Jeova—Hem We i Gat Paoa We i Strong We i Strong

“From we paoa blong hem i strong we i strong, neva wan sta i mestem ples blong hem.”—AESEA 40:26.

1, 2. (a) ?Wanem bigfala paoa we yumi evriwan i dipen long hem? (b) ?Olsem wanem nao yumi kasem blesing from paoa we Jeova i stap soemaot? Eksplenem.

 PAOA i wan samting we plante long yumi i ting se i olsem nating nomo. Wan eksampel, yumi no tekem naf taem blong tingbaot paoa blong lektrik. Hem i givim laet no hot we yumi nidim mo yumi save joenem wan lektrik rop i go isi nomo long wan mesin no samting we i wok long paoa blong lektrik. Long taem ya nomo we oli katem paoa blong lektrik, ol man oli luksave se sipos i no gat paoa ya, olgeta taon bambae oli no moa wok. Bighaf blong lektrik we yumi dipen long hem, i kam from bigfala paoa we wol i dipen long hem—hemia san. * Evri seken, san i yusum faef milyan tan blong niuklia. San i givim paoa we wol i nidim blong mekem se ol samting i gohed blong stap laef.

² ?Olgeta paoa blong san i kam long weples? ?Hu i mekem bigfala paoa ya we i stap long skae? Jeova God nao i mekem. Ol Sam 74:16 i tokbaot hem olsem se: “Yu yu mekem dei mo naet, mo yu putum san mo mun long ples blong tufala.” Yes, Jeova hem i Stamba blong olgeta paoa, i semak olsem we hem i Stamba blong olgeta laef samting. (Ol Sam 36:9) Yumi neva mas ting se paoa blong hem i olsem nating nomo. Jeova i yusum profet Aesea blong mekem yumi tingbaot blong lukluk olgeta samting antap long skae, olsem san mo ol sta, mo tingting dip se oli kam olsem wanem. “!Yufala i traem luk antap long skae! Ol sta ya we yufala i stap luk, hem nomo i wokem olgeta. Oltaem hem i stap lidim olgeta i kam, olsem we komanda i lidim ol soldia blong hem. Hem i savegud hamas sta i stap, mo i stap singaot olgeta wanwan long nem blong olgeta. Mo from we paoa blong hem i strong we i strong, neva wan sta i mestem ples blong hem.”—Aesea 40:26; Jeremaea 32:17.

3. ?Wanem blesing we yumi save kasem from we Jeova i soemaot paoa blong hem?

 ³ From we paoa blong Jeova i strong we i strong, yumi save sua se san bambae i gohed oltaem blong givim laet mo hot we laef blong yumi i dipen long hem. Be, yumi dipen long paoa blong God from plante moa narafala samting bitim ol samting we yumi nidim long saed blong bodi nomo. Rod blong sevem yumi long sin mo ded, hop blong yumi long fiuja, mo tras blong yumi long Jeova oli joen wetem paoa we hem i yusum. (Ol Sam 28:6-9; Aesea 50:2) Baebol i fulap wetem ol eksampel we oli tokbaot paoa blong Jeova blong wokem ol samting mo blong mekem ol man blong hem oli kam fri, blong sevem olgeta mo blong spolem ol enemi blong hem.

Paoa Blong God i Kamaot Klia Tru Long Olgeta Samting We Hem i Wokem

4. (a) ?Deved i harem olsem wanem taem hem i lukluk antap long skae long naet? (b) ?Olsem wanem nao ol samting we oli stap long heven oli soemaot paoa blong God?

⁴ Aposol Pol i tokbaot se paoa blong Man we i wokem yumi we “i no save finis . . . Yumi save faenemaot long ol samting blong wol ya we hem i bin mekem.” (Rom 1:20) Sam handred yia bifo, man blong raetem Ol Sam, Deved, wan man blong lukaot long sipsip, i stap lukluk plante taem antap long skae long naet mo hem i luksave bigfala saes blong skae mo bigfala paoa blong Man we i wokem samting ya. Hem i raetem se: “Taem mi mi luk skae we yu yu mekem, mo mi luk mun mo ol sta we yu yu putum olgeta oli stap long stret ples blong olgeta, mi luk man se hem i nating nomo. I no stret blong yu yu tingbaot hem. I no stret nating blong yu lukaot gud long hem.” (Ol Sam 8:3,4) Nating se Deved i gat smol save nomo long ol samting we oli stap antap long skae hem i kasem save se, hem i no impoten nating skelem wetem Man ya we i wokem bigfala skae blong yumi. Tede, ol man blong stadi long sta, oli gat moa save se skae i bigfala olsem wanem mo paoa we i sapotem ol samting long hem. Wan eksampel, oli talem se paoa we san blong yumi i givimaot evri seken, i semak long 100,000 milian megaton blong TNT we i faerap. * Wan smol haf nomo blong paoa ya i kasem wol, be hem i naf blong sapotem olgeta laef samting long wol blong yumi. Be i no san blong yumi nomo  we i gat bigfala paoa long heven. Long wan seken nomo samfala sta oli save saenaot paoa we san i saenaot long wan ful dei. !Naoia traem tingbaot, paoa we Hemia we i wokem olgeta sta ya i gat blong yusum! Elaehu i talem stret wetem strongfala voes se: “Paoa blong God i bigwan tumas, yumi no save kam klosap long hem.”—Job 37:23.

