!Yumi Mas Bilif Long Ol Profet Tok Blong God!

“Ol samting ya oli mekem mifala i save moa we tok blong ol profet i tru.”​—⁠2 PITA 1:​19.

1, 2. ?Wanem faswan profet tok long Baebol, mo wanem wan long ol kwestin we i stanap long taem ya?

 FASWAN profet tok long Baebol i kamaot long Jeova hem wan. Afta we Adam mo Iv tufala i sin, God i talem long snek se: “Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu mo yu bambae yu smasem bak blong leg blong hem.” (Jenesis 3:​1-7, 14, 15, NW) Plante handred yia oli mas pas bifo we ol man oli kasem save fulwan long mining blong profet tok ya.

² Faswan profet tok ya i givim trufala hop long ol sinman. Samtaem biaen, Baebol i soemaot se Devel Setan hem i “snek ya blong bifo.” (Revelesen 12⁠:⁠9) ?Be hu ya laen ya we God i promes blong stanemap?

Traem Faenem Laen Ya

3. ?Olsem wanem Ebel i soemaot bilif blong hem long faswan profet tok?

³ Ebel i defren long papa blong hem. Hem i obei long God mo i bilif strong long faswan profet tok. Ebel i luksave klia se, blad i mas ron blong kavremap sin. Taswe bilif blong hem i pusum hem blong givim wan anamol olsem sakrefaes, mo God i agri long sakrefaes ya. (Jenesis 4:​2-4) Be, promes Laen ya i stap yet olsem wan tokhaed.

4. ?God i givim wanem promes long Ebraham, mo promes ya i soemaot wanem long saed blong Laen ya?

⁴ Samwe 2,000 yia afta long taem blong Ebel, Jeova i givim wan promes we i olsem profet tok, long Ebraham se: “Bambae mi blesem yu. Mo bambae mi mekem laen blong yu oli kam plante tumas olsem ol sta long heven . . . Mo from laen blong yu, olgeta nesen long wol bambae oli blesem olgeta nomo.” (Jenesis 22⁠:​17, 18, NW) Ol tok ya oli soem se bambae Ebraham i joen blong mekem faswan profet tok i kamtru. Oli soem se Laen ya we i mas spolem olgeta wok blong Setan, bambae i kamaot long laen blong Ebraham ya. (1 Jon 3⁠:⁠8) “Tingting blong hem [Ebraham] i no seksek long promes blong God, bilif blong hem i stap strong long hem.” Hemia i sem mak long ol narafala Kristin Witnes blong Jeova blong bifo we “olgeta oli no kasem ol gudfala samting yet we God i promes blong givim long olgeta.” (Rom 4:​20, 21; Hibrus 11⁠:39) Yes, olgeta ya oli holemstrong bilif long ol profet tok blong God.

5. ?Hu ya Laen ya we God i promes long hem, mo from wanem yu ansa olsem?

⁵ Aposol Pol i talemaot hu ya Laen ya we God i promes long hem, taem hem i raetem se: “Nao God i mekem promes blong hem long Ebraham, mo long man ya we i kamaot biaen long hem. Tok ya i no talem se ‘mo long olgeta we oli kamaot biaen long hem’, we i min se plante man. Hem i talem se ‘mo long wan man we i kamaot biaen long hem,’ we i min se wan man nomo, we man ya, Kraes.” (Galesia 3:​16) Laen ya we God i yusum blong blesem olgeta nesen, i no minim olgeta pikinini blong Ebraham we oli kamaot biaen long hem. Blong blesem ol man, God i no yusum olgeta we oli kamaot long laen blong pikinini blong hem, Ismael, no  ol pikinini blong hem we Ketura i bonem. Laen ya we bambae i blesem ol man, i kamaot tru long pikinini blong hem, Aesak, mo smol bubu blong hem Jekob. (Jenesis 21⁠:12; 25⁠:​23, 31-​34; 27⁠:​18-​29, 37; 28⁠:14) Jekob i soemaot se “ol nesen” bambae oli obei long Silo we i kamaot long laen blong Juda. Be, biaen i kam klia se Laen ya bambae i kamaot long laen blong King Deved. (Jenesis 49⁠:​10, NW; 2 Samuel 7:​12-​16) Ol man Jiu blong fas handred yia oli save se wan man nomo i mas kam we hem i Mesaea, no Kraes. (Jon 7:​41, 42) Mo profet tok blong God long saed blong Laen ya i kamtru long pikinini blong hem, Jisas Kraes.

