Olsem Wanem Jeova i Lidim Yumi
Olsem Wanem Jeova i Lidim Yumi
“Plis yu lidim mi mi go long rod blong stret fasin.”—OL SAM 27:11, NW.
1, 2. (a) ?Olsem wanem Jeova i stap lidim ol man blong hem tede? (b) ?Wanem i joen wetem fasin ya blong yusum fulwan ol miting?
JEOVA i Stamba blong laet mo trutok, olsem yumi bin luk finis long faswan stadi. Tok blong hem i olsem laet long rod blong yumi taem yumi stap wokbaot long rod blong stret fasin. Jeova i lidim yumi taem hem i stap tijim yumi long ol rod blong hem. (Ol Sam 119:105) I gud yumi mekem olsem man blong raetem Sam bifo, yumi folem ol rod blong God wetem fasin tangkiu mo yumi prea olsem se: “Jeova, plis yu tijim mi long ol rod blong yu, mo lidim mi mi go long rod blong stret fasin.” —Ol Sam 27:11, NW.
2 Wan rod we Jeova i stap yusum blong tijim yumi tede, hemia tru long ol Kristin miting. ?Yu yu stap yusum fulwan rod ya we i soem lav blong Jeova? ?Yu stap (1) go oltaem long ol miting, (2) lesingud long ol tok we oli kamaot, mo (3) rere blong joen long ol haf we i gat kwestin mo ansa? ?Mo olsem wanem taem yu kasem ol advaes we oli save halpem yu blong wokbaot oltaem “long rod blong stret fasin”? ?Yu yu stap lesin long ol advaes ya wetem fasin tangkiu?
?Yu Stap Go Oltaem Long Ol Miting?
3. ?Olsem wanem wan fultaem paenia i wokem nambawan fasin blong go oltaem long miting?
3 Sam brata mo sista, taem oli pikinini nomo kam kasem naoia, oli go oltaem long ol miting. Wan Witnes blong Jeova we i fultaem paenia, i talem se: “Long 1930, taem mi mo sista blong mi, mitufala i pikinini nomo, mitufala i no nidim blong askem papa mama blong mitufala se bambae mifala i go long miting no nogat. Mitufala i save finis se mifala i mas go long ol miting sipos mifala i no kasem bigfala sik. Famle blong mifala i no stap mestem ol miting.” Olsem woman profet ya Ana, sista ya i stap “oltaem nomo” long ples blong wosipim Jeova.—Luk 2:36, 37.
4-6. (a) ?From wanem sam pablisa blong Kingdom oli mestem ol miting? (b) ?From wanem i impoten tumas blong go long ol miting?
4 ?Yu yu wan long olgeta we i stap go oltaem long ol Kristin miting, no yu stap go long miting wanwan taem nomo? Samfala Kristin we oli ting se oli no stap mestem ol miting, oli wantem sua gud long saed ya. Ale, oli makem sam wik, mo oli raetem daon evri miting we oli go long hem long ol wik ya. Nao long en blong ol wik ya, taem oli jekemap sipos oli bin go long evri miting no nogat, oli sapraes blong luk se oli bin mestem plante miting.
5 Sam man, maet oli talem se: ‘Yumi no sapraes long samting ya. Tede, ol man oli fesem fulap hadtaem, mekem se i hadwok long olgeta blong go oltaem long ol miting.’ I rili tru se yumi stap laef long ol taem we oli givim fulap wari. Antap long hemia, i sua se laef bambae i kam moa strong. (2 Timoti 3:13) From we yumi stap long taem we laef i kam moa strong, i impoten tumas blong go oltaem long ol miting. Sipos yumi no kakae gud long saed blong spirit blong mekem yumi strong, bambae yumi no gat paoa blong stanap strong agensem ol hadtaem blong rabis wol ya. Yes, sipos yumi no go oltaem long ol miting, maet wan samting i pulum yumi, nao kwiktaem nomo yumi lego fulwan “rod blong stret fasin.” (Ol Proveb 4:18) Tru ya, taem yumi kambak long haos, afta long wan strongfala dei blong wok, maet samtaem yumi harem se yumi no wantem go long miting. Be, taem yumi go long miting, nating se yumi taed, yumi kasem gudfala frut, mo yumi leftemap tingting blong ol Kristin brata sista blong yumi long Haos Kingdom.
