!Stap Longwe Long Eria We i Denja!

HEM i wok blong olgeta man we oli stadi long volkeno blong lukluk mo skelem ol samting we oli pruvum paoa blong volkeno, mo blong oli givim woning long ol man se bambae volkeno i faerap. (Taem bigfala Hil ya Fugen i faerap, ol polis oli mas karemaot ol man long eria ya we i denja.) Long sem fasin, ol Baebol studen oli luksave ol saen we i ‘soemaot se wol ya bambae i finis’ mo oli givim woning long ol narafala we denja ya i stap kam klosap.—Matiu 24:3.

Semfala japta ya long Baebol i talemaot woning long saed blong wan trabol we i klosap nomo, mo we bambae i kavremap ful wol. Yumi save ridim wanem we bambae i hapen bifo long trabol ya se: “Ol kantri bambae oli mekem faet long ol narafala kantri. Ol man bambae oli gat hadtaem blong kasem kakae. Mo olbaot long wol, bambae graon i seksek. . . . Bambae plante giaman profet oli girap, mo bambae oli pulum plante man oli go krangke. Bambae ol fasin nogud oli kam bigwan moa, nao bighaf blong ol man bambae oli no moa lavem God. . . . Nao bambae ol man oli stap talemaot gud nius ya [“blong Kingdom,” NW] long olgeta ples long wol, blong oli witnes blong hem long fes blong olgeta man. Nao biaen, bambae [“en,” NW] i save kam.”—Matiu 24:7-14.

Yumi no nid blong kam olsem ol man blong nius, blong luksave klia se profet tok ya i stap kamtru tede. Stat long 1914, yumi luk profet tok ya i kam klia moa. Long handred yia we i jes pas, yumi luk tu bigfala faet blong wol, plante faet bitwin ol man long wanwan kantri nomo, ol smolsmol faet insaed long wan taon no vilej, ol faet agensem ol man blong defren kala blong skin mo ol faet bitwin ol skul. Ol faet olsem oli mekem ol man oli safa from kakae i sot. Antap long hemia, i gat ol disasta olsem hariken no bigfala wota we oli spolem ol kakae. Plante man oli lusum laef blong olgeta taem graon i seksek. Ol smosmol grup blong skul wetem ol lida blong olgeta we man i no sua gud long fasin blong olgeta, oli kam antap olbaot, mo oli pulum plante man we oli bitim mak long fasin blong olgeta. From we “fasin blong brekem loa i kam antap” samting ya i spolem tingting blong ol man blong oli no moa soem lav mo fasin blong kaen gud long ol man raonabaot long olgeta. Ol fasin ya i no moa stap long laef blong man evri dei.

 Wok blong prij long olgeta ples blong wol, we i wan narafala haf blong saen ya, i stap kamtru fulwan. Sipos yu tanem pej i go long fored blong magasin ya, mbae yu luk aninit long taetel blong hem i gat ol tok ya “I Talemaot Kingdom Blong Jeova”. Oli wokem 22 milyan kopi blong Wajtaoa long 132 lanwis mo hem i olsem wan stamba tul blong talemaot “gud nius blong Kingdom” long olgeta ples blong wol. Gud nius ya i joen wetem mesej ya se Man ya we i Wokem heven mo wol, Jeova God, i stanemap wan Kingdom long heven we bambae i spolem ol rabis fasin blong naoia mo mekem wol i kam wan paradaes. I tru tumas, saen blong soemaot we God bambae i tekem aksin, i kam klia naoia. Samting ya i soemaot se laef blong ol man long olfala wol ya i stap long denja.—Skelem wetem 2 Timoti 3: 1-5; 2 Pita 3: 3, 4; Revelesen 6: 1-8.

Bigfala Dei Blong Jeova We i Mekem Man i Fraet

?Wanem bambae i hapen long taem ya we Jeova i rere blong mekem jajmen blong hem i kamtru? Lesin gud long wanem we hem i tokbaot se bambae i hapen long taem ya: “Mi bambae mi mekem ol saen long skae mo long wol ya tu. Bambae i gat blad, mo faea, mo bigfala smok i go antap. Fastaem, san bambae i kam tudak, mo mun bambae i kam red olsem blad. Nao biaen, Dei ya blong mi we mi mi [“Jeova,” NW], bambae i kamtru. Hemia i wan bigfala dei we bambae ol man oli fraet gud long hem.”—Joel 2:30, 31.

