Ona Long Olgeta We Oli Gat Raet Blong Lidim Yumi
Ona Long Olgeta We Oli Gat Raet Blong Lidim Yumi
“Yufala i mas ona long olgeta man, mo yufala i mas lavem olgeta Kristin man, mo yufala i mas ona gud long God, mo yufala i mas ona long hed gavman blong yufala.”—1 PITA 2:17.
1, 2. ?Wanem tingting blong ol man tede long saed blong olgeta we oli gat hae posisen??From wanem ol man oli gat tingting olsem?
WAN mama we i harem nogud i talem se: “Ol pikinini oli gat evri raet. Ol papa mama oli no moa kasem respek.” Long biaen blong sam trak, yumi save ridim tok ya blong wan stika we i talem se, “Agensem Man We i Gat Hae Posisen.” Hemia tu eksampel nomo blong soemaot tingting we ol man oli gat tede. Long evri ples long wol, ol man oli no moa gat respek nating long ol papa mama, ol tija, ol bos, mo ol haeman blong gavman.
2 Maet sam man oli talem se, ‘Be, ol man we oli gat hae posisen, oli no soem ol gudfala fasin blong mi save respektem olgeta.’ Sam samtaem, tok ya i tru. Long nius, yumi harem stori blong ol man blong gavman we oli gat kruked fasin, ol masta we oli griri tumas, ol tija we oli no savegud wok blong olgeta, mo ol papa mama we oli mekem i strong tumas long pikinini blong olgeta. Yumi glad tumas we bighaf blong ol Kristin oli no gat tingting olsem long saed blong olgeta we oli lidim kongregesen.—Matiu 24:45-47.
3, 4. ?From wanem ol Kristin oli mas soem respek long olgeta we oli gat hae posisen mo paoa?
3 From we yumi Kristin, ‘yumi gat risen’ blong soem respek long olgeta we oli haeman. Aposol Pol i leftemap tingting blong ol Kristin blong “stap aninit long ol haeman we oli stap rul, from we i no gat man i save rul sipos God i no letem hem. Ol haeman we oli stap, oli stap long prapa ples blong olgeta from God.” (Rom 13:1, 2, 5, NW; 1 Pita 2:13-15) Pol i soemaot tu from wanem yumi mas ona long olgeta we oli bos insaed long famle: “Yufala ol woman we i mared. Yufala i mas obei long ol man blong yufala. I stret nomo blong mekem olsem, from we yufala i Kristin. Ol pikinini. Oltaem yufala i mas obei long ol papa mo mama blong yufala, from we yufala i Kristin, mo fasin ya i save mekem Masta blong yumi i glad long yufala.” (Kolosi 3:18, 20) I stret nomo we yumi ona long ol elda long kongregesen from we ‘tabu spirit i putum [ol man long kongregesen] i stap finis long han blong olgeta. [Ol elda] oli mas lukaot long ol man blong kongregesen blong God, olsem we man blong lukaot long sipsip i stap lukaot long ol sipsip blong hem.’ (Ol Wok 20:28) From we yumi respektem Jeova, yumi ona long ol haeman long wol. Be, i tru se, ona we yumi soem long Jeova olsem bos blong yumi, i mas stap fasples long laef blong yumi.—Ol Wok 5:29.
4 Bambae yumi luk eksampel blong sam man we oli soem respek mo sam we oli no soem respek long olgeta we oli gat hae posisen mo paoa. Mo taem yumi tokbaot samting ya, i gud blong tingbaot se Jeova i rula we i hae olgeta.
God i No Save Agri Long Olgeta We Oli No Soem Respek
5. ?Olsem wanem Mikal i soemaot se hem i no gat respek long Deved, mo wanem i kamaot from?
