?Yu Yu Save Wanem Long Saed Blong Majik?

!MAJIK! ?Tok ya i mekem se yu tingbaot wanem?

Long tingting blong plante man, majik hem i ol giaman bilif mo tingting nomo we i no nid blong tinghevi long hem. Ol man olsem, oli ting se wok blong majik i kamaot nomo long tingting blong man—tingting ya se i gat ol olfala woman we oli werem ol blak klos we i kavremap hed blong olgeta, oli sakem ol wing blong flaengfokis i go long wan bigfala sospen we wota i stap boel insaed, oli tanem man i kam frog, mo oli flae long brum stik blong olgeta long naet, mo oli stap laf nogud.

Be long sam narafala, wok blong majik i no wan samting blong laf long hem. Sam man we oli stadi long saed ya, oli talem se bitim haf blong ol man long wol oli bilif se ol man blong wokem majik oli tru mo oli save gat paoa antap long laef blong ol narafala man. Plante milyan man oli bilif se wok blong majik hem i rabis, i denja, mo ol man oli mas fraet bigwan long hem. Eksampel, wan buk we i stap tokbaot ol skul blong Afrika i talem se: “Bilif long ol wok mo denja blong ol nogud majik, wok wetem rabis spirit mo nakaemas, i strong long laef blong ol man Afrika . . . Ol man long ol vilej oli no laekem nating ol man blong wok wetem rabis spirit mo majik. Kam kasem tede i gat sam spesel ples mo taem blong evriwan long vilej oli kilim i ded ol man we oli stap mekem ol samting ya.”

Be, long ol kantri blong Wes, ol man oli respektem wok blong majik. Ol buk mo televisin oli mekem se ol man oli no moa fraet long fasin blong wokem majik. Man ya David Davis we i stap stadi long ol pleplei, i lukluk gud samting ya mo i talem se: “Wantaem nomo, ol man blong wokem majik oli kam yangfala mo oli naes, we oli pulum ae blong man bigwan. Hollywood * i kwik blong yusum ol niufala tingting ya we man i gat. . . . Hem i mekem se plante man, antap moa ol woman mo ol pikinini, oli laekem ol man blong wokem majik, olsem we oli ol naesfala man we narafala i save fren gud wetem olgeta.” Hollywood i save gud olsem wanem blong yusum eni tingting we ol man oli gat, blong winim mane.

Samfala oli talem se majik i wan skul we i stap gru i kam bigwan long Yunaeted Stet. Long ol kantri we oli rij, plante moa man oli tinghevi long raet blong ol woman, mo ol skul oli mekem tingting blong plante man i foldaon. Taswe, ol man ya oli joen long ol defren kaen wok blong majik, blong kasem ol samting we oli nidim long saed blong spirit. I tru, se i gat plante defren rod blong wokem majik mekem se plante man oli no agri long mining blong wod ya “majik.” Be, plante man we oli wokem majik oli stret wetem mining blong tok ya Wicca—wan diksonari i talem mining blong tok ya se hem i “wan hiten skul we stamba blong hem i kamaot long wes blong Yurop. Hemia bifo we Yurop i kam olsem wan Kristin kantri mo i stap jenis sloslou, folem ol yia 1900.” *  From samting ya, plante man blong wokem majik oli talem se oli ol hiten man no ol niufala hiten man.

Histri i soem se ol man oli no laekem nating ol man blong wokem majik, oli bin givim hadtaem long olgeta, oli mekem olgeta i harem nogud tumas, mo tu, oli kilim olgeta i ded. From samting ya ol man blong wokem majik tede, oli stap traem blong winim gudnem long fes blong ol man. Long wan stadi, oli askem long ol man we oli wokem majik se wanem kaen mesej nao oli wantem talemaot long evri man. Man ya Margot Alder, we i stap traehad blong faenem ol defren save long saed blong olgeta, i talem ansa blong olgeta se: “Mifala i no rabis. Mifala i no wosip long Devel. Mifala i neva mekem nogud long man no pulum man blong trikim olgeta. Mifala i no mekem denja long man. Mifala i man olsem yufala nomo. Mifala i gat famle, wok, hop, mo samting we mifala i laekem tumas. Mifala i no wan smol grup we i wok haed. Mifala i no ol strenja . . . Yufala i no mas fraet long mifala . . . Mifala i sem mak nomo long yufala.”

Plante moa man naoia oli akseptem mesej ya. ?Be samting ya i minim se i no gat risen blong lukaot gud long wok blong mekem majik? Bambae yumi lukluk ansa blong kwestin ya long haf we i kam biaen.

[Ol futnot]