Lesin Long Wanem We Tabu Spirit i Talem
Lesin Long Wanem We Tabu Spirit i Talem
“Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’ ”—AESEA 30:21.
1, 2. ?Olsem wanem Jeova i bin toktok wetem ol man tru long histri?
LONG aelan blong Porto Riko, i gat wan strongfala teleskop blong radio. Teleskop ya i bigwan moa i winim ol narafala teleskop long wol. Blong plante yia finis, ol sayentis oli bin yusum bigfala teleskop ya blong traem kasem ol mesej we oli kamaot long ol laef samting afsaed long wol. Be neva oli kasem ol mesej olsem. Samting we i narakaen se, i gat ol klia mesej we oli kam afsaed long wol, mo ol mesej ya, eni man i save kasem long enitaem—we i no nidim ol spesel tul. Ol mesej ya oli kamaot long wan Stamba we i hae moa i bitim eni narafala laef samting we man i ting se i stap afsaed long wol. ?Hu nao i Stamba blong ol mesej ya? ?Hu ya ol man we oli stap kasem ol mesej ya? ?Ol mesej ya oli talemaot wanem?
2 Baebol i tokbaot ol taem we ol man long wol ya oli harem sam mesej we oli kamaot long God. Samtaem, ol enjel, we oli olsem mesenja blong God, olgeta nao oli karem ol mesej ya i kam long ol man. (Jenesis 22:11, 15; Sekaraea 4:4, 5; Luk 1:26-28) Long tri defren taem, ol man oli harem prapa voes blong Jeova. (Matiu 3:17; 17:5; Jon 12:28, 29) Mo tu, God i yusum ol profet blong oli talemaot ol tok blong hem, mo plante long ol profet ya oli raetemdaon wanem we tabu spirit i pusum olgeta blong talemaot. Tede, yumi gat Baebol, mo insaed long hem, i gat plante long ol mesej ya, wetem ol tijing blong Jisas mo ol disaepol blong hem. (Hibrus 1:1, 2) Yes, Jeova i bin mekem se ol man blong hem long wol ya oli harem ol mesej blong hem.
3. ?From wanem yumi kasem ol mesej blong God, mo yumi mas mekem wanem?
3 Olgeta mesej ya we oli kamaot long God, oli soemaot smol samting nomo long saed blong skae. Oli pulum tingting blong yumi i go long ol samting we oli moa impoten, hemia ol samting we oli gat bigfala mining long laef blong yumi naoia mo long fiuja. (Ol Sam 19:7-11; 1 Timoti 4:8) Jeova i yusum ol mesej ya blong talemaot ol samting we hem i wantem mekem mo blong soem rod blong lidim yumi. Ol mesej ya oli wan rod we i mekem profet tok blong Aesea i kamtru, se: “Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’ ” (Aesea 30:21) Jeova i no fosem yumi blong lesin long “voes” blong hem. Yumi wanwan i gat raet blong jusum sipos yumi wantem folem advaes we God i givim mo wokbaot long rod blong hem, no nogat. From samting ya, Baebol i talem strong long yumi blong lesin long ol mesej we oli kamaot long Jeova. Seven taem, buk blong Revelesen i talem long yumi se yumi mas “lesin gud long tok we [“tabu spirit,” NW] i stap talem.”—Revelesen 2:7, 11, 17, 29; 3:6, 13, 22.
4. ?I stret blong ting se bambae God we i stap long heven i toktok stret wetem yumi tede?
4 Tede, Jeova we i stap long heven, hem i no toktok stret wetem yumi. Long taem blong Baebol tu, i no plante taem we ol man oli kasem ol mesej we oli kamaot long ples blong ol spirit man, samtaem wan handred yia i mas pas afta we oli kasem wan mesej olsem. Tru long histri, plante taem Jeova i yusum ol defren rod blong toktok wetem ol man blong hem. Samting ya i sem mak long taem blong yumi. I gud yumi luk tri rod we Jeova i folem blong toktok wetem yumi tede.
“Olgeta Tok Blong Baebol Oli Kamaot Long God”
5. ?Wanem stamba tul we Jeova i stap yusum blong toktok wetem ol man tede, mo olsem wanem yumi save kasem blesing from tul ya?