!Mesaea i Kamtru!

6. (a) ?Talemaot mining blong profet tok long saed blong ol 70 wik? (b) ?Wetaem mo olsem wanem Jisas “i mekem sin i finis”?

⁶ Profet Daniel i bin talemaot wan impoten profet tok long saed blong Mesaea. Long fas yia blong rul blong Darias blong Midia, Daniel i luksave se ol 70 yia we Jerusalem i stap nogud, klosap oli finis. (Jeremaea 29⁠:10; Daniel 9:​1-4) Taem Daniel i stap prea, enjel Gabriel i kamtru long hem mo i talemaot se ‘God i makemaot seventi wik finis blong tekemaot sin.’ Mesaea bambae i ded long medel blong wik namba 70. “Ol seventi wik blong yia” oli stat long 455 B.K.T., taem King Atakseses I i sanem ‘toktok ya blong oli bildim Jerusalem bakegen.’ (Daniel 9:​20-​27; Moffatt; Nehemaea 2:​1-8) Mesaea bambae i kamtru afta long 7 wik mo 62 wik. Ol 483 yia oli stat long 455 B.K.T. i go kasem 29 K.T., taem Jisas i tekem baptaes mo God i makemaot hem olsem Mesaea, no Kraes. (Luk 3:​21, 22) Jisas ‘i mekem sin i finis’ taem hem i givim laef blong hem olsem wan ransom long 33 K.T. (Mak 10⁠:45) !I klia nomo se yumi gat ol gudfala risen blong bilif long ol profet tok blong God! *

7. Yusum sam vas blong soem olsem wanem ol profet tok long saed blong Mesaea i kamtru long Jisas.

⁷ Bilif long ol profet tok blong God i halpem yumi blong luksave Mesaea ya. Long Hibru haf blong Baebol yumi faenem plante profet tok long saed blong Mesaea. Ol man we oli raetem Grik haf blong Baebol oli talem stret se plante long ol profet tok ya oli tokbaot Jisas. Eksampel: Jisas i bon long wan vejin long Betlehem. (Aesea 7:​14; Maeka 5⁠:2; Matiu 1:​18-​23; Luk 2:​4-​11) God i singaot hem i aot long Ijip, mo ol soldia oli kilim plante pikinini oli ded afta long taem we hem i bon. (Jeremaea 31⁠:15; Hosea 11⁠:1; Matiu 2:​13-​18) Jisas i karem olgeta samting we oli stap mekem yumi harem nogud. (Aesea 53⁠:4; Matiu 8:​16, 17) Olsem Baebol i talemaot, hem i kam long Jerusalem i stap raed long wan dongki we i yangfala nomo. (Sekaraea 9⁠:9; Jon 12⁠:​12-​15) Ol tok blong man blong raetem Sam oli kamtru taem we Jisas i hang long pos, mo ol soldia oli seraotem ol klos blong hem long wanwan blong olgeta, mo oli sakem daes blong luk hu bambae i karem kot blong hem we i werem aninit long ol narafala klos. (Ol Sam 22⁠:18; Jon 19⁠:​23, 24) Sam narafala profet tok we oli kamtru hemia we oli no brekem leg blong Jisas mo oli sperem wan saed blong hem. (Ol Sam 34⁠:20; Sekaraea 12⁠:10; Jon 19⁠:​33-​37) Hemia sam long ol profet tok long saed blong Mesaea, we ol man we God i yusum blong raetem Baebol, oli talem blong tokbaot Jisas. *

!Presem Mesaea King!

