!Ol Man Blong Faet Agensem God Oli No Save Win!

“Bambae oli faet agensem yu, be bambae oli no save winim yu.”—JEREMAEA 1:19, NW.

1. ?Wanem wok we Jeremaea i mas mekem, mo wok ya i gohed blong hamas taem?

 JEOVA i givim wok long yangfala Jeremaea blong hem i kam wan profet blong talemaot tok blong God long ol nesen. (Jeremaea 1:5) Samting ya i hapen long taem we gudfala King Josaea i stap rul long Juda. Jeremaea i mekem wok blong profet long ol taem ya we oli raf tumas, bifo we Babilon i winim Jerusalem. Mo hem i gohed long wok ya taem we ol man blong God oli wok slef long Babilon.—Jeremaea 1:1-3.

2. ?Olsem wanem Jeova i mekem Jeremaea i kam strong moa, mo faet we ol man oli mekem agensem profet ya i minim wanem?

² Ol mesej blong jajmen we Jeremaea i mas talemaot, oli sua blong pulum trabol i kam long hem. Taswe, God i mekem hem i strong blong fesem ol trabol we bambae oli kam. (Jeremaea 1:8-10) Eksampel, tingting blong profet ya i kam strong bakegen taem hem i harem ol tok ya: “I tru, bambae oli faet agensem yu, be bambae oli no save winim yu, from we hemia nao tok blong Jeova: ‘Mi mi stap wetem yu, blong sevem yu.’” (Jeremaea 1:19, NW) Taem ol man oli faet agensem Jeremaea, i olsem we oli stap faet agensem God hem wan. Tede, Jeova i gat wan grup blong man we oli olsem ol profet mo we wok blong olgeta i klosap sem mak long wok we Jeremaea i mekem. Olsem Jeremaea, olgeta ya oli gat strong tingting blong talemaot profet tok blong God. Mesej ya we oli karem, i blong olgeta man mo olgeta nesen, mo i save mekem i gud no i save mekem i nogud long ol man i dipen long tingting we oli gat long saed blong mesej ya. Olsem long taem blong Jeremaea, i gat sam man we oli faet agensem God taem oli stap go agens long ol man blong God mo ol wok we God i givim blong oli mekem.

 Ol Man Blong Jeova Oli Kasem Trabol

3. ?From wanem ol man blong Jeova oli stap kasem trabol?

³ Ol man blong Jeova oli stap kasem trabol finis, long stat blong ol yia 19 handred. Long plante kantri, ol man we oli gat rabis plan, oli traem faenem rod blong spolem, no blong satem maot, blong olgeta we oli stap talemaot gud nius blong Kingdom blong God. Devel Setan nao i stap pulum ol man ya blong mekem olsem. Hem i Bigfala Enemi ya we i stap ‘raon long yumi oltaem, i olsem wan laeon we i stap singaot bigwan, i stap lukaot man blong i kakae.’ (1 Pita 5:8) Afta we “ol taem we God i makem long ol hiten man” oli finis long 1914, God i putumap Pikinini blong hem olsem niufala King blong wol, mo i givim oda ya long hem se: “Yu yu go rul long medel blong ol enemi blong yu, nao yu winim olgeta.” (Luk 21:24, NW; Ol Sam 110:2, NW) Kraes i yusum paoa we hem i kasem, blong sakemaot Setan long heven i kamdaon long wol ya. From we Devel Setan i save se taem blong hem i sot, hem i mekem kros blong hem i kamaot long ol tabu Kristin mo ol fren blong olgeta. (Revelesen 12:9, 17) ?Wanem i kamaot taem ol man ya blong faet agensem God oli stap mekem trabol bakegen mo bakegen long ol Kristin ya?

4. ?Wanem ol traem we ol man blong Jeova oli kasem long ol yia blong Faswan Bigfala Faet blong Wol, be wanem i hapen long 1919 mo 1922?

