?Olsem Wanem Tabu Spirit Blong God i Wok Tede?

LEG blong hem i nogud finis taem hem i stap long bel blong mama blong hem. Evri dei, hem i stap sidaon long get blong tempel we oli kolem se “Doa we i Flas Gud” blong askem mane long ol man we oli stap go insaed long tempel. Be wan dei, man ya we leg blong hem i nogud mo we i stap askem samting olbaot, i kasem wan presen we i sas moa long mane. !Leg blong hem i kam gud bakegen!—Ol Wok 3:2-8.

Tufala aposol ya Pita mo Jon, tufala nao i “givhan long hem blong i stanap” mekem se “leg blong hem i kam gud.” Nating se i olsem, tufala i no pulum ol man blong ting se hemia prapa paoa blong tufala we i mekem boe ya i kam gud bakegen. ?From wanem? Pita hem wan i eksplenem se: “Ol laen blong Isrel. ?From wanem yufala i sapraes tumas long samting ya? ?Weswe yufala i stap lukluk mitufala olsem? ?Yufala i ting se mitufala i mekem man ya i save wokbaot long paoa blong mitufala nomo, no from we mitufala i tabu man?” Yes, Pita mo Jon, tufala tugeta i luksave se i no prapa paoa blong tufala, be from paoa blong tabu spirit nao, tufala i save mekem wan samting olsem.—Ol Wok 3:7-16; 4:29-31.

Long taem ya, ‘ol samting ya blong sapraes’ oli blong soem se God i stap sapotem niufala Kristin kongregesen. (Hibrus 2:4) Be afta we ol samting ya blong sapraes oli kasem mak blong olgeta, ‘bambae oli lus,’ olsem we aposol Pol i talem. * (1 Korin 13:8) Taswe, naoia insaed long Kristin kongregesen, yumi no moa luk se God i mekem ol merikel blong man i kam gud long sik blong olgeta, i no moa gat ol profet tok, no wok blong ronemaot ol devel long man.

?Taswe, samting ya i minim se tabu spirit blong God i no moa stap wok tede? !Nogat! I gud yumi tingbaot sam narafala rod we tabu spirit blong God i wok long faswan handred yia mo i stap wok yet long taem blong yumi tede.

“Spirit Blong Trutok”

Wan wok we tabu spirit blong God i stap mekem, hemia blong givim moa save, mekem ol samting oli kam klia, mo talemaot ol trutok we oli haed. Smol taem nomo bifo long ded blong hem, Jisas i talem long ol disaepol blong hem se: ‘Mi mi gat plante narafala samting yet blong talem long yufala. Be naoia yufala i no save kasem olgeta evriwan, oli strong tumas yet long yufala. Be taem spirit ya we i stamba blong trutok i kam, hem bambae i save tijim yufala long olgeta trutok.’—Jon 16:12, 13.

‘Spirit ya we i stamba blong trutok’ i kamdaon long Pentekos 33 K.T. * Long taem ya, samwe long 120 disaepol we oli kam wanples long wan haos long Jerusalem, oli baptaes long tabu spirit. (Ol Wok 2:1-4) Aposol Pita tu i stap long medel blong olgeta ya we oli bin joen tugeta blong mekem lafet ya we oli stap mekem evri yia. Tabu spirit i fulap long Pita, taswe hem “i stanap” mo i mekem ol trutok long saed blong Jisas oli kam moa klia. Hem i tokbaot olsem wan eksampel, se “Man Nasaret ya Jisas” hem i “stap long raet saed blong God.” (Ol Wok 2:14, 22, 33) Tabu spirit blong God i mekem we Pita i no fraet nating blong talem long ol man Jiu we oli stap lesin se: “From samting ya yumi ol laen blong Isrel evriwan, yumi mas save gud se Jisas ya we yumi nilim hem long [“pos,” NW], hem nao God i mekem hem i Masta blong yumi, mo i Mesaea tu.” (Ol Wok 2:36) Frut blong nambawan mesej we Pita i kasem tru long tabu spirit, hemia se tri taosen man “oli bilif long tok blong hem” mo oli tekem baptaes. Long rod ya, tabu spirit blong God i givhan blong tijim ol man ya blong kasem trutok.—Ol Wok 2:37-41.

