Yumi Man Blong Bilif

Bildimap Bilif Wetem Baebol Stadi Long India

STAT long not, long ol bigfala hil blong Himalaya we sno i kavremap, go kasem saot, long ol ples we i hot klosap long Indian Si, India i wan kantri we ol eria blong hem oli defren mo ol skul tu. Long olgeta man India, we i bitim wan bilian, raonabaot 83 pesen oli Hindu, 11 pesen oli Muslim, mo ol narawan oli joen long ol skul olsem ol Kristin, Sik, Budis, mo Jain. Olgeta oli haremgud long fasin fri we oli gat blong mekem wosip. Buk ya The World Book Encyclopedia i talem se: “Skul i gat bigfala paoa long fasin blong laef we ol man India oli folem.”

Plante man oli makemaot ol Witnes blong Jeova from we oli stap laef folem Kristin bilif blong olgeta. Namba blong olgeta long India i bitim 21,200. Ol Witnes long India oli ting se i wan blesing blong halpem ol man we oli stap raonabaot long olgeta blong gat strong bilif long Tok blong God, Tabu Baebol. Oli mekem sem wok olsem ol fren blong olgeta long saed blong spirit, long ol narafala ples long wol. (2 Timoti 3:​16, 17) Tingbaot olsem wanem wan famle long Chennai long saot blong India, oli kasem save long trutok blong Baebol.

Bifo we famle ya i mitim ol Witnes blong Jeova, oli joen long wan grup blong karismatik we i haf blong Katolik Jos. Famle ya i talem se oli stap luk ol vison, oli toktok long ol defren lanwis, mo oli mekem sikman i kam gud bakegen. Oli gat haenem insaed long jos mo long vilej. Mo tu, ol man oli singaot sam memba blong famle ya se “swami,” we i minim “masta.” Ale, wan dei, wan Witnes i visitim famle ya mo i soem long olgeta long Baebol se, Jisas i Pikinini blong God, hem i no God ya we i gat Olgeta Paoa, olsem bilif blong plante man tede. Witnes ya i soem long olgeta tu se nem blong God hem i Jeova, mo se stamba tingting blong Jeova hem i blong mekem wol ya i kam wan naesfala paradaes.​—⁠Ol Sam 83⁠:18; Luk 23⁠:43; Jon 3:​16.

From we oli gat respek long Tok blong God mo oli laekem wanem we oli harem, oli agri blong mekem wan Baebol stadi wetem ol Witnes blong Jeova. Samting ya i mekem se ol narafala fren blong olgeta insaed long jos oli jikim olgeta. Nating se i olsem, famle ya i gat strong tingting blong gohed wetem Baebol stadi blong olgeta. Taem save blong olgeta i kam bigwan moa mo bilif blong olgeta i kam strong, oli lego ol giaman wosip blong skul blong olgeta. Tede, tri memba blong famle ya oli baptaes finis mo oli stap wok strong olsem ol Witnes. Mama blong famle ya hem i mekem wok blong haftaem paenia taem hem i gat jans blong mekem.

Bilif Blong Winim Ol Traem Blong Handikap

Sunder Lal, wan yang man we i stap long wan vilej long Punjab, i nidim wan strongfala bilif mo fasin no fraet blong serem gud nius ya blong Kingdom blong God wetem ol narafala. (Matiu 24⁠:14) Wan risen hemia se, hem i mas lego bilif long saed blong plante god, we famle mo vilej blong hem oli stap folem, blong wosip long trufala God, Jeova. Narafala risen se, Sunder Lal i no gat leg.

Bifo long 1992, Sunder Lal i stap mekem semfala wok nomo oltaem. Hem i wok blong halpem wan dokta mo i joen wetem famle blong hem long wosip blong ol defren kaen god we wan tija blong skul blong olgeta i lidim olgeta. Be wan naet, hem i foldaon taem hem i krosem rod we ol tren oli pas long hem. Wan tren i ron antap long hem mo i katemaot tufala leg blong hem jes antap long ni blong hem. Nating se hem i no ded, be samting ya i spolem ful laef blong hem. Taswe i isi blong kasem save se, tingting blong Sunder Lal i foldaon bigwan mo hem i tingbaot tu blong kilim hem wan i ded. Famle blong hem oli traem givhan long hem, be i luk olsem se hem i no moa gat hop long saed blong fiuja.

 Ale, wan Witnes blong Jeova i storeyan wetem Sunder Lal mo i soemaot promes blong Baebol long hem se God bambae i mekem wol ya i kam wan nambawan paradaes mo bambae i givim gudfala helt long olgeta we oli stap lavem hem mo we oli fraet long hem. Sunder Lal i agri blong mekem wan Baebol stadi, mo blong wan yia hem i gohed gud long stadi blong hem. Witnes ya i askem hem blong kam long ol Kristin miting, mo biaen hem i go wetem wan fren we i tekem hem long baskel. Nating se hem i harem i soa long rod blong go long miting, be frut we hem i kasem i nambawan. Taem hem i mitim ol narafala we oli gat trufala bilif long ol promes long Tok blong God, mo we laef blong olgeta i folem ol tijing blong Baebol, hem i luksave se olgeta samting we hem i bin lanem long Baebol stadi blong hem, oli tru.

Sunder Lal i stat blong serem gud nius wetem olgeta we oli stap raonabaot long hem. Mo long 1995 hem i baptaes. Fastaem, taem hem i joen long wok blong prij, hem i mas pulum bodi blong hem long graon nomo, i go long ol wanwan haos long vilej blong hem. Hemia fasin we hem i yusum oltaem blong wokbaot. Be naoia hem i gat wan nambawan presen we hem i kasem long ol brata blong hem long saed blong spirit​—⁠wan baskel we i gat tri wil long hem mo we oli wokem blong hem i yusum han blong hem nomo blong mekem wil i ron. From spesel baskel ya, naoia hem i no moa nidim narafala blong halpem hem oltaem mo hem i save ron hem wan twelef kilometa blong go long ol miting blong kongregesen. Samtaem hem i ron long ol taem we i gat bigbigfala ren mo long ol narafala taem we ples i hot bitim 43 digri.

Be, antap long fasin blong go long miting oltaem, Sunder Lal i mekem plante Baebol stadi tu, wetem ol narafala we oli wantem kasem help, blong wokem wan strongfala bilif long trufala God, Jeova. Tru ya, seven long olgeta we hem i bin mekem Baebol stadi blong olgeta bifo, naoia oli baptaes finis. Tri narafala man tu, we hem i bin prij long olgeta be ol narafala Witnes oli stadi Baebol wetem olgeta, oli baptaes finis.

Baebol i talem se “i no olgeta man evriwan we oli bilif.” (2 Tesalonaeka 3⁠:⁠2) Be olgeta “we oli stret blong kasem laef we i no save finis,” oli save kasem wan bilif we i strong from we oli stadi long Tok blong God oltaem. (Ol Wok 13⁠:48, NW) Stadi olsem i mekem man i haremgud from we i givim wan nambawan hop long saed blong fiuja. Hemia i wan samting we plante moa man long India oli stap bilif long hem.

[Map blong pija long pej 30]

(Lukluk niuspepa)

AFGANISTAN

PAKISTAN

NEPAL

BHUTAN

JAENA

BANGLADES

MIANMA

LAOS

TAELAN

VIETNAM

KAMBODIA

SRI LANKA

INDIA

[Credit Line]

Mountain High Maps® Copyright © 1997 Digital Wisdom, Inc.