“Yufala Evriwan i Brata”
“Yufala Evriwan i Brata”
“Be yufala, bambae yufala i no letem ol man oli singaot yufala se ‘Tija,’ from we yufala i gat wan tija nomo, mo yufala evriwan i brata.”—MATIU 23:8.
1. ?Wanem kwestin we i gud blong tingbaot?
LONG wan kantri long Esia, wan Kristin woman i askem wan misinari blong Ostrelia se: “?Hu i mas kasem moa ona, wan misinari no wan man we i wok long Betel?” Woman ya i wantem save se yumi mas respektem hu moa, ?wan misinari blong narafala kantri no wan manples we i wok fultaem long branj ofis blong Watch Tower Society? Kwestin ya, we woman i askem wetem gudfala tingting, i mekem se misinari ya i sapraes mo i soemaot se long kantri ya ol man oli tinghae long nem mo posisen blong man. Be, kwestin long saed blong hu i hae moa, i rili kamaot from we ol man oli wantem save stret ples blong olgeta we oli gat paoa mo haenem antap long narafala.
2. ?Yumi mas gat wanem tingting long saed blong ol brata blong yumi we oli wosip long Jeova?
2 Be, i no naoia nomo we ol man oli tingbaot kwestin ya. Ol disaepol blong Jisas tu oli stap raorao oltaem se hu long olgeta i hae moa. (Matiu 20:20-24; Mak 9:33-37; Luk 22:24-27) Olgeta oli gruap wetem tingting blong ol man Jiu long faswan handred yia, se i impoten tumas blong gat haenem. Jisas i tingbaot samting ya taem hem i givim advaes long olgeta se: “Be yufala, bambae yufala i no letem ol man oli singaot yufala se tija, from we yufala i gat wan tija nomo, mo yufala evriwan i brata.” (Matiu 23:8) Wan man blong stadi Baebol, we nem blong hem Albert Barnes, i talem se, nem ya “Rabae,” we oli givim long ol lida blong skul, mo we i minim se “Tija,” “i pulum man blong mekem flas mo tingting se hem i hae moa long ol narafala, mo i save mekem ol narafala oli jalus mo oli harem se oli nating nomo, mo tingting we i kamaot from nem olsem i agensem ‘klia tijing blong Kraes.’” Yes, ol Kristin oli neva mas yusum taetel ya “Elda” taem oli kolem ol elda we oli stap wetem olgeta, olsem we oli yusum nem ya blong leftemap ol man ya. (Job 32:21, 22) Defren olgeta, ol elda we oli folem mining blong advaes we Jisas i givim, oli soem ona long ol narafala memba blong kongregesen, stret olsem we Jeova i soem ona long ol man we oli wosipim hem wetem fasin tru, mo olsem Jisas i soem ona long ol man blong hem.
Eksampel Blong Jeova Mo Jisas
3. ?Olsem wanem Jeova i ona long ol enjel blong hem?
3 Nating se Jeova i “Hae King,” hem i soem ona long ol man blong hem. I stat long taem we hem i wokem man, hem i letem olgeta oli joen wetem hem long ol wok blong hem. (Ol Sam 83:18) Taem hem i wokem faswan man long wol, Jeova i yusum stret Pikinini blong hem olsem “Nambawan Man blong Wok,” blong givhan long hem. (Ol Proveb 8:27-30, NW; Jenesis 1:26) Taem Jeova i mekem disisen blong spolem rabis King Ehab hem i askem ol enjel blong hem long heven blong talemaot tingting blong olgeta long saed blong fasin blong spolem king ya.—1 King 22:19-23.
4, 5. ?Olsem wanem Jeova i ona long ol man?
4 Jeova hem i Haefala Rula blong heven mo wol. (Dutronome 3:24) Hem i no nidim blong askem advaes long ol man. Be, hem i mekem tingting blong hem i stap daon, blong i lesin long olgeta. Man blong raetem Sam i singsing se: “Hae God i God blong yumi, mo i no gat man we i olsem hem. Hem i King, i stap sidaon long bigfala jea blong hem long ples blong hem antap, be hem i glad blong lukluk i kamdaon long skae mo graon. Hem i stap leftemap ol puaman.”—Ol Sam 113:5-8.
