?Yu Yu Stap Soemaot Yu Long Ol Narafala?

‘!Mi mi no kea sipos man i tingting nogud long mi!’ Taem yu kros no yu harem nogud, maet yu talem wan strong tok olsem. Be samtaem afta we yu talem strongfala tok olsem, maet tingting blong yu i stat wok mo yu harem nogud. ?From wanem? From we bighaf blong yumi i rili kea long wanem we ol narafala oli stap tingting long saed blong yumi.

YES, yumi mas tingbaot filing blong ol narafala. Antap moa, yumi ol Kristin we yumi stap mekem wok blong Jeova God, yumi mas tingbaot tingting we ol narafala i gat long saed blong yumi. I olsem we ‘yumi stap stanap long fes blong olgeta man blong wol, blong oli save lukluk yumi.’ (1 Korin 4:9) Long 2 Korin 6:3, 4, yumi ridim nambawan advaes ya we aposol Pol i givim se: “Mifala i no wantem we sam man oli save faenem sam rabis poen long ol wok blong mifala. Nao mifala i stap traehad, blong mifala i no mekem sam fasin we narafala man bambae i save foldaon long hem. Long olgeta samting we mifala i mekem, mifala i stap soemaot we mifala i man blong wok blong God.”

Be, ?fasin ya blong soemaot yumi long ol narafala i minim wanem? ?I minim se yumi leftemap yumi wan no yumi pulum narafala blong luk yumi mo ol gudfala wok we yumi stap mekem? No gat. Hem i minim se yumi mekem ol tok ya blong 1 Pita 2:12 i wok: “Yufala i mas mekem fasin blong yufala i stret gud long fes blong olgeta [man], blong bambae oli luk ol gudfala wok blong yufala. Nao . . . bambae oli save leftemap nem blong God from ol gudfala wok ya blong yufala.” !Ol Kristin oli soemaot olgeta long narafala, taem oli letem gudfala fasin blong olgeta nao i toktok! Biaen, samting ya i mekem se ol man oli presem yumi, be tu oli presem God. Taem yumi soemaot yumi long ol narafala, samting ya i save karem blesing i kam long yumi tu. I gud yumi lukluk tri samting long laef blong yumi we i givim pruf long saed ya.

 Olsem Wan Fiuja Hasban No Waef

Wan eksampel, hemia mared. Mared i wan presen we i kamaot long Jeova God, we hem nao i “givim nem long olgeta famle long heven mo long wol.” (Efesas 3:15, NW) Maet yu gat tingting blong mared wan dei. Sipos i olsem, ?wanem fasin we yu soemaot finis, blong narafala i save luk yu olsem wan fiuja hasban no waef? Yes, ?wanem kaen nem we yu yu wokem taem yu stap olsem wan Kristin man no woman we i no mared yet?

Long sam kantri, gudnem i wan samting we ol famle oli tinghevi tumas long hem. Eksampel, long Gana, taem wan gel mo wan boe tufala i plan blong mared, kastom blong olgeta se tufala ya i mas talemaot bisnes ya long ol papa mo mama blong tufala. Biaen, ol papa mo mama ya blong tufala oli mas talemaot long ol narafala memba blong famle. Nao famle blong man ya i stat goraon long olgeta man raonabaot long olgeta blong faenemaot tingting blong ol man long saed blong gel ya. Taem papa mama blong boe ya tufala i sua fulwan se gel ya i stret long boe blong tufala, bambae tufala i go talemaot long famle blong gel ya se boe blong tufala i wantem mared wetem gel blong olgeta. Naoia, famle blong gel i mas faenemaot sipos boe ya i gat gudnem long fes blong ol narafala man, bifo we oli agri long mared ya. From samting ya, wan toktok long lanwis blong ol man Gana i talem se: “Askem olgeta we oli gat save, bifo we yu mared.”