5 Baebol i stamba tul we God i stap yusum blong toktok wetem ol man long wol ya. Hem i wan buk we i kamaot long God, mo olgeta tok we i stap insaed long hem, oli stret gud blong tijim yumi. (2 Timoti 3:16) Baebol i fulap long ol trufala stori blong ol man we oli soemaot fasin fri blong olgeta, nao oli jusum blong lesin, no blong oli no lesin long voes blong Jeova. Ol stori ya oli mekem yumi tingbaot from wanem i impoten tumas blong lesin long wanem we tabu spirit blong God i talem. (1 Korin 10:11) Mo tu, Baebol i gat waes we i wok gud, mo i givim advaes long yumi taem yumi mekem sam disisen long laef blong yumi. I olsem we God i stap stanap biaen long yumi, i stap talem tok ya se: “Hemia rod. Yufala i folem.”
6. ?From wanem Baebol i hae moa long olgeta narafala buk?
6 Blong harem wanem we tabu spirit i stap talem tru long ol pej blong Baebol, yumi mas ridim Baebol oltaem. Baebol i no olsem plante buk long wol tede, we ol man oli raetem gud mo we fulap man i wantem blong ridim. !Nogat! Baebol i kamaot from paoa blong tabu spirit mo hem i karem ol tingting blong God. Hibrus 4:12 i talem se: “Tok blong God i wan samting we i laef, mo i stap wok, mo i sap we i sap, i winim naef blong faet we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem.” Taem yumi ridim Baebol, ol tok blong hem oli go insaed long hat mo tingting blong yumi, i stikim yumi olsem naef blong faet we i stikim man, nao i soemaot sipos laef blong yumi i laenap wetem wanem we God i wantem.
7. ?From wanem i impoten tumas blong ridim Baebol oltaem, mo yumi kasem advaes blong mekem samting ya hamas taem?
7 “Ol samting we man i wantem long tingting blong hem,” oli save jenis taem ol dei oli stap pas mo taem yumi stap fesem ol defren samting long laef blong yumi—ol samting we oli gud mo ol samting we oli nogud. Sipos yumi no gohed oltaem blong stadi long Tok blong God, ol tingting, fasin, mo filing blong yumi, bambae oli no moa laenap wetem ol rul blong God. Taswe, Baebol i talem strong long yumi se: “Yufala i mas gohed blong jekemap sipos yufala i holem yet fasin blong bilif no nogat, yufala i mas gohed blong pruvum se yufala i wanem kaen man.” (2 Korin 13:5, NW) Blong gohed oltaem blong harem wanem we tabu spirit i talem, yumi mas obei long advaes ya se, ridim Tok blong God evri dei.—Ol Sam 1:2.
8. ?Wanem ol tok blong aposol Pol we oli givhan long yumi blong jekemap yumi wanwan long fasin ya blong ridim Baebol oltaem?
8 Olgeta we oli stap ridim Baebol oli mas tingbaot impoten advaes ya: !Tekem i naf taem blong save gud wanem we yu ridim! Taem yumi stap traehad blong folem advaes ya blong ridim Baebol evri dei, yumi no mas hareap blong gotru long sam japta we yumi no kasem minim blong samting we yumi ridim. I tru, i impoten tumas blong ridim Baebol oltaem, be yumi no mekem samting ya jes blong folem wan program. Yumi mas gat trufala filing blong wantem lanem moa long saed blong Jeova mo ol stamba tingting blong hem. Long saed ya, maet yumi save yusum ol tok ya blong aposol Pol we i talem se yumi mas jekemap yumi wanwan. Taem hem i raet long ol Kristin brata mo sista, hem i talem se: “Mi bodaon, mi prea long Papa blong yumi. . . . Hem i gat bigfala paoa blong heven, mo mi mi stap askem long hem blong hem i . . . givim paoa long yufala, blong mekem yufala i stanap strong oltaem. Mi stap askem long hem, blong Kraes i kam, i mekem ples blong hem long tingting blong yufala, from we yufala i stap bilif strong long hem. Mo mi stap askem long hem blong hem i mekem laef blong yufala i stanap long fasin ya blong Kraes blong lavem ol man, olsem we rus blong tri i holemtaet graon, olsem we haos i fas strong long graon we i stanap long hem. Mi mi stap askem long hem, blong yufala i save joen long olgeta man blong God long evri ples, blong kasem paoa blong save fasin ya blong Kraes we hem i lavem yumi tumas. Mi wantem blong yufala i save we fasin ya i bigwan olsem wanem, mo i longfala olsem wanem, mo i hae olsem wanem, mo i dip olsem wanem. Fasin ya blong Kraes i gudfala tumas, yumi no naf blong savegud. Be mi stap askem long hem blong yufala i save kasemgud tingting ya we Kraes i lavem yufala tumas, gogo bambae God i fulumap laef blong yufala, blong yufala i fulap gud long olgeta fasin blong hem nomo.”—Efesas 3:14, 16-19.
