Jeova i Hae Moa Long Hat Blong Yumi

MAN blong raetem Sam i talem se: “Jeova i glad long ol man we oli stap fraet long hem.” Yes, Man ya we i Wokem olgeta samting i glad taem hem i luk wanwan long ol man blong wok blong hem oli traehad blong holem ol stret rul blong hem. God i blesem ol man we oli stap fasgud long hem, hem i leftemap tingting blong olgeta, mo i mekem oli harem gud long ol taem we tingting blong olgeta i trabol. Hem i save se ol man we oli wosipim hem oli no stret. Taswe hem i no bitim mak long wanem we hem i wantem olgeta blong mekem.​—⁠Ol Sam 147⁠:​11, NW.

Maet i no hadwok long yumi blong bilivim se Jeova i gat bigfala lav long olgeta man blong wok blong hem. Be, sam man oli tingting tumas long slak fasin blong olgeta, nao oli bilif se Jeova i neva save lavem olgeta. Maet oli talem se: “Mi mi no stret nating blong Jeova i lavem mi.” I tru, yumi evriwan i gat ol filing we oli no stret sam samtaem. Be i gat sam man we oli stap gohed blong faet agensem filing ya se oli nating nomo.

Filing Se Yumi Nating Nomo

Long Baebol, plante stret man oli safa from ol filing we i mekem tingting blong olgeta i foldaon bigwan. Job i no laekem laef mo i harem olsem se God i lego hem. Hana, we i kam mama blong Samuel, i bin wari bigwan, taem hem i no save karem pikinini mo i harem nogud, i krae. Deved i “bendaon, we [hem i] no moa save girap,” mo Epafrodaetas i bin harem nogud tumas from we ol brata blong hem oli harem nius ya we hem i sik.​—⁠Ol Sam 38⁠:6; 1 Samuel 1:​7, 10; Job 29:​2, 4, 5; Filipae 2:​25, 26.

?Olsem wanem long ol Kristin tede? Maet ol sik, fasin blong kam olfala, no sam narafala samting bakegen, oli blokem sam long olgeta blong mekem moa long ol tabu wok ya olsem we oli wantem mekem. Samting ya maet i pulum olgeta blong ting se oli no stap mekem wanem we Jeova i wantem mo wanem we ol brata no sista blong olgeta i wantem. No maet samfala oli stap harem nogud yet from sam mastik we oli mekem bifo, mo oli no ting se Jeova i fogivim olgeta. Maet sam narafala oli kamaot long ol famle we i mekem i strong tumas long olgeta, nao oli tingting se oli no naf blong narafala i laekem olgeta. ?Olsem wanem nao wan tingting olsem i save kamaot?

Samfala oli gruap long wan famle we oltaem ol memba blong hem oli no soemaot lav be oli tingbaot olgeta nomo, oli talem ol tok blong daonem narafala mo oli mekem narafala i fraet. Olgeta ya, oli neva gat jans blong save wan papa we i soemaot bigfala lav long olgeta. Oli no gat wan papa we i laekem blong presem mo leftemap tingting blong olgeta, we i no lukluk ol smosmol mastik we oli mekem mo we i rere blong fogivim ol bigfala mastik blong olgeta tu. Oli no gat wan papa we lav blong hem i mekem se ful famle i harem gud mo i sef. From we oli neva gat wan papa we i lavem olgeta, maet oli faenem i had blong kasem save se i minim wanem blong gat wan Papa long heven we i gat lav.

Wan eksampel, Fritz i raetem se: “Fasin blong papa blong mi we i no soem lav long mi i gat bigfala paoa long laef blong mi taem mi pikinini yet mo long yangtaem blong mi. * Hem i neva talem wan gudfala tok from samting we mi mekem, mo mi neva harem olsem se mi fren gud wetem hem. I tru moa se, plante taem, mi mi fraet long hem.” From samting ya, Fritz we naoia i gat 50 yia blong hem, i gat filing ya yet se hem i no naf blong mekem wan gudfala samting. Mo Margarette i eksplenem se: “Papa mama blong mi, tufala i gat fasin we i strong mo tufala i no soemaot lav. Taem mi stat blong stadi long Baebol, i hadwok lelebet long mi blong tingbaot se wan papa we i gat lav hem i olsem wanem.”

