Jisas Kraes i Save Halpem Yumi

TAEM Jisas Kraes i stap long wol ya, samting we hem i mekem blong halpem ol man i nambawan tumas. Samting ya i tru nomo, taswe wan man i tokbaot plante samting we oli kamaot long laef blong Jisas. Man ya we i bin luk stret ol samting ya wetem ae blong hem, i talem se: “Nao i gat plante narafala samting we Jisas i mekem. Mo sipos ol man oli raetem daon ol samting ya evriwan long ol buk, mi mi ting se bambae i no gat i naf rum long wol ya blong holem ol buk ya.” (Jon 21:25) From we Jisas i mekem plante samting taem hem i stap long wol ya, maet yumi askem se: ‘?Olsem wanem hem i save halpem yumi naoia we hem i stap long heven? ?Yumi save harem gud long fasin sore we Jisas i gat long yumi?’

Ansa blong ol kwestin ya i kasem hat blong yumi mo i mekem yumi harem gud tumas. Baebol i talem long yumi se Kraes “i go insaed long heven stret, mo naoia hem i stap stanap long fes blong God blong toktok long saed blong yumi.” (Hibrus 9:24) ?Wanem ya we hem i stap mekem long saed blong yumi? Aposol Pol i eksplenem se: “Taem Kraes i go insaed long Haos Tapolen ya, hem i go stret insaed long Rum we i Tabu we i Tabu [“long heven stret”], be hem i no mekem olsem we ol narafala hae pris oli mekem. Hem i no tekem blad blong man nani mo blad blong smol bul blong tekemaot ol sin blong ol man, nogat. Hem i tekem blad blong hem nomo, nao i go insaed wan taem nomo, i mekem wok ya blong tekemaot ol sin blong yumi, mo i mekem yumi fri, nao bambae yumi fri gogo i no save finis.”—Hibrus 9:12; 1 Jon 2:2.

!Hemia wan gud nius ya! Ol wok we Jisas i mekem blong halpem ol man oli no finis nomo long wol ya. Taem hem i go antap long heven, hem i save mekem moa samting blong halpem ol man. Hemia from we i God ya we i kaen tumas, i jusumaot Jisas olsem “wan man blong wok long saed blong ol man”—wan hae pris—“long raet saed blong bigfala jea blong God ya we i gat olgeta paoa.”—Hibrus 8:1, 2, NW.

“Wan Man Blong Wok Long Saed Blong Ol Man”

Long heven, Jisas bambae i kam olsem man blong wok long saed blong olgeta man long wol. Bambae hem i mekem wan wok we i sem mak olsem hemia we ol hae pris blong Isrel oli mekem long saed blong ol man blong wosip long God long taem bifo. ?Wanem wok ya? Pol i eksplenem se: “Ol narafala hae pris ya, God i putumap olgeta blong oli stap givim presen long hem, mo blong oli stap kilim anamol blong mekem sakrefaes blong tekemaot ol sin blong ol man. Mo long sem fasin, Hae Pris ya blong yumi [Jisas we i go antap long heven], hem tu i mas gat samting blong givim i go long God.”—Hibrus 8:3.

Jisas i gat wan samting blong givim, mo samting ya i moa gud i bitim wanem we hae pris blong Isrel bifo i bin givim. Sipos “blad blong man nani mo blad blong ol bul” i save mekem ol man Isrel bifo oli klin long saed blong spirit, “blad blong Kraes i save mekem wok we i strong moa. . . . Blad ya i stap mekem tingting blong yumi i klin long ol samting we yumi mekem we i blong ded nomo, blong yumi save mekem ol wok blong God ya we i laef, i stap we i stap.”—Hibrus 9:13, 14.

Jisas i wan nambawan man blong wok long saed blong ol man, antap moa, from we hem i no save ded samtaem. Long Isrel bifo, “ol narafala pris oli plante, from we oli man nomo, oli save ded, mo oli no save holem wok blong olgeta longtaem.” ?Be olsem wanem long Jisas? Pol i raetem se: “Hem i no  givim wok ya blong hem we hem i pris, i go long sam narafala man. Nao from samting ya, hem i save sevem olgeta we oli joen long hem blong kam long God, i stat naoia, gogo i no save finis, from we hem bambae i laef oltaem, mo bambae i stanap oltaem long fes blong God, blong prea from olgeta.” (Hibrus 7:23-25; Rom 6:9) Yes, long raet saed blong God long heven, yumi gat wan man blong wok long saed blong yumi, we man ya i ‘stap oltaem long fes blong God blong prea from yumi.’ !Traem tingbaot, samting ya i mas gat bigfala mining long yumi naoia!

