Haremgud Long Paoa We Jeova i Givim

“Taem we mi mi wari, mo mi stap tingting tumas, oltaem yu yu mekem tingting blong mi i kam gud bakegen, yu stap mekem mi mi glad.”—OL SAM 94:19.

 BAEBOL i gat ol tok we i leftemap tingting blong olgeta we oli stap harem nogud. From samting ya, yumi no sapraes long tok we The World Book Encyclopedia i talem, i se: “Fulap man oli bin lukluk i go long Baebol blong faenem rod blong harem gud, gat hop, mo kasem advaes blong lidim olgeta long taem blong trabol mo long taem we tingting blong olgeta i fasfas.” ?From wanem oli lukluk long Baebol?

From we Baebol i kamaot long Man ya we i Wokem yumi, we hem i lavem yumi tumas, hemia ‘God we i gat olgeta fasin blong leftemap tingting.’ Hem “i stap leftemap tingting blong yumi long olgeta trabol we yumi stap kasem.” (2 Korin 1:3, 4, NW) Hem i ‘God we i stap leftemap tingting blong ol man.’ (Rom 15:5, NW) Jeova i soem eksampel long saed ya taem hem i mekem rod blong givhan long yumi evriwan. Hem i sanem Pikinini blong hem, Jisas Kraes, wan nomo we hem i gat, i kam long wol ya, blong givim hop mo blong mekem yumi harem gud. Jisas i tijim se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Baebol i tokbaot Jeova, se hem i man ya we “i stap karem ol hevi samting blong yumi. Hem i God mo i stap sevem yumi.” (Ol Sam 68:19) Olgeta we oli fraet gud long God, oli save talem wetem strong tingting se: “Oltaem mi mi save we Hae God i stap wetem mi, i stap klosap long mi, nao i no gat wan samting i save muvum mi.”—Ol Sam 16:8.

Ol vas blong Baebol olsem oli soem dip lav we Jeova God i gat long yumi olgeta man long wol ya. I klia se Jeova i wantem tumas—mo hem i nafgud—blong mekem tingting blong yumi i strong mo blong mekem yumi harem gud bakegen taem yumi kasem trabol. “Olgeta we oli taed, hem i stap givim paoa long olgeta, mo olgeta we oli no strong, hem i stap mekem olgeta oli strong bakegen.” (Aesea 40:29) ?Nao, olsem wanem yumi save harem gud long paoa blong Jeova?

Jeova i Rili Kea Long Yumi

Man blong raetem Sam i raetem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.” (Ol Sam 55:22) Yes, Jeova God i intres long olgeta man long wol ya. Aposol Pita i talem klia long ol Kristin blong faswan handred yia se: “Oltaem hem [God] i stap tingbaot yufala.” (1 Pita 5:7) Jisas Kraes i makem poen ya se Jeova i rili tinghae long ol man long wol ya. Hem i talem se: “Ol smosmol pijin ya we man i stap salem olgeta, wan handred twanti vatu long faef, be i no gat wan long olgeta we God i fogetem samtaem. Yufala i luk. Ol hea blong hed blong yufala, be hem i kaontem evriwan. Yufala i no fraet. Long fes blong hem, yufala i gud moa, i winim plante smosmol pijin ya.” (Luk 12:6, 7) Yumi sas tumas long fes blong God, from we hem i makem gud evri smosmol samting long saed blong yumi. Hem i savegud ol samting long saed blong yumi, i bitim yumi wan, from we hem i gat bigfala intres long yumi wanwan.

Svetlana, yangfala woman blong rod ya we yumi tokbaot long faswan haf, i harem gud tumas taem hem i kasem save se Jeova i gat intres long ol wanwan man. Yangfala woman ya i stap plan blong kilim hem wan i ded taem ol Witnes blong Jeova oli mitim hem. Be hem i agri blong stadi Baebol, nao stadi i halpem hem blong save se Jeova i wan God we i rili intres long ol nid blong hem. Samting ya i kasem hat blong hem, i pusum hem blong jenisim ol fasin blong laef blong hem mo blong givim laef blong hem i go long God. Mo tu, samting ya i givhan long Svetlana blong gohed, nating se hem i gat problem, mo blong gat gudfala tingting long saed blong laef. Ale, hem i talem se: “Mi trastem fulwan se bambae Jeova i neva lego mi. Mi faenem se wanem we i stap long 1 Pita 5:7 i tru nomo. Vas ya i talem se: ‘Yufala i mas putum ol trabol blong yufala long han blong [Jeova], from we oltaem hem i stap tingbaot yufala.’”

