Mared We i Karem Glad Mo i Givim Ona Long Jeova

Welsh mo Elthea tufala i mared long Soweto, Saot Afrika, long 1985. Wanwan taem tufala i glad blong luklukbak long ol foto blong mared blong tufala, wetem smol gel blong tufala, Zinzi, mo tingtingbak long dei ya we i karem bigfala glad long tufala. Sinzi i laekem blong talem nem blong ol man we oli stap long ol foto ya, mo hem i laekem tumas blong luk foto blong mama blong hem we i werem naesfala dres.

MARED blong tufala i stat wetem wan tok long saed blong mared, insaed long komuniti haos long Soweto. Ale, wan kwaea blong ol yangfala Kristin oli singsing ol sing blong presem God. Biaen, olgeta we oli kam long lafet ya oli tekem smol kakae, mo i gat smol miusik blong wan kaset blong ol sing blong Kingdom. I no gat alkol, mo i no gat strongfala miusik no danis. Defren olgeta, ol man we oli kam long lafet ya oli harem gud blong kampani tugeta mo storian wetem man mo woman ya we i jes mared, mo leftemap tingting blong tufala. Olgeta samting ya i gohed blong klosap tri aoa. Raymond, wan Kristin elda, i tingtingbak se: “Hemia wan mared we bambae i stap oltaem long memori blong mi.”

Long taem blong mared blong Welsh mo Elthea, tufala i stap mekem volontia wok long branj ofis blong Watch Tower Bible and Tract Society long Saot Afrika. Tufala i no gat naf mane blong mekem wan bigfala mared. Sam Kristin oli mekem disisen blong lego wok blong fultaem paenia blong faenem wan wok blong winim mane, olsemia oli naf blong pem olgeta samting we bambae oli nidim blong mekem wan bigfala mared. Be, Welsh mo Elthea, tufala i no sore nating se tufala i bin jusum blong mekem wan smol lafet blong mared, from we long rod ya nao, tufala i naf blong gohed long wok blong God, olsem fultaem paenia, go kasem taem we Zinzi i bon.

Be, ?olsem wanem sipos wan man mo woman tufala i jusum blong gat miusik mo danis long mared blong tufala? ?Olsem wanem sipos tufala i tingting blong gat waen no sam narafala dring we i gat alkol long hem? ?Olsem wanem sipos tufala i naf blong mekem wan bigfala mared? ?Olsem wanem tufala i save meksua se lafet ya bambae i karem glad mo i stret long ol man we oli wosipim God? Blong ansarem ol kwestin ya yumi mas tingting gud fastaem, from we Baebol i givim oda ya se: “Long olgeta samting we yufala i kakae, mo we yufala i dring, mo long olgeta fasin blong yufala, oltaem yufala i mas leftemap nem blong God.”​—⁠1 Korin 10⁠:⁠31.

Lukaot We Lafet i No Kam Nogud

I tru se mared i no wan taem blong sore. Be, i nogud tu blong bitim mak long fasin blong glad. Long plante mared blong man we oli no Witnes, i gat sam samting oli hapen we oli no givim ona long God. Eksampel, plante taem ol man oli dring alkol gogo i bitim mak. Sore tumas, samting ya i hapen finis long sam Kristin mared tu.

Baebol i givim woning se, “sipos yu dring tumas waen, hemia bambae i mekem yu yu mekem tumas noes.” (Ol Proveb 20⁠:⁠1) Hibru wod long ples ya we yumi tanem “tumas noes” i minim se man i mekem “bigfala noes.” !Sipos alkol i save mekem wan man i mekem tumas noes, tingbaot hamas noes we wan kampani blong man i save mekem taem oli stap wanples mo oli dring tumas! I klia se, long ol taem olsem, i isi blong man i ‘dring we i lusum hed, mo mekem lafet blong mekem nogud nomo, mo blong mekem ol narafala samting olsem.’ Hemia ol samting we Baebol i kolem “fasin blong ol man we oli stap mekem ol rabis samting we tingting blong olgeta i wantem.” Eni man we i mekem ol fasin ya mo we i no wantem tanem tingting blong hem from, hem i no naf blong kasem laef we i no save finis aninit long rul blong Kingdom blong God.​—⁠Galesia 5:​19-21.

