Wan Kwestin

Tri long ol Gospel oli tokbaot komplen we ol disaepol oli mekem from wan woman we i kafsaedem wan senta we i sas tumas, long hed blong Jisas. ?Plante long ol aposol oli komplen, no Judas nomo i mekem samting ya?

Yumi faenem ol stori ya insaed long ol Gospel long buk blong Matiu, Mak, mo Jon. I luk olsem se Judas nao i stat blong komplen, mo ating i gat sam narafala aposol bakegen we oli agri wetem hem. Samting we i hapen i soemaot from wanem yumi save tangkiu se i gat fo stori long Gospel. Wanem we wanwan man blong raetem Baebol i raetem oli stret, be i no evriwan we oli raetem samting long fasin we i sem mak. Taem yumi skelem wanwan stori we ol defdefren man oli raetem, yumi save kasem plante smolsmol samting long stori ya, we oli kam moa klia long tingting blong yumi.

Stori we i stap long Matiu 26:6-13 i talemaot ples we oli stap long hem—hemia long Betani, long haos blong Saemon we bifo hem i gat leprosi. Be stori ya i no givim nem blong woman ya we i kafsaedem senta ya long hed blong Jisas. Matiu i talem se: “Taem ol man blong Jisas oli luk samting ya, oli kros,” mo oli toktok smol se oli save salem senta ya mo givim mane blong hem long ol pua man.

Stori we Mak i raetem, i talemaot klosap evri smosmol poen ya tu. Be hem i ademap se woman ya i brekem maot blong botel senta ya. Botel ya i holem senta we oli “wokem long nad.” Maet ol kaen senta olsem ya oli kam long India. Long saed blong ol tok blong komplen, Mak i talem se: “Sam man oli kros, nao oli stap taltalem long olgeta,” mo “oli tok long woman ya.” (Mak 14:3-9) Taswe tufala stori ya oli soem se i no gat wan aposol nomo we i toktok smol agensem woman ya. ?Be olsem wanem nao ol komplen ya oli stat?

Jon, we i luk samting ya long prapa ae blong hem, i ademap sam samting bakegen we oli moa klia. Hem i talem nem blong woman ya se hem i Meri, sista blong Mata mo Lasros. Jon i tokbaot wan smol poen we i mekem se stori ya i kam fulwan moa i bitim we yumi ting se Jon i stap go agensem stori ya: “Hem i wasem leg blong Jisas long senta, mo i waepem leg blong hem long hea blong hem blong mekem i drae.” Taem yumi joenem ol stori ya, yumi luk se Meri nao i putum senta ya, we Jon i talem stret se “oli wokem long nad,” i go long hed blong Jisas mo long leg blong hem tu. Jon i klosap moa long Jisas i bitim ol narafala aposol mo hem i no laekem taem narafala i mekem nogud long Jisas. Yumi ridim se: “Nao wan man blong Jisas nem blong hem Judas Iskariot, man ya biaen i letem Jisas i go long han blong ol enemi blong hem, i tok from samting ya. Hem i talem se, ‘?From wanem hem i no salem senta ya blong givim long ol puaman? !Hemia i naf blong kasem tri handred taosen vatu ya!’”—Jon 12:2-8.

I tru se Judas hem i “wan man blong Jisas,” be Jon i kros from we wan man we i kasem posisen olsem ya long laef blong hem, i mekem plan blong letem Jisas i go long han blong ol enemi blong hem. Wan man blong transletem Baebol, Dr. C. Howard Matheny i tokbaot Jon 12:4 i se: “Tok ya ‘i no longtaem i’ [no, “biaen i”], we oli yusum blong minim wan aksin we bambae i hapen, mo tok ya ‘i stap letem Jisas i go long han blong ol enemi blong hem’ [no, “biaen i letem Jisas i go long han blong ol enemi blong hem”] we i minim wan aksin we i stap gohed naoia, tufala tugeta i folfolem tufala, no tufala i soem wan samting we i stap hapen mo we i gohed. Hemia i soemaot se, wanem we Judas i mekem blong salem Jisas long han blong ol enemi blong hem, i no wan samting we i jes hapen kwiktaem nomo. Hem i wan samting we hem i stap tingbaot finis, mo i stap mekem plan blong samting ya blong plante dei finis. Jon i ademap samting ya blong soemaot klia se Judas i stap komplen “i no from we hem i kea long ol puaman, be from we hem i man blong stil. Hem i stap holem basket blong mane blong olgeta, mo samtaem hem i save stil long hem.”

Taswe i stret blong ting se man blong stil ya, Judas, hem nao i statem fasin blong komplen from we hem i save stilim moa mane sipos oli salem senta ya, we i sas tumas, mo putum mane blong hem insaed long basket blong mane ya we hem i stap holem. Taem Judas i stat blong komplen, sam narafala aposol oli mekem sem mak from we oli tingting se tok ya i stret. Be, Judas nao hem faswan i statem fasin ya blong komplen.