6 Hibrus 10:25 i givim wan narafala impoten risen from wanem yumi mas go oltaem long ol miting. Long vas ya, aposol Pol i talem strong long ol Kristin blong joen wanples long ol miting ‘from we dei ya we Masta blong yumi bambae i jajem olgeta man long hem, hem i kam klosap finis.’ Yes, yumi no mas fogetem se “dei blong Jeova” i stap kam klosap. (2 Pita 3:12) Sipos yumi gat tingting se en blong rabis wol ya i longwe yet, maet yumi stat blong letem ol samting blong laef oli blokem yumi blong mekem ol samting we yumi rili nidim long saed blong spirit, olsem fasin blong go long miting. Nao, olsem woning we Jisas i givim, ‘bambae dei ya i kasem yumi wantaem nomo, olsem we trap i sat.’—Luk 21:34.
Kam Wan Man We i Lesingud
7. ?From wanem i impoten we ol pikinini oli lesingud long ol miting?
7 I no naf we yumi jes go nomo long ol miting. Yumi mas lesingud long ol tok we oli kamaot long ol miting. (Ol Proveb 7:24) Ol pikinini tu oli mas lesingud. Taem wan pikinini i go long skul, yumi wantem se hem i lesingud long tija, nating se tija i tijim wan lesen we pikinini ya i no intres long hem, no i hadwok blong kasem save. Tija i save se sipos pikinini ya i lesingud, bambae hem i lanem sam samting long lesen ya. ?Nao olsem wanem long saed blong ol miting blong kongregesen? I stret blong ol pikinini we oli naf blong go long skul oli lesingud long tijing we i kamaot long ol miting, bitim we oli slip stret afta we miting i stat. Tru ya, i gat plante nambawan trutok long Baebol. Sam long ol trutok ya, oli “strong blong save.” (2 Pita 3:16) Be yumi no mas ting se wan smol pikinini i no waes i naf blong lanem ol samting. God i no gat tingting olsem. Long taem blong Baebol, hem i talem long ol man blong hem we oli yangfala se, ‘oli mas lesin mo lanem fasin ya blong fraet gud long Jeova mo lukaot gud blong folem ol tok we loa ya i talem.’ I klia se sam long ol loa ya, i hadwok long ol pikinini blong kasem save long olgeta. (Dutronome 31:12 NW; skelem wetem Levitikas 18:1-30.) ?Olsem wanem long taem blong yumi tede? ?Tingting blong Jeova long saed ya i jenis?
8. ?Sam papa mama oli mekem wanem blong halpem ol pikinini blong olgeta blong lesingud long ol miting?
8 Ol Kristin papa mama oli luksave se ol samting we pikinini blong olgeta i lanem long ol miting oli save givhan long hem long saed blong spirit. Taswe, sam papa mama oli mekem se pikinini blong olgeta i slip smol long dei, olsem nao, taem oli kasem Haos Kingdom, oli wekap gud mo oli rere blong lanem samting. Sam papa mama, oli putum rul se ol pikinini blong olgeta oli no mas lukluk tumas, no oli no mas luk nating televisin long dei we i gat miting. (Efesas 5:15, 16) Ol papa mama ya oli blokem ol samting we i save pulum pikinini blong olgeta, mo oli leftemap tingting blong olgeta blong lesingud mo lanem samting, stret folem yia mo save blong olgeta.—Ol Proveb 8:32.
9. ?Wanem i save halpem yumi blong wokem fasin ya blong lesingud?
9 Jisas i stap toktok long ol bigman taem hem i talem se: “Tok ya we yufala i harem, yufala i mas tingting gud long hem.” (Luk 8:18) Long taem blong yumi naoia, i isi blong talem tok ya be i strong blong folem. Blong talem stret, fasin blong lesingud i wan had wok, be hem i wan fasin we yumi save lanem. Taem yu stap lesin long wan pablik tok no wan haf blong miting, traem makemaot ol bigfala poen. Traem kasem save long nekiswan poen we brata we i givim tok bambae i tokbaot. Makem ol poen we yu save yusum long wok blong prij no yu save folem long laef blong yu. Tingting bakegen long ol poen ya taem tok i stap gohed. Mekem wan smol not.
