Laef Stori

!Soem Tangkiu Long Jeova—Tru Long Fultaem Wok!

STANLEY E. REYNOLDS I TALEM STORI YA

Mi mi bon long London, Inglan, long 1910. Afta long Faswan Bigfala Faet blong Wol, papa mama blong mi, tufala i muf i go long Wiltshire mo tufala i stap long wan smol vilej we nem blong hem Westbury Leigh. Olsem wan smol boe, plante taem, mi stap tingting se: ‘?Hu ya God?’ I no gat man we i save talemaot samting ya long mi. Mo, mi neva kasem save from wanem wan smol vilej olsem blong mifala i nidim tu haos prea wetem wan bigfala jos haos blong wosip long God.

LONG 1935, fo yia bifo we Namba Tu Bigfala Faet long wol i stat, mi mo smol brata blong mi, Dick, mitufala i ron long baskel i go long Weymouth, long saot blong Inglan, blong spel long haos tapolen. Taem mitufala i sidaon insaed long haos tapolen, mitufala i stap lesin long ren we i stap folfoldaon mo mitufala i tingting we bambae mitufala i mekem wanem. Long sem taem ya, wan olfala man i visitim mitufala mo i givim tri buk long mitufala we oli givhan blong stadi Baebol​—⁠hemia The Harp of God, Light I, mo Light II. Mi tekem olgeta, mo mi glad se i gat samting ya we i save mekem mi fogetem semfala noes we mi stap harem. Kwiktaem nomo, samting we mi ridim i pulum intres blong mi, be mi mi no tingbaot nating se bambae samting ya i jenisim laef blong mi fulwan​—⁠mo laef blong brata blong mi tu.

Taem mi gobak long haos, mama blong mi i talem long mi se Kate Parsons, wan woman we i stap long vilej blong mifala, hem nao i stap seremaot ol semfala buk ya we oli tokbaot Baebol. Ol man oli save gud hem from we, nating se woman ya i olfala, hem i stap ron long wan smol motobaek blong visitim ol man we oli stap wanwan raonabaot long vilej blong mifala. Mi go blong luk hem, mo hem i glad blong givim tufala buk ya long mi, we oli kolem Creation mo Riches, mo tu, sam narafala buk blong Watch Tower Society. Hem i talem long mi tu se hem i wan Witnes blong Jeova.

 Afta we mi ridim ol buk ya wetem Baebol blong mi, mi kasem save se Jeova nao i trufala God, mo mi wantem wosipim hem. Taswe mi sanem wan leta i go long jos blong mifala blong talemaot se mi finis mo mi stap joen long Baebol stadi long haos blong John mo Alice Moody. Tufala i stap long Westbury, taon we i stap klosap moa long mifala. Mifala seven nomo long ol miting ya. !Bifo mo afta long miting, Kate Parsons i plei miusik mo mifala i singim ol singsing blong Kingdom long bigfala voes!

Ol Faswan Dei

Mi luksave se mifala i stap laef long taem we i impoten tumas, mo mi wantem tumas blong joen long wok blong prij we profet tok blong Matiu 24⁠:14 i tokbaot. Taswe mi lego smok, mi pem wan basket, mo mi givim laef blong mi long Jeova, God ya we i Hae Olgeta.

Long Ogis 1936, Joseph F . Rutherford, presiden blong Watch Tower Society, i visitim Glasgow, long Skotlan, blong givim wan tok long saed blong “Amageden.” Nating se Glasgow i stap samwe 600 kilometa longwe, mi gat strong tingting se mi mas go long ples ya mo baptaes long asembli ya. Mi no gat i naf mane, taswe mi jam long wan tren wetem baskel blong mi, mo tren ya i putum mi long Carlisle, wan taon we i stap klosap long Skotlan. Ale mi jam long baskel blong mi, mo ron 160 kilometa bakegen i go long not. Taem mi gohom, klosap se mi ron long baskel nomo i go kasem haos. Taem mi kasem haos, mi harem se mi taed we mi taed, be mi kam strong long saed blong spirit.

Stat long taem ya, taem mi wantem tokbaot bilif blong mi, mi ron long baskel blong mi, mi go storian wetem ol man long ol vilej we oli stap klosap. Long taem ya, wanwan Witnes i gat wan kad we i gat wan mesej blong Baebol i stap long hem blong ol man long haos oli ridim. Mifala i karem wan fonograf blong talemaot ol tok we oli rikodem finis. Ol tok ya, oli stanap long Baebol mo presiden blong Sosaeti nao i givim. Mo tu, oltaem mifala i karem wan basket * blong magasin, we i makemaot mifala olsem ol Witnes blong Jeova.

