God i Save Ansarem Ol Prea

Konilias i wan man we oltaem, i prea long God wetem fulhat blong hem, from we hem i wantem tumas se God i glad long hem. Mo tu, hem i yusumgud posisen blong hem olsem wan haeman blong ami. Baebol i talem se, “hem i givim plante mane blong hem blong givhan” long ol puaman.—Ol Wok 10:1, 2.

LONG taem ya, olgeta we oli mekemap Kristin kongregesen, hemia ol man Jiu we oli bilif, ol proselaet, mo sam man Sameria. Konilias i no kamaot long laen blong Isrel. Hem i no sakomsaes mo i no wan memba blong Kristin kongregesen. ?Samting ya i minim se God i no save ansa long ol prea blong hem? No gat. Jeova God i harem ol prea blong Konilias, mo i luk ol gudfala wok we hem i mekem.—Ol Wok 10:4.

Wan enjel i soem rod long Konilias blong kam insaed long Kristin kongregesen. (Ol Wok 10:30-33) From samting ya, Konilias mo famle blong hem, oli kasem nambawan blesing ya blong kam ol faswan man blong narafala laen, we oli no sakomsaes, blong kam insaed long Kristin kongregesen. Mo Jeova God i luk se i stret blong ol man oli raetemdaon stori blong Konilias long Baebol. I sua se Konilias i bin jenisim plante samting long laef blong hem, blong mekem i laenap wetem ol rul blong God. (Aesea 2:2-4; Jon 17:16) Stori blong Konilias i save leftemap tingting blong ol man blong olgeta nesen long taem blong yumi, we oli wantem tumas se God i glad long olgeta. Tingbaot sam eksampel.

Sam Eksampel Long Taem Blong Yumi

Wan yangfala woman long India i rili nidim narafala blong i leftemap tingting blong hem. Hem i mared taem hem i gat 21 yia, mo hem i gat tu pikinini. Be i no longtaem afta we hem i bonem nambatu pikinini blong hem, hasban blong hem i ded. Wantaem nomo, taem hem i gat 24 yia, hem i kam wan wido, we i mas lukaot long wan smol gel blong tu manis, mo wan smol boe we i gat klosap tu yia. !Taswe hem i rili nidim help! ?Bambae hem i faenem help weples? Wan naet hem i harem nogud bitim mak, nao hem i prea, i talem se, “Papa we yu yu stap long heven. Plis yu mekem mi mi harem gud bakegen, tru long Tok blong yu.”

Long nekis moning, wan man i kam visitim hem. Man ya, hem i wan Witnes blong Jeova. Long dei ya, hem i fesem hadtaem lelebet long wok blong prij from we smol man nomo i lesin long hem. Hem i harem se hem i taed mo tingting blong hem i foldaon smol, ale hem i rere blong gohom. Be nao, wan tingting i kam long hem se hem i mas visitim wan moa haos. Long haos ya nao, hem i mitim yangfala wido ya. Woman ya i askem hem blong kam insaed, mo i tekem wan buk we i eksplenem Baebol. Woman ya i haremgud tumas from samting we hem i ridim long buk ya, mo from ol toktok we Witnes ya i talem. Hem i lanem promes ya se bambae God i  mekem ol dedman oli laef bakegen, mo promes long saed blong Kingdom blong God we bambae i mekem wol i kam paradaes. Samting we i moa impoten, hemia se woman ya i kasem save mo i lavem trufala God ya, Jeova, we i bin ansarem prea blong hem.

Long taon blong George, long Saot Afrika, i gat wan woman we nem blong hem Nora. Hem i bin makemaot wan manis blong joen long fultaem minista wok. Bifo we Nora i statem fultaem minista wok, hem i prea wetem fulhat blong hem, i askem long Jeova blong i halpem hem blong faenem wan we i rili intres blong stadi Baebol. Long eria we Nora i mas go prij long hem, i gat wan man we bifo, hem i bin tok strong long Nora taem hem i go long haos blong man ya. Be, Nora i no fraet, hem i go long haos blong man ya bakegen. Hem i sapraes taem hem i faenem se i gat wan narafala woman i kam laef long haos ya. Woman ya we nem blong hem Noleen, wetem mama blong hem, tufala i bin prea long God blong halpem tufala blong kasem save long Baebol. Nora i talem se, “Taem mi askem tufala blong stadi Baebol, tufala i glad tumas.” Tufala i gohed gud long stadi blong tufala. Biaen, tufala tugeta i joen wetem Nora long wok ya blong givhan long ol narafala long saed blong spirit.

