wud blong yusum taem mitufala i wokbaot blong gohom.

“Blong klaem i go insaed long bas, i hadwok blong mitufala. Long ples blong stopem bas, mitufala i stanap long wan hip graon we i hae lelebet, blong i moa isi blong klaem insaed long bas. Sam draeva oli stop klosap long hip graon ya, be sam oli no mekem. Sipos oli no mekem, hemia we i longfala moa i givhan long hemia we i sot moa blong klaem insaed. Blong kasem seken bas ya, mitufala i mas krosem wan bigfala rod we ol trak oli spid long hem—hemia wan bigfala traem, from leg blong mitufala i sotfala nomo. From we bodi blong mitufala i sot tumas, i hadwok blong karem wan basket we i fulap long ol buk we oli hevi. Blong mekem basket i no hevi tumas, mitufala i karem ol smol Baebol nomo, mo mitufala i no karem tumas buk.

“Stat long taem we mitufala i pikinini, mitufala i stap sem bigwan. Ol man we oli stap raonabaot long mitufala, oli save se oltaem mitufala i bin fraet blong toktok long ol strenja. Taswe oli sapraes mo oli glad blong luk we mitufala i go noknok long doa blong olgeta, mo plante taem oli glad blong lesin long mitufala. Be long ol ples we ol man oli no savegud mitufala, oli jes luk we mitufala i smol man we bodi i no gru bigwan, ale, plante taem oli no lesin gud long impoten mesej we mitufala i talemaot. Nating se i olsem, mitufala i harem se Jeova i lavem mitufala, mo samting ya i mekem se mitufala i strong blong gohed long wok blong prij. Taem mitufala i tingting dip long ol tok blong Ol Proveb 3:5, 6, samting ya tu i mekem se mitufala i no fraet.”

Olsem Laura mo María oli soemaot, fasin blong gohed oltaem nating se oli gat handikap long bodi, i leftemap nem blong God. Aposol Pol i prea long God blong tekemaot “nil blong aranis we i stap stikim” hem. Maet hem i tokbaot wan problem long bodi we i bin mekem hem i harem nogud. Be God i talem long hem se: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” Yes, blong mekem wok  blong God, i no minim se ol problem no handikap blong yumi oli mas finis fastaem. Fasin blong trastem God fulwan, i save halpem yumi blong traem bes blong yumi, nating se bodi blong yumi i olsem wanem. From we Pol i tingting olsem long saed blong ‘nil blong aranis we i stap stikim hem’, hem i save talem se: “Long taem we mi mi no gat paoa, long taem ya nao, mi mi gat paoa.” (2 Korin 12:7, 9, 10) Sam yia biaen, Pol i raetem se: “Mi save mekem evri samting, long paoa blong Kraes ya we i stap mekem mi mi strong.”—Filipae 4:13.

Long taem blong yumi, God i stap mekem wan bigfala wok i gohed, mo i yusum ol man, woman, mo ol pikinini we oli lavem hem wetem fulhat blong olgeta. Plante long olgeta oli gat sam problem no handikap long bodi blong olgeta. I tru, olgeta oli gat hop se aninit long Kingdom blong God, bambae bodi blong olgeta i save kamgud bakegen. Be oli no wet blong God i tekemaot problem no handikap fastaem, bifo oli save mekem wok blong hem.

?Yu yu stap safa from sam problem long saed blong bodi? !No letem tingting blong yu i foldaon! Tru long bilif blong yu, yu save haremgud olsem Pol, Laura mo María. Long saed blong olgeta, mo ol man mo woman blong bilif long taem bifo, yumi save talem se: “Olgeta oli no gat paoa, be God i givim paoa long olgeta.”—Hibru 11:34.

[Tok blong pija long pej 8]

María

Laura

[Tok blong pija long pej 9]

María i halpem Laura blong klaem long bas

[Tok blong pija long pej 9]

“Ol dog oli mekem mitufala i fraet tumas, from we oli luk bigwan olsem ol hos”

Daon: Laura mo María, wetem olgeta we oli bin givhan long tufala blong stadi Baebol