8. ?Hu ya Olfala we i stap bifo olgeta, mo profet tok blong Daniel 7:​9-​14 i kamtru olsem wanem?

⁸ Long fas yia blong King Belsasa blong Babilon, Jeova i givim wan drim mo sam nambawan vison long Daniel. Fastaem profet ya i luk fo bigfala anamol. Enjel blong God i talem se ol anamol ya oli pija blong “fo king,” i minim se oli fo politik paoa long wol we oli rul wan afta narawan. (Daniel 7:​1-8, 17, NW) Biaen Daniel i luk Jeova, “Olfala ya we i stap fastaem bifo olgeta,” i sidaon wetem glori long jea blong hem. Hem i jajem fofala anamol ya, i karemaot raet blong rul long olgeta mo hem i spolem namba fo anamol ya. Nao, God i givim raet long wan “man we i olsem man blong wol,” blong hem i tekem rul ya we i no save finis samtaem, antap long “olgeta man blong olgeta kantri mo olgeta kala mo olgeta lanwis.” (Daniel 7:​9-​14) !Nambawan profet tok ya i tokbaot “Man we i olsem man blong wol,” hemia Jisas Kraes, taem hem i sidaon long jea blong hem olsem king long heven long yia 1914!​—⁠Matiu 16⁠:⁠13.

9, 10. (a) ?Ol defren haf blong bigfala pija long drim blong Nebukadnesa oli minim wanem? (b) Eksplenem olsem wanem Daniel 2:​44 i kamtru.

⁹ Daniel i save se God i ‘putumap ol king mo i  save tekemaot olgeta bakegen.’ (Daniel 2:​21) Wetem strong bilif long Jeova, we hem i ‘God we i soemaot ol samting we i haed,’ profet ya i talemaot mining blong drim blong bigfala pija ya, we King Nebukadnesa blong Babilon i luk. Ol defren haf blong bodi blong pija ya oli minim ol politik paoa blong wol we oli stanap mo oli foldaon olsem Babilon, Midia mo Pesia, Gris, mo Rom. Be God i yusum Daniel blong soemaot ol samting we oli hapen long wol kam kasem taem blong yumi mo long fiuja tu.​—⁠Daniel 2:​24-​30.

¹⁰ Profet tok i talem se “Long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.” (Daniel 2:​44) Long 1914, “taem we God i makem long ol nesen” i finis, mo God i stanemap Kingdom we Kraes i king blong hem long heven. (Luk 21⁠:24; Revelesen 12:​1-5) Long taem ya nao, long paoa blong God, “ston ya” we hem i Kingdom blong Mesaea, i kamaot long “bigfala hil” blong Hae Rul blong God. Long taem blong Amageden, ston ya bambae i rol i kamdaon, i smasem bigfala pija ya mo mekem hem i brobrok long ol smosmol pis olsem paoda. Rul blong Kingdom blong Mesaea bambae i stanap blong olwe, mo i kam olsem wan bigfala hil we i kavremap “olgeta ples long wol.”​—⁠Daniel 2:​35, 45; Revelesen 16⁠:​14, 16. *

11. Taem bodi blong Jisas i jenis i kam narafala, ?samting ya i pija blong wanem, mo wanem tingting blong Pita afta we hem i luk vison ya?

¹¹ Jisas i stap tingbaot rul blong Kingdom ya, taem hem i talem long ol disaepol blong hem se: “I gat sam man oli stap stanap long ples ya, we bambae oli no save ded, gogo oli luk mi, mi Pikinini blong Man, mi kamtru, we mi mi King.” (Matiu 16⁠:28) Sikis dei biaen, Jisas i tekem Pita, Jemes, mo Jon oli go antap long wan bigfala hil mo long ples ya trifala i luk bodi blong Jisas i jenis i kam narafala. Taem wan klaod we i saen we i saen i kavremap ol aposol ya, God i talemaot se: “Hemia Pikinini blong mi, we mi lavem hem. Mi mi glad tumas long hem. Yufala i mas lesin gud long hem.” (Matiu 17:​1-9; Mak 9:​1-9) !Hemia wan nambawan pija blong Kraes taem we bambae hem i kasem paoa long Kingdom! Yumi no sapraes we Pita i tokbaot nambawan vison ya mo i talem se: “Ol samting ya oli mekem mifala i save moa we tok blong ol profet i tru.”​—⁠2 Pita 1:​16-​19. *

