‘God, Plis Yu Sanem Laet Blong Yu i Kam’
‘God, Plis Yu Sanem Laet Blong Yu i Kam’
“Plis yu sanem laet blong yu mo trutok blong yu i kam. Mi wantem blong tufala i lidim mi.”—OL SAM 43:3.
1. ?Olsem wanem Jeova i soemaot ol stamba tingting blong hem?
JEOVA i tingbaot ol man blong hem taem hem i stap soemaot ol stamba tingting blong hem long olgeta. Hem i no mekem olgeta trutok oli kam klia wantaem, olsem strongfala laet we i saenaot wantaem nomo, i mekem ae i dak, nogat. Be hem i mekem laet ya blong trutok i kam klia sloslou. Rod we yumi stap wokbaot long hem blong go kasem laef, maet yumi save talem se hem i olsem wan longfala rod we wan man i stap wokbaot long hem. Man ya i girap eli long moning, taem ples i haf tudak yet, mo i stat wokbaot. Taem san i stap go antap sloslou, man ya i save luk klia sam samting raonabaot long hem. Be ol narafala samting, hem i no save luk klia yet. Nao taem san i stap gohed blong go antap, man ya i save lukluk i go longwe moa, i luk klia olgeta samting we oli stap farawe. Samting ya i sem mak long laet long saed blong spirit we God i givim. Hem i letem yumi blong luksave sam trutok fastaem, afta sam narawan bakegen. Pikinini blong God, Jisas Kraes, i folem sem fasin taem hem i mekem laet long saed blong spirit i saenaot long yumi. Naoia, i gud yumi luk olsem wanem Jeova i mekem laet blong hem i saenaot long ol man blong hem bifo mo long taem blong yumi.
2. ?Olsem wanem Jeova i mekem laet i saenaot long ol man blong hem bifo long Kristin taem?
2 Olgeta we oli raetem Sam 43, maet hemia ol pikinini blong Kora. Olgeta ya oli ol Livaet, taswe, oli gat wok ya blong tijim Loa blong God long ol man. (Malakae 2:7) Yes, Jeova i Bigfala Tija blong olgeta, mo oli luk long hem olsem Stamba blong waes we i bigwan olgeta. (Aesea 30:20) Ol man we oli raetem Sam ya, oli prea se: “God, . . . Plis yu sanem laet blong yu mo trutok blong yu i kam. Mi wantem blong tufala i lidim mi.” (Ol Sam 43:1, 3) Sipos ol man Isrel oli wantem se Jeova i tijim olgeta long ol rod blong hem, oli mas stap tru long hem oltaem. Sam handred yia biaen, Jeova i mekem i gud tumas long olgeta, i sanem wan laet long olgeta mo i givim wan trutok we i nambawan. God i mekem samting ya taem hem i sanem Pikinini blong hem, Jisas Kraes, i kam long wol.
3. ?Long wanem rod tijing blong Jisas i traem ol man Jiu?
3 Pikinini blong God, Jisas Kraes, hem i rili “olsem laet blong ol man long wol.” (Jon 8:12) Hem i tijim ol man “long plante samting long parabol”—ol niufala samting. (Mak 4:2) Hem i talem long Ponjes Paelet se: “Kingdom blong mi i no haf blong wol ya.” (Jon 18:36, NW) Long lukluk blong wan man Rom, hemia i wan niufala tingting. Mo i sua se hem i wan niufala tingting tu long ol man Jiu we oli strong blong leftemap nesen blong olgeta, from we oli ting se bambae Mesaea i kafsaedem gavman blong Rom mo i stanemap kingdom blong Isrel bakegen. Jisas i olsem laet we Jeova i sanem, be ol lida blong ol man Jiu oli no glad long tok blong hem. “Ol lida ya oli wantem tumas blong ol man oli glad long olgeta, i winim we oli wantem blong God i glad long olgeta.” (Jon 12:42, 43) Plante man long taem ya, oli jusum blong folem ol kastom blong man, be oli no akseptem laet long saed blong spirit mo trutok we God i sanem i kam long olgeta.—Ol Sam 43:3; Matiu 13:15.
4. ?Olsem wanem yumi save se bambae ol disaepol blong Jisas oli gohed blong gru long save blong olgeta?