5 Bifo we Jeova i spolem Sodom mo Gomora, hem i lesin long ol kwestin we Ebraham i gat long saed blong bisnes ya, mo i mekem Ebraham i agri long fasin blong hem blong jajem man. (Jenesis 18:23-33) Jeova i save finis wanem we bambae i hapen. Nating se i olsem, wetem longfala tingting hem i lesin long ol kwestin blong Ebraham mo hem i agri long ol tingting blong hem.
6. ?Wanem gudfala frut i kamaot from we Jeova i soem ona taem Habakuk i askem kwestin long hem?
6 Jeova i lesin tu long Habakuk, we i askem se: “?Wetaem bambae yu harem mi, yu tekemaot mifala long ol trabol ya?” ?Jeova i gat tingting se kwestin blong Habakuk i agensem hae rul blong hem? !Nogat! Long tingting blong Jeova ol kwestin blong Habakuk oli stret. Taswe hem i talemaot stamba tingting blong hem blong yusum ol man Koldia blong mekem jajmen blong hem i kamtru. Hem i mekem tingting blong profet ya i strong, i se, ‘jajmen ya bambae i mas kamtru long stret taem blong hem.’ (Habakuk 1:1, 2, 5, 6, 13, 14; 2:2, 3) Jeova i soem ona long Habakuk, taem hem i tinghevi long ol wari blong hem mo i ansa long prea blong hem. Mo from samting ya, Habakuk we bifo i harem nogud, i glad bakegen mo i trastem fulwan God ya we i sevem hem. Yumi luksave tingting ya long ol profet tok we tabu spirit i pusum Habakuk blong raetem. Ol tok ya oli halpem yumi tede blong mekem se tras we yumi gat long Jeova i strong moa.—Habakuk 3:18, 19.
7. ?From wanem wok we Pita i mekem long Pentekos 33 K.T. i gat bigfala mining long hem?
7 Jisas Kraes tu i wan nambawan eksampel blong fasin blong soem respek long ol narafala. Jisas i talem long ol disaepol blong hem se “man we i talemaot long fes blong ol man, se hem i no man blong mi, bambae mi tu, mi talemaot long fes blong Papa blong mi long heven, se hem i no man blong mi.” (Matiu 10:32, 33) Be, long naet we oli letem Jisas i go long han blong ol enemi blong hem, olgeta disaepol blong hem oli lego hem, mo aposol Pita i talem tri taem se hem i no save Jisas. (Matiu 26:34, 35, 69-75) Jisas i no jajem Pita from fasin we hem i luk nomo, be hem i luksave ol filing we oli stap dip insaed long Pita, hem i luksave se Pita i tanem tingting blong hem from sin blong hem. (Luk 22:61, 62) Jes 51 dei biaen, long dei blong Pentekos, Kraes i soem ona long aposol ya we i tanem tingting blong hem from sin blong hem, taem hem i letem hem i lidim ol 120 disaepol blong Jisas mo yusum faswan long “ol ki blong kingdom.” (Matiu 16:19, NW; Ol Wok 2:14-40) Pita i kasem jans blong ‘kambak bakegen, mo mekem tingting blong ol brata blong hem i strong.’—Luk 22:31-33.
Ona Long Ol Memba Blong Famle
8, 9. ?Blong soem ona long waef blong hem, olsem wanem wan hasban i save folem fasin blong Jeova mo Jisas?