Tabu spirit blong God i wok olsem wan tija mo i halpem ol man blong rimemba samting. Jisas i talem se: ‘Spirit ya blong givhan, we hem i tabu spirit, we bambae Papa blong mi i sanem i kam long nem blong mi, hem bambae i save tijim yufala long olgeta samting. Bambae hem i save mekem yufala  i tingbaot olgeta samting ya bakegen, we mi mi stap talem long yufala.’—Jon 14:26.

?Olsem wanem tabu spirit i bin wok olsem wan tija? Spirit blong God i openem tingting blong ol disaepol blong Jisas, blong oli tingbaot samting we oli bin harem fastaem finis long Jisas mo we oli no kasem save fulwan long hem. Wan eksampel, ol aposol oli save se taem Jisas i stap long fored blong Ponjes Paelet, haeman ya blong Rom we i stap lukaot long Judia, hem i talem se: “Mi mi no King olsem ol King long wol ya.” Nating se i olsem, 40 dei biaen, taem Jisas bambae i gobak long heven, ol aposol oli gat rong tingting ya yet se, Kingdom blong Jisas bambae i stanap long wol ya. (Jon 18:36; Ol Wok 1:6) I klia se, ol aposol oli no kasem fulwan mining blong ol tok blong Jisas go kasem taem ya nomo we oli kasem tabu spirit blong God long Pentekos 33 K.T.

Mo tu, spirit blong God i halpem olgeta blong rimemba olgeta defren tijing we Jisas i bin givim long olgeta. Eksampel, ol profet tok we oli tokbaot ded blong Kraes mo taem we bambae hem i laef bakegen, oli kasem niufala mining tru long help blong tabu spirit. (Matiu 16:21; Jon 12:16) Taem ol aposol oli tingbaot bakegen ol tijing blong Jisas, samting ya i givhan long olgeta blong no fraet blong toktok from bilif blong olgeta long fored blong ol king, ol jaj, mo ol lida blong skul.—Mak 13:9-11; Ol Wok 4:5-20.

Antap long samting ya, tabu spirit blong God i givhan blong lidim ol faswan Kristin oli go long ol teritori we oli save karem plante frut long wok blong prij. (Ol Wok 16:6-10) Mo tu, spirit blong God i pusum ol Kristin blong bifo blong mekem wok ya blong raetem Tok blong God, Baebol, blong givhan long laef blong olgeta man. (2 Timoti 3:16) Taswe i klia se, tabu spirit i wok long plante defren  kaen rod long ol faswan handred yia. God i no givim tabu spirit blong mekem ol merikel nomo.

Tabu Spirit Long Taem Blong Yumi

Sem mak olsem bifo, tabu spirit i mekem wok blong givhan long plante Kristin tede. Samting ya i klia long wan smol grup blong ol Baebol studen long Allegheny, Pennsylvania, Yunaeted Stet, long lashaf blong ol yia 1800. Ol studen ya we oli gat strong tingting blong stadi long Baebol, oli wantem tumas blong save “trutok.”—Jon 8:32; 16:13.

Wan memba blong grup ya, Charles Taze Russell, i tokbaot traehad blong hem blong faenem ol trutok blong Baebol i se: “Mi prea . . . se bambae mi save karemaot ol giaman save long tingting mo hat blong mi we oli save blokem mi, mo blong tabu spirit blong hem i lidim mi blong kasem stret save.” God i blesem prea ya we i soem tingting daon.

Taem Russell mo ol fren blong hem oli wok strong blong stadi long Baebol, plante samting oli kam moa klia. Russell i eksplenem se: “Mifala i faenemaot se long plante handred yia finis, ol defren Jos mo grup oli bin seraotem ol tijing blong Baebol bitwin long olgeta. Mo oli meksemap plante tingting blong man mo ol mastik i go wetem ol tijing ya.” Frut blong samting ya hemia wanem we hem i singaot se, “fasin blong no putum trutok long stret ples.” Yes, bigfala hip blong ol hiten tijing we oli kam insaed long Krisendom long ol handred yia we i pas, oli haedem olgeta trutok blong Baebol. Be Russell i wantem tumas blong save mo talemaot trutok.