4 Be, i gat sam man mo woman we hat blong olgeta i stret. Olgeta ya, oli glad blong akseptem trutok we Jisas i tijim, nao oli gohed blong kasem save long ol stamba tingting blong God. Nating se klosap nao bambae Tija blong olgeta i ded, be oli gat plante samting yet blong lanem. Jisas i talem long olgeta se: “Mi gat plante narafala samting yet blong talem long yufala. Be naoia yufala i no save kasem olgeta evriwan, oli strong tumas yet long yufala.” (Jon 16:12) Yes, ol disaepol bambae oli gohed blong kasem moa save long trutok blong God.
Laet i Gohed Blong Saenaot
5. ?Wanem kwestin i stanap long faswan handred yia, mo hu i mas stretem bisnes ya?
5 Afta we Jisas i ded mo i laef bakegen, laet we i kamaot long God i saen, i kam strong moa bitim bifo. Long wan vison we Pita i luk, Jeova i soemaot se, stat long taem ya, ol Hiten man we oli no sakomsaes oli save kam man blong Kraes. (Ol Wok 10:9-17) !Vison ya i kamaot long God! Nating se i olsem, biaen i gat wan kwestin i stanap: ?Olsem wanem long ol Hiten man ya we oli kam Kristin? ?Jeova i wantem se oli sakomsaes? Kwestin ya, Jeova i no givim ansa blong hem long vison, ale ol Kristin oli stap rao tumas from bisnes ya. Rao ya i mas stop, sipos no, bambae hem i spolem nambawan fasin joen blong olgeta. From samting ya, long Jerusalem, “ol aposol mo ol elda . . . oli mekem miting blong tokbaot bisnes ya.”—Ol Wok 15:1, 2, 6.
6. ?Ol aposol mo ol elda oli folem wanem rod taem oli stap lukluk long kwestin long saed blong sakomsaes?
6 ?Olsem wanem olgeta we oli stap long miting ya bambae oli faenemaot tingting blong Jeova long saed blong ol Hiten man we oli bilif? Jeova i no sanem wan enjel i kam blong lidim miting blong olgeta, mo tu, hem i no givim wan vison long olgeta blong stretem bisnes ya. Nating se i olsem, Jeova i no livim ol aposol mo ol elda we hem i no soem wan rod long olgeta. Oli skelem gud ol ripot we oli harem long sam Kristin man Jiu we oli bin luk olsem wanem God i bin stat blong wok wetem ol man blong narafala nesen, mo i kafsaedem tabu spirit long ol Hiten man we oli no sakomsaes. Mo tu, oli jekemap Baebol blong faenem rod we oli mas folem long saed ya. Ale biaen, disaepol Jemes i givim wan tok we i stanap long klia save blong wan vas blong Baebol. Nao, taem oli skelem gud ol pruf we oli gat, oli kasem save klia tingting blong God long saed ya. Ol man blong narafala nesen, oli no nidim blong sakomsaes blong God i glad long olgeta. Ale, kwiktaem nomo, ol aposol mo ol elda oli raetemdaon disisen ya blong ol Kristin brata sista oli save folem.—Ol Wok 15:12-29; 16:4.
7. ?Long wanem rod ol Kristin long faswan handred yia oli gohed blong kam antap?
7 Bighaf blong ol man Jiu we oli kam Kristin, oli no mekem olsem ol lida blong skul blong ol man Jiu we oli wantem holemtaet ol kastom blong ol bubu blong olgeta. Ol Kristin ya, oli glad tumas taem oli kasem nambawan niufala save ya blong God, we i soemaot stamba tingting blong hem long saed blong olgeta man blong narafala nesen. Oli akseptem niufala save ya, nating se oli mas jenisim tingting we oli gat fastaem long saed blong ol Hiten man. Ale, Jeova i blesem olgeta from tingtingdaon we oli soem, nao “olgeta man long jos long evri ples oli stap kam strong moa long bilif blong olgeta, Mo evri dei, namba blong olgeta i stap kam antap moa.”—Ol Wok 15:31; 16:5.
8. (a) ?Olsem wanem yumi save se bambae i gat moa laet i saenaot afta long en blong faswan handred yia? (b) ?Wanem ol impoten kwestin we bambae yumi tokbaot?
