?Weples Yu Save Faenem Gudfala Advaes?

Evri yia, ol man oli winim plante milian dola long bisnes blong “givim advaes.” I tru se ol man oli nidim advaes. Heinz Lehmann, wan dokta we i wok long saed blong tingting, i talem se: “[Plante man long wol tede] oli no gat gudfala edukesen mo oli no save olsem wanem blong joengud wetem ol narafala. Oli no moa tinghae long ol fasin mo rul blong skul. Ol famle oli no moa stanap strong . . . , mo from samting ya ol man oli faenem se laef blong olgeta i olbaot.” Man ya blong raetem buk, Eric Maisel, i talem se: “Ol man we bifo, oli lukaot help long ol kleva, pasta, mo dokta, blong winim problem we oli gat long saed blong tingting, spirit, no bodi, naoia oli lukaot help long ol buk we oli givim advaes blong winim ol problem ya.”

GRUP ya, American Psychological Association i stanemap wan grup blong man blong stadi long bisnes ya. Oli talem se ol buk ya “oli save givhan bigwan long ol man blong kasem save long olgeta wan mo ol narafala tu . . . , be samting we ol buk oli talem mo ol taetel blong ol program oli rili bitim mak.” Wan man blong raetem niuspepa i talem long Toronto Star se: “Lukaot long ol giaman toktok blong skul. . . . Lukaot tu long olgeta buk, kaset, no ol miting, we oli fulap long ol advaes blong kam gud moa, be ol samting we oli talem oli hadwok tumas, blong mekem i wok long sotfala taem, mo smol fasin traehad.” I tru se i gat plante man we oli rili wantem givhan long olgeta we oli trabol. Be sore tumas, sam man we oli gat nogud fasin, mo we oli wantem yusum ol man we tingting blong olgeta i foldaon, from we oli stap olgeta wan, mo from we oli stap safa, be oli no rili givhan long olgeta.

From samting ya, ?wanem nao i stamba rod blong kasem help we yumi save trastem? ?Weples yumi faenem ol gudfala advaes we oli save wokgud oltaem?

Stamba Blong Advaes We i Wokgud Oltaem

Long ol yia 1800, wan prija long Amerika, Henry Ward Beecher i talem se: “Baebol hem i wan map we God i givim, blong yu save folem taem yu stap stiarem sip blong yu, blong mekem se sip blong yu i no draon. Map ya i save lidim yumi i go long haba, mo i soem olsem wanem blong lukaot gud long sip blong yu blong i no rek long rif taem yu stap go long haba.” Wan narafala man i tokbaot Baebol se: “I no gat wan man samtaem we i go bitim Baebol. Taem ol yia oli pas, save blong yumi long buk ya i kam bigwan moa mo i dip moa.” ?From wanem i gud we yu lukluk gud insaed long buk ya?

Baebol i givim advaes ya se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 3:16, 17) Baebol i kamaot long Man ya we i Stamba blong laef, hemia Jeova God. (Ol Sam 36:9) From samting ya, hem i savegud yumi. Ol Sam 103:14 i talem long yumi se: “Hem i savegud we hem i mekem yumi long graon. Oltaem  hem i stap tingbaot we yumi kamaot long asis nomo.” Taswe, yumi save trastem fulwan se Baebol i save givhan long yumi.

Yes, nomata wanem problem yumi fesem, Baebol i fulap long ol rul mo advaes we oli save halpem yumi. Tru long Baebol, God i talem long yumi se: “Hemia rod. Yufala i folem.” (Aesea 30:21) ?Be, Baebol i rili save givhan long yumi wanwan tede? Bambae yumi luk.

Baebol i Givhan Long Yumi . . .

Blong Winim Ol Wari. Baebol i talem long yumi se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:6, 7) Prea i bin givhan bigwan long olgeta we oli wari from hadtaem long saed blong mane, oli harem nogud from we narafala i spolem olgeta long saed blong seks, i sakem nogud tok long olgeta, no from we oli lusum wan we oli laekem tumas? Bambae yumi luk wan stori.

Afta we Jackie i faenemaot se wan man i spolem gel blong hem long saed blong seks, hem i talem se: “Mi harem se mi gat bigfala fol from we mi no bin gat paoa blong protektem pikinini blong mi. I no gat tok blong talem filing blong mi we i trabol. Oltaem mi mas faetem agensem ol nogud filing blong kros. Sloslou, ol nogud filing ya oli stat blong spolem laef blong mi. Mi rili nidim Jeova blong lukaotgud long hat blong mi.” Afta we hem i ridim Filipae 4:6, 7 plante taem, hem i traehad blong mekem advaes ya i wok long laef blong hem. Jackie i gohed i talem se: “Mi prea evri dei, mo askem bakegen mo bakegen long Jeova blong i halpem mi blong no letem ol nogud filing i spolem mi, mo Jeova i givhan long mi blong gat wan hat we i kwaet mo i hapi. Naoia mi harem se i gat pis long tingting blong mi.”