?Olsem wanem long ol kantri blong Wes, we wanwan man i gat raet blong jusum man no woman we hem i wantem mared wetem? Long ol kantri ya tu, i waes blong wan Kristin man no woman we i bigman long tingting, i traem faenem tingting blong ol fren no papa mama long saed blong hemia we hem i gat tingting blong mared wetem. Buk ya Rod Blong Mekem Famle i Hapi i soemaot se, wan yangfala woman i save askem se: “‘?Ol narafala oli tingting olsem wanem long fasin blong man ya? ?Hu ya ol fren blong hem? ?Hem i stap soem se hem i save bos long tingting blong hem? ?Hem i mekem wanem fasin long ol olfala? ?Olsem wanem long famle blong hem? ?Hem i joengud wetem olgeta? ?Wanem tingting blong hem long saed blong mane? ?Hem i dring tumas alkol? ?Hem i save kam kros kwik, mo i save kilim narafala? ?Hem i gat wanem wok long kongregesen, mo hem i stap mekemgud wok ya? ?Mi save gat bigfala respek long hem?’—Levitikas 19:32; Ol Proveb 22:29; 31:23; Efesas 5:3-5, 33; 1 Timoti 5:8; 6:10; Taetas 2:6, 7.” *

Long sem fasin, maet wan man i wantem faenemaot sam samting long saed blong Kristin woman we hem i gat tingting blong mared wetem. Baebol i storebaot Boas we i soem intres long Rut, woman ya we biaen hem i mared wetem. Rut i talem se: “Masta. Mi mi wan strenja nomo long ples ya, be yu yu tingting tumas long mi.” Ale Boas i talem se: “No, be mi mi harem nius finis blong ol samting ya we yu mekem.” (Rut 2:10-12) Yes, Boas hem wan i lukluk gud olgeta fasin blong Rut, se hem i gat fasin blong stap tru long wok blong hem, i givim bes blong hem, mo i wok had. Be tu, Boas i harem ol gudfala toktok we ol narafala oli talem long saed blong woman ya.

Hemia i sem mak long yumi. Fasin blong yu i save gat bigfala paoa long tingting blong narafala we bambae i jajem sipos yu yu save stap olsem wan gudfala hasban no waef. ?Yu yu stap soemaot yu wan olsem wanem long saed ya?

Olsem Wan Wokman

Fasin blong holem ol gudfala fasin long ples blong wok tu i save karem blesing i kam long yumi. Plante man oli stap traehad tumas blong winim narafala long wok blong olgeta. Ol wokman we oli no obei long bos blong olgeta, oli kam  let oltaem, mo oli stap stil no giaman, plante taem oli lusum wok blong olgeta. Sam kampani oli putumaot ol wokman we oli gat ekspiriens long wok blong olgeta from we oli no wantem spenem bigfala mane. Taem ol man we oli no gat wok oli stap lukaot wan wok, maet oli faenem se sam kampani oli toktok wetem ol kampani we ol man ya oli bin wok long olgeta bifo, blong save fasin, tingting, mo waes, we ol man ya i gat long saed blong wok. Plante Kristin oli bin soemaot long ol bos blong olgeta se oli gudfala man from we oli gat respek, oli putum klos we i stret, oli frengud wetem ol man, mo oli soem ol nambawan Kristin fasin.

Wan long ol Kristin fasin ya hemia fasin blong no giaman mo no stil—oltaem ol bos oli jusum ol wokman we oli gat fasin ya. Olsem aposol Pol, yumi wantem “mekem i stret nomo long olgeta samting.” (Hibrus 13:18) Long wan kampani blong digim maen long Gana, oli faenemaot se sam man oli stap stil long kampani ya. Ale, kampani ya i sakemaot plante long ol wokman blong hem, be wan Witnes we i lukaot long wok, hem i no lusum wok blong hem. ?From wanem? Long ol yia we oli pas, ol bigfala bos long kampani ya oli bin makem gudfala fasin blong Witnes ya. Mo tu, oli savegud se Witnes ya i wan man blong wok strong mo i gat respek long hemia we i bos long hem. !Yes, stret fasin we hem i gat i mekem se hem i no lusum wok blong hem!

