Strong Blong Leftemap Tijing Blong God

“I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”​—⁠OL PROVEB 3:​5, 6.

1. ?Olsem wanem yumi save luk ol save blong wol bitim bifo?

 NAOIA, i gat samwe long 9,000 niuspepa we evri dei ol man oli stap seremaot raonabaot long wol. Long Yunaeted Stet nomo, evri yia oli wokem samwe long 200,000 niufala buk. Folem wan ripot, oli ting se long Maj 1998, i gat samwe long 275 milian Web pej long Intenet. Namba ya i stap go antap kwiktaem tumas. Oli talem se evri manis, ol man oli ademap 20 milian niufala pej bakegen. Tede, i isi nomo blong kasem ol save long saed blong eni samting we man i wantem. Bifo, i neva gat wan samting olsem. I tru se rod ya blong kasem enikaen save i gat gudfala saed blong hem, be hem i save mekem plante problem tu.

2. ?Wanem problem i save kamaot from plante rod we yumi gat blong kasem ol save?

² Sam man oli bitim mak long fasin ya we oli wantem tumas blong kasem ol laswan save we i jes kamaot, nating se oli mas lego ol samting we oli moa impoten. Sam narafala, oli mekem stadi long sam bigfala samting, nao taem oli kasem smol save, oli tingbaot olgeta wan se oli gat bigfala save. Smol save we oli gat, maet i lidim olgeta blong mekem sam bigfala disisen we i save spolem olgeta bakegen mo ol narafala tu. Mo oltaem, i gat wan denja i stap, hemia blong ridim ol save we oli giaman mo oli no stret. Plante taem, i nogat wan stret rod blong pruvum se ol save ya oli stret mo oli tru.

3. ?Baebol i givim wanem woning long fasin blong traem kasem olgeta waes blong man?

³ Yumi evriwan long wol ya, yumi gat fasin blong wantem kasem save moa long ol samting. Long taem bifo, Solomon i luksave denja ya we man i westem tumas taem blong lukaot ol save we oli no impoten no maet ol save we oli blong givim trabol nomo. Hem i raetem se: “I gat wan samting i stap we yu mas lukaot gud long hem. Bambae ol man oli stap raetem ol buk gogo i no save finis, mo sipos yu stap stadi tumas long olgeta oltaem, samting ya bambae i mekem yu yu taed gud nomo.” (Prija 12⁠:12) Plante handred yia biaen, aposol Pol i raet long Timoti se: “Bambae yu no go joen long ol toktok ya we oli no blong ona long God, mo long ol krangke toktok ya we oli talem se i fasin blong man i kam waes. Ol man we oli toktok olsem oli giaman nomo, mo plante man we oli stap folem fasin ya, oli gowe finis long fasin blong bilif.” (1 Timoti 6:​20, 21) Yes, yumi ol Kristin tede yumi mas stap longwe long ol krangke tingting we oli blong spolem yumi.

4. ?Wanem wan rod we yumi save folem blong soemaot se yumi trastem Jeova mo ol tijing blong hem?

⁴ I gud we ol man blong Jeova oli obei long tok blong Ol Proveb 3:​5, 6, we i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” Fasin blong trastem Jeova i minim tu se yumi sakemaot eni kaen tingting we i agensem Tok blong God, nomata we tingting ya i kamaot long yumi nomo no long wan narafala man. Blong protektem yumi long saed blong spirit, i impoten tumas blong trenem paoa blong tingting blong yumi. Olsem nao, bambae yumi naf blong makemaot ol save we oli blong spolem yumi mo ronwe long olgeta. (Hibrus 5:​14) I gud yumi tokbaot sam stamba blong ol save ya.

Wan Wol We Setan i Bos Long Hem

5. ?Wanem wan stamba blong ol tingting we oli blong spolem yumi, mo hu i stap biaen long hem?

