Laef We i Stret Gud Olgeta !Hem i No Wan Drim Nomo!

Wan wol we i stret gud—?samting ya i minim wanem long yu? Tingbaot wan wol we i no gat fasin blong brekem loa, fasin blong yusum drag, hanggri, fasin pua, mo ol rabis fasin. Evriwan oli haremgud long filing mo bodi blong olgeta. Man i no moa sore mo harem nogud from we ded tu i finis olgeta. ?I stret blong ting se yumi save laef long wan wol olsem?

PLANTE man, oli agri se sayens mo niufala save oli kam antap bigwan tumas. Nating se i olsem, ol man ya oli no rili bilif se bambae save no waes blong man i naf blong mekem wol i kam stret gud, we olgeta man oli gat pis mo oli haremgud. Samting we i defren se, oltaem ol man oli wantem mekem ol samting oli kam moa gud, mo stretem ol samting we oli rong. I tru, wan tingting we i olsem drim nomo, i no save givhan long olgeta we oli no gat haos mo ol puaman, mo tu tingting olsem bambae i no save mekem ol man we oli handikap mo we oli sik, oli stap safa longtaem finis, oli haremgud bakegen. Man nomo i no save mekem wol i kam stret gud olgeta. Be nating se tede, i gat plante samting we i mekem yumi harem nogud mo tingting i trabol, i gat ol strongfala risen blong bilivim se i no longtaem, bambae i gat wan wol we yu save talem se i stret gud olgeta.

Taem yu stap tingting long saed blong laef we i stret gud olgeta, maet yu tingbaot laef blong Jisas Kraes. Long olgeta man we oli bin laef long wol ya, i no Jisas hem wan we i stret gud olgeta. Adam mo Iv, we God i wokem tufala long pija blong hem, tufala i haremgud long laef we i stret gud olgeta long wan paradaes. Be, tufala i lusum nambawan laef ya from we tufala i rebel agensem Papa blong tufala long heven. (Jenesis 3:1-6) Man we i Wokem olgeta samting, hem i putum tingting ya blong laef foreva insaed long man. Prija 3:11, (NW) i talemaot se: “Olgeta samting, hem [God] i wokem oli naes long stret taem blong olgeta. Laef we i no save finis, hem i putum long hat blong olgeta, blong bambae olgeta man oli no save faenemaot olgeta wok we trufala God i mekem, long stat blong olgeta i go kasem en blong olgeta.”

Sin i mekem se laef blong olgeta man i kam olsem “nating” mo “i olsem we olgeta samting . . . oli stap panis, from we oli stap roten nomo.” Nating se i olsem, makemgud ol tok ya blong aposol Pol we i blong leftemap tingting se: “Olgeta samting we God i mekem oli stap wet, we oli wantem tumas blong luk we God bambae i soemaot ol pikinini blong hem. God i jajem finis olgeta samting ya we hem i mekem, se oli mas kam nating. Mo hemia i no from we olgeta samting ya oli wantem olsem, i from we God i wantem olsem, be tingting blong God i stap yet. Naoia i olsem we olgeta  samting ya we God i mekem oli stap panis, from we oli stap roten nomo. Be long dei ya we God bambae i mekem ol pikinini blong hem oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” (Rom 8:19-21) Baebol i soemaot klia se Jisas Kraes nao i man ya we God i yusum blong mekem olgeta man oli kasembak laef ya we i stret gud olgeta.—Jon 3:16; 17:3.

Antap long nambawan hop ya long saed blong fiuja, yumi evriwan i save kam gud moa long saed blong spirit, mo yumi save soemaot samting ya naoia.