10, 11. ?Olsem wanem sam papa mama oli halpem ol pikinini blong olgeta blong kam moa gud long fasin blong lesin, mo wanem rod nao yu luk se i wokgud?
10 Beswan taem blong lanem fasin ya blong lesingud, hemia taem we man i pikinini nomo. Sam pikinini we oli no go yet long skul, nomata we oli no save rid mo raet, papa mama blong olgeta i givhan long olgeta blong raetem sam “not” long taem blong ol miting. Ol pikinini ya oli putum wan mak long pepa taem oli harem ol tok we oli kamaot plante taem, olsem “Jeova,” “Jisas,” no “Kingdom.” Long rod ya, oli save lanem blong putum tingting blong olgeta i stap long ol tok we oli kamaot long platfom.
11 Ol pikinini we oli gruap finis, olgeta tu, papa mama i mas givhan long olgeta blong lesingud. Long wan asembli, wan papa i luksave we tingting blong boe blong hem we i gat 11 yia i stap flae olbaot. Ale, papa ya i givim wan Baebol long boe ya mo i askem hem blong jekem ol vas we brata i stap talemaot long platfom. Papa ya, we hem i stap tekem not, i wajem boe blong hem we i holem Baebol i stap. Biaen, boe ya i gat moa intres blong folem program blong asembli.
Letem Voes Blong Yu i Kamaot
12, 13. ?From wanem i impoten blong joen long singsing blong kongregesen?
12 King Deved i singsing se: “Hae God. . . . Mi stap wokbaot raon long olta blong yu, mi stap mekem wosip long yu. Mi stap singsing blong talem tangkiu long yu.” (Ol Sam 26:6, 7) Ol miting blong ol Witnes blong Jeova oli givim nambawan jans long yumi blong soemaot bilif blong yumi wetem bigfala voes. Wan rod blong mekem olsem, hemia taem yumi joen blong singsing wetem kongregesen. Singsing i wan impoten haf blong wosip blong yumi, be i isi nomo blong ting nating long hem.
13 Sam pikinini we oli no save rid yet, oli save singim baehat ol singsing blong Kingdom we yumi stap singim long ol miting evri wik. Oli harem gud tumas se oli save singsing tugeta wetem ol bigman. Be taem ol pikinini oli kam bigwan, maet oli no moa intres tumas blong joen long ol singsing blong Kingdom. Sam bigman tu oli sem blong singsing long ol miting. Be, singsing i wan haf blong wosip blong yumi, i sem mak olsem we wok blong prij i wan haf blong wosip blong yumi. (Efesas 5:19) Yumi stap mekem bes blong yumi blong presem Jeova long wok blong prij. ?From wanem yumi no save mekem sem mak long saed blong singsing? I gud we yumi givim ona long God, yumi leftemap voes blong yumi, yumi singsing wetem fulhat blong yumi blong presem hem, nating se yumi save singsing gud no nogat.—Hibrus 13:15.
14. ?From wanem yumi mas rerem gud ol buk we yumi yusum blong stadi long ol miting blong kongregesen?
14 Wan narafala rod blong presem God, hemia taem yumi givim ol ansa we oli leftemap tingting long ol haf blong miting we i gat kwestin mo ansa. Samting ya i minim se yumi mas reregud. I tekem taem blong tingting dip long ol dip trutok long Tok blong God. Aposol Pol, wan man we i strong blong stadi long Baebol, hem i luksave samting ya. Hem i raetem se: ‘!Olgeta! !Waes blong God mo save blong hem i bigfala tumas, i bitim mak!’ (Rom 11:33) Ol hed blong famle, i impoten tumas we yufala i halpem ol wanwan memba blong famle blong lukluk dip insaed long waes blong God we i stap long Baebol. Tekem smoltaem long famle stadi blong yufala blong eksplenem ol poen we oli strong mo halpem famle blong yu blong rere from ol miting.
15. ?Wanem advaes i save halpem yumi blong givim ansa long ol miting?
15 Sipos yu wantem ansa oltaem long ol miting, i gud we yu rere fastaem blong save wanem we bambae yu talem. I no nidim blong rerem wan longfala ansa. Bambae ol narafala oli glad taem yu ridim wan vas blong Baebol wetem strong tingting no yu givim wan sotfala ansa wetem fulhat blong yu. Sam pablisa oli askem brata we i lidim stadi blong i makem nem blong olgeta blong ansa long faswan kwestin blong sam paragraf. Olsem nao, oli no mestem jans blong soemaot bilif blong olgeta.