⁵ Oltaem nomo, wol ya i stamba blong plante tingting we oli blong spolem yumi. (1 Korin 3:​19) Jisas Kraes i prea long God from ol disaepol blong  hem, se: “Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef.” (Jon 17⁠:15) Yes, Jisas i askem God blong i protektem ol disaepol blong hem long “man nogud ya Setan.” Samting ya i soemaot se Setan i gat bigfala paoa long wol ya. Taem yumi kam Kristin, hemia i no blokem yumi long ol nogud paoa blong wol ya. Jon i raetem se: “Yumi save we yumi ya, yumi man blong God, be olgeta man blong wol ya oli stap long paoa blong Setan.” (1 Jon 5:​19) Setan mo ol rabis enjel blong hem oli fulumap gud wol ya wetem ol save we oli blong spolem yumi. Yumi save se samting ya i kam moawas naoia we yumi stap laef long en blong ol lasdei.

6. ?Olsem wanem ol pleplei blong harem gud oli save mekem se tingting blong yumi i no moa stikim yumi?

⁶ Yumi save tu se sam long ol save ya, maet i luk olsem we oli no blong spolem yumi. (2 Korin 11⁠:14) Eksampel, tingbaot ol pleplei blong haremgud, ol program long televisin, sinema, miusik, mo ol buk. Plante man oli agri se fulap long ol samting ya oli soem ol pleplei we i leftemap ol doti fasin, olsem nogud fasin blong seks, faet, mo fasin blong yusum drag. Maet ol man oli sek bigwan long faswan taem we oli luk ol pleplei ya. Be taem man i luk ol pleplei ya bakegen mo bakegen, bambae tingting blong hem i no moa stikim hem from. Yumi neva mas jusum blong lukluk ol pleplei we oli leftemap ol tingting we oli blong spolem yumi nomo.​—⁠Ol Sam 119⁠:⁠37.

7. ?Wanem waes blong man we i save spolem bilif we yumi gat long Baebol?

⁷ I gat wan narafala stamba blong ol save we i blong spolem yumi​—⁠hemia ol tingting blong sam sayentis mo sam man blong mekem dip stadi, we oli talem se Baebol i no kamaot long God. (Lukluk Jemes 3:​15.) Ol save olsem oli kamaot plante taem long ol magasin mo ol buk we fulap man i wantem ridim. Plante tingting insaed long ol buk ya oli save pulum man blong no moa bilif long Baebol. Samfala man oli wantem tumas blong tokbaot plante defren tingting we oli daonem Baebol. Semfala denja ya i stap tu long taem blong ol aposol. Samting ya i klia taem yumi ridim tok ya blong Pol se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long ol devel we oli stap olbaot long wol ya fastaem, i no kamaot long Kraes.”​—⁠Kolosi 2⁠:⁠8.

Ol Enemi Blong Trutok

8, 9. ?Olsem wanem fasin blong apostasi i stap gohed tede?

⁸ Apostasi * i wan narafala samting we i givim denja long yumi long saed blong spirit. Aposol Pol i bin talemaot se, sam man we oli talem se oli Kristin bambae oli girap, oli lego mo agensem trufala bilif. (Ol Wok 20⁠:​29, 30; 2 Tesalonaeka 2⁠:⁠3) Samting we hem i talem i kamtru. Afta long ded blong ol aposol, fulap Kristin oli lego trufala bilif, nao oli stanemap skul blong Krisendom. * Tede, i no gat fulap apostasi long medel blong ol man blong God. Nating se i olsem, wanwan man i stap lego ogenaesesen blong yumi, mo sam long ol man ya oli talem ol giaman tok mo givimaot ol save we oli no stret, blong traem daonem ol Witnes blong Jeova. Sam long olgeta oli wok wetem ol grup we ol man oli stanemap blong agensem klin wosip. Taem ol man ya oli mekem olsem, oli joen wetem fasfala man blong apostasi, hemia Setan.