Insaed long magasin ya Zion’s Watch Tower and Herald of Christ’s Presence, Russell mo ol fren blong hem oli no fraet blong tok agensem ol giaman tijing blong Jos we oli no stap talemaot trutok long saed blong God. Oli luksave se—defren olgeta long ol tingting blong ol skul tede—sol i save ded, mo taem yumi ded yumi gobak long beregraon. Oli luksave tu se, Jeova nomo hem i trufala God mo from samting ya hem i no haf blong wan Triniti.

Be yumi save finis se, rod ya blong soemaot klia ol giaman tijing blong Krisendom i mekem ol haeman blong Krisendom oli kros. Plante lida blong Jos blong Katolik mo Protestan oli no wantem lusum ol hae ples blong olgeta, taswe oli stanemap sam grup we mak blong olgeta i blong spolem gudnem blong Russell. Be Russell wetem ol fren blong hem oli no lego. Oli lukluk i go long God mo oli trastem hem blong lidim olgeta wetem tabu spirit blong hem. Russell i talem se: “Masta blong mifala i mekem mifala i sua gud se . . . tabu spirit blong Papa, we Hem i sanem i kam kwiktaem long mifala, tru long Jisas Kraes we i pemaot mifala mo i Man ya we i toktok from mifala mo we i Hed blong mifala, bambae i save tijim mifala.” !Mo i tru se tabu spirit i tijim olgeta! Ol trufala Baebol Studen ya oli gohed blong tekem klin wota we i olsem trutok blong Baebol, mo oli talemaot samting ya long olgeta ples blong wol.—Revelesen 22:17.

Blong bitim wan handred yia finis, ogenaesesen blong ol Witnes blong Jeova long taem blong yumi, i rere blong letem tabu spirit blong God i lidim hem. Taem spirit blong Jeova i mekem se sloslou, save blong olgeta long saed blong spirit i kam klia moa, ol Witnes oli rere blong mekem ol jenis we oli nidim blong folem ol save we oli kasem.—Ol Proveb 4:18.

“Bambae Yufala i Witnes Blong Mi”

Jisas i soemaot wan narafala wok blong tabu spirit blong God taem hem i talem long ol disaepol  blong hem se: “Taem tabu spirit i kam kasem yufala, bambae yufala i gat paoa. Nao bambae yufala i witnes blong mi long . . . olgeta ples long wol.” (Ol Wok 1:8, NW) Promes we Jisas i mekem blong givim “paoa” mo “tabu spirit” long ol disaepol blong hem blong oli save mekem wok we God i givim long olgeta, i stap gohed yet tede.

Plante man oli save ol Witnes blong Jeova from wok blong olgeta blong prij. (Lukluk bokis.) Yes, ol Witnes blong Jeova oli talemaot mesej blong trutok long bitim 230 kantri mo aelan. Nating se long wanem kaen taem, mo nating se klosap oli save lusum laef blong olgeta long ol ples we i gat faet long hem, be oli no fraet blong talemaot se oli sapotem Kingdom blong God. Strong tingting we oli gat long Kristin minista wok blong olgeta i pruvum se tabu spirit i stap wok long taem blong yumi. Mo i klia se Jeova God i stap blesem traehad blong olgeta.

Eksampel, las yia, oli spenem bitim wan bilian aoa blong talemaot gud nius blong Kingdom blong God. ?Wanem frut we i kamaot from? I gat 323,439 man we oli tekem baptaes long wota blong soemaot se oli givim laef blong olgeta long God. Antap long samting ya, oli mekem 4,443,884 Baebol stadi wetem ol niuwan we oli intres. Olgeta ripot oli soem se oli serem 26,607,741 buk, 631,162,309 magasin, mo 63,495,728 buklet long ol man. !Hemia wan strongfala pruf se spirit blong God i stap wok!

Spirit Blong God Mo Yu

Taem wan man i lesin long gud nius, i folem ol rul blong God long laef blong hem, mo i soemaot bilif long ransom, rod i open long hem blong kam klin long fored blong Jeova. Long olgeta ya aposol Pol i talem se: “God . . . i givim [tabu spirit] blong hem long yufala.”—1 Tesalonaeka 4:7, 8; 1 Korin 6:9-11.