8 Laet long saed blong spirit i gohed blong saenaot go kasem en blong faswan handred yia. Be Jeova i no soemaot evri haf blong ol stamba tingting blong hem long ol faswan Kristin. Aposol Pol i talem long ol Kristin blong faswan handred yia se: “Naoia yumi save luk fasin blong God, olsem we yumi stap luk long wan glas we i no klia gud.” (1 Korin 13:12) Man i no save luk gud ol samting long wan glas olsem. Fastaem, bambae ol man oli gat smol save nomo long laet long saed blong spirit. Afta long ded blong ol aposol, laet ya i no moa saenaot blong smoltaem, be long ol yia we oli pas i no longtaem, save long saed blong Baebol i kam antap bigwan. (Daniel 12:4) ?Olsem wanem Jeova i mekem laet i saenaot long ol man blong hem tede? ?Mo yumi mas mekem wanem taem yumi stap kasem moa save long Baebol?
Sloslou Laet i Stap Kam Strong Moa
9. ?Ol faswan Baebol Studen oli folem wanem spesel fasin blong stadi Baebol we i wokgud?
9 Long taem blong yumi, smol laet i saenaot fastaem long en blong ol yia 1800, taem wan grup blong ol Kristin man mo woman oli stat blong mekem dip stadi long Baebol. Olgeta ya, oli faenem wan gudfala rod blong stadi Baebol. Wan long olgeta i askem kwestin, ale olgeta evriwan oli jekemap ol vas blong Baebol we oli joen wetem kwestin ya. Taem i luk olsem se wan vas i agensem narafala vas, ol trufala Kristin ya oli traehad blong faenem olsem wanem tufala vas ya i save laenap. Grup ya we i tekem nem ya, ol Baebol Studen (nem blong ol Witnes blong Jeova long taem ya) oli defren long ol lida blong skul long taem ya, from we oli gat strong tingting blong letem Tabu Baebol i lidim olgeta, be i no ol kastom mo bilif we man nomo i stanemap. Afta we oli skelem gud olgeta pruf we oli faenem long Baebol, oli raetemdaon ansa blong kwestin ya. Long rod ya, save blong olgeta long saed blong plante stamba tijing blong Baebol, i kam klia.
10. ?Wanem ol buk we Charles Taze Russell i raetem blong givhan blong stadi Baebol?
10 Nambawan long ol Baebol studen ya, hemia Charles Taze Russell. Hem i raetem sikis buk we oli karem nem ya Studies in the Scriptures. Ol buk ya oli givhan bigwan blong stadi. Long taem ya, brata Russell i gat plan blong raetem namba seven blong ol buk ya, blong eksplenem buk blong Esikel mo Revelesen long Baebol. Hem i talem se: “Taem mi kasem save ya, bambae mi raetem namba Seven Volium.” Be hem i gohed, i se: “Sipos Masta i soem rod long wan narafala man, man ya i save raetem.”
11. ?Olsem wanem wan stret taem i joen wetem fasin blong yumi blong kasem save ol stamba tingting blong God?
11 Tok ya we C. T. Russell i talem, i soemaot wan impoten samting long saed blong save we yumi gat long sam vas blong Baebol—oli blong wan stret taem. Brata Russell i kasem save se hem i no naf blong fosem laet blong i saenaot long buk blong Revelesen. Hemia i sem mak long man ya we i stap long wan longfala wokbaot, we i no save mekem san i girap bifo long stret taem blong hem.
Save i Kam Klia —Be Long Stret Taem Blong God
12. (a) ?Wanem stret taem blong kasem beswan save long profet tok blong Baebol? (b) ?Wanem i soem se fasin blong yumi blong kasem save long profet tok blong Baebol i dipen long stret taem we God i makemaot finis? (Lukluk futnot.)
12 Ol aposol oli kasem save long plante profet tok long saed blong Mesaea, jes afta we Jisas i ded mo i laef bakegen. Long sem fasin, ol Kristin tede oli kasem fulwan save long wan profet tok blong Baebol, jes afta we profet tok ya i kamtru. (Luk 24:15, 27; Ol Wok 1:15-21; 4:26, 27) Buk blong Revelesen i fulap wetem ol profet tok. Taswe, blong kasem save klia long ol profet tok blong hem, yumi mas wet blong oli kamtru fastaem. Eksampel, C. T. Russell i no naf blong kasem stret mining blong anamol ya we i red we i red, we Revelesen 17:9-11 i tokbaot. Hemia from we tufala ogenaesesen we anamol ya i pija blong hem, hemia Ligof Nesen mo Yunaeted Nesen, oli no bin stanap yet long taem blong hem. *
13. ?Samtaem, wanem i hapen taem laet i saenaot i go long wan poen blong Baebol?