⁹ Sam man blong apostasi oli gohed moa, oli stap yusum ol defren rod blong toktok, olsem Intenet, blong givimaot ol giaman save long saed blong ol Witnes blong Jeova. Ale, taem olgeta we hat blong olgeta i stret oli stap stadi long ol bilif blong yumi, maet oli save faenem ol giaman tingting long saed blong ol Witnes blong Jeova. Sam  Witnes tu, oli bin sek long ol save ya we i blong spolem yumi. Antap long hemia, samtaem ol man blong apostasi oli joen long sam program long televisin mo radio. ?Wanem waes rod we yumi mas folem long saed ya?

10. ?Wanem waes samting we yumi save mekem long saed blong ol giaman tingting blong apostasi?

¹⁰ Aposol Jon i talem long ol Kristin se oli no mas tekem ol man blong apostasi i kam insaed long haos blong olgeta. Hem i raetem se: “Sipos wan man i kam long yufala, be hem i no tijim yufala long ol stret tok ya we Kraes i tijim yumi long hem, bambae yufala i no tekem hem i kam insaed long haos blong yufala. Sipos man olsem i kam, be bambae yufala i no talem halo long hem, from we man we i stap talem halo long ol man olsem, hem i stap joen long hem long ol rabis wok blong hem.” (2 Jon 10, 11) Yumi mas stap longwe long ol enemi ya. Olsem nao, bambae ol rabis tingting blong olgeta oli no spolem yumi. Sipos yumi stap ridim ol tijing blong apostasi long ol defren rod ya we ol man oli stap yusum blong toktok long taem blong yumi, samting ya i save spolem yumi. Hemia i sem mak olsem we yumi tekem wan man blong apostasi i kam insaed long haos blong yumi. !Yumi neva mas letem ol samting ya oli pulum tingting blong yumi long wan rod we i save mekem trabol long yumi!​—⁠Ol Proveb 22⁠:⁠3.

Insaed Long Kongregesen

11, 12. (a) ?Wanem stamba blong ol save we oli blong spolem kongregesen long faswan handred yia? (b) ?Olsem wanem sam Kristin oli kam slak, oli no moa strong blong leftemap ol tijing blong God?

¹¹ I gat wan narafala samting we i save kam olsem stamba blong ol tingting we oli blong spolem yumi. I tru se yumi ol Kristin we yumi givim laef blong yumi i go finis long God, yumi no wantem tijim ol samting we oli giaman, be maet yumi gat fasin ya blong toktok we yumi no tingtinggud fastaem. (Ol Proveb 12⁠:18) Yumi evriwan i no stretgud olgeta, taswe samtaem yumi save mekem sin wetem tang blong yumi. (Ol Proveb 10⁠:19; Jemes 3⁠:⁠8) I klia se long taem blong aposol Pol, samfala insaed long kongregesen oli no bos long tang blong olgeta, nao oli stap agiu from mining blong ol tok. (1 Timoti 2⁠:⁠8) Sam narafala oli tinghae tumas long prapa tingting blong olgeta nao oli stap tok agensem raet blong aposol Pol. (2 Korin 10⁠:​10-​12) Fasin ya i mekem se oli stap raorao from ol bisnes we i no nid blong rao from.

¹² Samtaem, “oli rao bigwan from ol smosmol samting nomo,” mekem se pis i no moa stap long kongregesen. (1 Timoti 6⁠:5; Galesia 5:​15) Pol i raet blong tokbaot olgeta we oli stamba blong ol rao ya, i se: “Sipos wan man i stap tijim ol man long narafala toktok, mo i no wantem ol trutok ya we Jisas Kraes Masta blong yumi i talemaot, man olsem i nogud. Hem i no ona gud long ol tok ya we i tijim yumi blong ona long God. Man olsem, hem i no save wan samting nating, mo hem i praod tumas. Man we i wantem askem ol kwestin mo we i wantem mekem tumas toktok long plante samting blong rao nomo, hem i krangke nomo. Fasin ya i stap mekem ol man oli jalus, mo oli stap seraot, mo oli stap tok nogud long nem blong narafala man, mo oli stap tingting nogud long olgeta.”​—⁠1 Timoti 6:​3, 4.