5. ?Wanem pruf i soemaot paoa blong Jeova we yumi save faenem long ol wok blong hem?

⁵ Sipos yumi ‘wantem tumas blong save gud olgeta wok blong God’ olsem we Deved i mekem, bambae yumi luk pruf blong paoa blong hem long olgeta ples—insaed long win mo ol wef blong solwota, long tanda mo laetning, long ol strong reva mo ol bigfala hil. (Ol Sam 111:2; Job 26:12-14) Antap long hemia, ol anamol tu oli soemaot paoa blong Jeova olsem we Hem i mekem Job i tingbaot. Sam long olgeta ya, hemia Behemot, no hipopotamus. Jeova i talem long Job se: “Paoa blong hem i stap long ol mit ya we i stap holem ol bun blong hem. . . Bun blong hem i strong olsem bras, mo leg blong hem i olsem aean stret.” (Job 40:15-18) Long taem blong Baebol, paoa blong wael bul tu i mekem man i fraet, taswe Deved i prea se bambae hem i sef i stap: ‘Blong ol laeon ya oli no kakae hem, mo long paoa blong ol wael bul ya.’—Ol Sam 22:21; Job 39:9-11.

6. ?Buluk we Baebol i tokbaot i saen blong wanem, mo from wanem? (Lukluk futnot.)

⁶ From we buluk i gat bigfala paoa, oli yusum hem long Baebol olsem wan saen blong soemaot paoa  blong Jeova. * Vison we aposol Jon i luk long saed blong bigfala jea blong Jeova i soemaot fo anamol, wan blong olgeta i gat fes olsem buluk. (Revelesen 4:6,7) I klia se, wan long olgeta fo bigfala fasin blong Jeova we ol jerubim ya oli soem hemia paoa. Ol narafala fasin hemia lav, waes, mo stret fasin. From se paoa hem i wan impoten fasin blong God, klia save long saed blong paoa blong hem mo olsem wanem hem i yusum paoa ya bambae i pulum yumi blong kam klosap long hem mo bambae i givhan long yumi blong folem eksampel blong hem blong yusum gud eni paoa we yumi gat.—Efesas 5:1.

“Jeova Blong Ol Ami, Hemia We i Gat Olgeta Paoa”

7. ?Olsem wanem nao yumi save sua se ol gudfala samting oli save winim ol rabis samting?

⁷ Insaed long Baebol, oli tokbaot Jeova olsem “God we i gat olgeta paoa,” wan taetel we i mekem yumi tingbaot se neva yumi mas ting nating long paoa blong Jeova no ting se hem i no naf blong save spolem ol enemi blong hem. (Jenesis 17:1, Eksodas 6:3) I luk olsem se rabis wol blong Setan i stanap strong, be long ae blong Jeova “ol nesen oli olsem drop blong wota nomo, mo ol aelan long narasaed wol oli olsem smok blong graon nomo.” (Aesea 40:15) From paoa ya blong God, yumi sua se ol gudfala samting bambae oli winim ol rabis samting. Long wan taem we ol rabis fasin oli fulap, yumi save haremgud blong save se “Jeova blong ol ami, Hemia we i gat olgeta Paoa long Isrel” bambae i finisim rabis fasin blong olwe.—Aesea 1:24, NW; Ol Sam 37:9,10.

8. ?Wanem ol ami blong heven we Jeova i lidim, mo wanem samting i soemaot long yumi paoa blong olgeta?

