Klas Namba 108 Blong Gilead i Kasem Strong Tingting Blong Mekem Ol Tabu Wok

PLANTE taem, Baebol i tokbaot wosip we man i mekem i go long God se i olsem wan “tabu wok.” Tok ya i kamaot long wan Grik tok we i minim olgeta wok we man i mekem i go long God. (Rom 9:4, NW) Ol 5,562 man we oli lesin long program long taem ya we namba 108 klas blong Wajtaoa Baebol Skul blong Gilead i kasem stefeket blong hem, oli harem ol tok we oli givim gudfala advaes blong halpem ol studen blong klas ya blong mekem ol tabu wok long fasin we Jeova God i save glad long hem. *

Theodore Jaracz, wan memba blong Hed Kampani blong ol Witnes blong Jeova, hem nao i jeaman. Program i stat wetem singsing namba 52, “Nem Blong Papa Blong Yumi.” Seken laen blong singsing ya i talem se: “Mifala i stap lukaot sam rod blong leftemap nem ya.” Tok ya i soemaot filing we i stap long hat blong ol studen blong klas ya (we oli kamaot long ten defren kantri) we oli wantem yusum trening ya we oli kasem taem oli go wok olsem misinari long 17 defren kantri.

Long fastok blong hem, Brata Jaracz i tokbaot ol faef manis ya we ol studen oli spenem long dip stadi blong Baebol we i rerem olgeta blong wok long narafala kantri. Samting ya i halpem olgeta blong “traem olgeta samting fastaem,” hemia i minim se oli yusum laet blong Tok blong God blong lukluk gud olgeta samting ya we oli lanem finis blong bambae oli “save holemstrong ol samting we oli gud.” (1 Tesalonaeka 5:21) Hem i leftemap tingting blong olgeta blong holemstrong bilif long Jeova, Tok blong hem, mo wok ya we oli kasem trening blong mekem. ?Wanem i save halpem olgeta taem oli mekem olsem?

Gudfala Advaes Blong Mekem Ol Tabu Wok

Lon Schilling, wan memba blong Komiti ya we oli kolem Bethel Operations, i tokbaot “?Bambae Yu Winim Fasin Blong Kwaet Man?” Hem i makem poen ya se i impoten tumas blong kam kwaet man from we hemia nao waes we i kamaot long God. (Jemes 3:17) Kwaet man hem i rere oltaem blong folem tingting blong narafala, hem i mekem i stret long narafala, hem i skelem gud ol samting, hem i tingbaot ol narafala, mo hem i gat longfala tingting. Brata Schilling i talem se: “Ol kwaet man oli skelem fasin blong olgeta taem oli wok wetem ol narafala. Oli no folem ol fasin we oli bitim mak.” ?Wanem i save halpem wan misinari blong kam kwaet man? Hemia taem hem i no tinghae tumas long hem wan, tekem jans blong lesin mo lanem samting from narafala, mo rere oltaem blong tingbaot filing blong narafala we long semtaem oli no lego ol rul blong God.—1 Korin 9:19-23.

“!No Foget Blong Kakae!” hemia stamba tok long nekis haf blong program we Samuel Herd, wan narafala memba blong Hed Kampani, i tokbaot.  Hem i soemaot se i impoten tumas blong kakae gud long saed blong spirit blong gohed strong long ol tabu wok. Brata Herd i talem se: “Taem yu stat blong prij mo tijim man, ol wok blong yu long saed blong spirit bambae oli kam antap bigwan. Taswe, bambae yu nidim blong tekem moa kakae long saed blong spirit blong mekem se yu naf mo yu gat paoa blong holem olgeta wok ya.” Fasin blong kakae oltaem long saed blong spirit i save halpem wan misinari blong no kam sik long saed blong spirit mo i givhan long hem blong no sore tumas long hom blong hem. Fasin ya i mekem hem i glad long wanem samting we hem i gat finis mo i gat strong tingting blong fulumap gud olgeta tabu wok we oli givim long hem blong mekem.—Filipae 4:13.

Wan tija blong Gilead, Lawrence Bowen, i leftemap tingting blong ol studen blong oli “Gobak Long Stat.” ?Samting ya i minim wanem? Brata ya i askem olgeta man we oli lesin blong ridim Ol Proveb 1:7, we i talem se: “Sipos man i wantem kasem save, stamba blong hem, hem i mas tinghevi long Hae God.” Nao hem i eksplenem se: “Ol tingting we oli go agensem trutok ya se Jeova i laef i stap, oli no naf blong givim trufala save mo oli no save givhan long man blong kasem gud save.” Brata Bowen i talem se Tok blong God, Baebol, i olsem wan pasel *. Taem yumi joejoenem ol smosmol pis blong pasel ya, pija i kam klia moa.  Sipos yumi joenem plante smosmol pis, pija ya i kam bigwan moa mo i kam klia moa tu, ale yumi save harem gud moa from samting we yumi luk. Hemia wan rod we i save halpem yumi evriwan blong mekem tabu wok blong God.