13 Taem ol faswan Kristin oli kasem save se ol Hiten man we oli no sakomsaes oli save kam Kristin, jenis ya i pulum ol aposol mo ol elda blong oli lukluk bakegen long fulwan bisnes long saed blong sakomsaes. Rod ya i stret long taem blong yumi tede. Strongfala laet we i saenaot i go long wan poen blong Baebol, samtaem i mekem se ol tabu man blong God, “slef ya we i stret mo waes,” i lukluk bakegen long ol save we oli joen wetem poen ya. Bambae yumi luk wan eksampel we i jes kamaot i no longtaem.—Matiu 24:45, NW.
14-16. ?Olsem wanem wan jenis i gat paoa long save we yumi gat long tempel long saed blong spirit we Esikel japta 40 kasem 48 i tokbaot?
14 Long 1971, oli prentem buk ya “The Nations Shall Know That I Am Jehovah”—How? Buk ya i eksplenem profet tok blong Esikel. Wan japta blong buk ya i tokbaot wan smol haf blong vison we Esikel i luk long saed blong wan tempel. (Esikel, japta 40-48) Long taem ya, impoten samting we buk ya i makem, hemia se olsem wanem vison blong Esikel long saed blong tempel bambae i kamtru long niufala wol.—2 Pita 3:13.
15 Be tufala haf insaed long Wajtaoa blong Desemba 1, 1972, oli gat paoa long save we yumi gat long vison blong Esikel. Tufala haf ya i eksplenem bigfala tempel long saed blong spirit we aposol Pol i tokbaot long Hibrus japta 10. Wajtaoa ya i eksplenem se rum we i Tabu mo yad we i insaed olgeta long tempel long saed blong spirit, i joen wetem laef blong ol tabu man taem oli stap yet long wol. Sam yia biaen, taem oli stadi bakegen long Esikel japta 40-48, oli luksave se tempel long saed blong spirit i stap wok tede, taswe, samting ya i minim se tempel we Esikel i luk long vison, hem tu i stap wok tede. ?Olsem wanem?
16 Long vison blong Esikel, hem i luk we ol pris oli stap wokbaot olbaot insaed long ol bigfala yad blong tempel, oli stap wok blong givhan long ol man Isrel we oli no long laen blong pris. I klia se ol pris ya oli pija blong “kampani blong pris mo king,” hemia ol tabu man blong Jeova. (1 Pita 2:9, NW) Be, bambae oli no wok insaed long bigfala yad blong tempel long wol ya tru long ol Taosen Yia Rul blong Kraes. (Revelesen 20:4) Long bighaf blong taem ya, no maet long olgeta taem ya, ol tabu man bambae oli wok blong God long tempel long saed blong spirit, insaed long Rum ya we i Tabu we i Tabu, hemia “long heven stret.” (Hibrus 9:24) Long vison blong Esikel, hem i luk we ol pris oli stap wokbaot olbaot insaed long ol bigfala yad blong tempel. Taswe, samting ya i soem se vison ya i mas kamtru long taem blong yumi, taem sam long ol tabu man oli stap yet long wol ya. From samting ya, Wajtaoa blong Maj 1, 1999, i soem wan smol jenis long saed blong poen ya. Olsem nao, laet long saed blong spirit i gohed blong saenaot i go long profet tok blong Esikel kam kasem en blong ol yia 1900.
Rere Blong Jenisim Tingting Blong Yu
17. ?Wanem sam tingting we yu jenisim taem yu kasem save long trutok, mo olsem wanem samting ya i givhan long yu?
17 Man we i rili wantem kasem save long trutok, hem i mas rere blong ‘tanem olgeta tingting blong hem, blong mekem oli ona long Kraes.’ (2 Korin 10:5) I no isi oltaem blong mekem samting ya, antap moa, sipos yumi bin holem ol tingting ya longtaem finis. Eksampel, taem yu no lanem trutok yet, maet yu mo famle blong yu, yufala i stap joen blong mekem lafet blong tingbaot sam tabu dei blong jos. Be taem yu stat blong stadi Baebol, yu luksave se ol lafet ya oli kamaot long ol hiten man. Fastaem, maet yumi no wantem lego ol lafet ya. Be biaen, lav we yumi gat long God i kam moa strong, i winim filing we yu gat long saed blong jos, nao yu lego ol lafet ya we God i no glad long olgeta. ?Yu ting se Jeova i no blesem disisen blong yu? Si hem i blesem yu.—Skelem wetem Hibrus 11:25.
