Ol Kristin Man Blong Lukaot Long Sipsip, !‘Openem Hat Blong Yufala’!

“HAE GOD i stap lukaot gud long mi olsem we mi mi sipsip blong hem, nao mi no save sot long wan samting.” Hemia ol tok blong Deved we oli soemaot se hem i trastem God blong hem fulwan. Jeova i lidim hem, long saed blong spirit, i go long ol “ples we i gat gudfala gras” mo “long kwaet ples we wota i stap ron smol long hem.” Hem i stap lidim Deved “long ol stret rod.” Nating se plante man blong agens oli kam raon long Deved, be hem i kasem paoa mo strong tingting. Taswe hem i talem long Jeova se: “Mi mi no save fraet long wan samting, from we yu yu stap wetem mi.” From Bigfala Man ya blong Lukaot Long Sipsip, Deved i gat strong tingting blong ‘stap long haos blong God olsem we i hom blong hem olwe nomo.’—Ol Sam 23:1-6.

Wan Pikinini ya nomo we God i gat, hem tu i harem save lav mo fasin kea blong Jeova. Mo hem i soemaot semfala fasin kea ya, taem hem i stap wetem ol disaepol blong hem long wol. Taswe Baebol i tokbaot hem olsem “gudfala man ya blong lukaot long sipsip,” mo “nambawan man blong lukaot long ol sipsip.”—Jon 10:11; Hibrus 13:20; 1 Pita 5:2-4.

Jeova mo Jisas Kraes, tufala i gohed blong lidim ol man we oli lavem tufala. Tufala i soemaot samting ya taem tufala i givim, wetem lav, ol man blong lukaot long sipsip insaed long kongregesen. Pol i toktok long olgeta ya we oli mekem wok olsem ol man blong lukaot long sipsip, i se: “Yufala i mas lukaot gud long yufala, mo long ol man ya we [tabu spirit] i putum olgeta oli stap finis long han blong yufala. Yufala i mas lukaot long ol man blong [“kongregesen,” NW] blong God, olsem we man blong lukaot long sipsip i stap lukaot long ol sipsip blong hem. Yufala i mas mekem olsem, from we God i pemaot ol man ya finis long blad blong Pikinini blong hem.”—Ol Wok 20:28.

Wok blong lukaot long ol sipsip folem eksampel blong Jeova mo Jisas Kraes, i no isi nating, be hem i impoten moa naoia i bitim ol narafala taem bifo. !Tingbaot olgeta milian Witnes we oli tekem baptaes long ol tri yia we oli jes pas! Ol niuwan ya oli no spenem plante yia yet long ol wok long saed blong spirit, taswe oli no gat wan strongfala fandesen. Mo tu, tingbaot ol Witnes ya we oli pikinini yet, no we oli yangfala. I no naf we papa mama nomo blong olgeta ya i soem intres long olgeta. Oli nidim tu se, ol man blong lukaot long sipsip insaed long kongregesen oli intres long olgeta.

Yes, olgeta Kristin oli fesem ol traem blong wol ya, olsem traem we i kamaot long ol nogud fren. Olgeta evriwan oli mas faet strong agensem paoa ya we i wantem pulum olgeta blong folem rod blong wol ya, we ol man blong hem oli ronem samting we olgeta nomo i wantem. Long sam kantri, ol pablisa blong Kingdom maet oli harem se tingting blong olgeta i foldaon from we i no gat man i lesin long mesej blong olgeta. Plante pablisa oli gat sam bigfala problem long helt blong olgeta. Ol trabol long saed blong mane maet oli stap pulum tingting blong samfala blong oli no moa putum Kingdom fastaem. Blong talem stret, yumi evriwan—wetem olgeta ya tu we oli stap longtaem finis long trutok—yumi nidim help we i kam long ol man blong lukaot long sipsip we oli gat lav.

Stretfala Tingting We i Pusum Olgeta Blong Wok

Ol Kristin blong faswan handred yia oli kasem advaes ya se: !‘Openem hat blong yufala’! (2 Korin 6:11-13) Ol Kristin elda oli waes blong folem advaes ya taem oli stap mekem wok blong lukaot long ol sipsip. ?Oli save mekem samting ya olsem wanem? ?Mo olsem wanem long ol man blong givhan, we plante long olgeta oli save kam ol man blong lukaot long sipsip?