8 Ol hasban mo ol papa mama, oli mas traehad blong folem fasin blong Jeova mo Jisas taem oli mekem wok we God i givim blong lidim famle. Pita i givim advaes se: “Yufala ol man we i mared, yufala i mas tingbaotgud ol woman blong yufala long laef blong yufala long mared. Yufala i mas ona long ol woman blong yufala, from we oli no strong olsem yufala.” (1 Pita 3:7) Tingbaot se yu stap yusum wan naesfala plet we i save brok isi moa i bitim wan plet we oli wokem long wud. Ating bambae yu kea gud long plet ya moa i winim plet ya we oli wokem long wud, ?i tru? Wan hasban i save mekem olsem long waef blong hem, taem hem i folem eksampel blong Jeova. Hem i mas lesin long tingting blong waef blong hem taem hem i mekem ol disisen long famle. Tingbaot we Jeova i tekem taem blong lesin mo toktok wetem Ebraham. From we hasban i sinman, maet hem i no luksave evri samting insaed long wan bisnes. Taswe i waes blong hem i lesin long tingting blong waef blong hem, mo long rod ya, soem ona long hem.
9 Long ol kantri we tingting i strong se man nao i bos, wan hasban i mas luksave se maet tingting ya i mekem i had long waef blong hem blong talemaot ol dip filing blong hem. I gud blong folem fasin we Jisas Kraes i mekem long ol disaepol blong hem, taem hem i stap yet long wol. Ol disaepol oli haf blong grup ya we bambae oli kam woman blong hem. Jisas i lukaotgud long olgeta. Hem i luksave samting we oli naf blong mekem long saed blong bodi mo long saed blong spirit, nating se oli no talemaot yet ol samting ya long hem. (Mak 6:31; Jon 16:12, 13; Efesas 5:28-30) Mo tu, yu mas tektaem blong luk wanem wok we waef blong yu i mekem blong givhan long yu mo famle blong yu. Soemaot fasin tangkiu tru long ol tok mo fasin blong yu. Jeova mo Jisas tu, tufala i soemaot tangkiu, presem, mo blesem ol man we i stret blong oli kasem ol samting ya. (1 King 3:10-14; Job 42:12-15; Mak 12:41-44; Jon 12:3-8) Afta we hasban blong hem i kam wan Witnes blong Jeova, wan Kristin woman long Esia i talem se: “Bifo, taem hasban blong mi i wokbaot, hem i wokbaot fastaem, mi mi biaen. Mo mi mas karem evri samting. !Naoia, hem i karem ol basket mo hem i soemaot tangkiu long wanem we mi mekem long haos blong mifala!” Wan gudfala tok we i soem se yu rili gat fasin tangkiu, i save givhan long waef blong yu blong harem se yu tinghae long hem.—Ol Proveb 31:28.
10, 11. ?Ol papa mama oli lanem wanem long gudfala eksampel blong Jeova taem hem i stretem stronghed nesen blong Isrel?
10 Ol papa mama oli mas folem eksampel blong God taem oli lukaot long ol pikinini blong olgeta. Samting ya i tru moa taem i nidim blong stretem ol pikinini. “Hae God i stap sanem ol profet blong hem oli kam talemaot tok blong hem long ol man Isrel mo ol man Juda,” blong oli lego nogud fasin blong olgeta, be oli “stronghed tumas.” (2 King 17:13-15) Ol man Isrel oli talem ol tok we “i blong giaman nomo, i no gat wan samting we oli talem we i tru.” Ating plante papa mama oli harem se samtaem ol pikinini blong olgeta tu oli mekem fasin ya. Ol man Isrel ‘oli traem God’ mo mekem hem i harem soa, i harem nogud tumas. Be, nating se i olsem, Jeova “i gat sore long ol man blong hem, mo i fogivim olgeta, i tekemaot ol sin blong olgeta, nao i no spolem olgeta.”—Ol Sam 78:36-41.
11 Jeova i askem strong long ol man Isrel se: “Olgeta. I gud yufala i kam, yumi stretem bisnes ya naoia. Nating we ol sin blong yufala i mekem yufala i doti gud, be bambae mi mekem we yufala i klin we i klin.” (Aesea 1:18) Nating se i no Jeova we i mekem rong, be hem i singaot stronghed nesen ya blong kam mo stretem bisnes ya wetem hem. !Hemia wan nambawan eksampel blong ol papa mama oli folem taem oli stretem pikinini blong olgeta! Blong stretem wan bisnes maet i nidim we yu soem ona long olgeta taem yu rere blong lesin long tingting blong olgeta. Mo yu save givhan long olgeta blong luksave from wanem oli mas jenisim fasin blong olgeta.