Dei ya blong mekem man i fraet, we i save spolem ol samting moa i bitim enikaen volkeno we i faerap no graon we i seksek, i rere blong hapen nao. Profet Sefanaea i talem se: “Bigfala Dei ya blong [“Jeova,” NW] i kam klosap finis. I no longtaem, bambae i kamtru. . . . Kros ya blong hem we i olsem faea, bambae i kakae olgeta ples long wol ya. Olgeta man we oli stap long wol ya, bambae oli ded wantaem nomo, we bambae i no gat wan i stap.” I tru se “long dei ya we [“Jeova,” NW] bambae i soemaot kros blong hem, ol silva mo ol gol blong ol man, bambae i no save sevem olgeta,” be i gat rod blong kasem sef long bigfala dei ya we bambae i mekem man i fraet.—Sefanaea 1:14-18.

Sefanaea i soem olsem wanem samting ya bambae i hapen, hem i se: “Bifo we bigfala kros blong Jeova i kamtru long yufala, bifo we dei blong kros blong Jeova i kamaot, yufala i mas lukaot Jeova, yufala olgeta kwaet man blong wol we tingting blong yufala i stap daon. . . . Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova.” (Sefanaea 2:2 ,3, NW) Yumi save stap long sefples taem yumi ‘lukaot Jeova, lukaot stret fasin, mo lukaot tingting daon.’ ?Hu ya tede oli stap lukaot Jeova?

Ating taem yu harem tok ya “Jeova” kwiktaem nomo yu tingbaot ol Witnes blong Jeova from wok blong prij we oli stap mekem. Maet yu kasem magasin ya long wan long olgeta. Ol man oli save gud se ol Witnes oli man we oli ona long gavman mo folem ol stret fasin long laef. Oli wokhad blong putum “niufala laef” ya we i joen wetem fasin blong gat tingting daon. (Kolosi 3:8-10) Oli talemaot stret se hemia frut we i kamaot from tijing we oli kasem long ogenaesesen blong Jeova we yumi no save luk wetem prapa ae blong yumi. Ogenaesesen ya i givim ol tijing ya tru long ol lokol kongregesen blong ol Witnes blong Jeova. Yes, yumi save stap long wan sefples wetem ‘ol brata blong yumi long evri ples long wol,’ taem yumi stap long medel blong ol Witnes blong Jeova long fulwol.—1 Pita 5:9.

Faenem Ples Blong Haed Naoia

Blong faenem ples blong haed taem yumi stap lukaot Jeova, yumi mas kam olsem fren blong hem. ?Hemia ya i joen wetem wanem? Baebol i givim ansa se: “?Yufala i no save se man we i wantem tumas ol fasin blong wol hem i kam enemi blong God? Taem yufala i wantem tumas ol fasin blong wol, be semtaem nomo yufala i kam enemi blong God.” (Jemes 4:4) Blong kam fren blong God, yumi mas stap longwe long enikaen strong filing we i joen wetem rabis wol ya blong naoia, we i soemaot klia ol fasin we i rebel agensem God.

Baebol i givim woning long yumi se: “Yufala i no mas laekem ol fasin blong wol mo ol samting we oli stap long hem. Man we i laekem tumas ol fasin blong wol, hem i no save laekem Papa blong yumi. Ol fasin ya we oli stap wol oli olsem. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo. Mo wol ya wetem ol samting blong hem we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:15-17) Tede plante man oli letem ol samting we bodi nomo i wantem, i bos long olgeta—man i no save bos long fasin blong wantem seks tumas, fasin griri blong ronem mane, mo fasin blong bos nogud antap long narafala. Be blong stap long saed blong Jeova, man i mas winim ol rabis fasin ya.—Kolosi 3:5-8.