⁸ Tok ya “Jeova blong ol ami,” we i kamaot 285 taem long Baebol, i wan narafala samting we i mekem yumi tingbaot paoa blong God. “Ol ami” we Baebol i tokbaot i minim bigfala haf blong ol spirit man we Jeova i bos long olgeta. (Ol Sam 103:20,21; 148:2) Long wan naet nomo, wan long ol enjel ya i kilim i ded 185,000 soldia blong ol man Asiria we oli wantem faetem Jerusalem. (2 King 19:35) Sipos yumi luksave paoa blong ol ami blong Jeova long heven, bambae yumi no save fraet long olgeta we oli agensem yumi. Profet Elisa i no wari taem wan fulwan haf blong ami i stap lukaotem hem from we oli wantem kilim hem. Defren long man blong wok blong hem, Elisa i save lukluk wetem ae blong bilif wan bigfala grup blong ol ami long heven we oli sapotem hem. (2 King 6:15-17).

9. Olsem Jisas, ?from wanem yumi mas trastem proteksen blong God?

⁹ Jisas tu i tingbaot sapot we hem i save kasem long ol enjel taem hem i fesem wan bigfala grup blong ol enemi we oli gat naef blong faet mo ol nalnal long garen blong Getsemane. Afta we hem i talem long Pita blong putumbak naef blong faet long ples blong hem, Jisas i talem se sipos i gat nid, hem i save askem long Papa blong hem blong sanem “ol enjel, we oli moa long twelef kampani blong ol soldia.” (Matiu 26:47, 52, 53) Sipos yumi gat semkaen fasin tangkiu tu from ol ami blong heven we God i save yusum olsem hem i wantem, bambae yumi trastem fulwan help blong God. Aposol Pol i raetem se: “?Taem yumi stap tingbaot ol samting ya, bambae yumi talem olsem wanem? God i stap wetem yumi, mo i no gat man nating we i strong moa, we bambae i save agens long yumi.”—Rom 8:31.

10. ?Jeova i soemaot paoa blong hem blong givhan long hu?

¹⁰ Taswe yumi gat evri risen, blong trastem proteksen blong Jeova. Hem i yusum paoa blong hem oltaem blong mekem i gud long yumi mo i laenap wetem ol narafala fasin blong hem—stret fasin, waes, mo lav. (Job 37:23; Jeremaea 10:12) Plante taem ol man we oli gat paoa oli spolem ol pua man mo olgeta we oli gat tingting daon jes blong kasem ol samting we olgeta nomo oli wantem, be Jeova i stap ‘leftemap ol puaman, i stap tekemaot olgeta long ol trabol blong olgeta’ mo hem i gat ‘paoa blong sevem olgeta.’ (Ol Sam 113:5-7; Aesea 63:1) Meri we i mama blong Jisas hem i gat fasin daon mo i no tinghae tumas long hem wan. Taswe hem i kasem save se ‘Hemia we i gat olgeta paoa’ i no stap tingbaot hem wan taem hem i soemaot paoa blong hem long olgeta we oli fraet long hem, mo hem i mekem tingting blong olgeta flas man i godaon mo i leftemap olgeta we oli stap daon.—Luk 1:46-53.

Jeova i Soemaot Paoa Blong Hem Long Ol Man Blong Wok Blong Hem

11. ?Wanem pruf we i soemaot paoa blong God we ol man Isrel oli luk long yia 1513 B.K.T.?

¹¹ Plante taem, Jeova i soemaot paoa blong hem long ol man blong wok blong hem. Wan long ol  taem ya hem i long Hil blong Sinae long 1513 B.K.T. * Long yia ya, ol man Isrel oli bin luk finis sam bigfala samting we oli soemaot paoa blong God. Ten trabol we oli spolem gud Ijip oli soemaot paoa blong han blong Jeova mo se ol god blong Ijip oli no gat paoa nating. Biaen long samting ya, merikel we i hapen taem oli krosem red si mo ol ami blong Fero oli lus i soemaot bakegen paoa blong God. Tri manis biaen, klosap long Hil blong Sinae, Jeova i invaetem ol man Isrel blong kam olsem ol ‘nambawan man blong hem, i winim ol narafala man long wol.’ Long saed blong olgeta, oli promes se: “Bambae mifala i mekem olgeta samting we [“Jeova,” NW] i talem.” (Eksodas 19:5, 8) Long taem ya, Jeova i soemaot wan klia pruf blong paoa blong hem. Long medel blong tanda mo laetning mo strong saon blong pupu, Hil ya blong Sinae i fulap long smok mo i seksek. Olgeta man we oli stap stanap longwe, oli fraet bigwan. Be Moses i talem long olgeta se ekspiryens ya i mas tijim olgeta blong fraet gud long God. Fraet ya i save pusum olgeta blong obei long Jeova, we i God blong olgeta, we i gat olgeta paoa, mo we hem nomo i trufala God.—Eksodas 19:16-19; 20:18-20.