Wallace Liverance, we i rejistarem ol studen blong Gilead skul, i mekem laswan long ol tok ya. Stamba tok blong hem se “Givim Tangkiu Olsem Sakrefaes i Go Long God.” Hem i tokbaot stori blong Jisas we i mekem ol ten man blong leprosi oli kamgud bakegen. (Luk 17:11-19) Wan nomo long olgeta ya i kambak blong presem God mo talem tangkiu long Jisas. Brata Liverance i talem se: “I sua se, ol narafala ya tu oli glad bigwan from we oli kam klin bakegen. Oli harem gud long bodi blong olgeta, be i luk olsem se tingting blong olgeta i stap nomo long pris we bambae i talemaot se oli kam klin.” Man we i gat tangkiu from we trutok i mekem hem i klin long saed blong spirit, hem i wantem tumas blong talemaot tangkiu we hem i gat long God from ol gudfala samting ya. Ol studen blong klas namba 108 blong Gilead oli kasem toktok we i leftemap tingting blong olgeta blong tingting dip long olgeta wok blong God mo kaengud fasin blong hem. Long rod ya, wok we oli mekem mo sakrefaes we oli givim i go long God, bambae i kamaot from fasin tangkiu we oli gat long God.—Ol Sam 50:14, 23; 116:12, 17.

Ol Ekspiriens Mo Toktok Blong Soemaot Olsem Wanem Blong Mekem Samting Ya

Mark Noumair, wan narafala tija blong Gilead skul, i lidim narafala haf blong program ya. Hem i tokbaot ol ekspiriens long wok blong prij we ol studen oli kasem long taem ya we oli stap kasem trening. Klosap evri studen ya wanwan, oli spenem moa long 12 yia long fultaem wok blong prij, bifo we oli kam long Gilead. Ol studen we oli joen long skul ya oli statem plante Baebol stadi wetem ol man we oli kamaot long ol defdefren kantri. Samting ya i soemaot se “long fes blong ol man we oli gat ol defdefren kaen fasin,” ol studen ya oli save ‘mekem olsem we olgeta tu oli gat sem fasin we ol man ya oli gat.’—1 Korin 9:22.

Afta long ol ekspiriens blong ol studen, Charles Molohan mo William Samuelson, tufala i askem kwestin long sam memba blong famle blong Betel mo elda blong goraon blong visitim ol kongregesen, we olgeta tu oli bin joen long Gilead skul. Wan brata we oli askem kwestin long hem, Robert Pevy, i wok olsem misinari long Filipin afta we hem i joenem klas namba 51 blong Gilead. Hem i mekem ol studen oli tingbaot se: “Taem wan problem i kamaot, evri man i wantem talemaot tingting blong hem long saed blong stret rod blong stretem problem ya. Oltaem i gat wan we bambae i waes moa long yu, oltaem i gat wan we tingting blong hem i moagud long tingting blong yu. Be sipos yu yusum Baebol mo traem faenem tingting blong God long saed blong wan bisnes, i no gat wan man we bambae i naf blong bitim tingting ya. Wan ansa olsem, oltaem, hem i stret.”

Blong endem nambawan program ya long saed blong spirit, John Barr, wan memba blong Hed Kampani i tokbaot stamba tok ya “Mekem Tabu Wok We God i Glad Long hem.” Hem i soem olsem wanem ol tabu wok we yumi mekem taem yumi prij oli save halpem ol man we oli gat gudfala hat blong wosipim God long fasin we hem i glad long hem. Brata Barr i tokbaot ol tok blong Jisas long Matiu 4:10, nao hem i se: “Sipos yumi wantem wosipim Jeova nomo, yumi mas sakemaot olkaen fasin blong wosip long ol giaman god, olsem fasin blong wantem plante samting tumas, fasin blong laekem mane tumas, mo fasin blong wantem kasem haenem. !Yumi glad tumas taem yumi tingbaot se ol misinari blong yumi, long olgeta yia we oli pas, stat long ol yia 1940 i kam, oli bin soemaot gudfala eksampel long saed ya! Mo mifala i sua se yufala ol studen blong namba 108 klas blong Gilead, bambae yufala tu i folem eksampel ya. Bambae yufala i mekem ol tabu wok blong Jeova, we hem wan nomo i stret blong kasem wosip blong yumi.”

Ol lastok ya oli givim gudfala tingting long evriwan long en blong program ya we i bildimap bilif. Smoltaem i stap blong harem mesej blong ol brata sista raon long wol we oli sanem lav blong olgeta i kam. Nao ol studen oli kasem stefeket blong olgeta, mo ol man oli lesin long leta we klas ya i raetem blong talem tangkiu from trening we oli bin kasem. Ol studen blong klas ya oli kasem advaes we i pusum olgeta blong soemaot fasin blong fasgud long wok we oli kasem mo long wosip we oli mekem i go long Jeova. Olgeta man evriwan we oli kam long program ya, wetem ol visita blong 25 kantri, oli joen long laswan singsing mo prea.

[Ol futnot]

[Bokis blong pija long pej 23]

KAONTEM KLAS YA

Oli kamaot long hamas kantri: 10

Oli go long hamas kantri: 17

Hamas studen: 46

Oli gat hamas yia: 34

Hamas yia long trutok: 16

Hamas yia long fultaem wok: 12

[Tok blong pija long pej 24]

Klas Namba 108 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go long raetsaed.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.