!Holem Tingting i Stap Klia Long ‘Hop Blong Sef’!
!Holem Tingting i Stap Klia Long ‘Hop Blong Sef’!
“Putum hat blong faet, hemia hop ya blong yumi se bambae yumi sef.”—1 TESALONAEKA 5:8, NW.
1. ?Olsem wanem “hop blong sef” i save givhan long yumi blong stanap strong longtaem?
HOP ya blong kasem sef i save givhan long wan man blong stanap strong, nating se hem i fesem hadtaem we i bitim mak. Wan man we i stap long wan laefbot afta we sip blong hem i rek, i save stanap strong longtaem moa sipos hem i save se bambae i gat man i kam blong sevem hem. Long sem fasin, blong plante taosen yia finis, hop ya se ‘Hae God bambae i sevem ol man’ i bin givhan long ol man mo woman blong bilif taem oli fesem trabol, mo hop ya i neva mekem tingting blong olgeta i foldaon. (Eksodas 14:13; Ol Sam 3:8; Rom 5:5; 9:33) Aposol Pol i talem se ‘hop blong sef’ we yumi gat, i sem mak long “hat blong faet” we i wan haf blong ol klos long saed blong spirit we wan Kristin i mas werem blong faet. (1 Tesalonaeka 5:8, NW) Yes, taem yumi sua se bambae God i sevem yumi, samting ya i lukaotgud long tingting blong yumi, blong halpem yumi blong holem klia tingting nomata we i gat hadtaem, man we i agensem yumi, mo ol traem.
2. ?Long wanem rod, “hop blong sef” i wan impoten haf blong trufala wosip?
2 Buk ya The International Standard Bible Encyclopedia i talem se: “Hop long saed blong fiuja, i no wan samting we i stap long tingting blong ol hiten man,” hemia ol nesen we oli laef raonabaot long ol Kristin blong faswan handred yia. (Efesas 2:12; 1 Tesalonaeka 4:13) Nating se i olsem, “hop blong sef” hem i wan impoten haf blong trufala wosip. ?Olsem wanem hem i impoten? Faswan samting se, fasin sef we ol man blong Jeova oli save kasem, bambae i leftemap nem blong God. Asaf, man ya blong raetem Sam, i prea se: “God we yu stap sevem mifala, plis yu halpem mifala. Mifala i wantem se yu leftemap nem blong yu; plis yu mekem mifala i fri.” (Ol Sam 79:9, NW; Esikel 20:9) Mo tu, blong holem wan gudfala fasin fren wetem Jeova, i impoten tumas blong trastem olgeta promes we hem i talem long saed blong ol blesing blong fiuja. Pol i makem poen ya taem hem i talem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) Antap long samting ya, Pol i eksplenem se, stamba risen we i mekem se Jisas i kam long wol, hemia blong sevem ol man ya we oli tanem tingting blong olgeta long sin. Hem i se: “Tok ya we i talem se Jisas Kraes i kam long wol ya blong sevem ol man nogud, hem i wan trutok we yumi mas bilif long hem oltaem.” (1 Timoti 1:15) Mo aposol Pita i tokbaot fasin sef olsem ‘en [no, frut] we i kamaot from we yumi bilif.’ (1 Pita 1:9, NW) Taswe, i stret nomo blong gat hop we bambae yumi sef. Be, ?wanem rili mining blong fasin sef? ?Mo i nidim wanem blong kasem samting ya?
?Wanem Ya Fasin Sef?
3. ?Ol man blong Jeova long taem bifo oli kasem fasin sef long wanem samting?
3 Plante taem, long Hibru haf blong Baebol, “fasin sef” i minim se wan man i ronwe no i kam fri long wan trabol no long ded we i save kasem hem. Eksampel, Deved i singaot Jeova se “Man blong wokem rod blong sef,” nao hem i se: “God blong mi i olsem ston blong mi. . . . Hem i ples we mi save ronwe blong go haed long hem. Bambae mi singaot i go long Jeova, Man ya we yumi mas presem hem. Nao hem bambae i sevem mi i tekemaot mi long han blong ol enemi blong mi.” (2 Samuel 22:2-4, NW) Deved i save se Jeova i lesin taem ol man blong Hem we oli gat bilif, oli singaot long hem blong i halpem olgeta.—Ol Sam 31:22, 23; 145:19.
4. ?Ol man blong Jeova we oli laef bifo Kristin taem oli gat wanem hop long saed blong fiuja?