5 Long stori blong King Deved, yumi luksave tingting blong Jeova long saed blong olgeta we oli daonem man we God i putumap olsem bos. Taem Deved i karem bokis blong kontrak i kam long Jerusalem, waef blong hem Mikal “i lukluk i kamtru long windo, mo i luk we king i stap jamjam, mo i stap danis bigwan blong leftemap nem blong Hae God, nao hem i [“stat blong agensem Deved long hat blong hem,” NW].” Mikal i mas luksave se Deved i no hed blong famle nomo, be tu, hem i king blong kantri. Nao Mikal i soemaot filing blong hem taem hem i tok long Deved se: “!Tede yu mekem wan samting we i no stret nating long hae nem ya blong yu! !Yu yu stap soemaot yu long fes blong ol haosgel blong ol haeman blong yu! !Yu yu stap mekem olsem man we i no save wan samting!” Risal blong samting ya, hemia se Mikal i no bonem wan pikinini nating, gogo hem i ded.—2 Samuel 6:14-23.
6. ?Wanem tingting blong Jeova long saed blong fasin blong Kora blong no gat respek long man we Jeova i jusumaot?
6 Kora i soem wan nogud eksampel long fasin blong no soem ona long olgeta we God i putumap blong lidim ol man blong hem long tiokratik fasin. !From we hem i kamaot long laen blong Kohat, hem i save haremgud long blesing blong wok long haos tapolen blong Jeova! Nating se i olsem, Kora i wantem faenem poen agensem Moses mo Eron, tufala we God i jusumaot blong lidim ol man Isrel. Kora i joen tugeta wetem sam narafala jif blong Isrel mo long klia fasin oli talemaot long Moses mo Eron se: “Yumi evriwan long kampani ya i blong Hae God, mo hem i stap wetem yumi evriwan. ?From wanem yutufala i putumap yutufala bakegen, se yutufala i hae moa long mifala?” ?Wanem tingting blong Jeova long fasin blong Kora mo olgeta we oli sapotem hem? God i tingbaot fasin blong olgeta olsem we oli no soem ona nating long Jeova hem wan. Nao, Jeova i mekem graon i open bigwan, mo olgeta ya we oli stap long saed blong Kora oli foldaon i go long hol ya oli ded. Ale, Jeova i sanem wan faea i kam i bonem Kora wetem olgeta 250 jif blong Isrel.—Namba 16:1-3, 28-35.
7. ?Ol ‘aposol we ol man oli stap talem se oli nambawan,’ oli gat gudfala risen blong tok agensem posisen blong Pol?
7 Long Kristin kongregesen blong faswan handred yia, i gat sam man we oli agensem tiokratik oda. Ol ‘aposol ya we ol man oli stap talem se oli nambawan’ long kongregesen blong Korin, oli no gat respek long Pol. Oli jikim fasin blong hem blong toktok, oli se: “Taem hem i stanap long fes blong yumi, hem i no wan strong man, mo ol tok blong hem i nating nomo.” (2 Korin 10:10; 11:5) Nating sipos Pol i gat gudfala fasin blong toktok, no nogat, i stret nomo we ol man oli soem respek long hem from we hem i wan aposol. ?Be, ol toktok blong Pol oli rili nating nomo? Ol bigfala toktok we Pol i mekem long fored blong plante man, we yumi save ridim long Baebol, oli pruvum se hem i wan man we toktok blong hem i save pulum man blong bilif. Smol storian we Pol i bin gat wetem Herod Agripa II, we i ‘savegud ol kastom mo fasin blong ol man Isrel,’ i pulum king ya blong talem se: “Long smoltaem ya nomo, bambae yu pulum mi mi kam Kristin man.” (Ol Wok 13:15-43; 17:22-34; 26:1-28) !Nating se i olsem, ol ‘nambawan aposol’ ya long Korin, oli talem se ol tok blong Pol i nating nomo! ?Wanem tingting blong Jeova long saed blong fasin blong olgeta? Long wan mesej we Jisas Kraes i sanem i go long olgeta we oli lidim kongregesen long Efesas, hem i tok gud long saed blong ol Kristin we oli no wantem biaenem olgeta “we oli stap talem se oli aposol . . . be oli stap giaman nomo.”—Revelesen 2:2.
Nating Se Oli Sinman Yumi Mas Respektem Olgeta
8. ?Olsem wanem Deved i soemaot se hem i gat ona long hae posisen we Jeova i givim long Sol?