Taem we Jisas i stap long wol ya, plante man oli kam long hem blong hem i givhan long olgeta, mo samtaem ol man ya oli mas mekem ol longfala trep blong mitim hem blong hem i halpem olgeta. (Matiu 4:24, 25) Naoia we Jisas i stap long heven, i moa isi long olgeta man blong evri kantri blong kasem help long hem. Oltaem, Jisas i rere blong wok long saed blong yumi.

?Jisas i Wanem Kaen Hae Pris?

Ol stori blong Jisas long ol Gospel oli soemaot klia long yumi se Jisas i wan man blong givhan long narafala mo i gat fasin sore. !Hem i lego plante samting long laef blong hem blong i save givhan long narafala! Bitim wan taem, ol man oli kam luk Jisas, taem hem mo ol disaepol blong hem oli go stap olgeta nomo blong tekem smol spel. Jisas i no kros se ol man ya oli stap tekemaot nambawan taem we tingting blong hem i spel mo ples i kwaet, be hem i “sore tumas long olgeta” from we oli stap lukaot hem blong i halpem olgeta. Nating we Jisas i taed, i hanggri, mo i tosta, “hem i glad nomo blong luk olgeta” mo hem i rere blong no kakae blong i save halpem ol sinman we hat blong olgeta i stret.—Mak 6:31-34; Luk 9:11-17; Jon 4:4-6, 31-34.

Fasin sore i pusum Jisas blong givim ol samting we ol man oli nidim long saed blong bodi, filing, mo spirit. (Matiu 9:35-38; Mak 6:35-44) Antap long hemia, hem i tijim olgeta blong faenem glad mo fasin blong harem gud longtaem. (Jon 4:7-30, 39-42) Eksampel, tok ya blong Jisas we i singaot ol man oli kam long hem, i rili pulum tingting blong yumi, se: “Yufala evriwan we yufala i stap hadwok tumas, mo we yufala i stap karem ol hevi samting; yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.”—Matiu 11:28, 29.

Lav we Jisas i gat long ol man i bigwan tumas, mekem se biaen hem i givim laef blong hem from olgeta. (Rom 5:6-8) Pol i tokbaot samting ya se: “God i no holemtaet stret Pikinini blong hem, i letem hem i ded blong sevem yumi evriwan. Hem i givim stret Pikinini blong hem finis, blong i sevem yumi. Bambae hem i no moa save holemtaet ol narafala samting blong hem, bambae i givim olgeta i kam nomo long yumi. . . . Jisas Kraes ya we i ded, mo we biaen God i mekem hem i laef bakegen, hem i stap sidaon long raet saed blong God, i stap toktok long God oltaem from yumi.”—Rom 8:32, 34.

Wan Hae Pris We i Gat Fasin Sore

Taem Jisas i stap long wol ya, hem i fesem ol samting olsem hanggri, hem i taed, i tosta, i harem i soa bigwan mo i ded. Ol bigfala hadtaem we hem i stanap strong tru long olgeta oli mekem hem i naf gud long wan spesel fasin blong mekem wok olsem Hae Pris blong ol man we oli stap safa long wol ya. Pol i raetem se: “Fastaem hem [Jisas] i kam stret olsem ol brata ya mo sista blong hem, blong hem bambae i save gat sore long olgeta, mo blong olgeta bambae oli save trastem hem. Taswe hem i save mekem ol wok blong hem, we hem i Hae Pris blong olgeta, nao hem i mekem rod blong God i fogivim olgeta i tekemaot ol sin blong olgeta. Mo naoia, hem i save givhan long olgeta we ol samting oli stap traem olgeta, from we hem tu i harem nogud finis, mo ol samting ya oli traem hem finis.”—Hibrus 2:17, 18; 13:8.

Jisas i soemaot se hem i naf mo hem i wantem blong pulum ol man oli kam klosap moa long God. Samting ya i no minim se Jisas i mas pulum wan God we i strong tumas, i no gat fasin sore, mo we i no wantem fogif, blong i fogivim narafala. Nogat, from we Baebol i talem klia long yumi se “Jeova i gud mo i rere blong fogivim man.” Baebol i talem tu se: “Sipos yumi talemaot ol sin blong yumi long God, yumi save bilif long hem, from we fasin blong hem i stret oltaem. Hem bambae i fogivim yumi from ol  sin blong yumi, mo i tekemaot ol fasin blong yumi we i no stret, i mekem yumi klin.” (Ol Sam 86:5, NW; 1 Jon 1:9) Yes, ol toktok mo ol fasin blong Jisas we oli kaen, oli soemaot fasin sore mo lav we Papa blong hem i gat.—Jon 5:19; 8:28; 14:9, 10.