4 Ol man blong Jeova we oli laef bifo long taem blong ol Kristin, olgeta tu oli holem hop ya blong wan laef long fiuja. (Job 14:13-15; Aesea 25:8; Daniel 12:13) Yes, plante long ol promes ya blong sef, we yumi faenem long Hibru haf blong Baebol, oli ol profet tok long saed blong wan fasin sef we i bigwan moa—wan fasin sef we biaen long hem ol man bambae oli save kasem laef we i no save finis. (Aesea 49:6, 8; Ol Wok 13:47; 2 Korin 6:2) Long taem blong Jisas, plante man Jiu oli hop blong kasem laef we i no save finis. Be, oli no wantem bilif se Jisas hem i rod ya blong mekem hop blong olgeta i kamtru. Jisas i tok long ol lida blong skul long taem blong hem se: “Yufala i stap luklukgud long ol tok blong Baebol, mo yufala i bilif se long ol tok blong hem, yufala i gat laef we i no save finis. !Be yufala i luk! Ol tok blong Baebol ya oli stap tokbaot mi.”—Jon 5:39.
5. ?Wanem bigfala mining blong fasin sef?
5 God i yusum Jisas blong soemaot ful mining blong fasin sef. Fasin sef ya i minim se man i no moa stap aninit long paoa blong sin, i no moa kalabus long giaman skul mo wol ya blong Setan wetem fasin blong fraet long man mo fraet long ded tu. (Jon 17:16; Rom 8:2; Kolosi 1:13; Revelesen 18:2, 4) Be, bigfala mining blong fasin sef, long tingting blong ol man blong God we oli holemstrong long bilif, hem i no minim nomo se oli gofri long ol hadtaem mo trabol. Hem i minim tu se oli gat jans blong kasem laef we i no save finis. (Jon 6:40; 17:3) Jisas i tijim se, blong “smol kampani,” fasin sef i minim se bambae oli laef bakegen blong go long heven mo joen wetem Kraes blong rul long Kingdom. (Luk 12:32, NW) Blong ol narafala man long wol, fasin sef i minim se bambae oli kasembak wan laef we i stretgud olgeta mo wan gudfala fasin fren wetem God, olsem Adam mo Iv tufala i gat long garen blong Iden bifo we tufala i sin. (Ol Wok 3:21; Efesas 1:10) Stamba tingting we God i gat fastaem hemia se olgeta man long wol oli kasem laef we i no save finis, long wan paradaes. (Jenesis 1:28; Mak 10:30) Be, ?olsem wanem ol man oli save kasembak olgeta samting ya?
Fandesen Blong Fasin Sef—Ransom
6, 7. ?Olsem wanem Jisas i joen long wok we i blong sevem yumi?
6 Fasin sef blong kasem laef we i no save finis, i save kamtru nomo from ransom sakrefaes blong Kraes. ?From wanem? Baebol i eksplenem se taem Adam i sin, hem i putum hem wan mo olgeta man we oli kamaot biaen long hem, wetem yumi tu, i go long han blong sin olsem “slef”—from samting ya olgeta man oli nidim ransom blong gat wan hop long saed blong fiuja. (Rom 5:14, 15; 7:14) Sakrefaes blong anamol we man i mas mekem aninit long Loa blong Moses, oli olsem pija blong ransom ya we God bambae i givim blong olgeta man. (Hibrus 10:1-10; 1 Jon 2:2) Ol sakrefaes ya oli olsem ol profet tok we oli kamtru taem Jisas i givim sakrefaes blong hem wan. Enjel blong Jeova i talemaot bifo we Jisas i bon se: “Hem bambae i sevem ol man blong hem, i tekemaot ol sin blong olgeta.”—Matiu 1:21; Hibrus 2:10.
7 Tru long wan merikel, Jisas i bon long vejin Meri, mo from we hem i Pikinini blong God, hem i no kasem ded we i kamaot long Adam. From risen ya, mo from we hem i holemstrong bilif long fasin we i stretgud olgeta, praes blong laef blong hem i naf blong pemaot ol man long sin mo ded. (Jon 8:36; 1 Korin 15:22) Jisas i no olsem ol narafala man we oli kasem panis blong ded from we oli gat sin. No gat. Hem i kam long wol from risen ya se ‘blong givim laef blong hem blong pem rod blong plante man oli go fri.’ (Matiu 20:28) Naoia we Jisas i mekem samting ya finis, i laef bakegen long ded, mo i sidaon long jea olsem king, hem i naf blong sevem olgeta man we oli mekem laef blong olgeta i laenap wetem wanem we God i wantem.—Revelesen 12:10.