Grik tok blong talem “lafet blong mekem nogud” hem i wan tok we oli yusum long ol grup blong man we oli haf drong mo we oli wokbaot long rod oli singsing, danis, mo mekem miusik. Sipos i gat tumas alkol long wan lafet blong mared, mo sipos i gat bigfala miusik mo danis we man i no  moa bos long tingting blong hem, hemia wan denja we i soemaot se lafet ya bambae i kam olsem wan lafet blong mekem nogud nomo. Long wan taem olsem, ol man we oli no strong inaf oli save foldaon isi nomo long ol traem mo mekem ol narafala fasin ya we oli blong bodi nomo, olsem ‘mekem nogud wetem woman, ol samting blong sem, mo ol samting we oli nogud olgeta, mo kros.’ ?Yumi save mekem wanem blong blokem ol samting ya blong oli no hapen mo spolem glad long wan Kristin mared? Blong ansarem kwestin ya, i gud yumi tingbaot wanem we Baebol i talem long saed blong wan mared long taem bifo.

Wan Mared We Jisas i Go Long Hem

Sam man oli singaot Jisas wetem ol disaepol blong hem oli go long wan mared long Kena, long Galili. Oli glad blong go long mared ya, mo Jisas i mekem wan samting long taem ya blong mekem se hem i wan hapi taem. Taem oli sot long waen, Jisas i mekem wan merikel blong givim moa waen bakegen we i moagud i winim ol faswan waen. I sua se, afta long mared ya, tufala ya we oli jes mared, mo famle blong tufala, oli save gohed blong yusum haf waen ya we i stap.​—⁠Jon 2:​3-​11.

I gat sam lesen we yumi save lanem from mared ya we Jisas i go long hem. Fastaem, Jisas mo ol disaepol blong hem oli no kam long lafet blong mared ya from we olgeta nomo oli wantem. Baebol i soem klia se oli go long lafet ya from we ol man blong mared oli singaot olgeta blong kam. (Jon 2:​1, 2) Long sem fasin, taem Jisas i talem tufala pijatok blong hem long saed blong lafet blong mared, hem i tokbaot ol man we oli kam from we narafala i singaot olgeta blong kam.​—⁠Matiu 22:​2-4, 8, 9; Luk 14:​8-​10.

Long sam kantri, i gat kastom se olgeta man long wan komuniti oli welkam long wan lafet blong mared, nating se oli invaetem olgeta no nogat. Be, wan kastom olsem i save mekem bigfala hadtaem long saed blong mane. Wan man mo woman we tufala i mared, maet tufala i no gat plante mane. Taswe, bambae tufala i gat bigfala kaon blong pembak, sipos tufala i mas meksua se i gat inaf kakae mo dring blong eni man we oli kam. From samting ya, sipos wan Kristin man mo woman i wantem mekem wan smol lafet nomo wetem wan stret namba blong man, ol narafala Kristin we oli no invaetem olgeta long lafet ya oli mas kasem save long disisen blong tufala ya mo respektem tingting blong tufala. Wan man we i mekem lafet blong mared blong hem long Cape Town, Saot Afrika, i tingbaot se long mared blong hem, hem i bin invaetem 200 man. Be, i gat 600 man we oli kam, nao kwiktaem nomo i no moa gat inaf kakae. Long olgeta ya we oli kam long prapa tingting blong olgeta, i gat wan bas blong ol man we oli bin kam long wiken ya blong visitim Cape Town. !Draeva blong bas ya i wan famle we i longwe lelebet blong man we i mared, ale, hem i tingting se hem i gat raet blong kam long mared ya mo hem i tekem olgeta man long bas ya oli kam wetem hem, we hem i no askem fastaem long tufala we i mared!