9. ?Olsem wanem yumi save wokem fasin blong wantem lan long Jeova mo gohed moa long fasin ya?
9 I tru se sam long yumi oli no intres tumas blong rid, sam narafala oli laekem blong rid. Be nomata wanem fasin yumi gat long saed ya, yumi save wokem fasin ya blong wantem lanem ol samting long saed blong Jeova mo mekem fasin ya i go dip moa. Aposol Pita i eksplenem se yumi mas wantem tumas blong kasem ol save blong Baebol, mo hem i luksave se hemia wan fasin we man i mas wokem. Hem i raetem se: “Yufala i mas kam we yufala i wantem tumas tok blong God we i klin gud, olsem pikinini we i jes bon i wantem titi tumas. Tok ya i save mekem yufala i kam strong, nao bambae God i sevem yufala.” (1 Pita 2:2) Blong gat fasin ya blong “wantem tumas” blong stadi long Baebol, i impoten we yumi stretem yumi wan. Tingting we yumi gat long fasin blong rid mo stadi i save jenis i kam moagud sipos yumi stretem yumi wan, mo folem wan gudfala program oltaem. Hemia i sem mak olsem we yumi wokem fasin blong laekem tumas wan niufala kakae taem yumi testem kakae ya bakegen mo bakegen.
“Kakae Long Stret Taem Blong Hem”
10. ?Hu i mekemap grup ya we i olsem “slef we i stret mo waes,” mo olsem wanem Jeova i stap yusum olgeta tede?
10 I gat wan narafala rod we Jeova i stap yusum blong toktok long yumi tede. Jisas i tokbaot rod ya long Matiu 24:45-47, (NW). Long ples ya, Jisas i tokbaot kongregesen blong ol tabu Kristin,—“slef we i stret mo waes” we oli stap wok olsem wan grup blong givimaot “kakae” long saed blong spirit “long stret taem blong hem.” Wanwan long ol memba blong grup ya, oli olsem “olgeta samting” blong Jisas. Olgeta ya, wetem “wan bigfala hip” blong “ol narafala sipsip,” oli kasem ol tok blong leftemap tingting mo advaes blong lidim olgeta. (Revelesen 7:9; Jon 10:16) Ol kakae ya long stret taem, yumi stap kasem fulap long olgeta tru long ol buk, olsem Wajtaoa, Wekap! mo ol narafala buk bakegen. Mo tu, yumi stap kasem ol kakae ya long saed blong spirit tru long ol tok mo ol pleplei long ol asembli mo ol miting blong kongregesen.
11. ?Yumi mas mekem wanem blong lesin long wanem we tabu spirit i talem tru long “slef we i stret mo waes”?
11 Ol save we yumi kasem tru long “slef we i stret mo waes,” oli blong mekem bilif blong yumi i strong mo blong trenem paoa blong tingting blong yumi. (Hibrus 5:14) Ol advaes ya oli blong yumi evriwan, be i stap long yumi wanwan blong mekem oli wok long laef blong yumi. Mo tu, samtaem yumi kasem ol advaes we i go stret long sam fasin long laef blong yumi. ?Yumi mas gat wanem tingting sipos i tru se yumi stap lesin long wanem we tabu spirit i stap talem tru long grup ya we i olsem slef? Aposol Pol i givim ansa se: “Yufala i mas ona long ol lida blong yufala, mo yufala i mas obei long ol tok blong olgeta.” (Hibrus 13:17) I tru, yumi evriwan, olgeta ya tu we oli stap lidim yumi, yumi no stret olgeta. Nating se i olsem, Jeova i glad blong yusum ol man blong hem long wol ya, nomata we oli no stretgud, blong lidim yumi naoia we yumi stap long taem blong en.
Folem Tingting We i Stap Jajem Yumi
12, 13. (a) ?Wanem wan narafala samting we Jeova i givim blong lidim yumi? (b) ?Olsem wanem tingting we i stap jajem man i save lidim olgeta ya tu we oli no gat stret save long Tok blong God?