?I Nidim Wanem Blong Kasem Sef?
8, 9. (a) ?Wanem ansa we Jisas i givim long kwestin blong wan yangfala rijman long saed blong fasin sef? (b) ?Olsem wanem Jisas i tekem jans long taem ya blong tijim ol disaepol blong hem?
8 Wan taem, wan yangfala rula blong Isrel, we hem i rij tumas, i askem Jisas se: “?Bambae mi mas mekem olsem wanem blong kasem laef ya we i no save finis?” (Mak 10:17) Kwestin blong man ya i soemaot tingting we maet plante man Jiu oli gat long taem ya—hemia se, i gat sam kaen gudfala wok we God i wantem se man i mas mekem fastaem nao sipos man ya i mekem ol wok ya go kasem wan stret mak, bambae hem i save kasem praes blong sef we God bambae i givim. Be tingting we i pusum wan man blong wosipim God tru long aksin nomo, maet hem i kamaot from we man ya i tingbaot samting we hem wan nomo i wantem. Ol wok ya oli mekem se hop blong hem blong sef oli no sua gud, from we i no gat wan sin man we i naf fulwan blong folem olgeta rul blong God.
9 Blong ansa long kwestin blong man ya, Jisas i mekem hem i tingbaot bakegen se hem i mas obei long ol loa blong God. Yangfala man ya i talem kwiktaem long Jisas se hem i stap folem ol loa ya finis stat we hem i smol i kam. Toktok blong yang man ya i mekem se Jisas i lavem hem tumas. Jisas i talem long hem se: “Wan samting nomo i stap we yu yu no mekem yet. Yu go, yu salemaot olgeta samting blong yu, yu tekem mane blong hem, yu go givim long ol puaman, nao bambae yu yu gat plante samting blong yu long heven. Mo yu kam, yu biaen long mi, yu man blong mi.” Be, yangfala man ya i gowe long Jisas, tingting blong hem i hevi, “from we hem i gat plante samting.” Biaen, Jisas i makem klia long tingting blong ol disaepol blong hem se fasin blong fasgud bitim mak long ol gudgudfala samting blong wol ya i save blokem rod blong man i kasem sef. Jisas i gohed blong talem se i no gat wan man i naf blong kasem sef tru long paoa blong hem wan nomo. Be, Jisas i leftemap tingting blong olgeta se: “Samting ya, man i no save mekem. God nomo i save mekem, from we hem i save mekem olgeta samting.” (Mak 10:18-27; Luk 18:18-23) ?Olsem wanem man i save kasem sef?
10. ?Wanem ol mak we yumi mas kasem sipos yumi wantem sef?
10 Fasin sef hem i wan presen we God i givim, be i no wan samting we yumi save kasem olsem nomo. (Rom 6:23) I gat sam mak we ol man wanwan oli mas kasem blong oli naf blong God i givim presen ya long olgeta. Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” Mo aposol Jon i talem tu se: “Man we i bilif long Pikinini ya blong God, hem i gat laef ya we i no save finis. Be man we i no save obei long Pikinini ya, hem bambae i no save luk laef ya samtaem.” (Jon 3:16, 36) I klia se, God i wantem we olgeta man wanwan oli gat bilif mo fasin obei sipos oli hop blong kasem sef mo laef we i no save finis. Evri man wanwan i mas mekem disisen blong bilif long ransom mo blong biaenem Jisas.
11. ?Olsem wanem wan sinman i save mekem se Jeova i agri long hem?
11 From we yumi sinman, yumi no bon wetem fasin obei mo yumi no naf nating blong obei long fasin we i stret gud olgeta. Taswe Jeova i givim wan ransom blong kavremap ol sin blong yumi. Nating se i olsem, yumi mas traehad oltaem blong mekem laef blong yumi i laenap wetem ol rod blong God. Olsem Jisas i talem long yangfala rijman ya, yumi mas folem ol loa blong God. Hemia wan rod blong mekem God i agri long yumi, be tu, hem i mekem yumi glad from we ‘ol tok blong [God] oli no strong tumas blong folem’; oli olsem “gudfala meresin.” (1 Jon 5:3; Ol Proveb 3:1, 8) Be i tru se, i no isi oltaem blong holemtaet hop ya blong sef.
‘Faet Strong Blong Holem Bilif’
12. ?Olsem wanem hop ya blong sef i save mekem wan Kristin i strong naf blong faet agensem ol samting we oli traem hem blong mekem i nogud?