Man We i No Gat Waes, Hem i Kam Waes
16, 17. ?Wan elda i givim wanem advaes long wan man blong givhan, mo from wanem advaes ya i wokgud?
16 Long ol miting blong ol Witnes blong Jeova, plante taem yumi kasem advaes se yumi mas ridim tok blong God evri dei. Fasin blong ridim Tok blong God evri dei i mekem yumi harem gud. Hem i halpem yumi tu blong mekem ol disisen we oli waes, stretem ol rong blong yumi, winim ol traem, mo blong kam skelgud bakegen long saed blong spirit sipos yumi stap folem wan rong rod. —Ol Sam 19:7.
17 Long plante kongregesen, ol elda we oli gat plante save oli rere oltaem blong givim ol gudfala advaes blong Baebol we oli stret wetem ol nid blong yumi. Wanem we yumi mas mekem, hemia blong “faenemaot,” no askem olgeta blong givim advaes we i stanap long Baebol. (Ol Proveb 20:5) Wan dei, wan man blong givhan we i wantem gohed moa, hem i askem wan elda blong givim sam advaes we hem i save folem blong mekem moa wok insaed long kongregesen. Elda ya, we i save gud yangfala ya, i tekem Baebol mo i openem long 1 Timoti 3:3. Vas ya i talem se man we i mekem wok insaed long kongregesen, hem i mas wan man we i stap “mekem i gud long ol man.” Wetem kaen fasin, elda ya i soemaot sam rod we yangfala ya i save folem blong mekem i gud long ol narafala taem hem i stap joen wetem olgeta. ?Yangfala brata ya i kam kros from ol advaes we hem i kasem? !Nogat! Hem i eksplenem se: “Elda ya i yusum Baebol, taswe mi luksave se advaes we hem i givim, i kamaot long Jeova.” Yangfala ya i gat fasin tangkiu from ol advaes we hem i kasem. Taswe, hem i folem olgeta, nao i gohed gud long saed blong spirit.
18. (a) ?Wanem i halpem wan yangfala Kristin blong winim ol traem long hae skul? (b) ?Wanem vas blong Baebol we yu tingbaot taem yu kasem traem?
18 Tok blong God i save halpem ol yangfala tu blong oli no “folem ol krangke fasin blong ol yangfala, we oli wantem tumas ol samting we oli no stret.” (2 Timoti 2:22) Wan yangfala Witnes blong Jeova we i jes kamaot long hae skul i no longtaem, hem i winim olgeta traem we hem i kasem long olgeta yia we hem i stap long skul. Hem i naf blong winim ol traem from hem i ridim Baebol mo i tingting dip long ol vas blong hem blong luk olsem wanem hem i save mekem ol vas ya oli wok long laef blong hem. Plante taem, yangfala sista ya i tingting long advaes we i stap long Ol Proveb 13:20, we i talem se: “Sipos man i go joen long ol waes man, bambae hem i save kam waes.” Sista ya i folem gud advaes ya. Hem i lukaot gud blong joen nomo wetem olgeta we oli gat bigfala respek long ol rul blong Baebol. Hem i stap tingting se: “Mi mi sem mak olsem olgeta narafala man. Sipos mi fren wetem olgeta we fasin blong olgeta i no stret, bambae mi wantem blong mekem ol fren ya oli glad, mo samting ya i save pulum mi i go long trabol.” Advaes blong Pol we i stap long 2 Timoti 1:8, hemia tu i givhan long hem. Pol i raetem se: “Bambae yu no sem blong tokbaot Masta blong yumi. . . . Yu mas rere blong harem nogud tu from gud nius ya blong Kraes.” Folem advaes ya, sista ya i gat strong tingting, i tekem evri jans blong tokbaot bilif blong hem we i stanap long Baebol wetem ol fren blong hem long skul. Taem tija i askem hem blong toktok long fored blong klas, hem i jusum blong tokbaot ol samting we i save givim jans long hem blong talemaot Kingdom blong God.
19. ?From wanem wan yangfala man i no naf blong fesem ol hadtaem blong wol ya, be wanem i givim paoa long hem long saed blong spirit?