?Olsem wanem Jisas i mekem ol sinman we oli tanem tingting from ol sin blong olgeta oli harem gud? Hemia taem hem i halpem olgeta blong faenem glad mo blong harem gud long ol traehad we oli mekem wetem fulhat blong olgeta blong mekem God i glad. Taem Pol i raet long ol tabu Kristin brata sista, hem i tokbaot olgeta samting ya olsem se: “Yumi mas holemtaet fasin ya blong bilif we yumi talemaot finis se hem i bilif blong yumi. I tru, yumi gat wan nambawan Hae Pris blong yumi, Jisas ya, Pikinini blong God, we hem i go insaed long heven finis, stret long fes blong God. Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin. Nao from samting ya, i gud yumi mekem tingting blong yumi i strong, nao yumi kam long fes blong God we hem i stap givhan long yumi long gladhat blong hem. Nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.”—Hibrus 4:14-16.

‘Help Long Stret Taem Blong Hem’

?Yumi save mekem wanem taem yumi fesem ol problem we yumi harem se oli strong tumas blong winim—olsem strong sik, filing ya se yumi gat fol, tingting i foldaon bigwan mo wari? Yumi save yusum gud presen ya we oltaem, Jisas hem wan i bin dipen long hem—nambawan jans ya blong prea. Eksampel, long naet bifo we hem i givim laef blong hem from yumi, “hem i stap prea strong moa, mo swet blong hem i stap folfoldaon long graon olsem blad nomo.” (Luk 22:44) Yes, Jisas i save filing we man i gat taem hem i prea strong long God. Jisas “i stap prea long God, i stap askem ol samting long hem, i stap krae bigwan, we wota blong ae blong hem i stap ron. God i gat paoa blong sevem hem blong hem i no ded, mo from we tingting blong Kraes i stap daon, God i harem hem.”—Hibrus 5:7.

Jisas i save se ol man oli nidim tumas we “God i harem olgeta” mo i mekem oli strong. (Luk 22:43) Antap long hemia, hem i promes se: “Tru mi talem long yufala. Sipos yufala i askem samting long Papa blong mi long nem blong mi, bambae hem i save givim long yufala. . . . Yufala i mas gohed blong askem ol samting long hem, mo bambae yufala i save kasem, nao bambae yufala i glad we i glad.” (Jon 16:23, 24) Taswe, yumi save prea long God wetem strong tingting se bambae hem i letem Pikinini blong hem i yusum paoa blong hem mo praes blong ransom sakrefaes blong hem blong givhan long yumi.—Matiu 28:18.

Yumi save sua se, wetem paoa we Jisas i gat long heven, bambae hem i givim stret help we yumi nidim long stret taem. Eksampel, sipos yumi mekem wan sin we yumi rili sore from, yumi save harem gud bakegen from tok ya se, “Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi.” (1 Jon 2:1, 2) Man ya we  i stap halpem yumi mo i mekem yumi harem gud bakegen, we hem i stap long heven, bambae hem i toktok long God from yumi blong mekem se God i ansa long ol prea we oli pastru long nem blong hem mo we i laenap wetem Baebol.—Jon 14:13, 14; 1 Jon 5:14, 15.

Soem Tangkiu From Help We Kraes i Givim

I gat moa samting blong mekem i bitim we yumi jes prea long God tru long Pikinini blong hem. “Kraes, hem i pemaot yumi” wetem praes blong ransom sakrefaes blong hem, nao olgeta man long wol oli kam olsem we hem i “Masta” blong olgeta. (Galesia 3:13; 4:5; 2 Pita 2:1) Yumi save soem fasin tangkiu from olgeta samting we Kraes i mekem long yumi, hemia taem yumi luksave se hem i Masta blong yumi, mo sipos yumi glad blong obei long tok ya blong hem we i singaot yumi se: “Man we i wantem kam biaen long mi, hem i mas blokem ol samting we hem nomo i wantem, mo evri dei hem i mas karem [pos] blong hem, i biaen long mi.” (Luk 9:23) Blong “blokem ol samting” we yumi nomo i wantem i no minim se yumi talem long toktok nomo se yumi gat wan defren masta. Tingbaot, Kraes “i ded blong sevem olgeta man, blong bambae ol man we oli laef wetem hem, oli no moa laef blong mekem ol wok blong olgeta nomo. Olgeta oli laef blong mekem ol wok blong hem, we hem i ded, mo i laef bakegen, blong i sevem olgeta.” (2 Korin 5:14, 15) From samting ya, fasin tangkiu we yumi gat long ransom bambae i gat bigfala paoa long ol plan, ol mak, mo ol fasin blong laef blong yumi. Bigfala kaon we yumi gat long “Jisas Kraes, [we] hem i givim laef blong hem blong sevem yumi,” i mas pusum yumi blong lanem moa long saed blong hem mo Papa blong hem, Jeova God, we i lavem yumi tumas. Mo yumi mas wantem tumas blong kam strong moa long bilif, folem ol gudfala rul blong God, mo wok “strong blong mekem ol gudfala samting.”—Taetas 2:13, 14; Jon 17:3.