8 Long Baebol, i gat plante eksampel blong olgeta we oli ona long ol man we oli gat hae posisen, nating se ol man ya oli yusum posisen blong olgeta long fasin we i no stret. Deved i wan long ol gudfala eksampel ya. King Sol, we hem i hae moa long Deved, i jalus long Deved mo i traem kilim hem i ded. (1 Samuel 18:8-12; 19:9-11; 23:26) Nating se Deved i gat jans blong kilim Sol i ded, Deved i talem se: “Prea blong mi we Hae God bambae i blokem mi oltaem, blong mi no mekem wan trabol long king blong yumi, we Hae God i jusumaot.” (1 Samuel 24:3-6; 26:7-13) Deved i save se Sol i rong, be hem i livim i stap long Jeova blong jajem hem. (1 Samuel 24:12, 15; 26:22-24) Hem i no tok nogud long Sol, mo tu, hem i no tok nogud long saed blong Sol long ol narafala man.
9. (a) ?Wanem filing blong Deved taem Sol i mekem nogud long hem? (b) ?Olsem wanem yumi luksave se Deved i gat trufala respek long Sol?
9 ?Deved i harem nogud, from we ol man oli mekem nogud long hem? Hem i krae long Jeova se: “Ol raf man oli stap traem blong kilim mi.” (Ol Sam 54:3) Hem i talemaot long Jeova, olgeta samting we i stap long hat blong hem, i se: “God blong mi, plis yu sevem mi, blong ol enemi blong mi oli no spolem mi. . . . Ol rabis man ya oli stap go wanples, oli agens long mi, nao oli stap wet blong kilim mi. Olgeta oli ron kwik blong mekemrere blong faet, be i no from wan rong blong mi, i no from wan samting nogud we mi mi mekem.” (Ol Sam 59:1-4) ?Yu yu harem olsem Deved samtaem, we yu no mekem i rong long wan haeman, be man ya i gohed nomo blong mekem trabol long yu? Deved i neva lego fasin blong soem respek long Sol. Taem Sol i ded, Deved i no jamjam from glad, be hem i raetem wan singsing blong soemaot sore blong hem. Hem i se: “King Sol mo Jonatan, tufala i gud tumas, mo ol man oli laekem tufala tumas . . . Tufala i save ron kwik winim bigfala pijin ya namala, mo tufala i strong winim laeon. !Ol woman Isrel! !Yufala i krae from King Sol!” (2 Samuel 1:23, 24) !Hemia wan nambawan eksampel blong soem trufala respek long wan we Jeova i jusumaot, nating se Sol i no mekem i stret long Deved!
10. ?Pol i soemaot wanem gudfala eksampel long saed blong fasin ona long posisen we God i givim long hed kampani, mo wanem i kamaot from?
10 Long Kristin taem tu, i gat sam nambawan eksampel blong ol man we oli soem ona long olgeta we God i putumap blong lidim kongregesen. Tingbaot eksampel blong aposol Pol. Hem i respektem olgeta disisen we hed kampani blong Kristin kongregesen long faswan handred yia, i mekem. Long laswan visit blong Pol long Jerusalem, hed kampani i givim advaes long hem blong mekem ol samting folem Loa we i blong mekem hem i klin. Long rod ya, hem i save soemaot long ol narafala se hem i no agensem Loa blong Moses. Maet Pol i tingting se: ‘Bifo, taem laef blong mi i stap long denja, ol brata ya oli talem long mi se mi mas lego Jerusalem. Naoia oli wantem se mi soemaot long fored blong olgeta man se mi gat respek long Loa blong Moses. Mi mi raetem wan leta finis i go long ol man Galesia blong talem se oli no nid blong folem Loa ya. Sipos mi go long tempel, maet ol narafala oli no kasem save long samting we mi mekem, maet oli ting se mi jenisim bilif blong mi mo mi joen wetem ol man we oli bilif long sakomsaes.’ Be, i klia se Pol i no gat tingting olsem. From we samting ya we oli askem i no go agensem ol Kristin rul, Pol i soem respek mo i folem advaes blong hed kampani blong faswan handred yia. Stret biaen long samting ya, Pol i nidim help from we wan hip blong ol man Jiu i wantem kilim hem i ded, mo biaen hem i go kalabus blong tu yia. Long en blong bisnes ya, Pol i mekem wanem we God i wantem, i kamtru. Pol i givim witnes long fored blong ol haeman long Sisaria mo biaen gavman i pem rod blong hem i go long Rom blong prij long fored blong Sisa.—Ol Wok 9:26-30; 21:20-26; 23:11; 24:27; Galesia 2:12; 4:9, 10.