Ol Kristin elda oli save karem blesing i kam long ol sipsip, sipos oli no tingbaot samting ya olsem wok nomo we oli mas mekem. Nogat. I mas gat wan narafala tingting we i pusum olgeta blong mekem wok ya. Advaes ya i go long olgeta se: “Yufala i mas lukaot gud long ol man we God i givim long yufala, olsem we man blong lukaot long sipsip i stap lukaot gud long ol sipsip blong hem. Yufala i mas lukaot gud long olgeta, we tingting blong yufala i glad blong mekem, olsem we God i wantem. I nogud yufala i mekem blong kasem pei nomo. Yufala i mas mekem from we yufala i glad long hem.” (1 Pita 5:2) Taswe  blong karem gudfala frut long wok blong olgeta, ol man blong lukaot long sipsip oli mas rere mo wantem blong givhan long ol narafala. (Jon 21:15-17) I minim se oli mas luksave nid blong ol sipsip mo tekem aksin kwiktaem blong givhan long olgeta. I minim tu se, taem oli toktok no wok wetem ol narafala, oli soemaot ol nambawan Kristin fasin we oli ol frut blong tabu spirit blong God.—Galesia 5:22, 23.

Wok blong lukaot long sipsip i minim se samtaem oli mas visitim ol brata long haos blong olgeta wanwan. * Be ol man blong lukaot long sipsip, we oli ‘openem hat blong olgeta,’ oli go moa blong mekem olsem. Samting ya i minim se, oli no visitim olgeta ya nomo we oli slak. Be oli yusum evri jans blong lidim mo lukaot long olgeta narafala sipsip we oli stap long han blong olgeta.

Trenem Narafala Blong Kam Man Blong Lukaot Long Sipsip

Nomata hamas yia we wan brata i gat, be sipos hem i ‘wantem kam wan elda insaed long kongregesen, hem i wantem wan gudfala wok ya.’ (1 Timoti 3:1, NW) Plante man blong givhan oli soemaot klia se oli wantem kasem moa wok. Ol elda oli glad blong halpem ol brata ya we oli rere blong wok, blong oli tekem impoten step ya blong ‘kam wan elda.’ Hemia i min se oli mas trenem olgeta blong oli save mekem wok ya blong lukaot long sipsip long fasin we i karem frut.

Kristin kongregesen blong Jeova i fasgud long ol haefala rul blong God, taswe hem i no kam slak from ol rabis man ya blong lukaot long sipsip we Esikel 34:2-6 i tokbaot. Long ae blong Jeova, ol man ya oli rabis olgeta, mo i stret nomo we hem i tingting olsem long saed blong olgeta. Tru ya, oli no stap givim kakae long ol sipsip blong God, be olgeta nomo oli stap kakae. Olgeta we oli sik, be oli no mekem olgeta oli kam strong bakegen, oli no lukaot gud long olgeta we oli harem nogud, oli no fasem soa blong olgeta we oli karekil, mo oli no go lukaot olgeta we oli lus, blong tekem olgeta oli kambak. Oli no mekem wok blong lukaot long ol sipsip, be oli olsem wael dog nomo we oli stap givim hadtaem long ol sipsip. Ol sipsip ya we oli no gat man blong lidim olgeta, oli stap wokbaot olbaot nomo, oli no gat man we i kea long olgeta.—Jeremaea 23:1, 2; Neham 3:18; Matiu 9:36.

Ol Kristin man blong lukaot long sipsip oli folem eksampel blong Jeova, oli defren olgeta long ol rabis man ya blong lukaot long sipsip. Oli wok blong lidim ol sipsip i go long ol ples we, long saed blong spirit, oli gat “gudfala gras” mo oli “kwaet ples we wota i stap ron smol long hem.” Oli traehad blong lidim ol sipsip i go “long ol stret rod” taem oli givhan long olgeta blong kasem stret save long Tok blong Jeova mo blong mekem ol tok ya oli wok long laef blong olgeta wanwan. Oli naf gud blong mekem samting ya from we oli “savegud fasin blong tij.”—1 Timoti 3:2.

Bighaf blong ol tijing we ol elda oli givim, oli mekem taem oli stap stanap long platfom long taem blong ol miting blong kongregesen. Be, ol elda wanwan oli save mekem wok ya blong tij long enitaem. I tru, sam elda oli gat gudhan moa blong tijim ol man wanwan, mo sam narafala elda oli gat gudhan moa blong givim pablik tok. Be, sipos i gat wan rod blong tij, we wan elda maet i no gat gudhan long hem, samting ya i no minim se hem i no save stap olsem wan tija. Ol elda oli man blong tij, taswe oli tekem evri rod we i stap fored long olgeta blong tijim narafala, olsem wok blong visitim ol brata sista long haos blong olgeta. Samtaem oli mekem ol visit ya taem we oli mekem plan wetem narafala fastaem. Be bighaf blong ol visit ya ol elda oli save mekem nomo taem we oli no mekem plan wetem narafala fastaem, hemia tu i wan rod we i karem gudfala frut.