Sipos i no gat toktok we i talem se eni man i save kam long lafet blong mared, wan trufala man blong Jisas bambae i no gat tingting ya blong invaetem hem wan i go long lafet ya mo tekem kakae mo dring we i stap blong olgeta we oli invaetem olgeta. Olgeta we oli gat tingting blong go, nating se oli no invaetem olgeta, oli mas askem long olgeta wan se, ‘?Sipos mi go long lafet blong mared ya bambae mi soem se mi gat lav long tufala ya we oli jes mared? ?Bambae mi mi no mekem trabol mo karemaot glad long spesel taem ya?’ Sipos oli no invaetem yu, i nogud yu kros. Wan Kristin we i kasem save long samting ya, maet bambae i soem lav mo sanem wan smol mesej blong talem se hem i glad from tufala ya mo i hop se bambae Jeova i blesem tufala. Mo tu, maet hem i gat tingting blong halpem tufala ya we i mared. Maet hem i sanem wan smol presen blong joen long glad ya we tufala i gat long dei blong mared blong tufala.​—⁠Prija 7⁠:9; Efesas 4:​28.

?Hu Bambae i Gat Responsabiliti?

Long sam ples long Afrika, i gat kastom se ol olfala memba blong famle nao oli mas lukaot long olgeta plan blong mared. Tufala we i mared maet tufala i save gat tangkiu long wan kastom olsem, from we hem i karemaot wan baden long tufala long saed blong mane. Mo tu, maet tufala i ting se, long rod ya tufala i no bos long eni samting we maet i save hapen long taem ya. Be, bifo we tufala i akseptem help blong ol famle we oli gat gudfala tingting blong givhan, tufala i mas meksua se bambae ol famle ya oli no go bitim wanem we tufala i wantem.

Nating se Jisas hem i Pikinini blong God we i “kamdaon long wol,” yumi no ridim se hem i wantem bos mo lidim ol samting long saed blong mared ya long Kena. (Jon 6:​41) Be, stori ya long Baebol i talem long yumi se i gat wan narafala man we i karem wok ya olsem ‘bos blong lafet ya.’ (Jon 2⁠:⁠8) Man ya nao i mas lukluk ol samting mo tokbaot wetem niufala hed blong famle, hemia man we i mared.​—⁠Jon 2:​9, 10.

 Ol Kristin famle blong tufala ya we i mared, bambae oli wantem respektem man ya we i hed blong niufala famle ya, folem oda blong God. (Kolosi 3:​18-​20) Man ya nao bambae i gat responsabiliti long eni samting we i hapen long mared blong hem. I sua se, man ya we i mared bambae i no bitim mak mo, sipos i gat jans, bambae hem i mekem ol samting we woman blong hem, papa mama blong hem mo blong woman blong hem tu, oli wantem. Be, sipos ol famle oli strong blong mekem ol samting we tufala i no wantem mo oli folem tingting blong olgeta nomo, ale, tufala ya we i mared bambae tufala i save talem wetem kaen fasin se tufala i no agri mo bambae tufala nomo i pem ol samting we i nidim blong mekem wan mared we i stret long tingting blong tufala. Long rod ya, bambae i no gat wan samting we i hapen we bambae i mekem se tufala ya we i mared, i tingtingbak mo harem nogud from. Eksampel, long wan Kristin lafet blong mared long Afrika, wan memba blong famle we i no gat bilif, i tekem wok blong bos long lafet ya. !Ale, man ya i mekem olgeta man oli leftemap glas waen blong olgeta blong ona long ol bubu blong olgeta we oli ded finis!

Samtaem tufala we i mared tufala i lego lafet blong mared bifo we lafet ya i finis. Sipos i olsem, man we i mared i mas putumap sam man we bambae oli meksua se ol samting oli gohed folem ol rul blong Baebol mo meksua se lafet ya i finis long wan taem we i stret.

