Yumi Man Blong Bilif

Serem Kristin Hop Long Senegal

STAT long taem bifo, kam kasem naoia, fis i wan kakae we ol man oli stap kakae oltaem. Blong plante taosen yia, ol man oli stap kasem fis long solwota, lek mo reva. Fastaem, sam aposol blong Jisas Kraes oli man blong pulum fis long Lugun blong Galili. Be Jisas i soem long olgeta se i gat wan narafala fasin blong pulum fis. !Hemia fasin blong huk long saed blong spirit, we i save givhan long man ya we i sakem huk, mo long ol fis tu!

Long saed ya, Jisas i talem long Pita, we i man blong pulum fis, i se: “Stat naoia, bambae yu yu man blong pulum man.” (Luk 5:10) Fasin ya blong hukum fis i stap gohed long bitim 230 kantri long taem blong yumi. (Matiu 24:14) Long Senegal, ol “man blong pulum man” oli wok strong blong serem Kristin hop long ol narafala.—Matiu 4:19.

Senegal i stap long Afrika, long wes saed olgeta long kantri ya. Hem i stat long draeples we i gat sanbij long hem klosap long Sahara long not blong kantri ya, i go kasem ol dakbus blong Casamance long saot. Senegal i wan ples we i kasem ol hot win blong draeples mo ol freswin we i kolkol we i kamaot long Atlantik. I gat bitim naen milyan man oli laef long ples ya. Wan fasin blong ol man Senegal hemia fasin we oli glad blong tekem eni man i kam long haos blong olgeta. Bighaf long olgeta oli no talem se oli Kristin. Plante long olgeta oli man blong lukaot long sipsip, mo sam oli lukaot long ol buluk, kamel, mo nani. I gat ol man blong wokem garen tu, we oli planem pinat, koten, mo raes. Mo tu, i gat ol man blong pulum fis, we oli stap pulum ol net we oli fulapgud wetem ol fis blong Dipsi blong Atlantik mo blong ol bigfala reva we oli ron i gotru long kantri ya. Wok blong kasem fis, hem i wan impoten haf blong ekonomi blong Senegal. Spesel kakae blong kantri ya, hemia ceebu jën, wan naesfala kakae we i gat raes, fis, mo ol ligim.

“Ol Man Blong Pulum Man”

Long Senegal i gat 863 man we oli wok strong blong talemaot Kingdom blong God. Fasin blong pulum fis long saed blong spirit i bin stat long ples ya long ol yia 1950. Long 1965, oli openem wan branj ofis blong Watch Tower Society long bigfala taon ya, Dakar. Ol misinari, no ol “man blong pulum man”, oli aot long ol kantri farawe blong kam long ples ya. Wok blong “pulum man” i stat, mo wok blong serem Kristin hop i gohed long Senegal. Oli wokem ol niufala branj ofis long Almadies, we i stap afsaed long Dakar. Long Jun 1999, oli mekem dedikesen blong givim ol niufala ofis ya oli go long Jeova. !Hemia wan nambawan taem blong glad!

Ol Traem We i Mekem i Had Blong Akseptem Trutok

Ol man we oli gat ol defren fasin blong laef oli stap harem gud nius ya, mo sam long olgeta oli laekem mesej blong hop we i stap insaed long Baebol. Nating se plante man oli no gat save long Baebol, oli glad blong lanem se i no longtaem, ol promes we Jeova i bin mekem long ol profet bifo, bambae oli kamtru.

Plante taem, i nidim fasin no fraet blong stanap strong long ol rul long Baebol, antap moa taem famle i strong blong joen long ol bilif mo kastom blong bifo. Wan eksampel, long Senegal plante man oli folem kastom ya blong gat plante waef. Tingbaot wan man we hem i gat tu waef taem hem i stat stadi Baebol. ?Bambae hem i gat strong tingting blong akseptem trutok mo mekem laef blong hem i laenap wetem rul blong Baebol we i talem se ol man oli mas gat wan waef nomo? (1 Timoti 3:2) Mo ?bambae hem i stap wetem waef blong yangtaem blong hem, woman ya we i mared long hem fastaem? Hemia nao samting we man ya i mekem, mo naoia hem i wan elda we i wok strong long wan bigfala kongregesen long eria blong Dakar. Faswan waef blong hem tu i akseptem trutok, mo olgeta 12 pikinini blong hem, 10 blong faswan waef blong hem, mo 2 blong seken waef we hem i gat fastaem, olgeta evriwan oli akseptem trutok.