Taem man i gat spirit blong God hem i save kasem plante blesing. ?Wanem kaen blesing? Wan samting hemia wanem we tabu Tok blong God i talem se: ‘Tabu spirit, hem i stap mekem ol man oli gat narafala fasin. Hem i stap mekem we oltaem oli stap lavem ol man, mo oli stap glad, mo oli gat pis long tingting blong olgeta. Hem i stap mekem we tingting blong olgeta i longfala, mo oli gat sore long man, mo we fasin blong olgeta i gud nomo, mo i stret oltaem we i no save jenis. Hem i stap mekem we olgeta oli kwaet man, mo oli save blokem ol samting we olgeta nomo oli wantem.’ (Galesia 5:22, 23) Taswe, tabu spirit blong God hem i wan paoa we i pusum man blong mekem i gud, mo i save halpem man blong soemaot ol fasin blong God.

Mo tu, sipos yu ridim Baebol mo yu folem wanem we yu lanem, spirit blong God i save halpem yu blong gru long waes, save, fasin luksave, fasin blong skelem gud ol samting mo fasin blong tingting gud. King Solomon i kasem “waes mo save . . . we i bigwan tumas, man i no save makem,” from we hem i wantem mekem God i glad i bitim we man i glad. (1 King 4:29) From we God i givim tabu spirit long Solomon, i sua se bambae hem i no save holembak tabu spirit blong hem long olgeta we oli stap traem blong mekem hem i glad tede.

Tabu spirit blong God i halpem ol Kristin tu blong faet agensem Setan mo ol rabis enjel blong hem, rabis wol ya blong tede, mo ol slak fasin we oli kamaot from sin we i stap insaed long yumi. ?Olsem wanem samting ya i kamtru? Aposol Pol i givim ansa se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:13) Tabu spirit i no save karemaot ol traem blong yumi; be hem i save halpem yumi blong stanap strong tru long ol traem ya. Taem we yumi dipen long spirit blong God, yumi save kasem “paoa ya we i bigwan tumas” blong fesem eni trabol no wari.—2 Korin 4:7; 1 Korin 10:13.

Taem yu tingbaot olgeta pruf ya, i tru nomo nomo se tabu spirit blong God i stap wok long taem blong yumi. Spirit blong Jeova i givim paoa long ol man blong hem blong talemaot ol nambawan stamba tingting blong hem. Tabu spirit i gohed blong soemaot laet long saed blong spirit, mo i mekem bilif blong yumi i kam strong, blong halpem yumi blong fasgud oltaem long Man ya we i Wokem yumi. !Yumi save glad bigwan from we God i stap tru long olgeta promes blong hem taem hem i givim tabu spirit long ol trufala man blong wok blong hem tede!

[Ol futnot]

[Bokis blong pija long pej 10]

Tok We Narafala i Talem Long Saed Blong Ol Witnes Blong Jeova

“Ol narafala Jos oli pem ol haeman long saed blong save blong pulum ol man oli go long Jos. Ol man ya oli raorao agensem ol bigfala kwestin blong tede long saed blong fasin we man i slip wetem man, no woman i slip wetem woman, mo fasin blong kilim bebi insaed long bel. Ol Witnes oli no jenisim bilif blong olgeta blong laenap wetem wol tede we i stap jenis. Oli stap gohed long wok blong olgeta blong prij long olgeta man long Wol.”—The Orange County Register blong Orange County, California, Yunaeted Stet.

“I no gat plante Jos we oli gat strong tingting blong serem bilif blong olgeta wetem narafala man . . . olsem we ol Witnes blong Jeova oli stap mekem.”—The Republic of Columbus, Indiana, Yunaeted Stet.

“Olgeta nomo oli stap go long ol haos wanwan wetem ‘gud nius ya,’ folem wanem we Baebol i talem.”—Życie Literackie, Polan.

“Ol Witnes blong Jeova oli karem mesej blong Jeova i go long olgeta ples long wol tru long bigfala wok ya blong prij, we man i neva luk bifo.”—News-Observer, Tamaqua, Pennsylvania, Yunaeted Stet.

[Ol Tok blong pija long pej 9]

Tabu spirit blong God i mekem ol samting long saed blong spirit oli kam klia,

. . . hem i leftemap ol nambawan Kristin fasin,

. . . mo i sapotem yumi long wok blong prij we yumi stap mekem long olgeta ples blong wol