Ripot Long Wok Blong Kingdom

Oli Kasem Pei From Bilif Blong Olgeta

APOSOL Pol i wan man we i nambawan long fasin blong holem bilif, mo hem i talem long ol Kristin se olgeta tu oli mas wokem bilif long God. Hem i talem se: “Sipos wan man i wantem kam long God, hem i mas bilif we God i stap, mo we hem bambae i givim gudfala pei long olgeta we oli rili wantem faenem hem.” (Hibrus 11:6, NW) Naoia, bambae yumi luk tu stori we i kamaot long Mosambik. Tufala stori ya i soem olsem wanem Jeova i givim pei long man we i gat strong bilif mo i ansa long ol prea we oli kamaot long hat.

• Long Niassa, wan provins long not blong Mosambik, i gat wan sista we man blong hem i ded. Sista ya i stap wari se olsem wanem hem mo ol sikis pikinini blong hem bambae oli joen long Distrik Asembli ya, “Fasin Blong Laef We God i Glad Long Hem.” Sista ya i gat wan rod nomo blong winim mane, hemia blong salem ol kakae long wan maket long eria ya. Taem dei blong asembli i kam, sista ya i gat inaf mane blong pem tren blong hem mo famle blong hem i go long asembli, be oli no gat mane blong pem tren i kambak. Nating se i olsem, hem i trastem fulwan se bambae Jeova i givhan long hem. Ale hem i gohed wetem plan blong hem blong stap long asembli.

Nao hem wetem ol sikis pikinini blong hem, oli tekem tren oli go. Taem oli stap long tren, man we i lukaot long tren i kam luk sista ya blong jekemap tikit blong hem. Taem man ya i luk baj we sista ya i putum, hem i askem se baj ya i saen blong wanem. Nao sista ya i talem long hem se baj ya i blong soem se hem i stap go long wan distrik asembli blong ol Witnes blong Jeova. Ale, man ya i askem se, “?Bambae yufala i holem asembli ya weples?” Sista ya i talem long hem se asembli ya bambae i stap long provins blong Nampula, samting olsem 300 kilometa longwe. !Nao sista ya i sek se man ya i talem long hem blong pem haf praes nomo! Ale, wetem haf mane we i stap, man ya i givim tikit long sista ya mo famle blong hem blong oli save kambak bakegen long tren ya. !Sista ya i glad we i glad se hem i bin trastem Jeova!—Ol Sam 121:1, 2.

• Blong samwe long 25 yia, wan woman we i strong long skul blong hem, i bin stap prea long God blong i soem stret rod long hem blong mekem wosip. Skul we woman ya i stap go long hem i joenem ol lafet blong jos wetem ol kastom blong ples blong hem. Be woman ya i no sua se God i glad long wan wosip olsem.

Woman ya i talem se: “Oltaem, mi tingbaot tok blong Jisas long Matiu 7:7 se: ‘Yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala.’ Vas ya i stap oltaem long tingting blong mi. From samting ya, evri dei mi prea long God, mi askem hem blong i soemaot trutok long mi. Wan dei, pasta blong jos blong mifala i askem long ol man we oli stap mekem maket long ples ya, blong givim sam mane mo sam samting long hem, blong bambae hem i save askem God blong i blesem olgeta. Long tingting blong mi, samting we pasta ya i askem, i no laenap wetem Baebol. Ale, ol narafala oli givim samting we hem i askem, be mi nomo mi no givim wan samting long hem. Taem pasta ya i luk se mi no givim wan ‘presen’ long hem, hem i stat blong tok daonem mi long fored blong olgeta memba blong jos. Stret long dei ya, mi luksave se hemia i no stret rod blong wosip we God i wantem yumi folem, ale mi lego jos ya. Be, mi gohed blong prea long God blong i givhan long mi blong faenem trutok.

“Wan dei, mi mekemap tingting blong mi, mi no fraet, mi go toktok wetem wan famle blong mi we hem i wan Witnes blong Jeova. Hem i givim wan traket long mi, mo taem mi ridim traket ya, wantaem nomo mi luksave se God i ansa long ol prea blong mi. Biaen, man we i stap wetem mi, hem tu i luksave ol trutok blong Baebol, mo mitufala i stretem mared blong mitufala folem loa. Be samtaem biaen, hasban blong mi i sik bigwan. Gogo kasem taem we hem i ded, hem i leftemap tingting blong mi blong gohed long rod blong trutok, blong bambae mitufala i save luk mitufala bakegen long Paradaes.

“Long ful laef blong mi, bambae mi talem bigfala tangkiu long Jeova, from we hem i ansa long ol prea blong mi mo i soem stret rod long mi blong mi wosipim hem. God i ansa long ol prea blong mi long wan narafala rod bakegen. Olgeta eit pikinini blong mi oli givim laef blong olgeta long Jeova blong mekem wok blong hem.”