12 Jeova i givim wan narafala samting blong lidim yumi—hemia tingting we i stap jajem yumi. Hem i wokem man wetem wan filing we i naf blong mekem hem i haremsave wanem we i gud mo wanem we i nogud. Hem i wan filing we yumi bon wetem. Taem aposol Pol i raetem leta blong hem i go long ol Kristin long Rom, hem i eksplenem se: “Olgeta ya oli no save Loa ya, be taem we oli gohed long tingting blong olgeta nomo, nao oli stap mekem ol samting olsem we Loa ya i talem, i olsem we olgeta oli gat Loa ya finis. Oli no save Loa ya, be oli stap folem tingting blong olgeta nomo we i olsem wan loa. Fasin blong olgeta i stap soemaot we God i putum ol samting we Loa blong Moses i talem, oli stap finis long tingting blong olgeta.”—Rom 2:14, 15.
13 Plante man we oli no save Jeova, samtaem oli save mekem tingting mo fasin blong olgeta i laenap wetem ol rul blong God long saed blong ol fasin we i stret mo ol fasin we i no stret. I olsem we oli stap harem wan smol voes insaed long olgeta we i stap lidim olgeta long stret rod. !Sipos samting ya i tru long saed blong olgeta we oli no gat stret save long Tok blong God, voes ya i mas toktok moa long ol trufala Kristin! Yes, tingting ya we i stap jajem ol Kristin, we Tok blong God i trenem mo i stap wok wetem tabu spirit blong God i save soem rod we yumi trastem.—Rom 9:1.
14. ?Olsem wanem tingting we Baebol i trenem i save halpem yumi blong folem rod we tabu spirit blong Jeova i soem?
14 Wan gudfala tingting we i stap jajem man, hemia we Baebol i trenem, i save mekem yumi tingbaot rod ya we tabu spirit i wantem yumi wokbaot long hem. Maet samtaem, Baebol mo ol buk blong yumi we oli stanap long Baebol oli no eksplenem klia sam samting we oli hapen long laef blong yumi. Long taem olsem, tingting we i stap jajem yumi bambae i givim woning agensem rod we i save givim trabol long yumi. Nao sipos yumi no lesin long tingting we i stap jajem yumi, i olsem we yumi no lesin long wanem we tabu spirit blong Jeova i talem. Long defren fasin, taem yumi lanem blong dipen long Kristin tingting we i stap jajem yumi, we yumi trenem gud, yumi save mekem waes disisen nating se i no gat wan stret advaes we oli raetem long saed ya. Be i impoten tumas blong tingbaot se, sipos God i no givim wan rul no wan loa long saed blong sam samting, i no stret nating blong fosem ol narafala Kristin blong folem tingting blong yumi long saed blong ol bisnes we wanwan man i gat raet blong jusum.—Rom 14:1-4; Galesia 6:5.
15, 16. ?Wanem i save mekem se tingting we i stap jajem yumi i no moa wok gud, mo olsem wanem yumi save blokem samting ya?
15 Tingting we i stap jajem yumi we i klin mo we Baebol i trenem, hem i wan gudfala presen we God i givim. (Jemes 1:17) Be yumi mas protektem presen ya blong kruked fasin i no spolem hem. Olsem nao, bambae hem i wok gud oltaem olsem wan tul blong soemaot ol fasin we i gud mo ol fasin we i nogud. Sipos yumi no lukaot gud, nao yumi folem ol kastom mo fasin blong ol manples blong yumi, we oli no laenap wetem ol rul blong God, bambae tingting blong yumi i no moa jajem yumi, nao hem i no moa save lidim yumi long stret rod. Ale, maet yumi no moa save skelem gud ol samting, nao yumi giaman long yumi wan bakegen, yumi bilivim se fasin we i nogud i oraet nomo.—Skelem wetem Jon 16:2.
16 Sipos oltaem, yumi no lesin long tingting we i stap jajem yumi, bambae sloslou tingting ya i kam slak, nao yumi no moa gat filing blong haremsave sipos wan samting i gud no i nogud. Man blong raetem Sam i tokbaot ol man olsem taem hem i raetem se: “Hat blong olgeta i no moa gat filing, i kam olsem gris nomo.” (Ol Sam 119:70, NW) Samfala we oli no lesin long tingting we i stap jajem olgeta, oli no moa gat fasin blong tingtinggud. Ol rul blong God oli no moa lidim olgeta mo oli no save mekem ol gudfala disisen. Blong blokem samting ya, yumi mas lesin gud long Kristin tingting we i stap jajem yumi, mo i stap lidim yumi long ol bisnes we i luk olsem se oli no impoten.—Luk 16:10.