Gudfala Plan Mo Tingting We i Skelgud

I sua se i gat plante gudfala kakae long mared ya we Jisas i go long hem, from we Baebol i tokbaot taem ya olsem wan lafet. Olsem yumi talem finis, i gat plante waen tu long lafet ya. Ating i gat miusik we i stret long taem ya mo danis we i no bitim mak, from we hemia wan haf blong laef blong ol man Jiu. Jisas i soem samting ya long parabol blong hem long saed blong pikinini we i lusum rod. Long parabol ya, papa blong pikinini ya, we hem i rij, i glad tumas blong luk pikinini blong hem i tanem tingting blong hem mo i kambak, ale, hem i talem se: “Bambae yumi mekem wan lafet.” Toktok blong Jisas i soemaot se long lafet ya i gat ‘singsing mo danis.’​—⁠Luk 15⁠:​23, 25.

Be, yumi intres blong luk se Baebol i no talem stret sipos i gat miusik mo danis long mared blong Kena no nogat. Tru ya, long olgeta stori we Baebol i givim long saed blong mared, i no gat wan we i tokbaot danis. Ating sam man blong God long taem blong Baebol oli danis taem we oli wantem be i no minim se danis i wan spesel haf blong lafet blong mared. ?Yumi save lanem wanem from samting ya?

Long sam Kristin mared long Afrika, oli yusum ol strongfala spika blong plei long miusik. From samting ya, miusik i save strong tumas mo ol man we oli stap long lafet ya oli no save storian gud tugeta. Samtaem ol man oli sot long kakae long ol lafet ya be oli no sot nating long ol danis we kwiktaem nomo oli bitim mak. Ol lafet ya oli no moa stap olsem lafet blong mared be oli kam olsem wan eskius nomo blong danis. Antap long samting ya, plante taem, strongfala miusik i save pulum ae blong ol man we oli lukaot trabol, no ol strenja we oli kam nomo long prapa tingting blong olgeta.

From we ol stori blong Baebol long saed blong mared oli neva tokbaot sipos i gat miusik mo danis long ol taem ya, hemia i givhan long tufala we i wantem mared blong tingting gud long wanem rod we tufala i save folem blong mekem wan mared we i ona long Jeova. I no longtaem, long sam mared long saot blong Afrika, i gat ol yangfala Kristin we oli bin mekem plan blong lanem sam spesel danis we oli save mekem long lafet blong mared. Long plante manis bifo mared, ol yangfala ya oli spenem tumas taem blong lanem ol danis ya. Be ol Kristin oli mas ‘pemaot taem’ blong mekem “ol samting we oli impoten moa,” olsem wok blong prij, stadi wanwan, mo go long ol Kristin miting.​—⁠Efesas 5:​16; Filipae 1:​10.

Taem yumi tingbaot hamas waen we i Jisas i wokem, i luk olsem se lafet blong mared ya long Kena hem i wan bigfala lafet. Be, yumi sua se lafet ya i no wan we i mekem bigfala noes. Mo yumi sua se ol man we oli kam long lafet ya oli no dring alkol bitim mak, olsem we oli mekem long sam mared blong ol man Jiu. (Jon 2:​10) ?Olsem wanem yumi save sua long samting ya? From we Masta Jisas Kraes i stap long lafet ya. Long olgeta man, ating Jisas nao bambae i lukaot gud blong obei long ol oda blong God long saed blong ol rabis fren se: “I nogud yu go joen wetem ol man we oli stap dring tumas.”​—⁠Ol Proveb 23⁠:⁠20.

