Paoa Blong Prea

San i stap godaon long taon ya Naho long Medel Is. Wan man Siria, nem blong hem Eliesa i kamtru wetem ten kamel, mo i stop long wan wel afsaed long taon. Nating se Eliesa i taed mo i tosta, hem i tingbaot nid blong narafala fastaem. Hem i aot long wan kantri farawe, i kam long ples ya blong faenem wan waef blong boe blong masta blong hem.Mo tu, hem i mas faenem waef ya long famle blong masta blong hem. ?Olsem wanem bambae hem i mekem wok ya we i no isi nating?

ELIESA i bilif long paoa blong prea. Hem i bilif strong long God, olsem wan pikinini we i trastem fulwan papa blong hem. Eliesa i askem wetem tingting daon se: “Hae God, yu yu God blong masta blong mi. Plis yu mekem wok ya blong mi i go gud tede. Plis yu soemaot we yu yu lavem masta blong mi, mo yu stap holem promes ya blong yu long hem yet. !Yu luk! Naoia, mi mi stap long wel ya, mo bambae i no longtaem ol yang gel blong taon ya oli kam long ples ya blong kasem wota. Bambae mi askem long wan long olgeta se, ‘?Plis, yu save givim smol wota long mi, blong mi dring?’ Sipos hem i talem se, ‘Ale, yu dring, mo bambae mi go tekem wota blong ol kamel blong yu tu,’ plis yu letem we tok ya i saen we yu yu jusumaot gel ya, blong man ya blong yu Aesak bambae i mared long hem. Long fasin ya, bambae mi mi save we yu yu holem promes ya blong yu yet, long masta blong mi.”—Jenesis 24:12-14.

Fasin ya we Eliesa i trastem paoa blong prea, i no blong nating nomo. !Traem tingbaot, faswan woman we i kam long wel, hem i smol bubu blong brata blong Ebraham! Woman ya, nem blong hem Rebeka, mo hem i no mared, fasin blong hem i klingud, mo hem i naes tu. Samting we i mekem yumi sapraes se, Rebeka i no jes givim wota long Eliesa, be wetem kaen fasin, hem i givim wota long ol kamel blong hem tu. Biaen, afta we famle ya i toktok tugeta, Rebeka i agri blong folem Eliesa blong go long wan kantri farawe, blong hem kam waef blong Aesak, boe blong Ebraham. !Hemia wan klia ansa long prea blong Eliesa, long wan taem blong bifo we God i bin mekem sam merikel!

Yumi save lanem plante samting long prea blong Eliesa. Prea ya i soemaot se Eliesa i gat strong bilif, tingting blong hem i stap daon, mo hem i tingbaot nid blong ol narafala. Prea blong Eliesa i soemaot tu se hem i folem gud rod ya we Jeova i stap folem blong wok wetem ol man. I sua se Eliesa i save long spesel fasin fren we God i gat wetem Ebraham mo promes blong Hem se bambae hem i yusum wan laen blong Ebraham blong blesem olgeta man long wol. (Jenesis 12:3) Taswe, Eliesa i statem prea blong hem wetem tok ya se: “Hae God, yu yu God blong masta blong mi.”

Jisas Kraes nao i laen blong Ebraham we bambae God i yusum blong blesem olgeta man we oli gat fasin obei. (Jenesis 22:18) Tede, sipos yumi wantem se God i ansarem ol prea blong yumi, yumi mas gat tingting daon, mo luksave rod we Jeova i stap folem blong wok wetem ol man, tru long Pikinini blong hem. Jisas Kraes i talem se: “Sipos yufala i joen gud long mi, mo ol tok blong mi i stap oltaem long yufala, wanem samting we yufala i wantem, yufala i save askem, nao bambae yufala i kasem.”—Jon 15:7.

 Aposol Pol, we i wan man blong Kraes, i luksave se tok ya i tru nomo. Bilif we hem i gat long paoa blong prea i no blong nating nomo. Hem i leftemap tingting blong ol narafala Kristin blong talemaot ol wari blong olgeta long God tru long prea. Hem i talem se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:6, 7, 13) ?Samting ya i minim se God i givim evri samting we Pol i askem long prea blong hem? Bambae yumi luk.