12, 13. ?Wanem samting we i kamaot i mekem se Elaeja i livim wok blong hem, be olsem wanem nao Jeova i mekem hem i kam strong?

¹² Sam handred yia biaen, long taem blong Elaeja, God i soemaot paoa blong hem bakegen long Hil blong Sinae. Profet ya i luk finis paoa blong God we i wok. Long tri yia haf, God i “blokem ren i no kam long kantri ya” from fasin blong apostasi * blong ol man Isrel. (2 Kronikel 7:13) Long drae taem ya, ol pijin ya reven oli fidim Elaeja long vali blong Kerit, mo biaen wan merikel i mekem se smol flaoa mo oel blong wan wido woman i kam bigwan, blong hem i save givim kakae long Elaeja. Jeova tu i givim paoa long Elaeja blong i wekemap pikinini boe blong wido woman ya long ded. Laswan samting, long Hil blong Kamel, long wan bigfala traem blong pruvum se hu ya nao trufala God, faea i kam daon long heven mo i kakae sakrefaes blong Elaeja. (1 King 17:4-24: 18:36-40) Be nating se i olsem, i no longtaem biaen, Elaeja i kam fraet mo tingting blong hem i foldaon taem hem i harem se Jesebel i wantem kilim hem i ded. (1 King 19:1-4) Hem i ronwe long kantri ya, wetem tingting ya se wok blong hem olsem wan profet i finis. Nao wetem kaen fasin Jeova i soemaot long Elaeja hem wan, klia pruf blong bigfala paoa blong hem, blong mekem se Elaeja i harem gud mo i kam strong bakegen.

¹³ Taem Elaeja i stap haed long hol blong ston, hem i luk wan samting blong sapraes we i soemaot trifala paoa we Jeova i bos long olgeta: wan strong win, graon we i seksek, mo laswan samting wan faea. Be, taem Jeova i toktok long Elaeja, hem i “stap tok smosmol long hem.” Hem i givim sam moa wok long Elaeja blong mekem mo i talem long hem se i gat 7,000 trufala man blong wosip long Jeova i stap yet long kantri ya. (1 King 19:9-18) Olsem Elaeja, sipos tingting blong yumi i foldaon from we minista wok blong yumi i no karem frut, yumi save askem Jeova blong givim “paoa ya we i bigwan tumas”—paoa ya i save mekem yumi kam strong blong gohed blong prij we yumi no kam slak nating.—2 Korin 4:7.

Paoa Blong Jeova i Soemaot Klia se Bambae Ol Promes Blong Hem Oli Kamtru

14. ?Nem blong Jeova i soemaot wanem, mo olsem wanem paoa blong hem i joen wetem nem ya?

¹⁴ Paoa blong Jeova i joen wetem nem blong hem mo olgeta samting we hem i wantem blong mekem. Spesel nem ya Jeova, we i minim se “Hem i mekem i Kamtru,” i soemaot se hem i mekem hem wan i kam Man blong Mekem ol promes blong hem oli kamtru. I no gat wan samting no wan man we i save blokem God blong mekem ol stamba tingting blong hem oli karem frut, nating se ol man we oli no bilif, oli ting se ol promes blong God oli no save kamtru. Olsem Jisas i talem long ol disaepol blong hem, “God i save mekem olgeta samting.”—Matiu 19:26.

15. ?Wanem samting i mekem Ebraham mo Sera oli tingbaot se i nogat wan samting we i strong tumas we Jeova i no save mekem?

¹⁵ Blong mekem i kam klia, wantaem Jeova i bin promes long Ebraham mo Sera se bambae hem i mekem ol pikinini blong olgeta oli kam wan bigfala nesen. Be, tufala i no gat pikinini blong plante yia. Tufala i kam olfala tumas taem Jeova i talem long tufala we bambae promes ya i no longtaem i kamtru, mo Sera i laf. Blong ansa, enjel i talem se: ‘?Yutufala i ting se i gat samting i stap we i strong tumas, we Jeova i no save mekem?’ (Jenesis 12:1-3; 17:4-8; 18:10-14) Fo handred yia biaen, taem Moses i mekem ol pikinini blong Ebraham oli kam wanples olsem wan bigfala nesen long flat ples blong Moab, hem i mekem olgeta i tingbaot se God i mekem promes blong hem i kamtru. Moses i talem se: “Nao from we hem i lavem tumas ol bubu blong yumi  bifo, hem i jusumaot yumi blong yumi man blong hem. Mo long bigfala paoa blong hem, hem nomo i tekemaot yumi long Ijip, mo i stap holem promes blong hem blong givim kantri ya long yumi kam kasem tede. Mo nating we ol man long kantri ya oli plante moa winim yufala, mo oli strong moa long yufala, be sipos yufala i go blong mekem faet long olgeta, hem bambae i stap ronemaot olgeta long fes blong yufala, blong givim kantri ya i go long yufala.”—Dutronome 4:37,38.