⁴ Long taem blong Faswan Bigfala Faet blong Wol, ol tabu man blong Jeova oli fesem plante traem long bilif blong olgeta. Ol man oli jikim olgeta mo talem ol giaman tok blong spolem nem blong  olgeta. Ol grup blong stronghed man oli ronem olgeta mo wipim olgeta. Olsem Jisas i talem finis, “bambae olgeta man oli no laekem yufala nating, oli agens long yufala.” (Matiu 24:9) Long taem ya we ol faet oli stap kamaot long evri ples, ol enemi blong Kingdom blong God oli yusum wan rod we ol man oli bin yusum agensem Jisas Kraes tu. Oli talem giaman tok agensem ol man blong Jeova se, oli stap wok agensem gavman. Ol enemi ya oli mekem trabol long wan impoten grup long ogenaesesen blong God long wol ya. Long Mei 1918, gavman i saenem pepa blong givim raet long polis blong holem J. F. Rutherford, we i presiden blong Watch Tower Society, mo seven narafala man we oli wok wetem hem. Kot i jajem olgeta eit man ya blong kalabus blong plante yia mo oli sanem olgeta i go long bigfala kalabus long Atlanta, Georgia, Yunaeted Stet. Naen manis biaen, oli gofri. Long Mei 1919, seket kot blong apil i talemaot klia se ol brata ya oli no bin kasem wan jajmen we i stret, mo from samting ya oli karemaot panis ya. Oli putum se kot bambae i lukluk long bisnes ya bakegen, be biaen, gavman i blokem samting ya, nao oli karemaot olgeta nogud tok agensem Brata Rutherford mo ol fren blong hem. Ol brata ya oli gobak long ol wok blong olgeta bakegen, mo long 1919 mo 1922 oli mekem sam bigfala asembli long Cedar Point, Ohio, blong givim strong tingting bakegen long evriwan blong mekem wok ya blong talemaot Kingdom.

5. ?Olsem wanem long ol Witnes blong Jeova long taem blong ol Nasi long Jemani?

⁵ Long ol yia 1930 wan niufala fasin blong rul i kam antap, hemia rul blong ol man we oli bos strong long kantri. Long taem ya, Jemani, Itali, mo Japan oli joen tugeta blong mekemap wanem we oli kolem ol Axis paoa. Long ol faswan ten yia ya, bigfala trabol i kam agensem ol man blong God, antap moa long Nasi Jemani. Oli putum tabu long wok blong ol man blong God. Polis i go insaed long haos blong ol Witnes, jekemap evri ples, mo tekem ol famle oli go kalabus. Plante taosen Witnes oli go long ol rabis kalabus from we oli no wantem lego bilif blong olgeta. Faet ya agensem God mo ol man blong hem, i traem blong finisim olgeta Witnes blong Jeova long ol kantri ya we oli gat ol strongfala rula. * Taem ol Witnes oli go long ol kot long Jemani blong faet from raet blong olgeta, Ministri blong Jastis aninit long rul blong ol Nasi, i rerem wan longfala tok blong meksua se bambae ol Witnes ya oli no win. Long tok ya oli talem se: “Ol kot oli no mas lus, jes from sam rul folem loa; be oli mas lukaot mo faenem ol rod blong mekem ol impoten wok blong olgeta, nomata sipos i gat sam loa we oli mekem i hadwok blong mekem olsem.” Samting ya i minim se ol kot bambae oli no save folem ol fasin we oli stret. Ol Nasi oli holem strong tingting ya se ol Witnes blong Jeova oli mekem wok blong ol enemi blong olgeta, mo oli stap ‘mekem trabol long rul blong ol Sosialis.’

6. ?Wanem ol traehad we man i mekem blong stopem wok blong yumi long taem blong Seken Bigfala Faet blong Wol mo long ol yia biaen long taem ya?