Kristin kongregesen, hem i ples we yumi kasem ol kakae long saed blong spirit long stret taem, yumi kasem ol tok we oli leftemap tingting, mo ol advaes blong lidim yumi. (Matiu 24:45-47; Hibrus 10:21-25) Eksampel, sipos wan i sik long saed blong spirit, hem i save “singaot ol elda blong [kongregesen] blong oli kam luk hem.” Jemes i gohed, i talem klia long yumi se: “Mo prea blong man we i bilif bambae i hilim sik man ya. Masta blong yumi bambae i mekem bodi blong hem i strong bakegen, mo sipos hem i bin mekem sam sin, Masta blong yumi bambae i fogivim hem from.”—Jemes 5:13-15.

Hemia wan eksampel: Wan man we i stap long kalabus long Saot Afrika i raet i go long wan elda blong  kongregesen mo i talem tangkiu long “olgeta Witnes blong Jeova we oli stap gohed long gudfala wok ya we Jisas Kraes i bin statem, hemia wok blong halpem ol man blong oli kasem Kingdom blong God.” Afta, hem i raetem se: “Mi mi glad tumas taem mi kasem leta blong yu. Mi harem gud tumas blong save se yufala i tingbaot mi long saed blong spirit. Hemia i mekem se mi gat moa risen blong stat obei long Jeova God, we i stap singaot ol man blong tanem tingting from ol sin blong olgeta. I gat 27 yia finis we mi bin foldaon mo mi lusum rod, mi wokbaot long tudak blong sin, mi giaman, mi brekem loa, mi mekem ol rabis fasin long saed blong seks, mo mi joen long ol skul we oli gat tu fes. !Taem mi mitim ol Witnes blong Jeova, mi harem se saye, mi faenem rod nao—hemia stret rod ya! Samting we mi mas mekem, hemia blong folem rod ya.”

Moa Help Long Fiuja

Laef blong wol ya i stap kam moa nogud. Samting ya i soemaot klia se yumi stap laef long wan impoten taem, hemia jes bifo we “bigfala trabol” i faerap. Naoia, wan bigfala hip blong man we oli kamaot long olgeta kantri, laen, kala, mo lanwis, oli stap ‘wasem ol klos blong olgeta long blad blong Smol Sipsip ya we i ded, blong mekem ol klos ya oli waet.’ (Revelesen 7:9, 13, 14; 2 Timoti 3:1-5) Taem oli soemaot bilif blong olgeta long ransom sakrefaes blong Jisas, God i fogivim ol sin blong olgeta mo oli kasem help blong frengud moa wetem God.—Jemes 2:23.

Smol Sipsip ya Jisas Kraes, “bambae i lukaot long olgeta [we oli pastru long bigfala trabol], olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwota ya we i save givim laef. Mo God bambae i ravemaot wota blong ae blong olgeta.” (Revelesen 7:17) Long taem ya, bambae Kraes i wok olsem Hae Pris gogo i finisim olgeta wok blong hem. Bambae hem i halpem olgeta fren blong God blong oli kasem blesing fulwan from “ol springwota ya we i save givim laef”—long saed blong spirit, bodi, tingting, mo filing. Long taem ya, wanem we Jisas i statem long 33 K.T. * mo wanem we hem i bin gohed blong mekem taem hem i go long heven, bambae i kasem fulmak blong hem.

From samting ya, yumi no mas stop blong soemaot bigfala tangkiu from olgeta samting we God mo Kraes tufala i bin mekem—mo tufala i stap mekem—blong givhan long yumi. Aposol Pol i talem se: “Yufala we i joen long Masta blong yumi, oltaem yufala i mas glad. . . . Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.”—Filipae 4:4, 6, 7.

I gat wan nambawan rod blong soem tangkiu long Jisas Kraes, Man blong halpem yumi we i stap long heven. Long Epril 19 2000, afta we san i godaon, ol Witnes blong Jeova long olgeta ples long wol bambae oli kam wanples blong tingbaot ded blong Kraes. (Luk 22:19) Samting ya bambae i givim jans long yu blong soem bigfala fasin tangkiu we yu gat long ransom sakrefaes blong Kraes. Mifala i singaot yu blong kam mo luk olsem wanem nambawan rod we God i yusum blong sevem man tru long Kraes bambae i save givim blesing long yu blong olwe. Plis jekem wetem ol Witnes blong Jeova long ples blong yu blong save gud stret taem mo ples we bambae oli holem miting ya long hem.

[Futnot]

[Tok blong pija long pej 7]

Jisas i save filing we man i gat taem hem i prea strong long God

[Tok blong pija long pej 8]

Kraes bambae i halpem yumi blong fesem ol bigfala problem we yumi wan i no naf blong winim

[Tok blong pija long pej 9]

Kraes i halpem yumi tru long ol elda we oli gat lav