Hop We i Stanap Long Baebol i Mekem Man i Harem Gud

Wan spesel rod we God i folem blong mekem yumi harem gud, hemia tru long Tok blong hem we i stap long Baebol. Tok ya i karem nambawan hop long saed blong fiuja. Aposol Pol i raetem se: “Olgeta tok ya we oli raetem long Baebol bifo, oli raetem blong tijim yumi. Nao maet yumi save gat hop, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4, NW) Pol i soemaot klia olsem wanem trufala hop i joen wetem fasin blong harem gud, taem hem i raetem se: “God ya we i Papa blong yumi, we i lavem yumi tumas, mo i mekem yumi harem gud blong olwe mo i givim gudfala hop long yumi from kaen fasin blong hem, i mekem hat blong yumi i harem gud mo i mekem yumi strong blong talem ol gudfala toktok mo blong mekem ol gudfala wok.” (2 Tesalonaeka 2:16, 17, NW) “Gudfala hop” ya i minim hop blong wan laef we i stret olgeta, i hapi, mo i no save finis long paradaes long wol ya.—2 Pita 3:13.

Hop ya we i sua mo i nambawan tumas i leftemap tingting blong Laimonis, man ya we  i alkolik mo haf bodi blong hem i ded, we yumi tokbaot long faswan haf. Taem hem i ridim ol buk blong ol Witnes blong Jeova we oli stanap long Baebol, hem i glad tumas blong kasem save long niufala wol we Kingdom blong God bambae i rul long hem, we long taem ya bambae helt blong hem i kam gud bakegen. Long Baebol, hem i ridim ol nambawan promes ya we oli soem se tru long wan merikel, ol sikman bambae oli kamgud bakegen: “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from.” (Aesea 35:5, 6) Blong kam naf blong laef long Paradaes ya, Laimonis i jenisim plante samting long laef blong hem. Hem i stopem fasin blong dring tumas alkol. Ol man we oli stap klosap long hem mo ol fren blong hem, oli luksave bigfala jenis we hem i mekem long laef blong hem. Naoia, hem i stap mekem sam Baebol stadi, i stap halpem ol narafala blong kasem glad ya we hop blong Baebol i save givim.

Paoa Blong Prea

Sipos sam samting i mekem se yumi harem nogud tumas long hat blong yumi, yumi save harem gud taem yumi prea long Jeova. Prea i save tekemaot baden long yumi. Taem yumi stap prea, yumi save harem gud taem yumi tingbaot ol samting we oli stap long Tok blong God. Long Baebol, Sam we i longfala moa, hem i wan naesfala prea. Man we i wokem Sam ya i singsing se: “Hae God, taem mi tingbaot ol tingting blong yu we yu mekem bifo olgeta, be oli mekem tingting blong mi i kam strong bakegen.” (Ol Sam 119:52) Taem yumi kasem ol bigfala hadtaem, antap moa ol hadtaem long saed blong helt, plante taem i no gat wan rod nating blong stretem trabol ya. Wetem prapa paoa blong yumi, maet yumi no save weples blong faenem help. Plante oli faenem se, afta we oli mekem evri samting we man i naf blong mekem, oli prea long God, nao God i ansa long prea blong olgeta, i mekem oli harem gud bakegen, mo samtaem, oli kam gud long wan fasin we oli neva ting se bambae i olsem.—1 Korin 10:13.

Pat, we oli tekem hem i go kwiktaem long hospital, i haremsave se prea i save givhan bigwan long hem. Afta we hem i kamgud bakegen, hem i talem se: “Mi mi prea long Jeova mo mi lanem se mi mas putum laef blong mi long han blong hem, mi trastem hem blong mekem olgeta samting we hem i wantem. Long olgeta taem ya mi harem se tingting blong mi i stap kwaet, mi kasem pis blong God, olsem we i stap long Filipae 4:6, 7.” !Vas ya i save leftemap tingting blong yumi evriwan! Pol i talem long yumi se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.”

Tabu Spirit i Save Givhan

Long naet bifo we Jisas i ded, hem i mekem i klia long ol aposol blong hem se, i no longtaem, bambae hem i gowe long olgeta. Samting ya i mekem tingting blong olgeta i trabol mo oli sore tumas. (Jon 13:33, 36; 14:27-31) Jisas i luksave se oli nidim we narafala i gohed blong givhan long olgeta, taswe hem i promes se: “Nao bambae mi mi askem long Papa blong mi, mo hem bambae i givim wan narafala [man blong givhan] long yufala, blong hem i save stap oltaem wetem yufala.” (Jon 14:16) Long ples ya, Jisas i stap tokbaot tabu spirit blong God. Wetem ol narafala samting, tabu spirit blong God i givhan long ol aposol long ol hadtaem we oli kasem mo i givim paoa long olgeta blong gohed blong mekem ol samting we God i wantem.—Ol Wok 4:31.