Ol filing olsemia, nating se oli blong wanem risen, oli minim se samtaem yumi mekem wok blong God i no from lav we i pusum yumi. Be yumi mekem from we yumi harem se yumi gat fol mo yumi fraet. Wanem traehad we yumi mekem be yumi no harem se i naf. Yumi wantem tumas blong mekem Jeova mo ol brata sista blong yumi oli glad, ale yumi harem se paoa blong yumi i no naf blong mekem olgeta samting ya. From samting ya, maet yumi no kasem ol mak we yumi putum. Yumi putum fol i go long yumi wan, mo tingting blong yumi i foldaon from filing ya se ol traehad blong yumi oli blong nating nomo.

?Wanem samting nao yumi save mekem? Maet yumi mas rimemba se Jeova i kasem save filing blong man. Wan man we i kasem save long fasin ya we i soemaot lav blong God, hemia aposol Jon.

“God i Hae Moa Long Hat Blong Yumi”

Long en blong faswan handred yia K.T., Jon i raet i go long ol brata sista blong hem se: “Sipos yumi stap mekem fasin ya long laef blong yumi, bambae yumi save we yumi man blong trutok. Mo yumi save mekem hat blong yumi i sua gud long fes blong God, i nomata sipos yumi harem long hat blong yumi se yumi mekem wan samting we i rong, from we God i hae moa long hat blong yumi, mo hem i save evri samting.” ?From wanem nao Jon i raetem ol tok ya?​—⁠1 Jon 3:​19, 20, NW.

Jon i save gud se wan man blong wok blong Jeova i save harem long hat blong hem se hem i mekem wan samting we i rong. Maet Jon hem wan i bin gat ol filing olsem. Taem Jon hem i wan yang man hem i save faerap kwiktaem. Wan taem, Jisas Kraes i stretem hem from we hem i mekem i strong tumas long ol narafala. Jisas i givim nem ya long Jon mo brata blong hem Jemes, se: “Boanejes, we i min se Tanda, from we tufala i man blong faerap.”​—⁠Mak 3: 17; Luk 9: 49-​56.

Long ol nekis 60 yia, Jon i kam wan kwaet man, hem i skelem gud fasin blong hem, i gat lav, mo i kam wan Kristin we i gat sore. Kasem taem ya we hem, olsem laswan aposol we i laef yet, i raetem leta blong hem, hem i save se Jeova i no askem kaon long ol man blong hem long evri smolsmol samting we oli mekem. Defren olgeta, Jeova i mekem man i harem gud, hem i kasem save filing blong man, hem i kaen, mo i wan Papa we i gat sore. Hem i gat bigfala lav long olgeta we oli lavem hem mo we oli wosipim hem long trutok. Jon i raetem se: “God i stamba blong fasin ya blong lavem man.”​—⁠1 Jon 4⁠:⁠8.

Jeova i Glad Long Wok We Yumi Mekem Blong Hem

God i save ol slak fasin we yumi bon wetem mo ol samting we yumi no naf blong mekem, mo hem i stap tingbaot ol samting ya. Deved i raetem se: “Hem i savegud we hem i mekem yumi long graon. Oltaem hem i stap tingbaot we yumi kamaot long ases nomo.” Jeova i luksave se fasin blong laef we yumi bin gruap long hem, i gat paoa long yumi mo laef ya nao i mekem se yumi kam wanem kaen man. Yes, Jeova i save yumi moa i bitim we yumi save yumi wan.​—⁠Ol Sam 103⁠:⁠14.

Hem i save se plante long yumi i wantem jenisim fasin blong yumi, be yumi no naf blong winim ol slak fasin blong yumi. Yumi save skelem laef blong yumi wetem laef blong aposol Pol, we i raetem se: “Nao oltaem mi no mekem ol gudgudfala fasin ya we mi wantem mekem, mi stap mekem ol rabis fasin ya, we mi no wantem mekem nating.” Yumi evriwan i stap long semfala faet ya. Samtaem samting ya i save mekem se hat blong yumi i jajem yumi wan.​—⁠Rom 7:​19.