Wan narafala traem we i mekem i had blong akseptem Kristin hop, hemia fasin blong no save rid mo raet. ?Hemia i minim se wan man we i no save rid mo raet, i no save akseptem mo folem trutok? No gat. Tingbaot eksampel blong Marie, wan mama we i wok had blong lukaot long eit pikinini blong hem. Hem i luksave kwiktaem se i impoten blong tokbaot wan vas blong Baebol wetem ol pikinini blong hem evri dei, bifo we oli aot blong go long skul mo hem i go long wok. Be from we hem i no save rid, ?olsem wanem hem i mekem samting ya? Hem i girap  eli evri moning, mo hem i karem buklet ya Ridimgud Ol Vas Blong Baebol Evri Dei, i go stanap long rod fored long haos blong hem. Taem ol man oli pas, hem i askem long olgeta sipos oli save rid. Taem hem i faenem wan we i save rid, hem i givim buklet ya long hem mo i talem se: “Mi mi no save rid. ?Plis yu save ridim haf ya long mi?” Nao, hem i lesin gud long riding ya. !Biaen, hem i talem tangkiu long man we i bin rid mo hem i go kwiktaem insaed long haos blong mekem wan storeyan wetem ol pikinini blong hem bifo we oli aot blong go long skul!

Ol Defren Kaen Man Oli Glad Long Mesej Ya

Long Senegal, plante man oli sidaon long rod maket blong salem fis, ligim mo frut. Samfala oli sidaon aninit long bigfala tri ya baobab, oli stap dring ataya, wan grin ti we i konkon lelebet. Tu brata oli gat strong tingting blong serem gud nius wetem evri man we oli mitim. Ale, oli toktok long wan man we i handikap mo i stap askem mane long ol narafala man long rod. Afta we oli talem halo long hem, oli talem se: “Plante man oli givim mane long yu, be oli no tektaem blong toktok wetem yu. Mifala i kam blong toktok wetem yu long saed blong wan impoten samting we i save minim fiuja blong yu.” Man ya i sapraes long samting ya. Tufala brata oli gohed se: “Mifala i wantem askem wan kwestin long yu. Long tingting blong yu, ?from wanem i gat plante man long wol ya we oli stap safa?” Man ya i ansa se: “From we God i wantem se i olsem.”

Tufala brata ya oli yusum Baebol blong halpem man ya blong tingting gud, mo oli eksplenem vas blong Revelesen 21:4. Man ya i haremgud tumas blong harem mesej ya we i givim hop, mo hem i glad tu from we tufala i wantem tektaem blong toktok wetem hem long saed blong Baebol. From samting ya, wota blong ae blong hem i ron. Nao hem i no moa askem mane long ol narafala be, !i stap talem strong long tufala blong karem evri mane long bokis blong hem we narafala i bin givim long hem! Taem hem i stap tok strong olsem, hem i pulum ae blong olgeta man we oli stap wokbaot. Tufala brata ya oli traehad blong mekem man ya i kipim mane blong hem. Biaen, hem i agri, be hem i talem long tufala se oli mas visitim hem bakegen.

Long bigfala yunivesiti long Dakar tu, i gat sam “fis” we oli stap kam insaed long net ya long saed blong spirit. Jean-Louis, wan studen blong meresin, i stat stadi Baebol. Hem i luksave trutok kwiktaem nomo, i givim laef blong hem i go long Jeova mo i tekem baptaes. Hem i wantem mekem wok blong God mo kam wan fultaem paenia, be hem i laekem tu blong stadi long meresin. From we hem i gat kontrak wetem prapa kantri blong hem, hem i mas gohed blong finisim kos blong hem blong stadi long meresin. Be long semtaem, hem i stat mekem wok blong haftaem paenia. I no longtaem afta we hem i kasem stefeket blong dokta, !ol brata oli singaot hem blong mekem wok blong dokta long wan bigfala Betel haos long Afrika! I gat wan narafala man we i bin harem gud nius taem hem i stap long Yunivesiti blong Dakar, hem tu i stap wok naoia long Betel long kantri blong hem.

Long Senegal, fasin blong pulum fis long saed blong spirit i stap karem plante gudfala frut. Ol man oli glad long ol buk blong ol Witnes blong Jeova, mo naoia oli save kasem ol buk ya long lokol lanwis blong olgeta we oli kolem Wolof. From we oli harem gud nius long prapa lanwis blong olgeta, samting ya i halpem plante man we hat blong olgeta i stret blong oli akseptem trutok wetem fasin tangkiu. Wetem blesing blong Jeova, yumi sua se taem ol “man blong pulum man” oli gohed strong blong serem Kristin hop blong olgeta, wetem bilif mo fasin no fraet, bambae oli kasem plante moa fis bakegen.

[Map/Tok blong pija long pej 31]

(Lukluk niuspepa)

SENEGAL

[Foto]

Serem Kristin hop long Senegal

[Credit Line]

Mountain High Maps® Copyright © 1997 Digital Wisdom, Inc.