Wan narafala eksampel we i soem paoa blong prea, hemia eksampel blong wan man wetem waef blong hem, we tufala i laef long taon ya, Johannesburg, long Saot Afrika. Long wan Sarede naet long 1996, klosap nomo se bambae mared blong Dennis mo Carol i brok. Tufala i tekem disisen blong prea, olsem laswan rod blong kasem help. Ale, tufala i prea bakegen mo bakegen kasem medel naet. Long 11 klok long nekis moning, tu Witnes blong Jeova i kam noknok long doa blong tufala. Dennis i go long doa mo i talem long tufala blong wet fastaem, blong hem i singaot waef blong hem. Dennis i givim woning long Carol se, sipos hem i askem tufala Witnes ya blong kam insaed, maet oltaem bambae tufala i stap kambak bakegen. Be Carol i talem long Dennis se tufala i bin prea long God blong askem help, mo se maet hemia nao ansa blong prea blong tufala. Ale, tufala i askem tufala Witnes ya blong kam insaed, mo oli statem Baebol stadi long buk ya Save Blong Lidim Yu Long Laef We i No Save Finis. Dennis mo Carol, tufala i glad tumas long ol samting we tufala i lanem. Long sem aftenun ya, tufala i stat blong go long miting long Haos Kingdom blong ol Witnes blong Jeova long ples ya. From we Dennis mo Carol, tufala i folem ol samting we tufala i lanem long Baebol, tufala i faenem rod blong winim ol problem long mared blong tufala. Naoia, tufala i baptaes finis, mo oltaem tufala i harem gud tumas, tufala i stap presem Jeova mo serem bilif blong tufala we i kamaot long Baebol wetem ol narafala.

?Olsem Wanem Sipos Yu Ting Se Yu No Naf Blong Prea?

Sam man we hat blong olgeta i stret, maet oli harem se oli no naf blong prea from we oli gat sam nogud fasin long laef blong olgeta. Jisas Kraes i talem stori blong wan man we i gat filing olsem. Man ya, hem i wan man blong tekem mane blong takis mo ol narafala oli luk daon long hem. Taem hem i go insaed long bigfala yad blong tempel, hem i harem se hem i no naf blong go long ples ya we oltaem ol man oli stap go long hem blong prea. “Hem i stap stanap longwe . . . i harem nogud, i stap kilim jes blong hem from, nao i stap talem se, ‘God, mi mi man nogud. Plis yu sore long mi.’” (Luk 18:13) Jisas i talem se man ya, God i harem prea blong hem. Samting ya i pruvum se Jeova God i kaen tumas mo hem i wantem givhan long olgeta we oli rili tanem tingting from ol sin blong olgeta.

Tingbaot wan yangfala man Saot Afrika, we nem blong hem Paul. Taem Paul i wan smol boe, hem i go long ol Kristin miting wetem mama blong hem. Be taem hem i kam yangfala mo i go long haeskul,  hem i stat blong fren wetem ol yangfala we oli no folem ol loa blong God. Taem hem i finis long skul, hem i joenem ami blong gavman blong Saot Afrika bifo, we i no laekem ol waetman. Nao, wantaem nomo, gelfren blong hem i lego hem. Laef ya we Paul i folem i no karem glad, be i mekem se hem i harem nogud tumas long filing blong hem. Hem i tingting long taem ya, nao i talem se: “Wan naet mi prea long Jeova mo mi askem hem blong i givhan long mi, nating se plante yia finis, mi no bin prea long hem wetem fulhat blong mi.”

I no longtaem afta we Paul i prea, mama blong hem i askem hem blong kam joen long Memoriol blong ded blong Kraes. (Luk 22:19) Taem Paul i luk samting ya, hem i sapraes tumas, from we Paul i bin lego stretfasin, mo i no bin soem tumas intres long Baebol. Hem i talem se, “Taem mama blong mi i askem mi blong go long Memoriol, mi tingbaot samting ya olsem rod we Jeova i yusum blong ansarem prea blong mi, mo mi harem se naoia mi mas lego ol nogud fasin blong mi.” Stat long taem ya, Paul i stap go long olgeta Kristin miting. Afta we hem i stadi Baebol blong fo manis, hem i kam naf blong tekem baptaes. Mo tu, hem i lego ol stadi we hem i stap mekem blong i kam wan mekanik, mo i jusum blong mekem wok blong prij fultaem. Tede Paul i wan man we i hapi, mo hem i no moa harem nogud from laef blong hem bifo. Long ol 11 yia we i jes pas, hem i bin wok long branj ofis blong Watch Tower Society long Saot Afrika.

Tru ya, Jeova God i kaen tumas mo i stap ansa long ol prea. Mo tu, hem “i stap mekem i gud long olgeta we oli stap traem faenem hem.” (Hibru 11:6) I no longtaem, bigfala dei blong Jeova bambae i kam mo i finisim olgeta nogud fasin. Go kasem taem ya, Jeova i stap ansa long ol man blong hem taem oli prea long hem blong askem paoa mo waes, blong gohed strong long impoten wok ya blong talemaot gud nius. Long rod ya, plante milian man long olgeta nesen oli kam joenem Kristin kongregesen, mo oli kasem blesing ya, hemia save blong Baebol we i lidim man long laef we i no save finis.—Jon 17:3.

[Tok blong pija long pej 5]

Konilias i prea long fulhat blong hem, nao aposol Pita i visitim hem

[Tok blong pija long pej 6]

Prea i bin halpem plante man long ol taem we oli harem nogud

[Tok blong pija long pej 7]

I gud blong prea from help blong kasem save long Baebol

Olgeta we oli mared, oli save prea from help blong mekem mared blong olgeta i kam strong moa