?Wanem sam narafala samting we wan Kristin i save mekem blong soemaot hem long ples blong wok? Lanem blong kam gud moa long eni kaen wok we yu stap mekem. (Ol Proveb 22:29) Gohed strong long wok ya mo tinghevi long hem. (Ol Proveb 10:4; 13:4) Soem respek long masta blong yu no hemia we i lidim wok blong yu. (Efesas 6:5) Ol bos oli wantem wokman we i kam long stret taem, i no stap stil, i mekem gudfala wok, mo i wok strong. Ol fasin ya bambae oli halpem yu blong kasem wok, nating sipos i no isi blong faenem wok.

Ol Wok Insaed Long Kongregesen

Naoia, bitim ol taem bifo, yumi nidim moa man, we oli bigman finis long tingting, blong lidim Kristin kongregesen. ?From wanem risen? Aesea i talem profet tok ya se: “Mekem haos tapolen ya i kam bigwan moa. Yufala i mas mekem ol rop blong hem oli longlongfala moa.” (Aesea 54:2) Folem profet tok ya, kongregesen blong Jeova long fulwol i stap gohed blong gru.

Taswe, sipos yu yu wan Kristin man, ?olsem wanem yu save soemaot yu se yu naf blong holem wan wok insaed long kongregesen? Tingbaot eksampel blong yangfala man ya Timoti. Luk i tokbaot Timoti se ‘ol brata blong Listra mo Ikoniam oli stap talem se hem i wan gudfala man.’ Yes, yangfala man ya i gat ol nambawan fasin. Long rod ya, hem i soemaot hem wan long ol man we oli stap long tu defren taon. From samting ya, Pol i singaot Timoti blong joenem hem long misinari trep blong hem.—Ol Wok 16:1-4.

?Olsem wanem wan man tede, i save ‘kam wan elda long kongregesen’ long fasin we i stret, mo we i laenap wetem tingting blong God? Hemia i no blong pulum ol man blong putumap hem, be hem i mas wokem ol gudfala fasin long saed blong spirit, ol fasin we hem i nidim blong mekem ol wok ya. (1 Timoti 3:1-10, 12, 13; Taetas 1:5-9) Mo tu, hem i save joen fulwan long wok blong prij mo mekem disaepol, blong soem se hem i “wantem wan gudfala wok.” (Matiu 24:14; 28:19, 20) Ol Kristin man we oli soemaot se oli naf blong mekem sam wok, oli rili kea long ol brata sista blong olgeta long saed blong spirit. Oli folem advaes ya blong aposol Pol se: “Sipos sam long yufala oli trabol, oli sot long sam samting, yufala i mas givhan long olgeta. Mo oltaem, yufala i mas rere blong tekem ol Kristin man blong ol narafala ples oli kam insaed long haos blong yufala.” (Rom 12:13) Taem wan Kristin man i mekem ol samting ya, hem i stap ‘soemaot se hem i man blong wok blong God.’

Long Ol Narafala Taem

Taem yumi soemaot yumi long ol narafala, hemia i no minim se yumi mekem wan giaman fasin no yumi jes wantem ‘mekem ol man oli glad long yumi.’ (Efesas 6:6) Be, hem i minim se yumi soemaot yumi long Man ya we i Wokem yumi, Jeova God, nao yumi stap traehad blong folem ol loa mo rul blong hem. Sipos yu wokem ol gudfala fasin long saed blong spirit mo mekem fasin fren blong yu wetem Jeova God i kam strong moa, ol narafala bambae oli luksave se fasin blong yu i jenis. Bambae oli luksave samting ya long ol fasin we yu soem long ol famle blong yu, ol man we oli wok wetem yu, mo ol narafala Kristin. Mo tu, bambae oli luksave se yu stanap strong mo tingting blong yu i no olbaot, yu naf blong skelemgud ol samting, yu save mekem gud ol wok, mo yu gat tingting daon. Samting ya bambae i mekem se ol narafala oli lavem yu mo respektem yu. !Be samting we i moa impoten se, bambae yu mekem Jeova God i glad long yu from we yu soemaot yu long ol narafala!

[Futnot]

[Tok blong pija long pej 19]

Plante papa mama oli waes blong faenemaot sipos gel we boe blong olgeta i wantem mared wetem, i gat gudnem no nogat

[Tok blong pija long pej 20]

Wan brata i soemaot se hem i naf blong holem wan wok insaed long kongregesen, taem hem i tingbaot ol narafala