12. ?From wanem i impoten tumas long taem blong yumi naoia, blong soemaot bilif blong yumi long ol profet tok blong God?

¹² “Tok blong ol profet” i no jes minim ol profet tok long saed blong Mesaea we yumi faenem long Hibru haf blong Baebol nomo. Be tu, hem i minim tok ya blong Jisas we hem i talem se bambae hem i kam ‘wetem paoa mo glori.’ (Matiu 24⁠:​30, NW) Samting we i hapen long taem we bodi blong Jisas i jenis, i soemaot klia se profet tok ya long saed blong Kraes we bambae i kambak wetem glori blong kasem paoa long Kingdom, i mas kamtru. I no longtaem, bambae Jisas i soemaot paoa blong hem taem hem i spolemgud olgeta we oli no bilif, mo blesem olgeta we oli soemaot bilif blong olgeta. (2 Tesalonaeka 1:​6-​10) Ol profet tok blong Baebol we oli stap kamtru tede oli pruvum se yumi stap long taem blong “lasdei.” (2 Timoti 3:​1-5, 16, 17; Matiu 24:​3-​14) Bigfala man we God bambae i yusum blong Givim Panis, Mikael, we hem i Jisas Kraes, i rere nao blong finisim rabis fasin blong wol ya long taem blong “bigfala trabol.” (Matiu 24⁠:21; Daniel 12⁠:⁠1) Taswe, naoia hem i taem blong soemaot se yumi bilif long ol profet tok blong God.

Holemtaet Bilif Long Ol Profet Tok Blong God

13. ?Wanem ol samting we oli save halpem yumi blong holemtaet lav we yumi gat long God mo blong mekem bilif blong yumi i stap strong long tok blong hem?

¹³ I tru se fastaem we yumi kasem save long ol profet tok we oli kamtru finis, yumi glad tumas. Be afta we sam taem i pas, ?bilif blong yumi i kam slak lelebet no lav blong yumi i kam kolkol? Yumi neva mas kam olsem ol Kristin long Efesas we oli ‘no moa lavem [Jisas] olsem we oli lavem hem bifo.’ (Revelesen 2:​1-4) Nomata hamas yia we yumi spenem finis long wok blong Jeova, yumi save kam slak sipos yumi no ‘gohed blong lukaot Kingdom blong God fastaem mo stret fasin blong hem.’ Hemia nao rod blong hivimap ol sas samting long heven. (Matiu 6:​19-​21, 31-​33) Fasin blong stadi oltaem long Baebol, joen oltaem long ol Kristin miting, mo wok strong blong  talemaot Kingdom, i save halpem yumi blong holemtaet lav we yumi gat long Jeova, pikinini blong hem, mo long tok blong hem Baebol. (Ol Sam 119⁠:105; Mak 13⁠:10; Hibrus 10⁠:​24, 25) Samting ya nao bambae i halpem yumi blong mekem se bilif blong yumi long Tok blong God i stap strong oltaem.​—⁠Ol Sam 106⁠:⁠12.

14. ?Olsem wanem ol tabu Kristin oli kasem blesing from bilif blong olgeta long ol profet tok blong Jeova?

