?Yu Yu Bilif Long Wanem We Yu No Save Luk?

TAEM wan man i talem se, ‘Mi bilif nomo long wanem we mi save luk,’ man ya i no rili minim samting we hem i talem. From we yumi evriwan, yumi bilif long ol samting we yumi no save luk.

Eksampel, taem yu stap long skul, maet yu bin mekem wan tes blong pruvum se i gat wan eria we paoa blong magnet i stap long hem. Maet tes ya i olsem: Kafsaedem ol makas blong aean antap long wan pis pepa. Ale, putum pepa ya antap long wan magnet. Taem yu seksekem pepa ya smol, ol makas blong aean bambae oli muf, olsem wan majik, i kam stret long ples we paoa blong magnet i strong moa mo oli mekemap wan hip folem mak blong paoa blong magnet we i stap aninit long pepa ya. Sipos yu  mekem samting ya, yu no save luk paoa blong magnet. Be yu luksave wanem we paoa blong hem i mekem long ol makas blong aean, nao samting ya i givim bigfala pruf se i gat paoa blong magnet i stap aninit long pepa ya.

I gat plante samting we yumi no save luk, be yumi bilif kwiktaem long ol samting ya. Taem yumi luk wan naesfala pija we man i pentem no wokem long wud, yumi bilif fulwan se wan man i bin pentem no wokem pija ya. ?Nao olsem wanem sipos yumi stap wajem wan wotafol no lukluk san we klosap i godaon? ?Bambae yumi tingbaot samting ya olsem wok blong wan bigfala Man we i gat gudhan blong wokem ol nambawan samting?

From Wanem Samfala Oli No Bilif

Samting we i narakaen se, ol tijing we sam man oli harem insaed long jos i mekem se oli no moa bilif long God. Hemia nao wanem we i hapen long wan man blong Nowei. Oli talem long hem se God i stap bonem ol man nogud long wan helfaea. Tingting blong man ya i fasfas, hem i no kasem save from wanem God i mas bonem ol man long faea. Nao from samting ya, hem i no moa bilif se i gat wan God i stap.

Be biaen, man ya i agri blong wan Witnes blong Jeova i givhan long hem blong jekemap poen ya long Baebol. Hem i sapraes tumas blong lanem se Baebol i no tijim se bambae God i bonem ol man nogud long wan helfaea. Baebol i talem se taem yumi ded, i olsem we yumi stap slip nomo. Taem yumi stap long gref, yumi no save harem i soa; yumi no moa save wan samting. (Prija 9:5, 10) Hem i lanem tu se ol man we God i jajem olgeta se oli rabis man, bambae oli stap foreva long beregraon. (Matiu 12:31, 32) Ol narafala ded man, bambae God i mekem olgeta oli laef bakegen long stret taem blong hem, mo oli gat hop blong laef foreva long Paradaes. (Jon 5:28, 29; 17:3) Wanem we Witnes ya i eksplenem, hem i klia mo i gat mining. Hem i laenap wetem tok ya blong Baebol se, “God i stamba blong fasin ya blong lavem man.” (1 Jon 4:8) Man ya, we i wantem tumas blog lanem moa, i gohed blong stadi long Tok blong God, nao biaen, hem i lavem God mo Baebol.

Samfala man oli no bilif se i gat wan God we i lavem ol man, from we i gat tumas trabol mo fasin we i no stret long wol ya. Oli agri wetem wan man Swiden we, wan dei, hem i poen i go antap long skae mo i askem se: “?Weswe i save gat wan strongfala God we i rij tumas i stap antap longwe, be daon long wol ya, ples i fulapgud long kruked fasin mo rabis fasin?” From we i no gat wan man i save ansa long kwestin blong hem, hem tu i no moa bilif se God i stap. Biaen hem i stat stadi Baebol wetem ol Witnes blong Jeova. Hem i faenem se Tok blong God i givim gudfala ansa long wan kwestin we ol man oli bin askem longtaem finis, se ?From wanem God i letem ol nogud fasin oli stap? *