13. ?Wanem fasin blong bighaf blong ol Kristin long faswan handred yia?

¹³ I gud tumas we, long taem blong ol aposol, bighaf blong ol Kristin oli gat strong bilif, mo oli  putum tingting blong olgeta i stap strong long wok blong talemaot gud nius blong Kingdom blong God. Oli bisi long wok blong lukaot gud long “ol pikinini we oli no gat papa blong olgeta, mo long ol widowoman, long ol trabol we i kasem olgeta,” mo oli traem bes blong olgeta blong “stap klin oltaem, [blong] bambae ol rabis fasin blong wol i no spolem” olgeta. Oli no stap westem taem blong olgeta long ol rao from toktok we i blong nating nomo. (Jemes 1:​27) Blong lukaotgud long olgeta long saed blong spirit, oli stap longwe long ol “rabis fren,” afsaed mo insaed long Kristin kongregesen tu.​—⁠1 Korin 15⁠:33 NW; 2 Timoti 2:​20, 21.

14. ?Sipos yumi no lukaotgud, olsem wanem fasin blong storian gud i save jenis i kam wan rao?

¹⁴ I tru, ol samting we paragraf 11 i tokbaot, oli no stap kamaot oltaem long ol kongregesen blong ol Witnes blong Jeova tede. Nating se i olsem, yumi mas luksave se ol rao olsemia oli save kamaot. Yes, i stret nomo blong tokbaot ol stori blong Baebol mo askem ol kwestin long sam samting we oli joen wetem niufala wol, we maet yumi no save ansa blong olgeta yet. Mo i no rong blong talemaot prapa tingting blong yumi long saed blong ol samting olsem fasin blong putum klos, katem hea, mo blong jusum ol pleplei. Be, sipos yumi stap fosem narafala blong folem tingting blong yumi, mo yumi kam kros taem oli no agri long tingting blong yumi, bambae kongregesen i seraot from ol smosmol samting nomo. Nao, toktok we fastaem, i luk olsem se i smol nomo, i no save spolem yumi, naoia i mekem wan bigfala trabol i kamaot.

Holemgud Ol Samting We God i Putum Long Han Blong Yumi

15. ?‘Ol tijing blong ol devel’ oli save mekem wanem trabol long yumi long saed blong spirit, mo Baebol i givim wanem advaes?

¹⁵ Aposol Pol i givim woning se: “Tabu spirit i talemaot gud, se bambae long taem ya we klosap wol i finis, sam man oli save lego fasin blong bilif long God. Bambae olgeta ya oli obei long ol tok blong ol devel we oli blong giaman nomo, mo bambae oli biaen long ol toktok ya we ol devel nomo oli stap tijim olgeta long hem.” (1 Timoti 4⁠:⁠1) Yes, ol tingting ya we oli blong spolem yumi, oli givim wan bigfala denja long yumi. Yumi kasem save from wanem Pol i talem long gudfala fren blong hem, Timoti, se: “Timoti, yu mas holemgud olgeta samting ya we God i putum finis long han blong yu. Bambae yu no go joen long ol toktok ya we i no blong ona long God, mo long ol krangke toktok ya we oli talem se i fasin blong man i kam waes. Ol man we oli toktok olsem oli giaman nomo, mo plante man we oli stap folem fasin ya, oli gowe finis long fasin blong bilif.”​—⁠1 Timoti 6:​20, 21.

16, 17. ?God i putum wanem long han blong yumi, mo yumi mas lukaot long samting ya olsem wanem?