18. ?Yumi mas mekem wanem taem save we yumi gat long wan trutok blong Baebol i kam klia?
18 Oltaem, yumi kasem gudfala frut taem yumi mekem ol samting we God i wantem. (Aesea 48:17, 18) !Taswe, taem tingting we yumi gat long saed blong wan vas i jenis from we vas ya i kam klia moa, i gud we yumi glad from ol niufala trutok ya! Tru ya, fasin ya we trutok i stap kam klia moa i pruvum se yumi stap long stret rod. Hemia “rod we ol stret man oli stap wokbaot long hem.” Rod ya “fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.” (Ol Proveb 4:18) I tru se naoia, yumi stap luk sam stamba tingting blong God “olsem we yumi stap luk long wan glas we i no klia gud.” Be long stret taem we God i makemaot finis, bambae yumi luk we olgeta trutok oli kam klia gud. Sipos yumi wantem luk taem ya, yumi mas stanap strong mo wokbaot oltaem long “rod ya.” Go kasem taem ya, i gud we yumi glad, yumi harem gud from olgeta trutok we Jeova i soemaot long yumi finis, mo yumi wet long hem blong soemaot ol narafala trutok we yumi no kasem klia save long olgeta yet.
19. ?Wanem wan rod blong soem se yumi laekem trutok?
19 ?Wanem gudfala rod we yumi save folem blong soemaot lav blong yumi from laet we yumi kasem? Wan rod, hemia blong ridim Tok blong God oltaem—evri dei sipos yumi naf. ?Yu yu gat wan program blong ridim Baebol oltaem? Tufala magasin ya Wajtaoa mo Wekap!, tufala tu i fulap long ol nambawan kakae long saed blong spirit we yumi save tekem. Antap long hemia, i gat ol buklet, mo ol buk, we yumi kasem blong givhan long yumi. ?Mo olsem wanem long ol ripot blong wok blong prij we oli stap insaed long Yearbook of Jehovah’s Witnesses, we oli leftemap tingting blong yumi bigwan?
20. ?Olsem wanem laet we i saenaot i joen wetem trutok mo fasin blong go long ol Kristin miting?
20 Yes, long rod we i nambawan, Jeova i ansa long prea we i stap long Ol Sam 43:3. Long en blong vas ya, yumi ridim se: “[Plis, yu letem laet mo trutok blong yu] i tekem mi mi kambak long Saeon, tabu hil ya blong yu, tufala i tekem mi mi kamtru long ples blong yu we yu yu stap long hem.” ?Yu yu stap wet long taem ya we bambae yu joen wanples wetem wan bigfala hip blong man blong wosip long Jeova? Tijing long saed blong spirit we yumi kasem long ol Kristin miting i wan impoten rod we Jeova i stap yusum blong mekem laet i saenaot tede. ?Yumi save mekem wanem blong gat moa tangkiu from ol Kristin miting? Mifala i askem yufala blong tingbaot poen ya wetem prea long haf we i kam biaen.
[Futnot]
^ Afta we C. T. Russell i ded, oli mekem rere namba seven volium blong buk ya Studies in the Scriptures, blong eksplenem buk blong Esikel mo Revelesen. Buk ya, haf blong hem i stanap long ol tok we brata Russell i bin talem long saed blong Esikel mo Revelesen. Be, i no stret taem yet blong soemaot ol mining blong ol profet tok, mo fasin blong eksplenem mining blong tufala buk ya i no klia gud long namba seven volium blong Studies in the Scriptures. Long ol yia we oli kam biaen, kaen fasin blong Jeova mo ol samting we oli kamaot long wol, oli mekem ol Kristin oli luksave mining we i moa stret long saed blong ol profet tok long tufala buk ya.
?Yu Yu Save Ansa?
• ?From wanem Jeova i soemaot ol stamba tingting blong hem sloslou?
• ?Olsem wanem ol aposol mo ol elda long Jerusalem oli stretem kwestin long saed blong sakomsaes?
• ?Wanem fasin blong stadi Baebol we ol faswan Baebol Studen oli folem, mo from wanem fasin ya i spesel?
• Eksplenem olsem wanem God i stap mekem laet blong hem i saenaot long stret taem blong hem.
[Kwestin]
[Tok blong pija long pej 12]
Charles Taze Russell i save se bambae laet i saenaot i go long buk blong Revelesen long stret taem we God i makemaot finis