12. (a) ?From wanem yumi mas lukaot long fasin blong ona moa long pikinini blong yumi i winim we yumi ona long Jeova? (b) ?Taem yumi stretem pikinini, yumi mas mekem wanem blong respektem raet we oli gat blong kasem ona?
12 I tru se, samtaem papa mama i mas tok strong long ol pikinini blong olgeta. Ol papa mama oli no wantem folem fasin blong Ilae, we i ‘leftemap tufala pikinini boe blong hem i hae moa long Jeova.’ (1 Samuel 2:29) Nating se i olsem, ol yangfala oli nidim blong luksave se lav nao i pusum papa mama blong stretem olgeta. Oli mas luksave se papa mama i rili lavem olgeta. Pol i givim advaes se: “Ol papa . . . Bambae yufala i no mas mekem ol samting long ol pikinini blong yufala we i save mekem olgeta oli kros. Yufala i mas lukaot gud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.” (Efesas 6:4) Makemgud se, wan papa we i mekem wok blong hem olsem hed blong famle, i soem se hem i tinghae long raet we pikinini i gat blong kasem respek, taem hem i no mekem pikinini i kros from we hem i mekem i strong tumas long pikinini ya. Yes, papa mama i nidim taem mo fasin traehad blong tingbaot raet we pikinini i gat blong kasem respek. Be, frut we bambae i kamaot from traehad ya, i gud moa i winim eni samting we tufala i bin lego.
13. ?Baebol i talem wanem long saed blong ol olfala insaed long famle?
13 Blong soem ona long ol memba blong famle i no minim nomo se yu respektem waef mo ol pikinini blong yu. Wan waes tok blong ol man Japan i talem se: “Obei long pikinini blong yu, taem yu kam olfala.” Bigfala poen long waes tok ya hemia se ol papa mama we oli kam olfala oli no mas bitim mak long raet we oli gat blong lidim famle, mo oli mas lesin long pikinini blong olgeta we oli bigman finis. I tru se Baebol i pulum ol papa mama blong soem ona long pikinini blong olgeta taem oli lesin long olgeta. Be, ol pikinini tu oli mas gat respek long tufala we oli olfala long famle. Ol Proveb 23:22 (NW) i talem se: “Yu no mas daonem mama blong yu from we hem i kam olfala.” King Solomon i soemaot se hem i folem ol tok ya mo i ona long mama blong hem, taem mama blong hem i kam long hem blong askem wan samting long hem. Solomon i talem long ol man blong oli tekem wan jea i kam putum long raetsaed blong hem, nao hem i lesin long wanem we olfala mama blong hem, Batseba, i wantem talem long hem.—1 King 2:19, 20.
14. ?Olsem wanem yumi save soem ona long ol olfala memba blong kongregesen?
14 Long bigfala famle blong yumi long saed blong spirit, ‘oltaem yumi mas rere’ blong soem ona long ol memba blong kongregesen we oli olfala moa long yumi. (Rom 12:10) Maet oli no moa save mekem plante samting olsem long taem we oli yangfala, mo samting ya i save mekem se oli harem nogud. (Prija 12:1-7) Wan olfala Witnes we tabu spirit i makemaot hem, mo we i slip long hospital from we hem i no moa save wokbaot, i soemaot filing blong hem taem hem i talem se: “Mi no save wet blong ded, olsem nao bambae mi save stat blong wok bakegen.” Yumi save givhan long ol olfala ya, taem yumi soem se yumi tingbaot olgeta mo ona long olgeta. God i givim loa long ol man Isrel se: “Long fored blong waet hea yu mas stanap, mo yu mas keagud long man we i olfala.” (Levitikas 19:32, NW) Yumi save soemaot we yumi keagud long olgeta sipos yumi mekem ol olfala ya oli harem save se yumi nidim olgeta mo yumi gat tangkiu from olgeta. Blong ‘stanap’ i save minim tu se yumi sidaon mo lesin long ol storian blong laef blong olgeta bifo. Fasin ya i soem ona long ol olfala mo i save mekem se yumi kam rij moa long saed blong spirit.