Rimemba samting ya oltaem: Samting we i moa impoten hemia tingting we Jeova i gat long saed blong yumi, i winim tingting we yumi gat long yumi wan. Eni taem we hem i luk se yumi traem mekem hem i glad, hem i no harem gud smol nomo, be hem i glad bigwan. (Ol Proveb 27⁠:11) Maet yumi ting se samting we yumi mekem i smol nomo, be God i glad from we yumi rere blong wok mo yumi gat gudfala tingting we i pusum yumi blong wok. God i no stap lukluk nomo wanem we yumi stap mekem; hem i luksave tu wanem we yumi wantem mekem; hem i save finis ol samting we yumi wantem mo we yumi laekem blong mekem. Jeova i save gud wanem i stap long hat blong yumi.​—⁠Jeremaea 12⁠:3; 17⁠:⁠10.

Wan eksampel, plante long ol Witnes blong Jeova oli gat fasin ya blong sem lelebet mo oli no laekem blong pulum ae blong man. Long olgeta ya, fasin blong talemaot gud nius long ol haos wanwan i wan samting we i no isi blong mekem. Nating se i olsem, wan tingting i pusum olgeta blong wantem mekem wok blong God mo blong halpem ol man raonabaot long olgeta. Taswe olgeta we oli sem lelebet oli lanem olsem wanem blong stanap fored long ol man raonabaot long olgeta mo tokbaot Baebol long olgeta. Maet oli gat filing ya se oli mekem smol nomo, mo samting ya i save karemaot glad blong olgeta. Maet long hat blong olgeta oli gat tingting ya se minista wok blong olgeta i blong nating nomo. Be i sua se Jeova i glad long ol traehad we olgeta ya oli stap mekem long wok blong olgeta. Mo tu, oli no save se wetaem mo weples ol sid blong trutok bambae oli gru, mo karem frut.​—⁠Prija 11⁠:6; Mak 12⁠:​41-​44; 2 Korin 8:​12.

Sam narafala Witnes oli safa from we oli gat wan sik we i stap longtaem no oli stap kam olfala. Long olgeta ya, i no isi blong kam oltaem long ol miting from we oli harem soa mo oli wari. Taem oli lesin long wan tok long saed blong wok blong prij maet oli rimemba wanem we oli bin mekem bifo mo wanem we oli wantem yet blong mekem. Be sik i blokem olgeta. Maet oli harem nogud long olgeta wan from we oli no save folem evri advaes olsem we oli wantem blong mekem. Be fasin blong olgeta blong stap tru long God mo blong stanap strong longtaem, i sas tumas long ae blong Jeova. Sipos oli gohed blong stap tru long hem, hem i neva fogetem ol gudfala samting we oli bin mekem.​—⁠Ol Sam 18⁠:25; 37⁠:⁠28.

“Mekem Hat Blong Yumi i Sua Gud”

Taem we Jon i kam olfala hem i kasem plante save finis long saed blong fasin ya blong God we i harem save filing blong man. Rimemba toktok ya we hem i raetem se: “God i hae moa long hat blong yumi mo hem i save evri samting.” Antap moa, Jon i leftemap tingting blong yumi blong “mekem hat blong yumi i sua gud.” ?Jon i minim wanem taem hem i talem ol samting ya?

Folem Vine’s Expository Dictionary of Old and New Testament Words, Grik veb we oli tanem i kam “mekem i sua gud” i minim “wan fasin we i pulum tingting blong man, winim tingting blong hem, no pulum hem blong folem wan samting.” Taswe yumi save talem se, blong mekem hat blong yumi i sua gud, yumi nidim blong winim hat blong yumi, pulum hat blong yumi blong i bilif se Jeova i lavem yumi. ?Olsem wanem yumi save mekem samting ya?