⁶ Long taem blong Seken Bigfala Faet blong Wol, plante gavman oli putum tabu long wok blong ol man blong God, olsem long Ostrelia, Kanada, mo ol narafala kantri we oli stap aninit long gavman blong Inglan, olsem Afrika, Esia, mo sam aelan long Karibin mo Pasifik. Long Yunaeted Stet, sam man we oli no laekem ol Witnes mo sam man we oli no gat klia save long trutok, oli ‘mekem ol loa blong stanemap ol fasin nogud.’ (Ol Sam 94:20) Be ol Witnes oli go long kot blong faet from raet blong olgeta long ol bisnes olsem fasin blong no salut long flag mo prij long ol haos wanwan. Ol disisen we sam kot long Yunaeted Stet oli tekem blong sapotem ol Witnes, oli kam olsem strongfala pruf we ol Witnes ya oli save yusum blong kasem fasin fri blong wosip. Tangkiu long Jeova from we ol enemi oli no win. Taem faet klosap i finis long Yurop, ol gavman oli karemaot tabu we oli bin putum long wok blong ol Witnes. Olgeta taosen Witnes we oli bin stap long ol rabis kalabus, oli gofri. Be, faet i no finis yet. Kwiktaem nomo afta long Seken Bigfala Faet ya blong Wol, wan narafala faet i kamaot we oli kolem Kol Wo. * Ol kantri long Is Yurop oli gohed bakegen blong mekem trabol i kam long ol man blong Jeova. Gavman i tekem aksin blong stopem wok blong prij blong ol Witnes, blokem ol buk long saed blong Baebol, mo no moa givim raet blong mekem ol asembli. Plante Witnes oli go kalabus no oli mekem strongfala wok long ol kamp blong presina.

!Gohed Wetem Wok Blong Prij!

7. ?Wanem samting i hapen long ol Witnes blong Jeova long Polan, Rasia, mo narafala kantri bakegen long ol yia we oli jes pas?

⁷ Taem ol yia oli pas, fasin fri blong mekem wok blong talemaot Kingdom i stat bakegen. Long 1982, ol brata long Polan oli kasem raet blong mekem wan asembli blong wan dei, nating se kantri ya i stap yet  aninit long rul blong ol Komunis. Long 1985 ol Witnes oli mekem ol Intenasnal asembli long ples ya. Mo long 1989, ol bigbigfala intenasnal asembli oli gohed bakegen long kantri ya, wetem plante man blong Rasia mo Yukren we oli kam. Long semfala yia ya, gavman long Hangari mo Polan oli luksave ol Witnes blong Jeova olsem wan skul we loa i agri long hem. Long 1989, klosap long koltaem, Stonwol blong Berlin i foldaon. Sam manis nomo biaen, gavman blong Is Jemani i luksave mo agri long ol wok blong ol Witnes blong Jeova, mo smoltaem biaen, ol Witnes oli mekem wan intenasnal asembli long Berlin. Mo long stat blong ol yia 1990, Sosaeti i traem faenem rod blong mitim mo storian wetem ol brata long Rasia. Ol brata oli storian wetem sam long ol haeman long Moscow, ale long 1991, gavman blong kantri ya i luksave ol Witnes blong Jeova mo i givim raet long olgeta blong wosip. Stat long taem ya, wok i gru bigwan long Rasia mo long ol narafala ripablik we bifo oli haf blong Soviet Yunion.

8. ?Wanem i hapen long ol man blong Jeova long ol 45 yia afta we Seken Bigfala Faet blong Wol i finis?

⁸ Nating se trabol agensem ol Witnes i godaon long samfala ples, be long sam narafala ples trabol ya i kam antap. Long ol 45 yia biaen long Seken Bigfala Faet blong Wol, plante kantri oli no wantem luksave ol Witnes blong Jeova olsem wan skul we loa i agri long hem. Antap long samting ya, ol gavman oli putum tabu long ol Witnes, no long wok we oli stap mekem long 23 kantri blong Afrika, 9 kantri blong Esia, 8 kantri blong Yurop, 3 kantri long Latin Amerika, mo 4 smosmol aelan.

9. ?Ol man blong Jeova long Malawi oli pastru long wanem hadtaem?