Maet yu tu, yu stap fesem wan problem we i bigwan tumas blong yu winim, mekem se yu harem nogud long filing blong yu. Taem yu folem advaes we Baebol i givim, blong prea, yu save winim filing ya. Man blong raetem Ol Sam, i leftemap tingting blong yumi, i talem se: “Yu mas givim laef blong yu long Hae God, yu mas trastem hem, nao bambae hem i halpem yu.”—Ol Sam 37:5.

Blong Leftemap Tingting. Man blong raetem Ol Sam i soemaot fasin tangkiu long God taem i talem tok ya se: “Hae God, mi mi laekem haos blong yu tumas. Haos ya i ples we yu yu stap long hem long bigfala paoa blong yu. Hae God, oltaem yu yu stap mekem we mi mi stap sef long olgeta trabol, nao from samting ya bambae mi mi presem yu long fes blong olgeta man blong yu.” (Ol Sam 26:8, 12) Baebol i leftemap tingting blong yumi blong joen tugeta oltaem, blong wosip long Jeova. ?Olsem wanem fasin ya blong joen tugeta i save givhan long yumi? Bambae yumi luk sam stori.

Becky i talem se: “Papa mo mama blong mi, tufala i no wosip long Jeova, mo from samting ya, tufala i agensem mi taem mi mekem wok blong God. I nidim bigfala traehad blong mi go long ol miting.” Becky i bilif se hem i bin kasem fulap blesing from we hem i traehad blong go long ol Kristin miting oltaem. Hem i talem se: “Ol miting oli bildimap bilif blong mi, mo samting ya i givhan long mi blong fesem hadtaem we mi kasem evri dei, blong mi save stap olsem wan studen, wan pikinini gel, mo wan man blong wok blong Jeova. Ol man long Haos Kingdom, oli defren olgeta long ol studen long skul. Oli rili kea mo oli wantem givhan, mo oltaem, ol storian blong mifala oli leftemap tingting. Olgeta oli ol trufala fren.”

Yes, taem yumi folem advaes blong Baebol blong joen tugeta oltaem, bambae yumi haremgud from we Jeova i leftemap tingting blong yumi. Long ples ya yumi luksave se ol tok ya blong Ol Sam i tru, se: “God, hem i sefples blong yumi, hem i paoa blong yumi. Oltaem hem i rere blong givhan long yumi long taem blong trabol.”—Ol Sam 46:1.

Blong Gat Wan Gudfala Wok We i Mekem Yumi Haremgud. Baebol i talemaot se: “Yufala i mas stanap strong. Yufala i no mas slak. Oltaem yufala i mas wok strong long ol wok ya blong Masta blong yumi, from we yufala i save finis, se taem yufala i wok blong Masta ya blong yumi, be wok ya bambae i mas gat frut blong hem.” (1 Korin 15:58) ?I tru se “wok blong Masta” i save mekem yumi haremgud?  ?I tru se i gat gudfala samting i kamaot from Kristin wok blong prij?

Amelia i talemaot tingting blong hem se: “Mi stadi wetem wan man mo woman, we klosap mared blong tufala i brok. Mi givhan tu long wan woman we ol rabis man oli kilim gel blong hem i ded. Woman ya i harem nogud bitim mak from we hem i no sua se ol ded man oli stap wea. Ol man long tufala stori ya, oli faenem pis mo hop, from we oli mekem ol rul blong Baebol i wok long laef blong olgeta. Mi haremgud mo glad tumas from we mi bin joen long wok blong givhan long olgeta.” Scott i talem se: “Sipos yu storian gud wetem wan man long wok blong prij, yu statem wan Baebol stadi, no yu tekem jans blong prij long wan man we i soem intres, bambae yu tokbaot ol stori ya blong plante yia. !Evri taem we yu talem stori ya bakegen, yu haremgud! Yes, wok blong prij i save givim bigfala glad we i stap longtaem.”

I klia se, taem ol man ya oli folem advaes blong Baebol mo wok strong long wok blong prij, oli haremgud long gudfala wok. Mifala i singaot yu blong kam joen long wok ya blong tijim ol narafala long saed blong ol rod mo ol rul blong God, mo long sem taem, yu tu yu save haremgud.—Aesea 48:17; Matiu 28:19, 20.

Kasem Blesing From Tok Blong God

I klia se long wol tede, Baebol i stamba blong ol gudfala advaes we yumi save trastem. Blong kasem blesing from Baebol, yumi nidim fasin traehad oltaem. Oltaem yumi mas ridim, stadi, mo tingting dip long hem. Pol i givim advaes ya se: “Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.” (1 Timoti 4:15; Dutronome 11:18-21) God i soemaot se sipos yu wok strong blong folem advaes blong hem we i stap long Baebol, bambae yu kasem gudfala frut. Hem i promes se: “Yu mas trastem Hae God . . . Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”—Ol Proveb 3:5, 6.

[Tok blong pija long pej 31]

Taem yumi folem ol advaes blong Baebol, bambae yumi haremgud mo laef blong yumi i gat mining