No Mekem i Strong Tumas Long Narafala

Long tingting blong Jisas Kraes, laef ya we i stret gud olgeta i impoten tumas. Taswe, hem i talem long wan bigfala hip blong man se: “Fasin blong yufala i mas stret gud, olsem fasin blong Papa blong yufala long heven.” (Matiu 5:48) ?Hemia i minim se Jisas i wantem we yumi no mas mekem wan mastik nating long rabis wol ya? Nogat. I tru se yumi mas traehad blong soem kaen fasin mo lav long ol man raonabaot long yumi, be samtaem yumi save mestem, yumi mekem samting we i no stret. Wan aposol blong Jisas i raetem se: “Sipos yumi talemaot ol sin blong yumi long God, yumi save bilif long hem, from we fasin blong hem i stret oltaem. Hem bambae i fogivim yumi from ol sin blong yumi, mo i tekemaot ol fasin blong yumi we i no stret, i mekem yumi klin. Sipos yumi stap talem se neva yumi mekem sin samtaem, hemia i minim se yumi stap talem se God i man blong giaman nomo, mo tok blong hem i no stap nating long yumi.”—1 Jon 1:9, 10.

Nating se i olsem, yumi save kam moa gud long tingting we yumi gat long saed blong yumi wan mo long ol fasin we yumi mekem long ol narafala, we yumi no bitim mak. Tok blong God, Baebol, hemia nomo i save givim ol advaes we i givhan long yumi blong mekem ol fasin we i stret mo blong no mekem i strong tumas long narafala. Taem yumi wokem ol fasin olsem glad mo fasin blong mekem i stret nomo, bambae samting ya i halpem yumi blong joen tugeta wetem ol narafala long ples blong wok, wetem hasban no waef blong yumi, mo taem yumi stap wetem papa mama no ol pikinini blong yumi. Aposol Pol i givim advaes ya long ol Kristin, se: “Yufala we i joen long Masta blong yumi, oltaem yufala i mas glad. Mi mi talem bakegen, se yufala i mas glad. Yufala i mas soemaot long olgeta man, we yufala i no stap mekem i strong tumas long ol narafala.”—Filipae 4:4, 5, NW.

Frut We i Kamaot From Fasin Blong Gat Stret Tingting

Taem yu gat stret tingting mo yu blokem fasin blong wantem kam stret bitim mak, wan fasin we i mekem yu tingbaot yu wan mo yu harem se yu gat fol, bambae yu mekem i gud long yu wan mo tu long ol narafala. Blong kasem save long wanem we yu naf blong mekem, i minim se yu mas gat intres mo stret tingting long samting we yu wantem mekem. Rimemba se God i mekem yumi blong laef long wol ya, mo haremgud long ol gudfala wok we i save givim glad long yumi mo ol narafala.—Jenesis 2:7-9.

Sipos yu bin mekem i strong tumas long yu wan, ?from wanem yu no wantem askem Jeova blong i givhan long yu? Sipos yu kam fren blong God, bambae yu haremgud tumas. Jeova i savegud olgeta samting long saed blong bodi blong yumi mo hem i save tu se yumi no stret gud olgeta. Taswe hem i no stap mekem i strong tumas long yumi, mo hem i no wan God we i hadwok blong mekem hem i glad, nogat. Man blong raetem Ol Sam i talem klia se: “Fasin blong Hae God, oltaem hem i stap mekem i gud tumas long olgeta we oli stap ona long hem, olsem we ol papa oli stap mekem long ol pikinini blong olgeta. Hem i savegud we hem i mekem yumi long graon. Oltaem hem i stap tingbaot we yumi kamaot long asis nomo.” (Ol Sam 103:13, 14) !Yumi talem bigfala tangkiu long God from fasin ya blong hem we hem i gat sore long yumi! Hem i savegud ol mak we yumi no naf blong kasem. Nating se i olsem, hem i luk yumi olsem ol nambawan pikinini we hem i lavem tumas.

 !I moa waes we yumi gat stret tingting mo fasin luksave long saed blong spirit, i bitim we yu wantem kam stret bitim mak! Yumi sua se i nogat man i save blokem Jeova blong mekem stamba tingting blong hem i kamtru, hemia blong mekem ol man oli kam stret gud olgeta aninit long Kingdom blong God. ?Be i minim wanem blong kam stret gud olgeta?