 Ating yu stap ridim magasin ya sam samtaem, mo maet yu agri long rod blong hem blong eksplenem ol profet tok blong Baebol. Nating se i olsem, maet yu fraet lelebet blong joen wetem ol Witnes blong Jeova. Be, ?sipos yumi stap fesem wan bigfala disasta, i naf nomo blong harem woning blong hem? Olsem we yumi luk long stori blong bigfala Hil ya Fugen we i faerap, yumi mas wok folem ol woning. Rimemba, bitim 15 man blong nius mo man blong tekem foto oli wantem tumas blong raetem wan stori long saed blong volkeno ya, be oli lusum laef blong olgeta. Tru ya, wan man blong tekem foto, i ded we fingga blong hem i stap yet long baten blong klosem ol film long kamera blong hem. Wan man blong stadi long volkeno—we i bin talem wan tok olsem se, “Sipos wan dei mi mas ded, mi wantem se hem i klosap long wan volkeno”—i lusum laef blong hem olsem we hem i wantem. Olgeta evriwan oli givim ful laef blong olgeta i go long wok blong olgeta mo ol samting we oli wantem kasem. Ale, oli pem praes blong samting ya taem oli lusum prapa laef blong olgeta—hemia nao praes blong fasin ya blong ting nating long ol woning.

Plante man tede oli harem mesej ya we i tokbaot disisen blong God blong spolem rabis wol ya. Oli luksave, smol, se woning ya i impoten. Taswe maet oli talem se, ‘Yes bambae hem i kam wan dei, be i no tede.’ Oli haremgud blong folem prapa tingting blong olgeta taem oli putum dei blong Jeova i go long wan narafala taem biaen. Long rod ya, i no gat samting i save blokem ol wok we long tingting blong olgeta i impoten moa naoia.

Baruk i gat wan problem olsem. Hem i sekretari blong profet Jeremaea blong bifo. Baruk i no fraet nating blong givim woning long ol man Isrel long saed blong trabol we bambae i kasem Jerusalem i no longtaem. Be, i gat wan taem we hem i bin kam slak long wok ya blong hem. From samting ya, Jeova i stretem hem: “?Olsem wanem? ?Yu ting se bambae yu kasem gudfala laef, i winim we ol narafala man bambae oli kasem? I nogud yu mekem olsem.” Maet Baruk i wantem kam rijman, kasem haenem, no maet hem i wantem kasem ol samting long saed blong bodi we mbae oli lukaotgud long hem, nating se i olsem wanem, be hem i kasem woning blong no traem ‘kasem wan gudfala laef, we i winim ol narafala man.’ Hem i mas gat intres long wan samting, hemia blong mekem wok blong God mo halpem ol man blong oli stap long saed blong Hem. Sipos hem i mekem olsem, God ‘bambae i letem hem i stap laef long weples we bambae hem i go long hem.’ (Jeremaea 45:1-5) Samting ya i sem mak long yumi tede. Yumi mas lukaot Jeova, samting ya i save sevem laef blong yumi i bitim we yumi stap traem ‘kasem wan gudfala laef, we i winim ol narafala man.’

Long bigfala Hil blong Fugen, i gat bitim twelef polisman mo volontia blong kilim faea oli stap wok taem strongfala hot blong volkeno ya i kilim olgeta. Oli stap traem blong halpem mo protektem ol man we oli stap long denja. Oli olsem ol man mo woman ya we oli putum fulwan tingting blong olgeta i go long ol gudfala wok we i blong mekem laef long wol ya i kamgud moa. Nating se ol tingting ya blong olgeta i nambawan tumas, be “samting we i kruked, yumi no save stretem.” (Prija 1:15) Ol kruked fasin blong naoia oli no save kam stretgud. ?Taswe i stret blong kam ‘wan fren blong wol’ from we yumi wantem sevem wol ya we God i wantem finisim?

Taem Yu Ronwe Finis, Stap Longwe

I no isi blong ronwe long wol ya blong naoia we i stap long denja. Be i hadwok moa blong gohed oltaem blong stap insaed long sefples blong “kampani blong ol brata.” (1 Pita 2:17, NW) Yumi no mas fogetem ol man ya blong wokem garen long Hil ya Fugen. Afta we oli karemaot olgeta long ples ya, oli gobak blong jekem garen blong olgeta klosap long hil ya. Ating oli tingting tumas blong gobak long “prapa bisnes blong laef” we oli gat bifo. Be yu luksave se disisen blong olgeta blong gobak i no waes nating. Ating hemia i no fastaem we oli traem go kros long eria ya we i denja. Maet oli stanap finis insaed long eria ya, blong smoltaem nomo, mo oli luk se i no gat samting i hapen. Wan narafala taem maet oli stap longtaem lelebet, mo long taem ya tu i no gat samting i hapen. From samting ya, oli lan blong krosem laen ya we i blokem olgeta, gogo tingting blong olgeta i no moa fraet blong gohed olsem bifo blong mekem ol samting long eria blong olgeta we i denja tumas.

