Ol Man Oli Nidim Wan Man Blong Halpem Olgeta

WAN man we bifo hem i man blong flas mo blong kilim man i talem se: ‘Mi mi stap mekem i nogud long narafala mo mi stap tok nogud blong spolem ol man.’ Man ya, bifo hem i no gat sore nating, i stap tok nogud, i stap ronem mo kilim ol man blong Jisas Kraes we oli fraetgud long God. Hem i talemaot wetem glad se: “Nating we mi mi mekem olsem, be hem [Masta] i gat sore long mi.” I defren olgeta se man ya we bifo, i stap ronem ol Kristin bitim mak, hem i kam wan gudfala Kristin, hemia aposol Pol.—1 Timoti 1:12-16; Ol Wok 9:1-19.

I no evri man we i bin mekem ol samting we Pol i mekem. Nating se i olsem, yumi evriwan i mestem ol hae rul blong God. ?From wanem? From we ‘yumi evriwan i mekem nogud finis, mo yumi stap afsaed olgeta long ol gudgudfala fasin blong God.’ (Rom 3:23) Antap long hemia, i isi nomo blong letem tingting blong yumi i foldaon olgeta, nao maet yumi ting se yumi nogud olgeta, God i no save sore long yumi. Taem Pol i stap tingting long ol rabis fasin we hem i bin mekem, hem i talem se: “Man. Mi mi no save harem gud nating. ?Hu man we bambae i save pulumaot mi long laef ya we i stap holemtaet mi, we bambae mi ded from?” Hem i ansa long kwestin blong hem taem hem i raetem se: ‘!Mi mi talem tangkiu tumas long God, we hem bambae i mekem samting ya tru long Jisas Kraes Masta blong yumi!’—Rom 7:24, 25.

God we i wokem yumi, hem i gat stret fasin. ?Nao, olsem wanem wan God olsem i save wok wanples wetem ol sinman? (Ol Sam 5:4) Makem gud we Pol i talem se: ‘!Mi mi talem tangkiu tumas long God, we hem bambae i wokem samting ya tru long Jisas Kraes Masta blong yumi!’ Wan narafala man we God i sore long hem i eksplenem se: “Sipos wan long yumi i mekem sin, i gat Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi. Kraes ya, hem i man we i ded blong mekem rod blong God i tekemaot ol sin blong yumi. Mo i no blong yumi nomo, i blong olgeta man long wol.”—1 Jon 2:1, 2.

?From wanem vas ya i talem se Jisas i olsem “man blong givhan long yumi, blong toktok long Papa blong yumi long saed blong yumi”? ?Mo olsem wanem Jisas “i man we i ded blong mekem rod blong God i tekemaot ol sin blong yumi”?

I Nidim Wan Man Blong Halpem Yumi

Jisas i kam long wol ya blong “givim laef blong hem [olsem wan ransom] blong pem rod blong plante man oli go fri.” (Matiu 20:28)  Ransom i minim wan praes we man i givim blong pemaot no pembak wan man no wan samting blong i go fri. Hibru tok we oli tanem i kam “ransom” i karem tingting ya se i kavremap, no stretem sin. (Ol Sam 78:38) Grik tok ya, olsem hemia long Matiu 20:28, plante taem ol man oli yusum blong tokbaot praes we man i givim blong pemaot ol presina we oli holem olgeta long taem blong faet, no blong pemaot ol slef blong oli kam fri. Blong folem stret fasin long saed ya, man i mas givim wan samting we praes blong hem i sem mak long samting we hem i pemaot.

Olgeta man oli kam olsem slef from fasin rebel we faswan man i mekem agensem God. Olsem Jenesis japta 3 i soemaot, stret man ya—Adam—i jusum blong folem wan rod we i no soem fasin obei long Jeova God. Taem hem i mekem olsem, hem wan mo ol pikinini blong hem we oli no bon yet, oli kam slef blong sin mo ded. Adam i mekem se hem wetem ol pikinini blong hem oli lusum wan laef we i stret gud olgeta.—Rom 5:12, 18, 19; 7:14.

Long Isrel bifo, God i givim oda se oli mas kilim anamol blong mekem sakrefaes blong stretem, no kavremap sin blong olgeta man. (Levitikas 1:4; 4:20, 35) I olsem we laef blong anamol ya we oli givim olsem sakrefaes, i tekem ples blong sinman ya. (Levitikas 17:11) From samting ya, yumi save talem tu se “dei blong stretem sin” i olsem “dei blong ransom.”—Levitikas 23:26-28.

Be from we ol anamol oli daon moa long man, “blad blong bul mo blad blong man nani i no save tekemaot [fulwan] sin blong man samtaem.” (Hibrus 10:1-4) Wan sakrefaes we i naf blong kavremap, no tekemaot sin fulwan, hemia sakrefaes we praes blong hem i mas sem mak long samting we Adam i lusum. I nidim wan man we i stretgud olgeta (Jisas Kraes), blong stretem wanem we wan narafala stret man (Adam) i bin lusum. Laef blong wan man we i stret gud olgeta, hemia nomo praes we i save pemaot ol pikinini blong Adam oli kam fri long fasin slef we oli kasem long faswan papa blong olgeta. Blong mekem se trufala stret fasin i kamaot long saed ya, ‘wan laef i mas lus from narafala laef we i lus.’—Eksodas 21:23-25.

Taem Adam i mekem sin mo i kasem panis blong ded, ol pikinini blong hem we oli no bon yet oli ded wetem hem. Stret man ya Jisas, “laswan Adam,” hem i jusum blong i no mared mo gat pikinini. (1 Korin 15:45) Hem i save gat pikinini, be taem hem i ded olsem wan sakrefaes we i stret gud olgeta, hem i no gat pikinini. From samting ya, yumi save talem se ol pikinini we oli save kamaot long Jisas, oli ded wetem hem. Jisas i tekem famle blong Adam we oli gat sin mo we oli stap ded, oli kam olsem ol pikinini blong hem. Hem i no mekem wan prapa famle blong hem wan. Taem Jisas i givim laef blong hem we i stret olgeta olsem wan sakrefaes, hem i pemaot bakegen olgeta man we oli kamaot long Adam blong oli save kam olsem famle blong Hem, mo Hem i kam olsem “Papa blong Olwe” blong olgeta.—Aesea 9:6, 7.

Ransom sakrefaes blong Jisas i openem rod blong ol man we oli gat fasin obei, blong kasem fasin sore blong God mo laef we i no save finis. From samting ya, aposol Pol i raetem se: “Ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:23) Jeova mo nambawan Pikinini blong hem, tufala i lego wan samting we i bigfala tumas blong givim wan ransom sakrefaes. Taswe, yumi mas presem Jeova from lav mo fasin sore we hem i soemaot long yumi tru long ransom sakrefaes ya. (Jon 3:16) Mo Jisas i pruvum se hem nao i “man blong givhan long yumi, blong toktok long Papa blong yumi from yumi,” from we hem i girap bakegen long ded, i go laef long heven mo i givim praes blong ransom sakrefaes blong hem i go long God long heven. * (Hibrus 9:11, 12, 24; 1 Pita 3:18) ?Be naoia we Jisas Kraes i stap long heven, olsem wanem hem i pruvum se hem i wan man we i stap givhan long yumi?

[Futnot]

[Tok blong pija long pej 4]

Laef blong Jisas we i stret gud olgeta i praes ya we i pemaot ol pikinini blong Adam oli go fri