19 Sipos yumi lusum “rod blong stret fasin,” Tok blong God i save halpem yumi blong kambak long stret rod. (Ol Proveb 4:18) Wan yangfala man we i laef long Afrika i lanem samting ya. Taem wan Witnes blong Jeova i visitim hem, yangfala ya i agri blong stadi Baebol. Hem i harem gud long wanem we hem i lanem, be smoltaem biaen, hem i joen wetem ol nogud fren long skul. From samting ya, fasin blong hem i kam nogud we i nogud. Hem i talem se: “Oltaem tingting blong mi i stikim mi, mo mi mas stop blong go long ol miting.” Biaen, hem i stat go long ol miting bakegen. Yangfala man ya i talem se: “Mi faenemaot se stamba blong problem ya, hemia se mi no kakae long saed blong spirit. Mi mi no mekem stadi blong mi wan. Hemia nao from wanem mi no save winim ol traem. Ale, mi stat blong ridim Wajtaoa mo Wekap! Nao, sloslou mi kam strong bakegen long saed blong spirit mo mi lego ol nogud fasin blong mi. Samting ya i givim wan gudfala witnes long olgeta we oli luk ol jenis we mi mekem long laef blong mi. Mi tekem baptaes, mo naoia mi mi hapi.” ?Wanem i givim paoa long yangfala man ya blong winim slak fasin blong hem? Hem i kam strong bakegen long saed blong spirit, from we hem i gohed bakegen blong stadi Baebol oltaem.
20. ?Olsem wanem wan yangfala i save winim ol traem blong Setan?
20 !Ol Kristin yangfala, tede Setan i stap traem blong winim yufala! Sipos yufala i wantem winim hem, oltaem yufala i mas tekem ol kakae long saed blong spirit. Man ya blong raetem Sam, we i klia se hem i wan yangfala man, hem i kasem save long samting ya. Hem i talem tangkiu long Jeova from we i givim Tok blong Hem, blong ‘wan yangfala man i save mekem laef blong hem i klin.’ —Ol Sam 119:9.
Oltaem Yumi Mas Folem Rod We Jeova i Soem
21, 22. ?From wanem yumi no mas ting se rod blong trutok i hadwok tumas blong folem?
21 Jeova i lidim ol man Isrel oli aot long Ijip, oli go insaed long Promes Lan. Maet long tingting blong man, rod we hem i jusum i hadwok blong folem. Jeova i no lidim ol man blong hem long rod we i sotfala, hemia folem soa blong Mediterenian Si. Be, hem i lidim olgeta i go long draeples we laef i strong tumas. Nating se i olsem, samting we God i mekem i soem kaen fasin blong hem. Sipos ol man Isrel oli tekem sot kat, nao oli folem faswan rod ya, bambae oli pastru long kantri blong ol man Filistia we oli man blong faet. Taem Jeova i jusum narafala rod ya, hem i sevem ol man blong hem blong ol man Filistia oli no mekem faet wetem olgeta kwiktaem.
22 Yes, samtaem i luk olsem se rod we Jeova i jusum blong lidim yumi tede i strong lelebet. Evri wik, program blong yumi i fulap long ol Kristin wok. Yumi mas go long ol miting blong kongregesen, mekem stadi blong yumi wan, mo go long wok blong prij. Maet i moa isi blong folem narafala rod. Be rod blong God, hemia nomo i rod we i go long ples we yumi stap traehad blong kasem. From samting ya, i gud we yumi gohed blong folem impoten tijing we Jeova i givim mo stap oltaem “long rod blong stret fasin.” —Ol Sam 27:11.
?Yu Yu Save Eksplenem?
• ?From wanem i impoten tumas we yumi tingbaot nid ya blong go oltaem long ol Kristin miting?
• ?Ol papa mama oli save mekem wanem blong halpem ol pikinini blong olgeta blong lesingud long ol miting?
• ?Yumi mas mekem wanem blong kam wan gudfala man blong lesin?
• ?Wanem i save givhan long yumi blong givim ansa long ol miting?
[Kwestin]
[Tok blong pija long pej 16, 17]
Fasin blong go long ol miting i halpem yumi blong tingbaot dei blong Jeova oltaem
[Tok blong pija long pej 18]
I gat plante defren rod blong presem Jeova long ol Kristin miting