‘Oltaem Yumi Mas Rere Blong Ona Long Yumi’
15. ?Ol elda oli save mekem wanem blong soem se oli gat respek long ol memba blong kongregesen?
15 Ol memba blong kongregesen oli karem plante blesing taem ol elda oli soem wan gudfala eksampel long olgeta. (1 Pita 5:2, 3) Nating se ol elda oli bisi tumas, oli soem fasin kea taem oli go storian wetem ol yangfala, ol hed blong famle, ol mama we olgeta wan oli lukaot long pikinini blong olgeta, ol waef we oli mekem bigfala wok long haos, mo ol olfala, nomata sipos oli gat problem no nogat. Ol elda oli lesin long wanem we ol memba blong kongregesen oli wantem talem, mo oli presem olgeta from wok we oli naf blong mekem. Wan elda we i gat fasin luksave mo i talem ol gudfala tok long saed blong ol samting we ol brata sista oli naf blong mekem, hem i folem eksampel blong Jeova we i rili glad long ol man blong hem long wol.
16. ?From wanem i stret we yumi ona long ol narafala memba blong kongregesen long sem fasin we yumi ona long ol elda?
16 Taem ol elda oli folemgud fasin blong Jeova, oli soemaot rod blong folem advaes we Pol i givim se: “Yufala i mas lavlavem yufala olsem we yufala i wan brata nomo from we yufala i joen long Kraes, mo oltaem yufala i mas rere blong ona long yufala.” (Rom 12:10) Samting ya i had moa long ol elda we oli stap long ol kantri we ol man oli tinghae long nem mo posisen blong man. Eksampel, long wan kantri long Esia, i gat tu tok blong talem “brata.” Wan we oli yusum olsem wan taetel nem blong singaot man we i gat haenem, mo narafala tok i blong yusum long ol man we oli no gat nem. Bifo finis i kam, ol memba blong kongregesen oli yusum taetel nem ya blong singaot ol elda mo olgeta we oli olfala, mo oli yusum narafala tok blong singaot olgeta we oli no gat nem. Be biaen, oli kasem advaes blong no moa yusum taetel nem ya, be blong yusum narafala tok ya nomo blong evriwan long kongregesen, from we Jisas i talem long ol man blong hem se, “yufala evriwan i brata.” (Matiu 23:8) Nating se fasin ya blong seraotem haeman long man nating, i no stap long klia ples long ol narafala kantri, be yumi evriwan i mas luksave se hemia fasin blong man blong seraotem man long ol defren grup folem posisen blong olgeta.—Jemes 2:4.
17. (a) ?From wanem ol memba blong kongregesen oli no mas fraet blong toktok long ol elda? (b) ?Olsem wanem ol elda oli save folem fasin blong Jeova taem oli wok wetem ol memba blong kongregesen?
17 I tru se, Pol i leftemap tingting blong yumi blong givim “dabol ona” long sam elda we i stret blong kasem ona ya, be nating se i olsem, olgeta ya oli stap yet olsem brata blong yumi. (1 Timoti 5:17, NW) Sipos yumi “fri blong tok long fored blong jea blong God we i gat gladhat,” we hem i Haefala King blong heven mo wol, yumi no mas fraet tu blong toktok long ol elda, we oli folem fasin blong Jeova. (Hibrus 4:16, NW; Efesas 5:1) Ol elda oli save luksave sipos ol narafala oli faenem i isi blong kam toktok wetem olgeta no nogat, taem oli tingbaot hamas taem nao ol narafala oli bin kam askem advaes no givim tingting blong olgeta. Fasin blong Jeova blong yusum ol narafala long ol wok blong hem, i save tijim yumi long rod blong folem. Jeova i soem ona long ol narafala taem hem i letem sam wok blong hem i go long olgeta blong oli mekem. Maet i luk olsem se advaes we wan narafala Witnes i givim i no save wokgud, be ol elda oli mas glad from fasin kea we Witnes ya i soem. Tingbaot fasin we Jeova i mekem long Ebraham we i gohed blong askem ol kwestin long hem, mo Habakuk we i krae i go long hem from we hem i harem nogud.