 Man ya we i rili wantem save God, hem i lanem se ol fasin nogud oli no wan risen blong bilif se i no gat God i stap. Tingbaot eksampel ya: Wan man i wokem naef we i blong yusum blong katem mit. Ale, wan narafala man i go long stoa, i pem naef ya, mo i yusum, i no blong katem mit, be blong kilim man i ded. Yes, man ya i no yusum naef ya long stret rod. Be hemia i no wan risen blong bilivim se i no gat man i wokem naef ya. I sem mak, ol fasin nogud we ol man oli stap mekem long wol ya oli no wan risen blong bilif se i no gat God.

Baebol i tijim se ol wok blong God oli stret gud. “Oltaem hem i stap mekem ol samting we i stret, mo i stap mekem sem mak nomo long olgeta man.” (Dutronome 32:4) God i givim ol gudfala presen long man, be sam long ol presen ya, ol man oli yusum long rod we i no stret, nao samting ya i mekem se oli safa bigwan. (Jemes 1:17) Be bambae God i finisim fasin blong safa. Biaen, “ol man we tingting blong olgeta i stap daon, bambae oli tekem graon ya i blong olgeta, . . . mo bambae oli stap long hem gogo i no save finis.”—Ol Sam 37:11, 29.

Man Swiden we yumi tokbaot antap, hem i harem nogud tumas long filing blong hem taem hem i luk ol man we oli stap safa. Be, filing we man Swiden ya i gat i soemaot se i gat wan God i stap. ?Olsem wanem?

Plante man, sipos oli no bilif long God, oli bilif long evolusen. * Ol man blong evolusen oli tijim se ol man mo anamol we “oli strong bambae oli laef”—i olsem we ol man oli faet bitwin long olgeta mo ol anamol oli faet bitwin long olgeta blong traem kasem laef. Hemia we i strong, hem i laef; hemia we i slak, hem i ded. Oli talem se tingting ya i stret folem oda blong ol samting long wol. Be sipos i “stret” we ol slak man oli ded blong letem ol man we oli strong oli gat i naf ples blong laef, ?from wanem ol man we oli strong, olsem man Swiden antap, oli harem nogud tumas taem oli luk ol man we oli stap safa? ?Olsem wanem blong eksplenem poen ya?

Kasem Save Long God

Yumi no save luk God from we hem i no gat sem bodi olsem yumi man. Nating se i olsem, God i wantem se yumi save hem. Wan rod blong save hem, hemia taem yumi lukluk ol bigfala wok blong hem—we oli olsem “ol penting” mo “ol pija” we God i mekem. Long buk blong Rom 1:20, Baebol i talem se: “Yumi no save luk ol fasin ya blong [God] stret long ae blong yumi. Hem i God. Hem i stap oltaem, mo paoa blong hem i no save finis. Be i stat long taem ya we hem i mekem wol ya fastaem, i kam kasem tede, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem.” Yes, tingbaot pija we man i pentem no i wokem long wud. Taem yu stadi gud long pija olsem, samting ya i givhan long yu blong savegud fasin blong man we i wokem pija ya. Long sem fasin, sipos yu tingting dip long ol nambawan wok blong God, samting ya bambae i givhan long yu blong savegud ol fasin blong hem.

I tru se, yumi no save faenem ansa blong ol bigfala kwestin long saed blong laef, sipos yumi lukluk nomo long ol samting we God i wokem raonabaot long yumi. Be taem yumi stadi long Tok blong God, Baebol, yumi save faenem ansa blong ol kwestin olsem. Yes, fasin blong ridim Baebol wetem bigfala intres, hemia nao i givhan long tufala man we yumi tokbaot antap, nao tufala i kasem save se God i stap mo se hem i rili kea long yumi.

[Ol futnot]

[Credit Line blong pija long pej 28]

J. Hester and P. Scowen (AZ State Univ.), NASA