Jisas i tokbaot wan samting we i sem mak we i mas hapen long taem ya we bambae “wol ya i finis.” Hem i talem se: “Long taem ya, taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no save se bambae trabol i kam, gogo wota i ron bigwan, i tekemaot olgeta. Nao long taem ya we mi, mi Pikinini blong man mi kamtru, bambae i sem mak nomo.”—Matiu 24:3, 38, 39.

Makemgud se Jisas i tokbaot kakae, dring, mo mared. Wanwan long olgeta samting ya oli no rong long ae blong Jeova. ?Be wanem nao i rong? Ol man long taem blong Noa oli “no save se bambae trabol i kam” mo oli stap mekem prapa bisnes blong olgeta  long laef. Long wan taem we i impoten tumas, man i no save stap mekem ol “prapa bisnes blong laef” blong hem. Taem we yu ronwe, no seraot finis long wol blong naoia we bambae i kasem jajmen, yu mas faet strong agensem enikaen fasin we i save pulum yu blong gobak mo tekem sam samting we i stap yet long hem. (1 Korin 7:31) Maet yu save lego sefples ya long saed blong spirit mo maet yu kambak bakegen insaed, we i no gat wan trabol i kasem yu, mo narafala i no luksave nating. Be, samting ya bambae i mekem tingting blong yu i no moa wari mo i save lidim yu blong gobak long wol bakegen, nao yu stap longtaem lelebet. Sloslou tingting ya i save gru se: “En bambae i no kam tede.”

Mo tu, tingbaot trifala man ya blong draevem trak, we oli lusum laef blong olgeta from we oli wet long ol man blong nius mo ol man blong tekem foto, taem lava blong volkeno i ron i godaon long hil. Tede, samfala maet oli folem ol narafala we oli no fraet blong gobak long wol. Nomata wanem kaen risen i pusum olgeta blong mekem olsem, be i klia nomo se fasin blong letem ol narafala oli pulum yumi blong gobak mo putum laef blong yumi long eria ya we i denja, hemia i no wan samting blong man i traem mekem.

Olgeta we oli ded from lava we i kamaot long Hil ya Fugen we i faerap, oli krosem mak ya we i sef mo oli go insaed long eria we i denja. Nating se oli save se bambae hil ya i faerap wan dei, i no gat wan long olgeta we i ting se bambae samting ya i hapen stret long dei ya. Plante man we oli stap lukluk ol saen blong en, oli save se dei blong Jeova bambae i kam samtaem, be oli ting se i no naoia. Samfala oli gat tingting ya se dei ya bambae i neva kam “tede.” Wan tingting olsemia i save putum man long denja.

Aposol Pita i givim woning se: “Dei blong [“Jeova,” NW] bambae i kam olsem we man blong stil i kam.” Yumi nidim blong stap wekap, “stap wet long Dei ya blong [“Jeova,” NW] blong i kamtru,” mo traehad blong ‘mekem we long fes blong God, laef blong yumi i klingud, i no gat wan samting we i rong long laef blong yumi. Nao long fasin ya, yumi gat pis wetem God.’ (2 Pita 3:10-14) Afta we ol rabis fasin blong wol ya i finis, wan paradaes wol we i stap aninit long Kingdom blong God, i wet long yumi. Yumi no mas foldaon long traem ya blong go long eria ya we i denja, nomata wanem kaen risen no eskius we i save kam long tingting blong yumi, from we dei ya we yumi krosem mak blong gobak long wol, maet hemia nao dei blong Jeova.

Faenem sefples long medel blong ol man blong Jeova mo stap wetem olgeta.

[Tok blong pija long pej 7]

Faenem sefples long medel blong ol man blong Jeova mo stap wetem olgeta

[Credit Line blong pija long pej 4]

Iwasa/Sipa Press