Mekem Paenia Long Taem Blong Faet

Brata blong mi i baptaes long 1940. Namba tu bigfala faet blong wol i stat long 1939, mo mitufala i luksave se i rili nidim ol man we oli prij fultaem. Taswe, mifala i fulumap pepa blong mekem wok olsem paenia. Mitufala i glad tumas blong go stap long haos blong ol paenia long Bristol. Long ples ya, mitufala i joen wanples wetem Edith Poole, Bert Farmer, Tom mo Dorothy Bridges, Bernard Houghton, mo ol narafala paenia we mitufala i tinghae long fasin blong bilif blong olgeta.

Smoltaem biaen, wan smol bas we oli raetem ol bigfala leta long tugeta saed blong hem se: “JEHOVAH’S WITNESSES,” i kam tekem mifala. Man we i draevem bas ya, hemia Stanley Jones, we biaen hem i kam wan misinari long Jaena mo oli putum hem long kalabus blong seven yia from wok blong prij we hem i stap mekem.

 Taem faet i stap kam antap, mifala i no moa save slip gud long naet. Ol bom oli foldaon raon long haos blong mifala, mo mifala i mas lukaot gud oltaem long ol bom we i faerap. Long wan sapa, afta long wan nambawan asembli we 200 Witnes oli joen long hem, mifala i aot long Bristol, mo mifala i kasem haos blong mifala we mifala i wokbaot long medel blong plante bolet we ol masket blong plen blong ol enemi oli stap sutum i kam daon.

Long nekis moning, mi mo Dick, mitufala i kambak long taon blong karem sam samting we mitufala i bin livim i stap. Mitufala i sapraes bigwan. Taon blong Bristol i kam nogud olgeta. Fulwan taon i brobrok nogud mo faea i bonem evriwan. Park Street, ples we Haos Kingdom blong mifala i bin stap long hem, i brokbrok nogud mo smok i stap kamaot long hem. Be, i no bin gat wan Witnes we i ded no i karem kil. Mifala i harem gud, se mifala i bin karemaot ol buk blong mifala long Haos Kingdom mo givimaot long ol memba blong kongregesen. Mifala i talem tangkiu long Jeova from we i no gat wan Witnes we i ded mo tu from ol buk oli stap gud nomo.

Fasin Fri We Mi No Tingbaot Nating Se Oli Save Givim

Long taem ya we mi mi presiden elda long Bristol Kongregesen, i gat 64 Kristin minista evriwan. Long sem taem ya, oli askem mi blong mekem wok blong ami. Oli putum plante narafala Witnes long kalabus from we oli no wantem joen long faet, mo mi ting se bambae oli blokem mi tu, blong mi no moa prij. Mi pas long Kot blong Bristol mo long ples ya Brata Anthony Buck, we bifo hem i wan gad blong ol presina, i toktok long saed blong mi. !Hem i wan man we i no fraet nating, hem i stanap strong long saed blong ol trutok blong Baebol! Mo from nambawan toktok we hem i mekem long saed blong mi, oli letem mi mi fri, mi no moa joen long wok blong ami. Mi neva tingbaot se oli save mekem olsem. Oli talem se mi save stap fri olsem nomo, sipos mi gohed oltaem wetem fultaem wok blong mi blong prij!

Mi glad tumas se mi save stap fri olsem, mo tingting blong mi i strong se mi mas yusum fasin fri ya blong prij go kasem mak we mi naf blong kasem. Taem mi kasem wan mesej blong telefon long branj ofis long London blong toktok long Albert D. Schroeder, mi stap tingting se bambae oli askem mi blong mekem wanem. Tingbaot, mi sapraes tumas taem oli askem mi blong go long Yorkshire blong wok olsem seket elda. Evri wik, mi visitim wan defren kongregesen blong givhan mo mi leftemap tingting blong ol brata sista. Mi harem se mi no naf nating blong mekem wok ya, be oli letem mi blong no joen long wok blong ami mo mi fri blong go. Taswe mi akseptem rod we Jeova i soem mo mi glad blong go.

Albert Shcroeder i talemaot mi long ol brata long wan asembli long Huddersfield, mo long Epril 1941, mi statem niufala wok blong mi. !Mi glad tumas blong save ol gudfala brata ya! Lav mo kaen fasin blong olgeta i mekem mi luksave moa se Jeova i gat ol man we oli fasgud long hem, mo oli laeklaekem olgeta.​—⁠Jon 13⁠:⁠35.

