Ol Gospel—Ol Rao Long Saed Ya Oli Stap Gohed

?Ol stori blong Gospel long saed blong Jisas Kraes we i bon, oli tru no oli no tru?

?I tru se Jisas i givim Bigfala Toktok antap long Hil?

?I tru se hem i laef bakegen?

?I tru we hem i bin talem se: “Mi nao rod ya, mo mi mi stamba blong trutok, mo mi stamba blong laef”?—Jon 14⁠:⁠6.

HEMIA ol kwestin we samwe 80 man blong hae save oli bin tokbaot long wan miting we oli kolem Jisas Semina. Stat long 1985, oli stap holem miting ya tu taem evri yia. Grup blong ol man ya we oli gat hae save, oli bin ansa long ol kwestin ya long wan rod we i narakaen. Oli sakem pepa blong vot from ol wanwan tok we ol Gospel oli talem long saed blong Jisas. Pepa we i red i minim se Jisas i bin talem tok ya. Pepa we i ping i minim se maet Jisas i bin talem tok ya. Pepa we i waet lelebet i soem se ol tok ya oli klosap sem mak long ol tok blong Jisas, be oli no kamaot long hem. Pepa we i blak i minim se ol tok ya oli giaman stret, oli kamaot nomo long ol kastom stori samtaem biaen long taem blong Jisas.

Folem rod ya, ol man we oli joen long Jisas Semina oli sakemaot fasin blong mekem dip stadi blong faenem ansa blong ol fo kwestin we yumi luk long stat blong haf ya. Antap long hemia, 82 pesen blong ol tok we ol Gospel oli talem long saed blong Jisas, ol man ya oli vot wetem pepa we i blak. Oli talem se, ol stori long saed blong Jisas we ol Gospel mo ol narafala buk oli tokbaot, 16 pesen nomo i tru.

Fasin ya blong tok agensem ol Gospel i no wan niufala samting. Fastaem we ol tok i kamaot agensem ol Gospel, hemia long 1774, taem oli prentem hanraet blong Hermann Reimarus, wan tija long Hamburg, Jemani, we i stap tijim ol man long ol lanwis blong ol kantri long Is. Reimarus i ded finis taem oli prentem hanraet ya we i gat 1,400 pej blong hem. Insaed long hanraet ya, Reimarus i soem se hem i no bilif long plante samting we ol Gospel oli tokbaot. Ol tingting blong hem oli stanap long stadi we hem i stap mekem long saed blong lanwis, mo sam stori insaed long ol fo Gospel long saed blong laef blong Jisas, we i luk olsem se oli no joengud. Stat long taem ya, plante taem ol man blong agens oli talem se ol Gospel oli no trufala stori, mo samting ya i mekem se plante man oli lusum bilif blong olgeta long ol Gospel.

Bigfala tingting we ol man ya blong hae save oli gat, hemia se ol stori blong ol Gospel oli olsem kastom stori blong skul we ol defdefren man oli bin stap talem kam kasem naoia. Plante taem, ol man blong hae save we oli no bilif fulwan long ol Gospel, oli askem se: ?Maet Kristin bilif i mekem se ol man blong raetem ol fo Gospel oli ademap sikis pen long ol stori we oli tru? ?Ol tingting we ol faswan Kristin oli gat blong pulum moa man blong biaenem olgeta i mekem se oli tekemaot no ademap sam samting long stori blong Jisas? ?Weswan haf blong ol Gospel nao i stret, i no kastom stori?

Long sam ples, plante man oli no bilif long God mo plante narafala oli no moa intres long skul. Ol man we oli gruap long ol ples olsem, oli bilif se Baebol​—⁠ol Gospel tu​—⁠i wan buk we i fulap long ol kastom stori mo ol stori we ol man oli mekemap. Sam narafala bakegen oli harem nogud from ol fasin we Krisendom * i bin mekem kam kasem naoia. Yes, Krisendom i mekem fulap blad i ron, i mekem i strong tumas long ol narafala, i seraotem ol man, mo i mekem ol rabis fasin we God i no laekem. Olgeta we oli stap harem nogud from samting we Krisendom i mekem, oli luk se i no nid blong lesin long eni buk we Krisendom i talem se i tabu. Long tingting blong olgeta, sipos wan buk i pulum ol man blong mekemap wan skul we i gat tu fes, ol samting we buk ya i talem oli no tru, oli kamaot long ol giaman stori nomo.

?Wanem tingting blong yu? ?Bambae yu letem ol man ya blong hae save, we tingting blong olgeta i hafhaf long saed blong ol Gospel, oli pulum yu blong gat sem tingting olsem olgeta? ?Olsem wanem sipos yu harem toktok se ol man blong raetem Gospel, olgeta nomo oli mekemap stori we oli raetem? ?Bambae yu letem samting ya i spolem bilif we yu gat long ol Gospel? ?I stret blong letem ol fasin nogud we Krisendom i mekem long histri oli pulum yu blong no moa trastem ol Gospel? Mifala i askem yu blong faenemaot sam trutok long saed ya.

[Futnot]

 [Tok blong pija long pej 4]

?Ol stori blong ol Gospel oli kastom stori no oli tru?

[Credit Line]

Jesus Walking on the Sea/The Doré Bible Illustrations/Dover Publications

[Credit Line long pej 3]

Background, pages 3-5 and 8: Courtesy of the Freer Gallery of Art, Smithsonian Institution, Washington, D.C.