⁹ Long stat blong 1967, ol Witnes blong Jeova long Malawi oli kasem trabol we i nogud olgeta. Ol Kristin brata blong yumi long ples ya oli no wantem pem ol kad blong joen long ol pati blong politik, from we ol trufala Kristin oli no stap joen long ol bisnes blong politik. (Jon 17:16) Afta long wan miting blong Malawi Kongres Pati long 1972, ol man oli stat bakegen blong mekem trabol long ol Witnes. Oli ronemaot ol brata long haos blong olgeta mo oli blokem olgeta blong oli no kasem wok blong winim mane. Plante taosen Witnes oli ronwe long kantri ya from we oli no wantem lusum laef blong olgeta. ?Be, ol man ya we oli faet agensem God mo ol man blong hem, oli win? !No gat! Taem ol samting long Malawi oli jenis, ol ripot oli soemaot se long 1999 i gat 43,767 pablisa blong Kingdom mo bitim 120,000 man oli kam long ol distrik asembli long kantri ya. Wan niufala branj ofis i stanap long bigfala taon blong kantri ya.

Oli Traem Faenem Poen

10. Olsem long taem blong Daniel, ?olgeta we oli agensem ol man blong God long taem blong yumi oli mekem wanem?

¹⁰ Ol man we oli agensem trufala wosip, ol lida blong skul, mo sam narafala man bakegen, oli no harem gud nating from mesej blong yumi we i kamaot long Tok blong God. Ol lida blong Krisendom oli stap biaenem ol man blong agens blong oli traem faenem wan rod we oli talem se i folem loa, blong sapotem faet blong olgeta agensem yumi. ?Wanem sam trik we samtaem oli yusum? Tingbaot, ?wanem giaman trik we ol rabis man oli bin yusum blong agensem Daniel? Long Daniel 6:4, 5, yumi ridim se: “Nao tufala presiden ya wetem ol praeminista ya oli traem blong faenemaot sam poen long Daniel long wok blong hem, be oli no save faenem wan samting nating, from we hem i putum olgeta tingting blong hem long wok blong hem, mo ol man oli save trastem hem, mo hem i no mekem wan samting we i rong no i no stret. Nao oli taltalem long olgeta se, ‘Daniel ya, bambae yumi no save faenem wan poen long hem nating long wok blong hem. Ating yumi save kasem hem long fasin ya nomo we hem i stap folem Loa blong God blong hem.’” Tede, ol man blong agensem yumi oli mekem sem mak taem oli traem faenem ol poen long yumi. Oli mekem bigfala toktok se yumi wan “grup blong man we i denja” mo oli traem pulum evri man blong gat tingting ya long saed blong ol Witnes blong Jeova. Blong agensem wosip blong yumi mo blong agensem fasin blong yumi blong traem folem ol rul blong God, oli givim rong tingting long saed blong yumi, oli mekem tingting blong man i hafhaf long saed blong yumi mo oli talem plante giaman stori.

11. ?Ol man we oli agensem ol Witnes blong Jeova oli mekem wanem giaman toktok?

¹¹ Long sam kantri, ol haeman blong skul mo politik oli no wantem luksave se yumi stap folem ‘prapa fasin blong ona long God, we hem i luk se i klin gud mo i stret gud.’ (Jemes 1:27) Nating se ol Kristin wok blong yumi oli stap gohed naoia long 234 kantri, ol man we oli agensem yumi oli stap talem yet se yumi no wan “skul we plante man oli save long hem.” Smoltaem bifo long wan intenasnal asembli long 1998, wan niuspepa long Athens i raetem toktok we wan lida blong Grik Otodoks Jos i talem. Lida ya i talem se “[ol Witnes blong Jeova] oli no wan ‘skul we plante man oli save long hem,’” nating se Kot blong Ol Raet blong Man long Yurop i talem i defren. Sam dei biaen, wan narafala niuspepa  long semfala taon, i raetemdaon tok blong wan man blong skul we i talem se: “Yumi no save talem se [ol Witnes blong Jeova] oli ‘wan Kristin kongregesen,’ from we i no gat wan tijing blong olgeta we i laenap wetem bilif blong ol Kristin mo long Jisas Kraes.” !Yumi sapraes bigwan long toktok ya from we i no gat wan narafala skul we i traehad blong pulum man blong folem eksampel blong Jisas, i bitim ol Witnes blong Jeova!