Mi Kasem Moa Wok

Long 1941, mifala i holem wan bigfala asembli blong faef dei long De Montfort, wan bigfala haos long Leicester. Hemia wan asembli we mi no save fogetem. Nating se i gat problem long saed  blong kakae mo gavman i no letem ol pablik transpot, namba blong ol man we oli kam long asembli ya i kasem 12,000 long Sande. Long taem ya, i gat samwe long 11,000 Witnes nomo long kantri ya. Mifala i lesin long ol tok blong presiden blong Sosaeti we oli bin rikodem long kaset, mo long taem ya, mifala i kasem buk ya Children. Asembli ya i rili wan bigfala samting long tiokratik histri blong ol man blong Jeova long Briten. Mifala i mekem asembli ya taem Namba Tu Bigfala Faet Blong Wol i stap gohed.

Smoltaem afta long asembli ya, Sosaeti i askem mi blong wok wetem Betel famle long London. Long ples ya, mi wok long dipatmen blong putum ol buk long katon mo sanem i go long narafala ples, mo biaen, mi wok insaed long ofis, mi lukaot long ol wok blong ol kongregesen.

Famle blong Betel i mas lan blong laef wetem noes we ol plen blong faet long London oli stap mekem long dei mo long naet. Mo tu, oltaem ol haeman oli stap kam blong jekem ol brata we oli lukaot long Betel. Oli putum Pryce Hughes, Ewart Chitty, mo Frank long kalabus from we trifala i no wantem joen long faet, mo smoltaem biaen, gavman i sanem Albert Schroeder i gobak long Yunaeted Stet. Nating se i gat ol hadtaem olsem, mifala i gohed blong kea gud long ol kongregesen mo olgeta we oli intres long Kingdom.

!Go Long Gilead Skul!

Taem bigfala faet i finis long 1945, mi fulumap pepa blong go kasem trening long Watchtower Baebol Skul blong Gilead blong kam misinari, mo oli akseptem mi blong joen long namba eit klas long 1946. Sosaeti i mekem rod blong sam long mifala, olsem Tonny Attwood, Stanley Jones, Harold King, Don Rendel, mo Stanley Woodburn, blong oli jam long sip long haba blong Corny long Fowey mo kam long ples we skul i stap long hem. Wan Witnes long ples ya, i bin pem rod blong mifala blong pas long wan sip we i stap karem ol graonpot long Jaena. Ples we mifala i slip long hem long sip ya i fasfas, mo solwota i pas antap long dek blong sip. !Mifala i glad tumas taem mifala i kasem haba we mifala i stap go from, hemia Filadelfia!

Naesfala graon mo ol bilding we mifala i holem Gilead Skul long hem i stap long Saot Lansing afsaed long New York, mo trening we mi kasem long ples ya, i gat bigfala mining long mi. Ol studen long klas blong mifala oli kam long 18 defren kantri. Hemia i faswan taem we Sosaeti i save tekem plante Kristin minista long ol narafala kantri mo mifala evriwan i kam olsem gud fren. Mi glad tumas blong kampani wetem brata we mitufala i serem semfala rum blong slip, hemia Kalle Salvaara blong Finlan.

Taem i pas hareap, mo long en blong ol faef manis ya, presiden blong Sosaeti, Nathan H. Knorr i aot long hedkwota long Brooklyn, i kam blong givim ol stefeket blong mifala mo blong talem long mifala weples bambae mifala i go wok long hem. Long ol taem ya, ol studen oli no save weples nao bambae oli go wok long hem, go kasem dei we oli kasem stefeket blong olgeta. Sosaeti i sanem mi mi gobak long Betel blong London blong gohed long wok we mi bin mekem long ples ya.

Gobak Long London

Long Briten, laef i rili had long ol yia afta long bigfala faet. I gat hadtaem long saed blong kakae mo plante narafala samting we mifala i nidim, olsem pepa. Be mifala i gat i naf blong gohed, mo ol intres long saed blong Kingdom blong Jeova oli gohed blong gru. Antap long wok we mi mekem long Betel, mi wok tu long ol distrik mo seket asembli, mo mi visitim ol kongregesen, we sam long ol kongregesen ya oli stap long Aealan. I wan bigfala blesing tu blong mitim Erich Frost mo ol narafala brata mo sista blong Yurop mo blong lanem fasin blong stanap strong we ol brata sista oli gat taem oli safa insaed long ol rabis kalabus blong ol Nasi. Wok blong Betel i rili wan blesing we mi kasem.