Olgeta We Oli Gat Fasin Blong Lesin Mo Obei Oli Save Hapi
17. ?Taem yumi lesin long ‘voes we i kamaot biaen long yumi’ mo folem tingting blong yumi we Baebol i trenem, olsem wanem bambae yumi kasem blesing?
17 Taem yumi stap lesin long ‘voes ya we i kamaot biaen long yumi’—tru long Baebol mo slef we i stret mo waes—mo taem yumi stap lesin long tingting we i stap jajem yumi we Baebol i trenem, bambae Jeova i blesem yumi, i givim tabu spirit blong hem long yumi. Nao, bambae tabu spirit ya i save mekem yumi naf gud blong kasem mo save mining blong wanem we Jeova i talem long yumi.
18, 19. ?Olsem wanem advaes blong Jeova i save mekem se yumi karem frut long wok blong prij mo long prapa laef blong yumi wan?
18 Mo tu, bambae tabu spirit blong Jeova i mekem yumi strong blong fesem ol traem wetem fasin waes mo strong tingting. Olsem ol aposol, tabu spirit blong God bambae i givim paoa long tingting blong yumi mo i halpem yumi oltaem blong mekem ol samting mo talem ol tok we oli laenap wetem ol rul blong Baebol. (Matiu 10:18-20; Jon 14:26; Ol Wok 4:5-8, 13, 31; 15:28) Bambae yumi kasem gudfala frut sipos tabu spirit blong Jeova i givhan long yumi mo sipos yumi traehad. Nao, bambae yumi gat paoa blong skelemgud ol disisen we yumi mekem long laef blong yumi. Eksampel, maet yu stap tingting blong jenisim sam samting long laef blong yu, blong spenem moa taem long ol samting long saed blong spirit. No maet yu gat tingting blong mekem sam impoten disisen long laef blong yu, maet blong jusum wan waef no hasban, skelem gud wan wok we yu kasem, no pem wan haos. Yumi no mas letem filing blong yumi i kam olsem wan stamba samting we i lidim yumi long ol disisen blong yumi. I gud we yumi lesin long wanem we tabu spirit blong God i talem mo yumi mas wok folem rod we hem i soem long yumi.
19 Yumi harem gud tumas from ol tok mo advaes we ol Kristin brata sista blong yumi, wetem ol elda tu, oli givim wetem kaen fasin. Be yumi no mas ting se oltaem bambae yumi wet long ol narafala blong soem rod long yumi. Sipos yumi save rod we i waes blong folem mo wanem tingting mo fasin we yumi mas jenisim blong mekem God i glad, i gud yumi gohed, yumi folem rod ya. Jisas i talem se: “Naoia yufala i savegud ol samting ya. Oraet, sipos yufala i stap mekem olsem, bambae yufala i save harem gud.”—Jon 13:17.
20. ?Olgeta we oli lesin long ‘voes we i kamaot biaen long olgeta’ oli kasem wanem blesing?
20 I klia se, yumi ol Kristin, yumi no nidim blong harem wan voes we i kamaot long heven, mo yumi no nidim wan enjel blong talem long yumi olsem wanem blong mekem God i glad. Yumi gat Tok blong God we ol man oli raetem long buk mo ol advaes we grup blong ol tabu Kristin long wol ya i stap givim wetem lav. Sipos yumi obei oltaem long ‘voes we i stap kamaot biaen long yumi,’ mo folem rod we tingting we i stap jajem yumi we Baebol i trenem i soem long yumi, bambae yumi gat gudfala frut taem yumi stap mekem ol samting we God i wantem. Ale i sua se bambae yumi luk we promes ya blong aposol Jon i kamtru, se: “Man we i stap mekem ol samting we God i wantem, hem bambae i no save lus samtaem.”—1 Jon 2:17.
Wan Sotfala Rod Blong Tingtingbak
• ?From wanem Jeova i toktok wetem ol man we hem i wokem?
• ?Wanem blesing yumi save kasem from program blong ridim Baebol oltaem?
• ?Yumi mas mekem wanem taem grup we i olsem slef i givim advaes blong lidim yumi?
• ?From wanem yumi no mas go agensem tingting we i stap jajem yumi we Baebol i trenem?
[Kwestin]
[Tok blong pija long pej 13]
Ol man oil no nidim ol spesel tul blong kasem ol mesej blong God
[Credit Line]
Courtesy Arecibo Observatory/David Parker/Science Photo Library
[Tok blong pija long pej 15]
Jeova i toktok long yumi tru long Baebol mo “slef we i stret mo waes”