12. Taem yumi stap long faet blong yumi long saed blong spirit, ?yumi mas mekem wanem?

¹² Yumi traem faenem rod blong blokem ol enemi blong gud nius mo blong mekem gud nius i stanap strong folem loa. (Filipae 1:7) Mo tu, bambae yumi no lego, no haedem, strong tingting we yumi gat blong folem ol stretfala rul blong God. (Taetas 2:10, 12) Olsem Jeremaea, yumi ‘rere blong go talemaot ol tok we God i talem,’ we yumi no letem ol man we oli stap faet agensem God oli mekem yumi fraet. (Jeremaea 1:17, 18) Tabu Tok blong Jeova i makemaot klia stretfala rod we yumi mas folem. I nogud yumi traem dipen long ‘paoa we i kam long man nomo’ no lukaot ‘sefples blong haed long king blong Ijip,’ hemia wol ya. (2 Kronikel 32:8; Aesea 30:3; 31:1-3) Taem yumi joen long faet ya long saed blong spirit, yumi mas gohed blong trastem Jeova wetem ful hat blong yumi, yumi mas letem hem i lidim yumi, mo yumi no mas dipen long prapa waes blong yumi. (Ol Proveb 3:5-7) Sipos Jeova i no givhan long yumi mo i no lukaot long yumi, olgeta wok ya blong yumi bambae oli “blong nating nomo.”—Ol Sam 127:1.

Kasem Trabol Be No Lego

13. ?From wanem yumi save talem se Setan i lus long faet ya we hem i mekem agensem Jisas?

¹³ Beswan eksampel we yumi gat long saed blong fasin fasgud long Jeova, hemia eksampel blong Jisas. Ol man oli bin giaman se hem i stap agensem gavman mo i stap brekem loa. Afta we Paelat i lukluk long bisnes ya finis, hem i rere blong letem Jisas i go fri. Be olgeta man, we ol lida blong skul oli stap pusum olgeta, oli singaot strong se Jisas i mas ded we i hang long pos, nating se hem i no gat fol. Oli singaot se Barabas i mas go fri long ples blong Jisas. !Barabas ya i wan man we i go kalabus from we hem i bin agensem gavman mo i kilim wan man i ded! Taswe, Paelat i traem bakegen blong jenisim tingting blong ol stronghed man ya blong agens, be hem i no naf, ale, hem i gohed, i  folem tingting blong olgeta. (Luk 23:2, 5, 14, 18 - 25) Nating se Jisas i ded we i hang long pos, rabis plan ya we Setan nomo i mekem i kamaot agensem gudfala Pikinini blong God, i no win nating. Jeova i mekem Jisas i laef bakegen long ded mo i putum hem i sidaon long raethan blong Hem. Nao, long dei blong Pentekos blong yia 33 K.T., Jisas ya we i kasem glori finis, i sanem tabu spirit i kamdaon long Kristin kongregesen—“wan niufala wok blong God.”—2 Korin 5:17, NW; Ol Wok 2:1-4.

14. ?Wanem i kamaot taem ol lida blong skul blong ol man Jiu oli kam agensem ol man blong Jisas?

¹⁴ Smoltaem afta long samting ya, ol skul oli mekem trabol long ol aposol, be ol man blong Kraes oli no stop blong tokbaot ol samting we oli bin luk mo harem. Ol disaepol blong Jisas oli prea se: “Hae God, naoia plis yu makemgud ol strong tok ya we oli stap mekem agens long mifala. Mifala i man blong wok blong yu. Plis yu givhan long mifala, blong bambae mifala i talemaot ol tok blong yu, we tingting blong mifala i strong.” (Ol Wok 4:29) Jeova i ansa long prea blong olgeta taem hem i sanem tabu spirit i kam long olgeta mo i mekem oli strong blong gohed long wok ya blong prij wetem fasin no fraet. I no longtaem biaen, ol aposol oli kasem oda bakegen se oli mas stop blong prij, be Pita mo ol narafala aposol, oli ansa se: “Mifala i mas obei long God, mifala i no save obei long man.” (Ol Wok 5:29) Nating se ol man oli traem mekem olgeta oli fraet, oli holem olgeta no wipim olgeta, be oli no naf blong jenisim tingting blong olgeta we i stap strong long wok blong talemaot Kingdom.

15. ?Hu ya Gamaliel, mo wanem toktok we hem i givim long ol lida blong skul we oli stap agensem ol man blong Jisas?