¹⁴ Olsem ol profet tok blong God we oli kamtru finis, yumi save bilif se ol samting we God i talemaot long saed blong fiuja bambae oli mas kamtru. Eksampel, profet tok we i talemaot se Kraes bambae i stap long Kingdom paoa blong hem, i kamtru finis. Mo promes ya i kamtru finis long ol tabu Kristin we oli bin holemstrong go kasem ded, se: “Man we i win long faet ya, mi bambae mi givim raet long hem blong i kakae frut blong tri blong laef we i stap gru long Garen blong God.” (Revelesen 2:​7, 10; 1 Tesalonaeka 4:​14-​17) Long olgeta ya we oli win, Jisas i givim jans blong oli “kakae frut blong tri blong laef” long “Garen blong God“ long heven. Afta we oli laef bakegen, mo tru long Jisas Kraes, olgeta ya oli kasem wan bodi we i no moa save lus samtaem, mo we i no moa save ded samtaem. Bodi ya i kam long Jeova we hem i “King we rul blong hem i stap oltaem nomo, gogo i no save finis, mo hem i God we i no save ded samtaem. Yumi no save luk hem, be hem nomo i God, i no gat narafala.” (1 Timoti 1:​17; 1 Korin 15⁠:​50-​54; 2 Timoti 1:​10) !Hemia wan nambawan praes we oli kasem from lav we oli gat long God, wan lav we i no save lus samtaem, mo strong bilif we oli gat long ol profet tok blong hem!

15. ?Fandesen blong “niufala wol” i stat long medel blong hu, mo hu ya ol fren we oli sapotem olgeta?

¹⁵ I no longtaem afta we ol tabu man, we oli bin stap tru long God, oli laef bakegen long “Garen blong God” long heven, smol grup blong Isrel long saed blong spirit we oli stap laef yet long wol oli kam fri long “Bigfala Babilon” we hem i olgeta giaman skul blong wol. (Revelesen 14⁠:8; Galesia 6:​16) Fandesen blong “niufala wol” i stat long medel blong olgeta. (Revelesen 21⁠:⁠1) Long rod ya, wan “niufala kantri” i stanap, mo i kam wan paradaes long saed blong spirit we, tede, i stap long olgeta ples long wol. (Aesea 66⁠:⁠8) Naoia, “long laswan haf blong ol dei,” plante man we oli olsem sipsip oli kam insaed long kantri ya blong joen wetem Isrel long saed blong spirit.​—⁠Aesea 2:​2-4, NW; Sekaraea 8:​23; Jon 10⁠:16; Revelesen 7⁠:⁠9.

Profet Tok Blong God i Talemaot Fiuja Blong Man

16. ?Olgeta we oli wok strong blong sapotem ol tabu man, oli gat wanem hop?

¹⁶ ?Olsem wanem long fiuja blong olgeta we oli wok strong blong sapotem ol tabu man? Olgeta tu  oli gat bilif long ol profet tok blong God, mo oli gat hop blong kasem laef long wan Paradaes long wol. (Luk 23⁠:​39-​43) Long ples ya bambae oli dring long ‘reva blong wota blong laef’ mo bambae oli haremgud long ol “lif blong ol tri ya” we oli stap long tufala saed blong reva ya. (Revelesen 22:​1, 2) Sipos yu yu bilif long nambawan hop ya, yu mas gohed blong soemaot bigfala lav long Jeova mo bilif long ol profet tok blong hem. Olsem nao, bambae yu stap wetem olgeta we bambae oli kasem nambawan glad ya blong laef olwe long wan Paradaes long wol.

17. ?Wanem ol blesing we yumi save kasem long Paradaes long wol?