?Yu Yu Soem Respek?
11. ?Long wanem rod yumi soem respek long olgeta haeman blong gavman?
11 Yu yu soem respek long olgeta we oli gat hae posisen? Ol Kristin oli kasem oda se “ol samting we i stret blong yufala i givim long olgeta, yufala i mas givim long olgeta evriwan. . . . Long man we i wantem ona, yufala i mas ona long hem.” I tru se, blong obei long ol “haeman we oli stap rul” i no minim se yumi pem takis nomo, be tu, yumi mas soem ona long olgeta long ol fasin mo toktok blong yumi. (Rom 13:1-7, NW) ?Bambae yumi mekem wanem, sipos yumi fesem ol haeman blong gavman we oli gat strong fasin? Long Chiapas State, Meksiko, ol haeman long wan vilej oli karemaot graon long 57 famle blong ol Witnes blong Jeova, from we ol Kristin ya oli no wantem joen long sam lafet blong jos. Ol man ya oli mekem plante miting blong stretem bisnes ya, mo oltaem ol Witnes oli kam long ol miting ya we oli klin mo oli dres gud mo oli tok long fasin we i soem respek. Bitim wan yia biaen, disisen we i kamaot i tekem saed blong ol Witnes. Fasin we ol Witnes oli soemaot i winim respek blong ol man we oli stap long miting ya, mekem se sam long olgeta tu oli wantem kam witnes blong Jeova.
12. ?From wanem i impoten tumas we waef i “gat ona” long hasban blong hem we i no bilif?
12 ?Olsem wanem yu save soemaot respek long olgeta we God i putumap olsem hed insaed long famle? Afta we aposol Pita i tokbaot eksampel blong Jisas long fasin blong harem nogud taem ol man oli agensem hem, hem i talem se: “Nao long sem fasin, yufala ol woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta.” (1 Pita 3:1, 2; Efesas 5:22-24) Long vas ya, Pita i makem se i impoten tumas blong waef i obei mo “gat ona” long hasban blong hem, nating se sam hasban oli no mekem plante samting we i stret blong kasem respek ya. Maet respek we waef i gat, i save pulum hasban blong hem we i no bilif.
13. ?Olsem wanem ol waef oli save soem ona long hasban blong olgeta?
13 Long ol vas we oli stap raonabaot long vas ya, Pita i pulum tingting blong yumi i go long eksampel blong Sera, we hasban blong hem, Ebraham, i soemaot wan nambawan eksampel long fasin blong bilif. (Rom 4:16, 17; Galesia 3:6-9; 1 Pita 3:6) ?Ol waef we hasban blong olgeta i bilif, oli mas soem ona olsem ol waef we hasban blong olgeta i no bilif? ?Olsem wanem sipos yu no agri wetem hasban blong yu long wan samting? Jisas i givim advaes we i stret long yumi evriwan se: “Sipos wan soldia blong ol man Rom i fosem yu blong yu karem basket blong hem wan kilometa, olsem we hem i gat raet blong mekem, be yu mas karem i go wan kilometa bakegen.” (Matiu 5:41) ?Yu yu mekem olgeta samting we hasban blong yu i wantem mo long rod ya, soem ona long hem? Sipos yu faenem se samting ya i hadwok tumas, talemaot filing blong yu long hasban blong yu. Yu no mas ting se hem i save filing blong yu finis. Nao taem yu talemaot tingting blong yu, yu mas mekem long wan fasin we i soem respek. Baebol i givim advaes long yumi se: “Yufala i mas toktok gud long olgeta, long ol tok we olgeta oli save glad long hem. Mo yufala i mas save rod blong givim ansa long evri man, we i stret gud long olgeta evriwan.”—Kolosi 4:6.