¹⁶ ?Olsem wanem yumi tede i save kasem frut from woning ya we i soem lav? God i putum wan samting long han blong Timoti​—⁠wan samting we i sas tumas, we Timoti i mas lukaotem gud mo protektem. ?Wanem samting ya? Pol i eksplenem se: “Yu yu mas holemstrong ol tok ya we mi mi tijim yu finis long hem. Ol tok ya oli stret gud, mo i blong soemaot rod long yu, blong yu save folem ol fasin blong bilif mo blong lavem ol man. Ol fasin ya, yumi stap folem from we yumi joen long Jisas Kraes. Ol gudfala samting ya we Jisas Kraes i putum long han blong yu finis, yu mas holemgud olgeta long paoa blong tabu spirit we hem i mekem ples blong hem finis long yumi.” (2 Timoti 1:​13, 14) Yes, samting we i stap long han blong Timoti, hemia ‘ol tok we oli stret gud,’ “we i tijim yumi blong ona long God.” (1 Timoti 6⁠:⁠3) Folem ol tok ya, ol Kristin tede oli gat strong tingting blong protektem bilif blong olgeta mo olgeta trutok we God i givim finis long olgeta.

¹⁷ Blong holemgud ol samting we God i putum finis long han blong yumi, yumi mas gat gudfala fasin blong stadi Baebol mo prea oltaem. Mo tu, yumi mas “mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.” (Galesia 6:​10; Rom 12⁠:​11-​17) Pol i gohed, i givim advaes ya se: “Yu mas traehad blong mekem ol stret fasin, mo blong folem ol fasin blong prea we God i wantem. Bilif blong yu i mas strong, mo yu mas lavem ol man. Yu mas holem wok ya gogo kasem en blong hem, mo yu mas kam wan kwaet man. Yu mas traehad blong gohed gud long Kristin laef blong yu, olsem man we i traehad blong resis blong hem i win. Sipos yu traehad olsem, bambae yu save kasem laef ya we i no save finis, we God i singaot yu blong yu kasem, long taem ya bifo we yu talemaot bilif blong yu long fes blong plante man.” (1 Timoti 6:​11, 12) Taem Pol i yusum ol tok olsem “traehad blong gohed gud” mo “traehad blong resis,” hem i soemaot klia se yumi mas wok strong mo gat strong tingting blong agensem ol samting we oli blong spolem yumi long saed blong spirit.

 I Nidim Fasin Luksave

18. ?Olsem wanem yumi save soem Kristin fasin blong skelemgud ol samting taem yumi stap tekem ol save blong wol?

¹⁸ Yes, taem yumi stap traehad blong gohed gud long Kristin laef blong yumi, yumi nidim fasin luksave. (Ol Proveb 2:​11; Filipae 1⁠:⁠9) Eksampel, i no waes blong sakemaot evri save blong wol. (Filipae 4⁠:5; Jemes 3:​17) I no evri tingting blong man we oli agensem Tok blong God. Jisas i talem se olgeta we oli sik, oli nidim wan gudfala dokta​—⁠wan wok we i nidim save blong man. (Luk 5:​31) Long taem blong Jisas, ol man oli no gat bigfala save long saed blong meresin. Nating se i olsem, Jisas i luksave se wan dokta i save givhan long ol sikman. Ol Kristin tede oli soem stret tingting long saed blong ol save blong wol, be oli no wantem nating blong lukluk ol save we i blong spolem olgeta long saed blong spirit.

19, 20. (a) ?Olsem wanem ol elda oli save wok wetem waes fasin taem oli stap givhan long man we i toktok olbaot nomo? (b) ?Kongregesen i mekem wanem taem wan man i stap gohed blong leftemap ol giaman tijing?

¹⁹ I impoten tumas we ol elda tu oli gat fasin luksave taem oli stap givhan long olgeta we oli stap toktok olbaot nomo. (2 Timoti 2⁠:⁠7) Samtaem, maet ol memba blong kongregesen oli rao from ol samting we oli no impoten mo ol defren tingting we oli gat. Blong holem fasin joen i stap insaed long kongregesen, ol elda oli mas kwik blong stretem ol problem olsem. Long semtaem, oli mas lukaotgud blong no tingting nogud long ol brata mo sista blong olgeta mo oli no mas kwik blong tingbaot olgeta olsem we oli ol apostasi.