12 Disaepol Jud i wantem raet i go long ol faswan Kristin blong tokbaot “rod we God i stap yusum blong sevem [olgeta].” Be, from we i gat rabis fasin i stap gohed long medel blong olgeta, Jud i harem se i stret blong givim advaes long ol brata blong hem blong oli ‘faet strong blong holem trutok ya we oli bilif long hem finis.’ Yes, blong kasem sef, i no naf blong gat bilif, fasgud long trufala Kristin bilif, mo obei taem evri samting i ron gud nomo. No gat. Wosip we yumi mekem i go long Jeova i mas strong inaf blong halpem yumi blong stanap strong agensem ol traem mo ol nogud fasin we maet oli pulum yumi. Be, long kongregesen blong faswan handred yia, ol nogud fasin mo tingting long saed blong seks, fasin blong no respektem olgeta we oli hae moa, fasin seraot, mo ol tingting we oli hafhaf, oli gohed yet blong kam insaed. Jud i wantem givhan long ol Kristin blong faet agensem ol nogud fasin ya, nao hem i talem strong long olgeta blong holem tingting i stap klia long mak we oli wantem kasem: “Yufala i mas wok strong blong mekem bilif blong yufala i kam strong moa. Bilif ya i kamaot long God mo i klin gud. Mo oltaem yufala i mas prea long paoa blong [tabu spirit]. Yufala i mas stap long laef ya we oltaem yufala i save se God i stap lavem yufala, mo oltaem yufala i mas luk long Jisas Kraes, Masta blong yumi, blong hem bambae i gat sore long yufala, i givim laef long yufala we i no save finis.” (Jud 3, 4, 8, 19-21) Hop ya blong sef, i save mekem olgeta oli strong moa long faet blong olgeta blong stap klin long fasin mo tingting blong olgeta.
13. ?Olsem wanem yumi soem se yumi no letem gudfala wok ya blong God i go blong nating nomo?
13 Jeova God i wantem luk se olgeta ya we bambae hem i sevem olgeta, oli mas soem gudfala eksampel long fasin mo tingting blong olgeta. (1 Korin 6:9, 10) Be, fasin blong folem ol stretfala rul blong God i no minim se yumi stat jajem ol narafala. I no yumi we i mekem disisen long saed blong fiuja we narafala man i mas kasem. God nomo bambae i mekem disisen ya. Olsem Pol i talem long ol man Gris long Atens, se: “Hem i putum dei finis we bambae hem i save jajem olgeta man long wol, mo bambae hem i mekem long fasin we i stret nomo. God i jusumaot finis man ya we bambae hem i yusum blong jajem olgeta man”—hemia Jisas Kraes. (Ol Wok 17:31; Jon 5:22) Sipos yumi laef wetem bilif long ransom blong Jisas, yumi no nid blong fraet long dei blong jajmen we i stap kam. (Hibrus 10:38, 39) Impoten samting se, yumi neva mas ‘letem gudfala wok ya blong God [we i mekem yumi joen bakegen wetem hem tru long ransom] i go blong nating nomo,’ from we yumi letem ol traem oli pulum yumi blong folem ol rong tingting mo fasin. (2 Korin 6:1) Antap long samting ya, taem yumi halpem ol narafala man blong kasem sef, yumi soem se yumi luksave stamba tingting blong fasin sore blong God. ?Olsem wanem yumi save halpem olgeta ya?
Serem Hop Blong Sef
14, 15. ?Jisas i jusum hu ya blong oli talemaot gud nius ya blong sevem man?
14 Pol i yusum toktok blong profet Joel taem hem i raetem se: “Olgeta man we oli singaot long mi long nem blong mi, mi bambae mi sevem olgeta.” Ale, hem i gohed se: “?Sipos man i no go talemaot nius blong God, bambae ol man oli save harem nius ya olsem wanem? ?Mo sipos ol man oli no harem nius ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem?” Long sam vas biaen, Pol i makem klia se man i no kasem bilif olsem nomo, be hem i talem se bilif i kamaot ‘taem man i [“folem,” NW] gud nius ya,’ hemia “gud nius ya long ol tok blong Kraes.”—Rom 10:13, 14, 17; Joel 2:32.