14. ?I minim wanem blong soem ona long papa mama?
14 ?Olsem wanem long yufala pikinini? Tok blong God i givim oda se: “Ol pikinini. Yufala i mas obei long papa mo mama blong yufala, from we yufala i joen long Masta blong yumi. Hemia i stret fasin blong yufala i mekem. Loa ya we i talem se, ‘Yufala i mas ona long papa mo mama blong yufala,’ hemia i faswan long ol loa ya we i gat promes i stap long hem.” (Efesas 6:1-3) Makemgud se, long vas ya fasin blong obei long papa mo mama blong yu i olsem fasin blong ‘ona long tufala.’ Grik tok ya we oli tanem i kam “ona” i karem mining blong “tinghae” no “putum wan sas praes long wan samting.” Taswe, fasin obei i no minim se yu folem nomo ol rul blong papa mama blong yu, nating sipos yu no rili wantem from we yu ting se oli strong tumas. Nogat. God i askem se yu tinghae long papa mo mama blong yu mo tinghae long ol rul blong tufala.—Ol Proveb 15:5.
15. ?Olsem wanem ol pikinini oli save gat respek long papa mama blong olgeta, nating se oli ting se tufala ya i mestem?
15 ?Sipos papa mama blong yu tufala i mekem wan samting we i daonem respek we yu gat long tufala, bambae yu mekem wanem? Traem kasem save long tingting blong tufala. Tufala i “bonem yu” mo i lukaot long yu. (Ol Proveb 23:22) ?Yu no ting se lav we tufala i gat long yu i gat paoa long tufala? (Hibrus 12:7-11) Wetem fasin respek, toktok long papa mama blong yu, mo long kwaet fasin talemaot filing blong yu long saed blong bisnes ya. Nating se tufala i ansa long wan fasin we yu no glad long hem, yu no mas toktok long tufala long fasin we i no soem respek. (Ol Proveb 24:29) Rimemba olsem wanem Deved i soem respek long Sol, nating se king ya i no moa folem advaes blong God. Askem Jeova blong givhan long yu blong winim ol filing blong yu. Deved i talem se: “God i sefples blong yumi. I gud yufala i . . . talemaot ol trabol blong yufala long hem.”—Ol Sam 62:8; Ol Krae 3:25-27.
Soem Ona Long Olgeta We Oli Lidim Yumi
16. ?Yumi lanem wanem long eksampel blong ol giaman tija mo ol enjel?
16 Tabu spirit i putumap ol elda long kongregesen. Nating se i olsem, ol elda ya oli sinman mo oli save mestem. (Ol Sam 130:3; Prija 7:20; Ol Wok 20:28; Jemes 3:2) From samting ya, maet sam memba blong kongregesen oli harem nogud long ol elda. ?Bambae yumi mekem wanem sipos, long tingting blong yumi, ol elda oli no folem rod we i stret blong stretem wan bisnes long kongregesen? Makemgud olsem wanem ol giaman tija blong faswan handred yia oli defren olgeta long ol enjel: “Ol [giaman] tija ya oli stronghed, mo oli wantem folem tingting blong olgeta nomo. Oli no save ona long ol [“haeman,” NW], oli stap tok nogud nomo long olgeta. Be ol . . . enjel we oli hae moa, mo oli gat paoa moa . . . oli no save ripotem olgeta, mo oli no save tok nogud long olgeta [“from we oli gat respek long Jeova,” NW].” (2 Pita 2:10-13) Taem ol giaman tija oli stap tok nogud long “ol haeman”—hemia ol elda we oli gat wok insaed long Kristin kongregesen blong faswan handred yia—ol enjel oli no tok nogud long ol giaman tija ya we oli stap spolem fasin joengud blong ol brata. From we ol enjel oli gat wan posisen we i hae moa, mo tingting blong olgeta long saed blong fasin blong jajem man i klia moa, oli savegud wanem i kamaot long kongregesen. Be, “from we oli gat respek long Jeova,” oli letem God i jajem olgeta samting.—Hibrus 2:6, 7; Jud 9.