18. ?Olsem wanem ol elda oli save folem fasin blong Jeova taem oli stretem wan we i nidim help?
18 Sam Kristin brata oli nidim fasin stretem. (Galesia 6:1) Be nating se i olsem, oli sas long ae blong Jeova, mo i stret blong yumi soem respek long olgeta. Wan Witnes i talem se: “Taem wan we i givim advaes long mi, i soem respek long mi, mi harem se mi no fraet blong go luk hem.” Bighaf blong ol man oli glad blong lesin long advaes sipos man we i givim advaes i soem respek long olgeta. Maet i tektaem lelebet, be taem yu lesingud long olgeta we oli mestem, bambae i isi moa long olgeta blong akseptem advaes we oli nidim. Tingbaot olsem wanem Jeova i toktok bakegen mo bakegen wetem ol man Isrel blong mekem olgeta oli tingting, from we hem i gat sore long olgeta. (2 Kronikel 36:15; Taetas 3:2) Taem advaes we yu givim i soemaot se yu kasem save long filing blong man we i nidim help mo se yu sore long hem, bambae yu tajem hat blong hem.—Ol Proveb 17:17; Filipae 2:2, 3; 1 Pita 3:8.
19. ?Wanem tingting blong yu long saed blong ol man we oli no gat sem Kristin bilif olsem yumi?
19 Blong soem ona long ol narafala, i minim olgeta ya tu we maet wan dei oli kam brata blong yumi long saed blong spirit. Maet ol man ya oli slou naoia blong akseptem mesej blong yumi, be yumi mas gat longfala tingting mo luksave se olgeta tu oli gat raet blong kasem ona. Jeova “i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) ?Yu no ting se i stret we yumi gat sem tingting olsem Jeova? Sipos oltaem yumi tingbaot ol man raonabaot long yumi, bambae yumi openem rod blong givim witnes long olgeta. I tru se, yumi no joen wetem olgeta sipos fasin blong olgeta i save spolem yumi long saed blong spirit. (1 Korin 15:33) Be yumi save soem “kaengud fasin” long olgeta, mo yumi no daonem olgeta jes from we oli no bilif olsem yumi.—Ol Wok 27:3, NW.
20. ?Eksampel blong Jeova mo Jisas i pulum yumi blong mekem wanem?
20 Yes, long tingting blong Jeova mo Jisas, i stret blong yumi wanwan i kasem ona. Yumi neva mas fogetem fasin we tufala i mekem mo yumi mas rere oltaem blong folem fasin ya mo ona long evriwan. Mo i gud yumi neva fogetem ol tok blong Masta blong yumi Jisas Kraes se: “Yufala evriwan i brata.”—Matiu 23:8.
?Bambae Yu Yu Ansa Olsem Wanem?
• ?Wanem tingting blong yumi long saed blong ol narafala we oli wosip long Jeova?
• ?Olsem wanem eksampel blong Jeova mo Jisas i pulum yumi blong ona long ol narafala?
• ?Olsem wanem ol hasban mo ol papa mama oli soem ona long ol narafala?
• From we ol elda oli tingbaot ol Kristin olsem brata blong olgeta, ?samting ya i pulum olgeta blong mekem wanem?
[Kwestin]
[Tok blong pija long pej 18]
Yu ona long waef blong yu, taem yu talem ol tok we oli soem fasin tangkiu blong yu
[Tok blong pija long pej 18]
Soem respek long pikinini blong yu taem yu lesin long olgeta
[Tok blong pija long pej 18]
Fasin we yu mekem long ol memba blong kongregesen i mas soem se yu respektem olgeta