16. ?From wanem nao ol Sadusi oli foldaon long mastik ya blong no bilif se man i save girap bakegen long ded?

¹⁶ Sam handred yia biaen, Jisas i tok blong jajem ol Sadusi, we oli no bilif long laef bakegen long ded. ?From wanem oli no wantem bilif long promes blong God blong mekem ol man oli laef bakegen long ded? Jisas i talem long olgeta se: “Yufala i no save tok blong Baebol, mo yufala i no save paoa blong God tu.” (Matiu 22:29) Baebol i mekem yumi sua se “ol dedman bambae oli harem voes blong [Pikinini blong man], nao bambae oli aot long beregraon blong olgeta.” (Jon 5:27-29) Sipos yumi save wanem we Baebol i talem long saed blong laef bakegen long ded, fasin blong yumi blong trastem paoa blong God bambae i mekem yumi sua se ol ded man bambae oli laef bakegen long ded. God “bambae i mekem we ded bambae i lus olgeta. . . . Hem i [“Jeova,” NW], mo hemia tok blong hem.”—Aesea 25:8.

17. ?Wetaem long fiuja we bambae yumi mas trastem Jeova long wan spesel fasin?

¹⁷ I no longtaem bambae i gat wan taem i stap kam we evriwan i nidim blong trastem paoa blong Jeova blong sevem man long wan rod we i spesel. Devel Setan bambae i traem faetem ol man blong God, mo bambae i luk olsem se oli no gat proteksen nating. (Esikel 38:14-16) Long taem ya nao God bambae i soem paoa blong hem blong sevem yumi, mo evriwan bambae oli save se hem i Jeova. (Esikel 38:21-23) Naoia hem i taem blong bildimap bilif blong yumi mo fasin blong yumi blong trastem God ya we i gat olgeta paoa blong mekem se tingting blong yumi i no hafhaf long impoten taem ya.

18. (a) ?Wanem ol gudfala samting we yumi save kasem sipos yumi tingting dip long paoa blong Jeova? (b) ?Wanem kwestin we bambae yumi tokbaot long nekis haf?

¹⁸ Yes, i gat plante risen blong tingting dip long paoa blong Jeova. Taem yumi tingbaot ol wok blong hem, samting ya i pusum yumi wetem tingting daon blong presem Bigfala Man we i Wokem yumi mo talem tangkiu from hem i yusum paoa blong hem long wan rod we i waes mo i soem lav. Bambae yumi no save fraet sipos yumi trastem Jeova blong ol ami. Bilif blong yumi long ol promes blong hem bambae i no save kam hafhaf. Rimemba tu se, God i wokem yumi olsem stret pija blong hem. Taswe, yumi gat paoa tu—nating se i long fasin we i smol nomo. ?Olsem wanem nao yumi save folem eksampel blong Man we i Wokem yumi long fasin blong soemaot paoa blong yumi? Bambae yumi tokbaot samting ya long nekis haf we bambae i kam biaen.

[Ol futnot]

?Yu Yu Save Ansa Long Ol Kwestin Ya?

• ?Olsem wanem nao olgeta samting we Jeova i wokem oli pruvum paoa blong hem?

• ?Wanem ol ami we Jeova i save yusum blong sapotem ol man blong hem?

• ?Wanem samfala taem we Jeova i soemaot paoa blong hem?

• ?Wanem pruf we yumi gat se Jeova bambae i mekem olgeta promes blong hem oli kamtru?

[Kwestin]

[Tok blong pija long pej 10]

“Leftemap ae blong yufala i go antap mo lukluk. ?Hu ya i wokem ol samting ya?”

[Credit Line]

Photo by Malin, © IAC/RGO 1991

[Tok blong pija long pej 13]

Tingting dip long ol samting we oli soem paoa blong Jeova i bildimap bilif blong yumi long ol promes blong hem