²⁰ Pol i tokbaot tingting we ol elda oli mas gat taem oli stap givim help. Hem i talem se: “Ol brata mo sista. Sipos wan long yufala i foldaon, yufala we spirit blong God i stap long yufala, yufala i mas givhan long hem blong stretem hem. Be yufala i mas mekem long kwaet fasin.” (Galesia 6⁠:⁠1) Taem Jud i stap tokbaot olgeta ya we oli stap traehad blong winim tingting we i hafhaf, hem i raetem se: “I gat sam man we bilif blong olgeta i no strong, oli gat tu tingting, mo yufala i mas sore long olgeta. Mo i gat sam narafala man we klosap oli lus, we yufala i mas sevem olgeta, olsem we yufala i pulumaot olgeta long faea.” (Jud 22, 23) I tru se, sipos ol elda oli givim advaes long wan man, be man ya i gohed blong leftemap ol giaman tijing, ol elda oli mas tekem aksin blong protektem kongregesen.​—⁠1 Timoti 1:​20; Taetas 3:​10, 11.

Fulumap Tingting Blong Yumi Wetem Ol Fasin We Ol Man Oli Ona Long Olgeta

21, 22. ?Yumi mas jusumgud wanem samting, mo yumi mas fulumap tingting blong yumi wetem wanem?

²¹ Kristin kongregesen i no agri nating long ol toktok we oli blong spolem yumi. Ol toktok ya oli olsem “soa long leg blong man, we i no save kam gud bakegen, oltaem i stap kam bigwan moa.” (2 Timoti 2:​16, 17; Taetas 3⁠:⁠9) Samting ya i tru tumas, nomata we ol toktok ya oli soemaot “waes” blong wol, we i save lidim man i go krangke, ol giaman tingting blong ol apostasi, no ol man long kongregesen we oli toktok be oli no tingtinggud fastaem. I tru se yumi save kasem nambawan frut sipos gudfala tingting i pusum yumi blong wantem lanem ol niufala samting. Be sipos yumi no bos long ol samting we yumi lukluk, bambae yumi foldaon long ol tingting we i blong spolem yumi. Yumi savegud ol plan blong Setan. (2 Korin 2:​11) Yumi save se hem i stap mekem bigfala traehad blong lidim yumi i go long rong rod blong mekem yumi kam slak long wok blong God.

²² Olsem ol gudfala Kristin minista, i gud yumi strong blong leftemap tijing blong God. (1 Timoti 4⁠:⁠6) I gud we yumi yusum taem blong yumi long waes fasin, yumi skelem ol save we yumi wantem kasem save long hem. Olsem nao, bambae ol giaman tok blong Setan oli no pulum yumi kwiktaem. Yes, i gud we yumi gohed blong tingbaot ol fasin we “oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta.” Sipos yumi fulumap tingting mo hat blong yumi wetem ol fasin ya, bambae God ya blong pis i stap wetem yumi.​—⁠Filipae 4:​8, 9.

[Ol futnot]

?Yumi Lanem Wanem?

• ?Olsem wanem waes blong wol i save givim denja long yumi long saed blong spirit?

• ?Yumi save mekem wanem blong protektem yumi long ol save blong apostasi we i blong spolem yumi?

• ?Yumi mas stap longwe long wanem kaen toktok insaed long kongregesen?

• ?Olsem wanem yumi save soem Kristin fasin blong skelemgud ol save blong man we oli plante tede?

 [Kwestin]

[Tok blong pija long pej 9]

Plante magasin mo buk we plante man oli laekem, oli agensem ol gudfala Kristin fasin

[Tok blong pija long pej 10]

Ol Kristin oli save talemaot ol tingting blong olgeta, be oli no traem fosem narafala blong folem tingting blong olgeta