¹⁷ From we ol man oli sinman, oli no naf blong talemaot fulwan se laef long Paradaes long wol bambae i olsem wanem. Be ol profet tok blong God oli givhan long yumi blong luksave ol blesing we ol man we oli obei bambae oli kasem long taem ya. Taem Kingdom blong God i rul bambae i no gat wan samting we i save agensem rul ya. Samting we God i wantem, bambae i kamaot long wol olsem we i kamtru finis long heven. Bambae i no moa gat ol rabis man​—⁠mo rabis anamol tu​—⁠we bambae oli “save mekem i nogud long narafala man, mo i no moa gat wan samting we i save spolem man.” (Aesea 11⁠:9; Matiu 6:​9, 10) Ol man we oli gat tingting daon bambae oli laef long wol ya, mo “bambae oli harem gud, from we oli stap gud, mo oli gat plante samting.” (Ol Sam 37⁠:11) Bambae i no moa gat ol man we oli hanggri, from we “bambae i gat plante kakae long ples ya, we bambae ol hil oli fulap gud long hem.” (Ol Sam 72⁠:16) Bambae i no moa gat man i krae. Ol sik bambae oli finis, mo bambae i no moa gat ded. (Aesea 33⁠:24; Revelesen 21⁠:⁠4) Traem tingbaot, bambae i no moa gat ol dokta, no meresin, no hospital no ples blong ol man we oli lusum hed, no sevis blong berem ol dedman. !Hemia wan nambawan fiuja!

18. (a) ?Wanem hop i givim paoa long Daniel? (b) ?Wanem pei we Daniel bambae i kasem?

¹⁸ Beregraon blong ol man bambae i emti from we ol dedman bambae oli laef bakegen. Stret man ya Job hem i bilif long samting ya. (Job 14⁠:​14, 15) Profet Daniel tu, hem i gat hop ya from we enjel blong Jeova i talem long hem se: “Yu mas mekem tingting blong yu i stap strong long God gogo kasem en blong laef blong yu. Nao bambae yu yu ded, be bambae yu laef bakegen blong kasem pei blong yu long en blong wol.” (Daniel 12⁠:13) Daniel i mekem wok blong God gogo kasem en blong laef blong hem. Naoia hem i stap slip long ded, be bambae hem i “laef bakegen” long “taem we ol stret man oli laef bakegen” long Taosen Yia Rul blong Kraes. (Luk 14⁠:14) ?Wanem “pei” we bambae Daniel i kasem? Taem profet tok blong Esikel i kamtru long Paradaes, bambae olgeta man blong Jeova oli gat wan ples blong olgeta, yes, graon ya tu bambae oli seraotem long wan fasin we i stret mo i gat oda. (Esikel 47:⁠13–​48⁠:35) Taswe Daniel bambae i stap long Paradaes ya, be pei blong hem i no jes wan pis graon nomo. Bambae hem i joen blong mekem stamba tingting blong Jeova i kamtru.

19. ?Yumi mas mekem wanem blong kasem laef long Paradaes long wol?

¹⁹ ?Be olsem wanem long yu mo pei blong yu? Sipos yu gat bilif long Tok blong God, Baebol, ating yu wantem tumas blong stap long Paradaes long wol. Maet yu tingbaot se yu stap long ples ya finis, mo yu harem gud long ol blesing blong lukaot long graon blong yu mo blong talem welkam long olgeta dedman we bambae oli laef bakegen. Yes i tru, Paradaes i ples blong ol man. God i wokem faswan man mo woman blong tufala i laef long wan ples olsem. (Jenesis 2:​7-9) Mo hem i wantem we olgeta we oli obei long hem oli laef blong olwe long Paradaes. ?Bambae yu folem wanem we Baebol i talem blong stap long medel blong ol milian man ya we bambae oli laef long Paradaes long wol? Yu save laef long taem ya, sipos yu gat trufala lav long Papa blong yumi long heven, Jeova, mo sipos yu bilif oltaem long ol profet tok blong God.

[Ol futnot]

?Bambae Yu Yu Ansa Olsem Wanem?

• ?Wanem ya faswan profet tok, mo hu ya Laen ya we God i promes long hem?

• Talem sam profet tok long saed blong Mesaea we oli kamtru long Jisas.

• ?Profet tok long Daniel 2:​44, 45 bambae i kamtru olsem wanem?

• ?Profet tok blong God i poen i go long wanem fiuja blong ol man we oli obei long hem?

 [Kwestin]

[Tok long pija long pej 18]

?Yu yu hop blong stap laef long Paradaes long wol?