Laef We i Stret Gud Olgeta i Moa Gud i Bitim Fasin Blong Wantem Kam Stret Bitim Mak

Fasin ya blong kam stret gud olgeta i no minim se yumi mas kam stret bitim mak. Olgeta we oli gat jans blong laef long Paradaes long wol aninit long Kingdom blong God, bambae oli ol man we oli no mekem i strong tumas long narafala, oli no gat tingting ya se oli stret moa bitim narafala. Sipos yumi wantem laef tru long bigfala trabol, wan long ol samting we yumi mas mekem, hemia blong soem wetem ful hat blong yumi se yumi tinghae long ransom sakrefaes. Yumi mas mekem olsem bigfala hip blong man we aposol Jon i tokbaot. Ol man ya oli stap talem se: “God blong yumi, hem i King, i stap sidaon long bigfala jea blong hem. Hem wetem Smol Sipsip ya, tufala ya nao i wokem rod blong sevem mifala.” (Revelesen 7:9, 10, 14) Olgeta we bambae oli laef tru long bigfala trabol we i stap kam, bambae oli haremgud tumas from we Kraes i rere blong ded from olgeta, mo from olgeta ya we oli soemaot bilif long hem. Sakrefaes ya we i soem lav, i stamba rod blong karemaot sin mo ol slak fasin blong olgeta man blong olwe.—Jon 3:16; Rom 8:21, 22.

?Bambae laef we i stret gud olgeta i olsem wanem? Yes, bambae i no moa gat fasin blong traem winim narafala mo fasin ya we man i tingbaot hem nomo. Olgeta man bambae oli gat lav mo kaen fasin. Samting ya bambae i mekem ol man oli haremgud long laef, oli no moa wari mo i no moa gat fasin ya blong no glad long yumi wan. Nating se i olsem, bambae yumi no save kam les long laef ya we i stret gud olgeta. Tok blong God i no tokbaot evri smosmol samting long saed blong Paradaes, be hem i tokbaot se bambae laef i olsem wanem: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesin blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem. Ol man we bambae oli stap long ples ya, oli man blong mi we mi mi jusumaot olgeta finis, mo bambae oli save stap longtaem, olsem tri we i save stap longtaem. Ol samting we olgeta oli hadwok long hem, bambae oli save harem gud long hem longtaem. Ol wok we bambae oli stap mekem, bambae oli save go gud, mo bambae i no gat trabol i kasem ol pikinini blong olgeta.”—Aesea 65:21-23.

I no nid blong wari se bambae Kingdom i givim wanem kaen pleplei, ol samting blong pem long stoa, niufala save, no transpot. Be i gud we yu pijarem se naoia, yu stap haremgud long promes ya we i kamtru, se: “Long taem ya, wael dog wetem smol sipsip, bambae tufala i save kakae wanples, mo laeon bambae i save kakae gras olsem buluk nomo, mo rabis snek bambae i no moa save kakae man. Long Saeon ya, tabu hil blong mi, bambae i no moa gat man we i save mekem i nogud long narafala man, mo i no moa gat wan samting we i save spolem man. Mi mi Hae God, mo hemia tok blong mi.” (Aesea 65:25) !Laef we i stret gud olgeta bambae i defren tumas long laef ya we yumi gat tede! Sipos yu yu kam wan long olgeta ya we i laef long taem ya, bambae yu gat risen blong trastem se Papa blong yumi long heven bambae i intres bigwan long yu mo famle blong yu. “Yu mas luk long Hae God blong i mekem yu yu glad, nao bambae hem i givim long yu ol samting we yu yu wantem tumas.”—Ol Sam 37:4.

Laef we i stret gud olgeta i no wan drim nomo. Nambawan stamba tingting blong Jeova long saed blong ol man bambae i kamtru fulwan. Yu mo famle blong yu, yufala i save stap wetem olgeta ya we bambae oli kam stret gud olgeta mo laef foreva long niufala wol blong God. Baebol i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.

[Tok blong pija long pej 6]

Yumi save kam gud moa long tingting we yumi gat long yumi wan mo long ol narafala, we long sem taem, yumi blokem fasin ya blong wantem kam stret bitim mak no fasin blong wantem se evri smosmol samting i stret gud

[Tok blong pija long pej 7]

I gud we yu pijarem se yu stap finis long Paradaes, yu stap haremgud long laef we i gat pis mo stret fasin