Fritz, we yumi tokbaot long fas haf ya, i wok olsem wan elda bitim 25 yia finis long wan kongregesen blong ol Witnes blong Jeova mo hem i faenemaot se fasin blong stadi hem wan i save mekem hat blong hem i sua gud long lav blong Jeova. “Mi stadi long Baebol mo ol buk long saed blong Baebol oltaem mo mi tektaem blong stadi gud. Samting ya i halpem mi blong no tingbaot ol samting we oli hapen bifo, be blong mi save holemtaet wan klia tingting long saed blong nambawan fiuja blong yumi. Sam samtaem, ol samting long laef blong mi bifo oli kam fulap long tingting blong mi, mo mi gat filing ya se neva God i save lavem mi. Be, fasin blong stadi mi wan oltaem i mekem hat blong mi i strong, bilif i kam bigwan, mo i halpem mi blong stap glad mo skel gud.”

I tru se, fasin blong ridim Baebol mo tingting dip long hem bambae i no save jenisim laef ya we yumi stap long hem finis. Be yet hem i save jenisim tingting we yumi gat long saed blong laef ya. Taem yumi putum ol tingting blong Tok blong God insaed long hat blong yumi, samting ya i halpem yumi blong tingting olsem hem. Mo tu, stadi i save halpem yumi blong gru moa blong kasem save long fasin blong Jeova blong harem save filing blong yumi. Sloslou bambae yumi agri se Jeova i no putum fol long yumi from ol fasin we yumi kasem taem yumi pikinini, mo ol sik we yumi gat. Hem i save se ol baden we plante long yumi oli stap karem​—⁠nating se i long saed blong filing no bodi​—⁠oli no fol blong yumi, mo hem i tingbaot samting ya wetem lav.

?Olsem wanem long Margarette we yumi tokbaot hem fastaem? Taem hem i stat blong save Jeova, stadi long Baebol i givhan long hem bigwan tu. Olsem Fritz, hem i mas jenisim tingting we hem i gat long saed blong fasin blong wan papa. Prea i givhan long Margarette blong joenem olgeta samting we hem i lanem long stadi blong hem. Margarette i talem se: “Fastaem, mi tingbaot Jeova olsem wan gudfala fren, from we i isi moa long mi blong tingbaot ol fren we oli gat lav i bitim wan papa we i gat lav. Sloslou, mi lanem blong talemaot ol filing blong mi, ol tingting we oli hafhaf, ol wari, mo ol trabol long Jeova. Long prea, mi toktok long hem bakegen mo bakegen. Long semtaem, mi joenem tugeta ol niufala samting we mi lanem long saed blong hem, lelebet olsem wan pija. Afta we samtaem i pas, ol filing blong mi long saed blong Jeova oli gru go kasem wan mak we naoia mi no gat trabol blong tingbaot hem olsem Papa blong mi we i gat lav.”

Fri Long Ol Wari

Gogo kasem taem we bambae rabis wol ya i finis, i no gat man i save kam fri long ol wari. Long sam Kristin, samting ya i minim se ol filing blong wari no maet hafhaf tingting long saed blong yumi wan, i stap mo i mekem tingting i trabol. Be yumi sua se Jeova i save ol gudfala tingting we oli pusum yumi mo ol hadwok we yumi stap mekem long wok blong hem. Bambae hem i neva fogetem lav we yumi soem from nem blong hem.​—⁠Hibrus 6:​10.

Long niufala wol ya we i stap kam klosap, aninit long Kingdom we Mesaea bambae i rul long hem, ol stret man oli save sua blong kam fri long ol baden blong wol ya blong Setan. !Hemia wan taem blong glad tumas! Biaen tu bambae yumi luk moa pruf olsem wanem Jeova i harem save filing blong man. Go kasem taem ya, yumi mas sua gud se: “God i hae moa long hat blong yumi, mo hem i save evri samting.”​—⁠1 Jon 3:​20, NW.

[Futnot]

 [Tok blong makem poen long pej 30]

Jeova i no wan nogud rula be hem i mekem i gud long man, hem i harem save filing blong man, mo hem i wan Papa we i gat sore

 [Tok blong pija long pej 31]

Fasin blong stadi long Tok blong God i halpem yumi blong tingting olsem hem