Angie, we klosap hasban blong hem i ded afta long wan bigfala aksiden, hem i naf blong fesem olgeta trabol mo soa we hadtaem ya i mekem long hem. ?Wanem i givhan long hem? Hem i talem se: “Sipos Jeova i no givhan long mitufala wetem tabu spirit blong hem, bambae mitufala i no save gotru mo stanap strong long hadtaem we mitufala i fesem. Tru ya, Jeova i soemaot paoa blong hem long taem ya we mitufala i no gat paoa, mo hem i kam olsem wan strongfala sefples long taem we mitufala i kasem trabol.”

Kampani Blong Ol Brata Sista i Givhan

Enikaen hadtaem we wan man i fesem long laef blong hem, nomata we i strong olsem wanem, hem i save harem gud from kampani blong ol brata sista insaed long kongregesen blong Jeova. Olgeta we oli joen long kampani ya blong ol brata sista oli save kasem help mo sapot long saed blong spirit. Insaed long kampani ya, yumi save faenem ol fren  we oli gat lav, oli kea, mo oli save sapotem yumi. Ol fren ya oli rere mo oli glad blong givhan mo leftemap tingting blong narafala long taem blong trabol.—2 Korin 7:5-7.

Ol memba blong Kristin kongregesen oli kasem tijing se, oli mas ‘mekem i gud long olgeta man. Antap moa, oli mas mekem i gud long olgeta ya we oli brata mo sista blong olgeta from we olgeta ya tu oli bilif long Kraes.’ (Galesia 6:10) Oli kasem wan edukesen we i stanap long Baebol. Samting ya i pusum olgeta blong soem lav mo kaen fasin long olgeta wanwan. (Rom 12:10; 1 Pita 3:8) Insaed long kongregesen, ol brata mo sista blong yumi long saed blong spirit, oli wantem tumas blong soem kaen fasin, leftemap tingting, mo soem filing long narafala.—Efesas 4:32.

Joe mo Rebecca, we tufala i lusum boe blong tufala long ded, tufala i harem gud bakegen from sapot we ol memba blong Kristin kongregesen oli soem long tufala. Tufala i talem se: “Jeova mo kongregesen blong hem we i lavem mitufala tumas, i halpem mitufala long hadtaem ya. Mitufala i kasem plante handred kad, leta, mo telefon. Samting ya i mekem mitufala i luksave se kampani blong ol brata sista i sas tumas. Taem mitufala i stap harem nogud, plante kongregesen long ples blong mitufala oli kam givhan long mitufala, oli kukum kakae mo oli klinim haos blong mitufala.”

!Yu Save Haremgud!

Taem strongfala win blong fasin agens i stat blong kam bigwan, mo ol hadtaem oli gohed blong mekem yumi harem nogud, God i rere blong protektem yumi, mo mekem yumi harem gud bakegen. Wan man blong raetem Sam i tokbaot Hem olsem God ya we i stap protektem yumi, i stap leftemap tingting blong yumi: “Wetem wing blong hem, bambae hem i blokem yu, bambae hem i tekem yu yu kam haed aninit long wing blong hem.” (Ol Sam 91:4, NW) Maet pijatok ya i stret long wan igel. Hem i makem fasin blong wan pijin we i luk denja, nao i tekem ol pikinini blong hem oli kam haed aninit long wing blong hem, i protektem olgeta. Be, pijatok ya i gat wan mining we i bigfala moa. Jeova nao i trufala Man blong Protektem olgeta we oli kam long hem blong faenem ples blong haed.—Ol Sam 7:1.

Sipos yu wantem lanem moa long saed blong God, ol fasin blong hem, ol stamba tingting blong hem, mo paoa we hem i gat blong givhan long yumi, mifala i singaot yu blong stadi long Tok blong hem. Bambae ol Witnes blong Jeova oli glad blong givhan long yu long saed ya. !Yes, yu tu, yu save harem gud long paoa blong Jeova!

[Tok blong pija long pej 7]

Hop we Baebol i givim long saed blong fiuja i save mekem yumi haremgud