Ripot Long Wok Blong Kingdom

Kasem Save Long God Ya We i Gat Lav

ANTÔNIO, wan boe Brasil we i gat 16 yia, i harem nogud long laef blong hem. Tingting ya se laef blong hem i blong nating nomo, i pusum hem blong yusum drag mo dring alkol bitim mak. Plante taem, hem i tingting blong kilim hem wan i ded. Be long ol taem ya hem i tingtingbak long wan tok we mama blong hem i bin talem se: “God i stamba blong fasin ya blong lavem man.” (1 Jon 4:8) ?Be olsem wanem blong faenem God ya we i stamba blong lav?

Antônio i wantem tumas blong lego fasin blong yusum drag mo dring alkol bitim mak. From samting ya, hem i go askem wan pris long ples blong hem blong i halpem hem. Nating se Antônio i kam strong long Katolik Jos, hem i gat plante kwestin blong askem. Eksampel, hem i gat kwestin long saed blong tok ya blong Jisas se: “Bambae yufala i save trutok, mo trutok ya bambae i mekem yufala i fri man.” (Jon 8:32) ?Wanem kaen fasin fri we Jisas i stap tokbaot? Jos blong Antônio i no save givim ol gudfala ansa long ol kwestin blong hem. Nao, sloslou Antônio i gobak long ol fasin blong hem blong bifo. Yes, ol fasin blong hem blong yusum drag mo dring alkol i kam nogud moa.

Raonabaot long taem ya, waef blong Antônio, Maria, i stat blong stadi Baebol wetem ol Witnes blong Jeova. I tru se Antônio i no agensem waef blong hem from stadi ya, be hem i tingbaot ol Witnes olsem wan “skul blong ol man Amerika we i stap sapotem gavman blong Amerika.”

Nating se tingting blong Antônio i olsem, Maria i tekem sam Wajtaoa mo Wekap! we hem i ting se Antônio i intres long olgeta, mo i putum i stap olbaot insaed long haos. Antônio i laekem blong rid, taswe samtaem hem i ridim ol buk ya taem waef blong hem i no stap long haos. Hemia fastaem long laef blong hem, we hem i faenem ansa long ol kwestin we hem i gat long saed blong Baebol. Hem i tingtingbak, nao i talem se: “Mi stat blong luksave lav mo kaen fasin we waef blong mi mo ol Witnes oli stap soem long mi.”

Long medel blong 1992, Antônio i mekem disisen blong stadi long Baebol wetem ol Witnes blong Jeova. Be, hem i gohed blong yusum drag mo blong dring alkol bitim mak. Let long wan naet, taem Antônio mo wan fren blong hem oli aot long wan taon we ol puaman oli laef long hem, ol polis oli stopem tufala long rod. Taem ol polis oli faenem se Antônio i gat sam drag, oli stat blong kilim hem. Wan polis i pusum hem i go foldaon long sofmad mo i poenem masket long hed blong hem. Wan narafala polis i singaot se: “!Kilim hem i ded!“

Taem Antônio i stap ledaon long sofmad, hem i tingtingbak long laef blong hem. Ol gudfala samting nomo we hem i save rimemba, hemia famle blong hem mo Jeova. Hem i mekem wan sotfala prea, i askem long Jeova blong i halpem hem. Nao, wantaem nomo ol polis oli lego hem, oli go. Ale hem i gobak long haos blong hem, mo hem i bilif strong se Jeova i sevem hem.

Antônio i stat blong stadi Baebol wetem strong tingting. Sloslou, hem i jenisim ol fasin blong hem blong mekem Jeova i glad long hem. (Efesas 4:22-24) Taem hem i lan blong bos long tingting blong hem, nao hem i stat blong lego fasin blong yusum drag. Nating se i olsem, hem i nidim ol dokta blong halpem hem. Hem i stap tu manis long wan klinik we i stap halpem ol man blong lego drag. Long taem ya, hem i gat jans blong ridim sam buk long saed blong Baebol, olsem buk ya Save Blong Lidim Yu Long Laef We i No Save Finis. Mo biaen, Antônio i tokbaot ol samting we hem i lanem long ol buk ya wetem ol narafala sikman.

Taem Antônio i aot long klinik, hem i gohed blong stadi Baebol wetem ol Witnes. Tede, Antônio, Maria, tu gel blong tufala, mo mama blong Antônio, oli wosip long Jeova olsem wan famle we i glad mo i joengud. Antônio i talem se: “Naoia mi kasem save long trufala mining blong tok ya se ‘God i stamba blong fasin ya blong lavem man.’”

[Tok blong pija long pej 8]

Mekem wok blong prij long Rio de Janeiro