 Taswe, sipos wan man mo woman tufala i mekem disisen blong gat waen no sam narafala alkol blong dring long lafet blong mared blong tufala, tufala i mas putumap sam man we oli naf blong bos strong long samting ya. Mo sipos tufala i mekem disisen se bambae i gat miusik, tufala i mas jusum ol singsing we oli stret mo putum wan man blong i lukaot long saon blong miusik ya. Ol man we oli kam long lafet ya oli no mas gat raet blong bos long ol samting mo putum ol singsing we maet oli nogud no blong tanem saon blong miusik i go antap bitim mak. Sipos i gat danis, hem i mas gohed long wan fasin we i karem ona mo we man i bos long tingting blong hem. Sipos sam memba blong famle we oli no bilif, no sam Kristin we oli no bigman long tingting blong olgeta, oli yusum sam stael blong danis we oli no stret, man we i mared maet bambae i mas jenisim miusik ya no askem long fasin we i stret se, oli stopem danis ya. Sipos no, lafet ya i save kam nogud mo i olbaot, nao i mekem samfala oli foldaon long sin.​—⁠Rom 14⁠:⁠21.

From we denja i save kamaot long ol stael blong danis blong naoia, strongfala miusik, mo alkol, plante Kristin man we oli mared oli mekem disisen blong no gat ol samting ya long taem blong mared blong olgeta. Sam man oli jikim ol Kristin ya from disisen we oli bin tekem, be i moagud blong tinghae long ol Kristin ya from we oli wantem blokem eni samting we maet i save sakem doti long tabu nem blong God. Sam narafala man we oli mared, oli mekem plan blong bambae i gat miusik we i stret, wan taem blong danis, mo alkol, we oli no bitim mak. Nomata wanem disisen we man blong mared i tekem, hem nao i bos long eni samting we bambae hem i letem i hapen long taem blong mared blong hem.

Long Afrika sam man we oli no bigman long tingting blong olgeta oli daonem ol Kristin mared we oli stret blong yumi ona long olgeta, mo oli talem se ol lafet ya oli olsem taem blong berem dedman. Be, tingting ya i no skelgud. Ol wok blong sin maet oli mekem man i harem gud blong smoltaem, be biaen oli mekem tingting blong wan Kristin i trabol mo i sakem doti long nem blong God. (Rom 2:​24) Defren olgeta, tabu spirit blong God i givim trufala glad. (Galesia 5:​22) Plante Kristin man mo woman oli save luklukbak long dei blong mared blong olgeta, mo harem gud from we hem i wan taem we i hapi mo i no wan taem ‘we narafala man i save foldaon long hem.’​—⁠2 Korin 6⁠:⁠3.

Welsh mo Elthea tufala i save tingtingbak long plante naesfala toktok we sam memba blong famle blong olgeta we oli no bilif, oli talem afta we oli bin kam long mared blong tufala. Wan long olgeta ya i talem se: “Mifala i les long ol mared we oli stap gohed naoia, we oli mekem plante noes. I naes tumas blong jenisim samting ya mo kam long wan mared we i folem stret fasin.”

Samting we i impoten moa se, ol Kristin mared oli wan taem blong glad mo wan taem blong karem ona i go long Stamba blong mared, hemia Jeova God.

[Bokis/Foto pija long pej 22]

LIS BLONG JEKEM LONG LAFET BLONG MARED

• ?Sipos yu singaot wan famle, we i no joen long bilif, blong hem i givim wan tok, yu yu meksua se bambae hem i no pulum sam kastom we oli no Kristin i kam long lafet ya?

• ?Sipos i gat miusik long taem ya, yu yu jusum finis ol singsing we oli stret?

• ?Miusik blong yu bambae i strong olsem wanem?

• ?Sipos i gat danis, bambae hem i folem wan fasin we i karem ona?

• ?Bambae yu givimaot alkol long fasin we i no bitim mak?

• ?Bambae i gat man blong bos long alkol ya mekem se oli no givimaot tumas?

• ?Yu makem wan stret taem finis blong mared ya i finis long hem?

• ?Bambae i gat sam man we oli bos blong meksua se ol samting oli gohed folem oda gogo kasem en blong lafet ya?