Mi bin save Joan Webb blong ten yia finis. Hem i wan spesel paenia we i stap wok long Watford, wan taon long not blong London. Long 1952, mitufala i mared. Mitufala evriwan i wantem gohed long fultaem wok. Mo taem mi finis long Betel, mitufala i glad tumas we Sosaeti i askem mi blong wok olsem seket elda. Faswan ples we mitufala i visitim, hemia Sussex mo Hampshire, long saot blong Inglan klosap long solwota. Long taem ya, wok blong seket elda i no isi nating. Plante taem, mitufala i mas ron long bas, baskel, mo wokbaot long leg nomo. Plante kongregesen oli gat ol bigfala teritori afsaed long taon. Nating se i hadwok blong kasem ol teritori ya, namba blong ol Witnes i gohed blong gru.

New York Siti Long 1958

Long 1957, mi kasem wan narafala leta we i askem mi blong go long Betel. Leta ya i talem se: “?Yu wantem kam long ofis blong givhan blong rerem rod blong olgeta we bambae oli go long asembli long Yankee Stadium mo Polo Grounds long New York long 1958?” I no longtaem mi mo Joan, mitufala i stap bisi wetem ol pepa we i kam long ol brata we oli askem blong pas long ol plen mo ol sip we Sosaeti i  rentem. Hemia nao asembli we nem blong hem ‘Divine Will International Assembly,’ mo i gat 253,922 man oli kam long asembli ya. Long taem ya, 7,136 man oli tekem baptaes long wota blong soemaot se oli givim laef blong olgeta long Jeova​—⁠namba ya i bitim tu taem long namba blong olgeta we oli baptaes long impoten dei blong Pentekos 33 K.T., * we Baebol i tokbaot.​—⁠Ol Wok 2:​41.

Neva mi mo Joan bambae i fogetem kaen fasin we Brata Knorr i soem long mitufala taem hem i askem mifala blong kam long asembli blong givhan long olgeta brata sista we oli aot long 123 kantri, oli kam long New York. Hemia wan ekspiriens we i mekem mitufala tugeta i harem gud tumas mo i givim bigfala glad long mitufala.

Ol Blesing Blong Fultaem Wok

Taem mitufala i gobak long ples we mitufala i stap wok long hem, mitufala i gohed long wok blong visitim ol kongregesen go kasem we mitufala i kasem problem long saed blong helt. Joan i go slip long hospital, mo mi kasem sik long bren blong mi. Mifala i no moa visitim ol kongregesen, ale mitufala i gohed long wok blong spesel paenia, be biaen mitufala i gohed wanwan taem blong visitim ol kongregesen bakegen. I no longtaem biaen, mitufala i gobak long Bristol, mo long ples ya mitufala i gohed long fultaem wok. Brata blong mi Dick wetem famle blong hem, oli stap klosap nomo long mitufala, mo plante taem mitufala i stap tokbaot laef blong mitufala long ol taem bifo.

Mi no moa save lukluk gud from we long 1971, mi kasem bigfala problem long ae blong mi, we ol dokta oli no save winim. Stat long taem ya, i hadwok long mi blong rid, taswe mi faenem se ol kaset blong ol buk we oli tokbaot Baebol oli nambawan presen we Jeova i givim. Mi mo Joan, mitufala i stap gohed yet blong mekem ol Baebol stadi, mo long ol yia we oli pas, mitufala i gat jans blong halpem raonabaot 40 man blong kasem save blong trutok, wetem wan famle we olgeta seven evriwan.

Taem mitufala i givim laef blong mitufala i go long Jeova 60 yia bifo, mitufala i wantem tumas blong joen long fultaem wok blong prij mo stap long wok ya. !Mitufala i glad tumas from paoa we mitufala i gat yet blong mekem wok blong Jeova, God ya we i Hae Olgeta! !Hemia nomo beswan rod blong talem tangkiu long hem from gudfala fasin we hem i soem long mitufala mo from olgeta yia we mitufala i bin harem gud tugeta!

[Ol futnot]

[Tok blong pija long pej 25]

Mifala wetem brata blong mi, Dick (Dick i stap stanap long lefsaed) mo ol narafala paenia long fran blong haos paenia long Bristol

[Tok blong pija long pej 25]

Haos blong ol paenia long Bristol long 1940

[Tok blong pija long pej 26]

Stanley mo Joan Reynolds long dei blong mared blong tufala, Janewari 12, 1952, mo tede.