17. ?Olsem wanem bilif i save givhan long yu taem ol elda oli stretem sam problem mo yu ting se oli no mekem i stret?
17 Nating se samtaem ol samting oli no folem rod we i stret, yumi mas bilif se Jisas Kraes i stap wok olsem Hed blong Kristin kongregesen. ?Yu no ting se hem i save wanem i stap hapen long kongregesen blong hem long ful wol? Yumi mas respektem rod we hem i folem blong stretem wan bisnes mo luksave se hem i naf blong lukaot long ol samting blong kongregesen. Tru ya, ‘?yumi ting se yumi God, blong yumi save jajem ol brata blong yumi?’ (Jemes 4:12; 1 Korin 11:3; Kolosi 1:18) ?From wanem yu no talemaot ol wari blong yu long Jeova tru long prea?
18, 19. ?Yu save mekem wanem sipos yu ting se wan elda i mestem?
18 From we yumi sinman, samtaem bambae yumi fesem ol hadtaem no ol problem. Maet wan elda i mestem, mekem se tingting blong samfala i trabol. Sipos yumi hareap tumas blong tekem aksin long taem olsem, bambae yumi no save jenisim bisnes ya. Maet fasin ya i mekem nomo se problem ya i kam bigwan moa. Olgeta we oli luksave samting long saed blong spirit, bambae oli wet long Jeova blong stretem bisnes ya, mo sipos i nidim blong stretem brata ya, bambae Jeova nomo i mekem long stret taem mo rod blong Hem.—2 Timoti 3:16; Hibrus 12:7-11.
19 ?Be olsem wanem sipos samting we i hapen i mekem yu yu harem nogud? I nogud blong tokbaot bisnes ya long ol narafala long kongregesen, i moa gud yu go luk ol elda blong oli save givhan long yu. Wetem fasin respek yu mas talemaot olsem wanem bisnes ya i mekem yu yu harem nogud, mo no tok nogud long saed blong narafala. Yu mas gat “filing” long olgeta oltaem, mo respek, taem yu talemaot tingting blong yu. (1 Pita 3:8, NW) I nogud blong yusum ol tok we i blong stikim olgeta, be i gud blong trastem olgeta from we oli bigman long saed blong spirit. Soem fasin tangkiu from eni advaes blong Baebol we oli givim wetem kaen fasin blong leftemap tingting blong yu. Mo sipos i luk olsem se i nidim blong stretem sam narafala samting yet, trastem Jeova blong Hem i lidim ol elda blong mekem wanem we i gud mo i stret.—Galesia 6:10; 2 Tesalonaeka 3:13.
20. ?Bambae yumi tokbaot wanem long nekis stadi?
20 Be, i gat wan samting bakegen blong tingbaot long saed blong ona mo respek long olgeta we God i putumap blong lidim yumi. Olgeta we God i givim wok long olgeta oli mas soem respek tu long olgeta we oli stap long han blong olgeta. Bambae yumi tokbaot samting ya long nekis stadi.
?Bambae Yu Yu Ansa Olsem Wanem?
• ?Wanem ol gudfala risen we i mekem se yumi mas ona long olgeta we oli gat hae posisen mo paoa?
• ?Wanem tingting blong Jeova mo Jisas long man we i no soem respek long olgeta we God i putumap blong lidim ol man blong hem?
• ?Wanem sam gudfala eksampel blong olgeta we oli ona long ol man we God i putumap?
• ?Bambae yumi mekem wanem sipos i luk olsem se wan we i lidim yumi i mestem?
[Kwestin]
[Tok blong pija long pej 12]
Sera i soem dip respek long Ebraham we i gat hae posisen mo hem i hapi from
[Tok blong pija long pej 13]
Mikal i no soem respek long Deved from posisen blong hem olsem hed blong famle mo king
[Tok blong pija long pej 15]
“!Prea blong mi we Hae God i blokem mi, blong mi no mekem wan trabol long king blong yumi, we Hae God i jusumaot!”
[Tok blong pija long pej 16]
?From wanem yu no talemaot ol wari blong yu long Jeova tru long prea?