¹⁵ Ale, ?ol lida blong skul oli mekem wanem? “Tok ya i stikim olgeta tumas, nao oli wantem jajem ol aposol, se oli mas ded.” Be, wan tija blong Loa we nem blong hem Gamaliel, i stap. Hem i wan Farisi, mo plante man oli tinghae long hem. Hem i putum ol aposol oli stap afsaed long Sanhedrin blong smoltaem, nao hem i givim toktok ya long ol narafala lida blong skul se: “Ol man ples. Yumi mas tingting gud long samting ya we yumi wantem mekem long olgeta ya. . . . Hemia tok blong mi long bisnes ya. Yumi mas livim ol man ya i stap. Yumi mas letem olgeta oli go fri, from we sipos samting ya i tingting mo wok blong man nomo, bambae i no save gotru. Be sipos samting ya i blong God, bambae yumi no save blokem olgeta. Maet bambae yumi faenemaot we yumi stap faet agens long God ya.”—Ol Wok 5:33-39.

Tul Blong Faet Blong Agensem Yumi i No Save Win

16. Long prapa tok blong yu, ?olsem wanem yu save eksplenem toktok we Jeova i givim long ol man blong hem?

¹⁶ Advaes ya we Gamaliel i givim i waes, mo yumi glad taem i gat sam man we oli tok blong sapotem yumi. Mo tu, yumi luksave se fasin fri blong mekem wosip i bin stanap long plante disisen blong kot from sam jaj we oli wantem mekem fasin we i stret. Tru tumas, fasin blong yumi blong folem Tok blong God i no karem glad i kam long ol lida blong Krisendom mo ol narafala lida blong Bigfala Babilon ya we i minim olgeta giaman skul blong wol. (Revelesen 18:1-3) Nating se olgeta ya wetem ol man blong olgeta, oli faet agensem yumi, yumi sua long samting ya se: “Ol samting ya blong mekem faet bambae oli no save mekem yufala i karekil. Mo bambae yufala i gat ansa tu blong givim long olgeta we oli gat poen long yufala. Yufala i man blong wok blong mi, mo bambae mi blokemgud yufala, mi mekem yufala i win. Mi mi Hae God, mo hemia tok blong mi.”—Aesea 54:17.

17. Nating se ol man oli faet agensem yumi, ?from wanem yumi no fraet?

¹⁷ Ol enemi blong yumi oli faet agensem yumi blong nating nomo, be yumi no lusum strong tingting blong yumi. (Ol Sam 109:1-3) Bambae yumi neva letem ol man ya we oli no laekem mesej blong yumi long saed blong Baebol, oli mekem yumi fraet nao yumi lego bilif blong yumi. Yumi save se faet blong yumi long saed blong spirit, bambae i kam strong moa, be yumi save tu, wanem we bambae i hapen biaen. Olsem Jeremaea, bambae yumi luk profet tok ya i kamtru we i se: “I tru, bambae oli faet agensem yu, be bambae oli no save winim yu, from we hemia nao tok blong Jeova: ‘Mi mi stap wetem yu, blong sevem yu.’” (Jeremaea 1:19, NW) !Yes, yumi save se ol man blong faet agensem God bambae oli no save win!

[Ol futnot]

?Bambae Yu Yu Ansa Olsem Wanem?

• ?From wanem ol man blong Jeova oli kasem trabol?

• ?Long wanem rod ol nogud man oli faet agensem ol man blong Jeova?

• ?From wanem yumi save sua se olgeta we oli faet agensem God bambae oli no save win?

[Kwestin]

[Tok blong pija long pej 17]

Jeremaea i sua se Jeova bambae i stap wetem hem

[Tok blong pija long pej 18]

Sam long olgeta we oli bin go long ol rabis kalabus

[Tok blong pija long pej 18]

Ol grup blong man we oli hivap blong kilim ol Witnes blong Jeova

[Tok blong pija long pej 18]

J. F. Rutherford mo olgeta we oli wok wetem hem

[Tok blong pija long pej 21]

Long saed blong Jisas, ol man we oli faet agensem God oli no win