God i No Givim Evri Samting We Hem i Askem

Taem Pol i stap mekem minista wok blong hem, hem i safa long wan trabol we hem i talem se i olsem, “nil blong aranis we i stap stikim mi.” (2 Korin 12:7) Maet trabol ya, hemia se hem i harem nogud tumas long tingting mo filing blong hem from nogud fasin we ol man blong agensem oli mekem long hem mo trabol we hem i kasem long “sam man we oli giaman se oli brata.” (2 Korin 11:26; Galesia 2:4) No maet hem i harem nogud tumas from trabol we i kasem ae blong hem. (Galesia 4:15) Nomata wanem trabol hem i kasem, “nil blong aranis” ya i mekem se Pol i no moa strong long bodi blong hem. Hem i raetem se: “Tri taem mi askem long Masta blong yumi, blong hem i tekemaot” mi long trabol ya. Be samting we Pol i askem, i no kamtru. God i eksplenem long Pol se, ol blesing long saed blong spirit we God i givim finis, olsem paoa blong winim ol traem, hemia i naf. Mo tu, God i talem long hem se: “Taem we yu yu no gat paoa, paoa blong mi i save kam strong moa long yu.”—2 Korin 12:8, 9.

?Yumi lanem wanem long eksampel blong Eliesa mo Pol? Yumi lanem se Jeova God i stap lesin long ol prea blong olgeta we oli rili wantem mekem wok blong hem wetem tingting daon. Be hemia i no minim se oltaem, hem i stap givim samting we oli askem, from we God i save ol samting we bambae oli hapen long fiuja. Hem i save gud wanem we i gud long yumi, i bitim yumi. Samting we i moa impoten se, oltaem hem i stap mekem ol samting we i laenap wetem stamba tingting blong hem we i stap long Baebol.

Wan Taem Blong Kamgud Bakegen Long Saed Blong Spirit

God i promes se long Wan Taosen Yia Rul blong Kraes, bambae hem i mekem olgeta man long wol oli kamgud bakegen long saed blong bodi, tingting mo filing. (Revelesen 20:1-3; 21:3-5) Ol trufala Kristin oli stap wet wetem strong tingting blong luk promes ya. Oli bilif fulwan se paoa blong God i naf blong mekem promes ya i kamtru. Naoia, oli save se bambae God i no mekem oli kamgud bakegen tru long wan merikel. Nating se i olsem, oli prea long God, oli askem hem blong i leftemap tingting blong olgeta mo blong givim paoa we oli nidim blong fesem ol traem. (Ol Sam 55:22) Taem oli sik, oli prea long God, oli askem hem blong i lidim olgeta blong kasem ol beswan meresin we oli naf blong pem.

Sam skul oli talem long man we i sik se hem i mas prea sipos hem i wantem kamgud naoia. Oli pulum tingting blong hem i go long ol merikel we Jisas mo ol aposol blong hem oli bin mekem blong winim sik blong ol man. Be i gat wan stret risen from wanem Jisas mo ol aposol oli mekem ol merikel. Ol merikel ya oli blong pruvum se Jisas Kraes, hem i trufala Mesaea, mo oli soemaot se God i lego nesen blong Isrel, mo i jusum niufala Kristin kongregesen. Long taem ya, i nidim merikel blong mekem bilif blong niufala Kristin kongregesen i kam strong. Taem niufala kongregesen ya i stanap strong, mo i gohed blong gru, presen ya blong mekem merikel i “finis.”—1 Korin 13:8, 11.

Long spesel taem ya we yumi stap long hem, Jeova God i stap lidim ol man blong hem blong mekem wan wok we i moa impoten. Wok ya i blong mekem ol man oli kamgud bakegen long saed blong spirit. Long smoltaem ya we i stap yet, i impoten tumas we ol man oli obei long tok ya we i singaot olgeta se: “Naoia Hae God i stap klosap long yumi, mo yufala i save faenem hem. !Yufala i mas lukaot hem, mo yufala i mas prea long hem! Yufala we i stap mekem ol fasin nogud, yufala i mas lego ol fasin ya. Yufala i mas livim ol rabis tingting blong yufala. Yufala i mas kambak long Hae God ya we i God blong yumi. Hem i gat sore long yumi, mo i kwik blong fogivim yumi, i tekemaot ol sin blong yumi.”—Aesea 55:6, 7.

Wok blong talemaot gud nius blong Kingdom blong God i givim jans long ol man we oli tanem tingting blong olgeta blong oli kamgud bakegen long saed blong spirit. (Matiu 24:14) Jeova God i givim paoa long ol man blong hem blong mekem wok ya we i save sevem laef blong narafala. Long rod ya, hem i stap halpem plante milian man long olgeta nesen, blong tanem tingting blong olgeta from ol sin blong olgeta, mo blong oli frengud wetem hem bifo we hem i spolem rabis wol ya. Olgeta ya we oli prea wetem fulhat blong olgeta blong kamgud bakegen long saed blong spirit, mo olgeta we oli stap askem long God blong mekem ol samting oli kamgud bakegen, God i stap ansa long ol prea blong olgeta.

[Credit Line blong pija long pej 3]

Eliezer and Rebekah/The Doré Bible Illustrations/Dover Publications