Oli Lidim Sipsip Mo Tij Oltaem

Wan dokta i nidim save mo ekspiriens blong mekem gud wok blong hem. Be ol sikman we oli kam long hem oli harem gud taem hem i soem kaen fasin, fasin sore, wari, mo trufala intres long olgeta tu. Ol fasin ya, hem wan nomo bambae i mas wokem long laef blong hem. Wan gudfala tija mo man blong lukaot long sipsip i mas wokem ol semfala fasin ya tu, long laef blong hem evri dei. Wan trufala tija bambae i rere oltaem blong tijim ol man raonabaot long hem long enitaem we oli nidim. Ol Proveb 15:23 (NW) i talem se: “!Wan tok long stret taem blong hem, i gud tumas!” “Stret taem” ya maet hemia taem hem i stap givim tok long platfom, taem hem i stap prij long ol haos wanwan, no taem hem i stap storian wetem narawan long Haos Kingdom no long telefon. Mo tu, wan gudfala man blong lukaot long sipsip i traehad blong soemaot ol nambawan fasin oltaem, i no long taem ya nomo we hem i visitim olgeta we oli slak. From we hem i ‘openem hat blong hem,’ hem i tekem evri jans blong lidim ol sipsip, mo i kea gud long nid we oli gat long stret taem. Ol fasin ya nao, oli mekem se ol sipsip oli lavem hem tumas.—Mak 10:43.

Wolfgang, we naoia hem i wan elda, i tingbaot taem ya we wan man blong givhan wetem waef blong hem, tufala i kam visitim famle blong hem, jes blong  storian nomo. Hem i se: “Ol pikinini blong mifala oli glad tumas long intres we tufala i soem long olgeta, mo gud taem ya we mifala i gat tugeta. Kam kasem tede, oli stap tokbaot taem ya yet.” Yes, man ya blong givhan i soem se hem i kea; hem i rili ‘openem hat blong hem.’

Wan narafala rod we ol elda oli save ‘openem hat blong olgeta’ hemia taem oli visitim olgeta we oli sik, sanem wan smol leta blong leftemap tingting blong olgeta, no telefon i go long olgeta—!yes, mekem eni samting we i save soemaot long sikman ya se yu kea! Sipos oli nidim help, talem long olgeta se yu glad blong givhan. Sipos oli wantem toktok, lesin gud long olgeta. Tokbaot ol gudfala tiokratik wok we oli stap gohed long kongregesen blong yufala, no long sam narafala ples bakegen. Givhan long olgeta blong putum tingting blong olgeta i stap long nambawan fiuja we i stap blong ol man ya we oli lavem Jeova.—2 Korin 4:16-18.

Wok Ya Blong Visitim Ol Brata Sista i No Naf

I gud blong tingbaot stamba tingting we i stap biaen long wok ya blong lukaot long ol sipsip. I klia se, fasin blong mekem plan blong visitim ol wanwan brata long haos blong olgeta i impoten tumas, be hem i wan haf nomo blong wok ya blong lukaot long ol sipsip. Wan man blong lukaot long sipsip, we i gat lav, hem i ‘openem hat blong hem’ sipos hem i mekem se ol narafala oli no fraet blong kam long hem long eni taem mo wetem enikaen problem we oli gat. Gudfala fasin fren we hem i gat wetem ol brata blong hem, i givhan long ol brata ya blong sua fulwan se long ol taem blong trabol, bambae oli no nid blong fraet long samting nogud, from we oli save se gudfala brata blong olgeta, Kristin  man ya blong lukaot long ol sipsip, bambae i kea gud long olgeta.—Ol Sam 23:4.

Yes, yufala evriwan Kristin man blong lukaot long ol sipsip, yufala i mas ‘openem hat blong yufala.’ Soemaot trufala lav long ol brata blong yu—yusum evri rod we i stap blong leftemap tingting blong olgeta, mekem olgeta oli harem gud bakegen, mo bildimap olgeta long saed blong spirit. Halpem olgeta blong stanap strong long bilif. (Kolosi 1:23) Ol sipsip bambae oli no save sot long wan samting sipos oli gat ol Kristin man blong lukaot long sipsip we oli ‘openem hat blong olgeta.’ Bambae oli gat strong tingting, olsem Deved, blong stap long haos blong Jeova blong olwe. (Ol Sam 23:1, 6) Hemia nao samting we wan gudfala man blong lukaot long sipsip i wantem ol sipsip blong mekem.

[Futnot]

[Bokis blong pija long pej 30]

Ol Kristin Man Blong Lukaot Long Sipsip

• Oli mas wantem tumas mo rere oltaem blong wok

• Oli givim kakae mo kea gud long ol sipsip

• Oli halpem ol narafala blong kasem mak ya blong kam man blong lukaot long sipsip

• Oli visitim olgeta we oli sik mo oli kea gud long olgeta

• Oli luksave nid mo halpem kwiktaem ol brata blong olgeta

[Tok blong pija long pej 31]

Ol elda oli mekem wok blong lukaot long sipsip oltaem, nomata se oli stap long wok blong prij, long ol miting, no long taem blong spel, blong harem gud wetem narafala