15 ?Hu bambae i karem “tok blong Kraes” i go long olgeta man? Jisas i givim wok ya long ol disaepol blong hem—olgeta ya we oli kasem tijing finis long saed blong “tok” ya. (Matiu 24:14; 28:19, 20; Jon 17:20) Taem yumi joen long wok blong talemaot Kingdom mo mekem disaepol, yumi stap mekem sem mak long wanem we aposol Pol i tokbaot taem hem i yusum tok blong Aesea se: “Samting ya i gud tumas, we ol man oli wokbaot i kam blong talemaot gud nius long yumi.” Nating sipos plante man oli no lesin long gud nius we yumi karem, leg blong yumi i “gud tumas” long ae blong Jeova.—Rom 10:15; Aesea 52:7.
16, 17. ?Wanem tufala samting we wok blong prij i mekem oli kamtru?
16 Taem yumi folem oda ya, yumi mekem tu impoten samting oli kamtru. Faswan samting se, gud nius ya i mas goaot blong leftemap nem blong God mo givhan long ol man we oli wantem sef blong oli save olsem wanem blong kasem sef. Pol i luksave se hemia wan impoten haf long oda ya blong prij. Hem i talem se: “Hemia tok we Masta blong mifala i givim finis long mifala, we Baebol i talem se, ‘Mi mi mekem yu yu kam wan laet long ol man blong ol narafala kantri, blong bambae mi mi save sevem olgeta man long wol ya.’” Taswe, from we yumi disaepol blong Kraes, yumi wanwan i mas joen long wok ya blong karem mesej blong sef i go long olgeta man.—Ol Wok 13:47; Aesea 49:6.
17 Seken samting hemia se, wok blong talemaot gud nius i putum wan fandesen we God bambae i yusum blong jajem ol man wetem stret fasin. Long saed blong jajmen ya, Jisas i talem se: “Long taem ya we mi, mi Pikinini blong Man bambae mi King mi gat olgeta paoa, bambae mi kamtru wetem olgeta enjel blong heven, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i stap seraot ol sipsip blong hem long ol nani blong hem.” Yes, wok ya blong jajem mo seraotem ol man bambae i stat nomo long taem ya we ‘Pikinini blong Man i kam long olgeta paoa blong hem.’ Be wok blong prij i givim jans long ol man naoia, blong oli luksave ol brata blong Kraes long saed blong spirit nao oli save mekem wok we i sapotem ol brata ya mo kasem sef blong olwe.—Matiu 25:31-46.
Holemtaet ‘Ol Samting Ya We Yufala i Hop Long Hem’
18. ?Olsem wanem yumi save holem tingting i stap klia long “hop blong sef”?
18 Fasin blong stap bisi oltaem long wok blong prij i givhan long yumi blong holem tingting i stap klia oltaem long hop blong yumi. Pol i raetem se: “Mifala i wantem tumas we tingting blong yufala bambae i stap strong oltaem, nao bambae yufala i save kasem ol samting ya we yufala i putum tingting blong yufala i stap strong long hem.” (Hibrus 6:11) Taswe, i gud sipos yumi wanwan i putum “hat blong faet” we hem i ‘hop ya blong sef.’ Nao long rod ya bambae yumi tingbaot se “God i no jusumaot yumi blong bambae i kros long yumi bakegen, be blong hem bambae i sevem yumi, from we yumi joen long Jisas Kraes, Masta blong yumi.” (1 Tesalonaeka 5:8, 9) Mo tu, yumi mas folem advaes ya blong Pita, se: “Yufala i mas mekem tingting blong yufala i rere blong yufala i mekem wok. Tingting blong yufala i mas klia gud. Mo yufala i mas putum tingting blong yufala i stap oltaem long God ya we bambae i givhan long yufala long gladhat blong hem.” (1 Pita 1:13) !Olgeta man we oli mekem olsem, bambae oli luk ‘hop ya blong sef’ i kamtru fulwan long olgeta!
19. ?Bambae yumi tokbaot wanem long nekis stadi?
19 Be naoia, ?wanem tingting yumi mas gat long saed blong taem we i stap yet bifo we wol ya i finis? ?Olsem wanem yumi save yusum gud taem ya blong wokem rod blong sevem yumi mo ol narafala? Bambae yumi ansa long ol kwestin ya long nekis stadi.
?Yu Yu Save Eksplenem?
• ?From wanem yumi mas holem tingting i stap klia long “hop blong sef” blong yumi?
• ?Fasin sef i minim se man i sef long wanem?
• ?Olsem wanem yumi save kam naf blong kasem presen ya blong sef?
• ?Wok blong prij we yumi mekem i givhan blong mekem wanem stamba tingting blong God i kamtru?
[Kwestin]
[Tok blong pija long pej 10]
Fasin sef i no minim nomo se man i ronwe long taem blong trabol