Planem Ol Sid Blong Trutok Blong Kingdom
Planem Ol Sid Blong Trutok Blong Kingdom
“Yu mas planem ol kakae long garen blong yu long moning, mo long sapa tu.”—PRIJA 11:6.
1. ?Long wanem rod ol Kristin oli stap joen long wan wok blong planem sid tede?
FASIN blong planem garen i impoten tumas long ol man Isrel bifo. Hemia nao from wanem Jisas, we i spenem ful laef blong hem long Promes Lan taem hem i stap long wol ya, i tokbaot plante pijatok we oli joen wetem garen. Eksampel, hem i talem se man we i stap talemaot Kingdom, hem i olsem man we i planem sid. (Matiu 13:1-9, 18-23; Luk 8:5-15) Long taem blong yumi, nomata we yu stap long wan ples we ol man oli wok plante long garen no nogat, fasin blong planem sid long saed blong spirit i wan impoten wok we ol Kristin oli mekem.
2. ?Wok blong prij we yumi stap mekem i impoten olsem wanem, mo wanem sam long ol samting we tede oli stap givhan long yumi blong mekem wok ya?
2 Long taem ya blong en, hem i wan bigfala blesing blong joen long wok ya blong planem ol trutok blong Baebol. Rom 10:14, 15, i soemaot se wok ya i impoten tumas, i se: “?Sipos God i no sanem ol man oli go blong talemaot nius blong hem, bambae ol man oli save go olsem wanem? ?Mo sipos man i no go talemaot nius blong God, bambae ol man oli save harem nius ya olsem wanem? ?Mo sipos ol man oli no harem nius ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem? Taswe Baebol i talem se, ‘Samting ya i gud tumas, we ol man oli wokbaot i kam blong talemaot gud nius long yumi.’” Naoia, i impoten moa, blong gat strong tingting mo gohed long wok ya we God i givim. From samting ya, ol Witnes blong Jeova oli bisi blong wokem mo seremaot ol Baebol mo ol buk we oli givhan blong stadi Baebol long 340 lanwis. Blong wokem ol buk ya, i gat moa long 18,000 man mo woman we oli wok fri nomo long ol hedkwota mo branj ofis blong ol Witnes long ol defren kantri. Mo klosap sikis milian Witnes raon long wol, oli joen blong seremaot ol buk ya we oli stanap long Baebol.
3. ?Wanem samting i kamaot from wok ya blong planem trutok blong Kingdom?
3 ?Wanem frut i kamaot from hadwok ya? Olsem Kristin Skul bifo, taem we hem i jes stanap nomo, tede tu, plante man oli stap akseptem trutok. (Ol Wok 2:41, 46, 47) Be samting we i moa impoten, i no bigfala namba blong ol niuwan we oli baptaes blong kam man blong talemaot Kingdom, be hemia se bigfala wok ya blong prij i givim ona long nem blong Jeova mo i leftemap hem olsem trufala God. (Matiu 6:9) Mo tu, save long Tok blong God i jenisim laef blong plante man mo i save lidim olgeta long rod blong sef.—Ol Wok 13:47.
4. ?Olsem wanem ol aposol oli tingbaot ol man we oli prij long olgeta?
4 Ol aposol oli luksave se gud nius ya we i save givim laef i impoten tumas, mo oli gat dip filing long ol man we oli talemaot gud nius long olgeta. Samting ya i klia long tok blong aposol Pol, taem hem i raetem se: “Mifala i no tingbaot blong talemaot gud nius ya nomo long yufala. Mifala i rere tu blong lego laef blong mifala from we mifala i lavem yufala, mo mifala i wantem tumas blong givhan long yufala.” (1 Tesalonaeka 2:8) Pol mo ol narafala aposol oli soemaot se oli rili tingbaot ol man. Long rod ya, oli folem eksampel blong Jisas mo ol enjel blong heven we oli joen bigwan long wok ya blong sevem laef. Naoia bambae yumi tokbaot impoten wok we ol man blong God long heven oli stap mekem blong planem sid blong trutok blong Kingdom. Bambae yumi luk olsem wanem eksampel blong olgeta i save givhan long yumi blong mekem wok ya we God i givim long yumi.
Jisas—Man We i Planem Sid Blong Trutok Blong Kingdom
5. ?Wanem faswan wok we Jisas i bisi blong mekem taem hem i stap long wol?
5 Jisas, wan man we i stret olgeta, i gat paoa blong givim plante gudfala samting long saed blong bodi we ol man oli nidim long taem blong hem. Eksampel, hem i naf blong stretem plante rong tingting we ol man long taem blong hem oli gat long saed blong meresin, mo hem i naf tu blong givim moa save long man long saed blong sayens. Be hem i no mekem olsem. Stret afta we hem i statem minista wok blong hem, hem i soemaot klia se wok we hem i kam blong mekem, hemia blong talemaot gud nius. (Luk 4:17-21) Mo klosap long en blong minista wok blong hem, hem i eksplenem se: “Mi mi bon, mi kam long wol ya blong wan samting nomo, blong mi talemaot ol tok we i tru.” (Jon 18:37) Taswe, Jisas i rili bisi long wok blong planem ol sid blong trutok blong Kingdom. Hem i tijim ol man long taem blong hem blong oli save God mo ol stamba tingting blong Hem. Wanem we Jisas i tijim long olgeta i moa impoten i winim eni narafala tijing we hem i save givim long olgeta.—Rom 11:33-36.
6, 7. (a) ?Wanem nambawan promes we Jisas i mekem bifo we hem i go antap long heven, mo olsem wanem hem i mekem promes ya i kamtru? (b) ?Olsem wanem tingting we Jisas i gat long wok blong prij i save pusum yu blong mekem sem mak?
6 Jisas i tokbaot hem wan olsem Man we i stap planem sid blong trutok blong Kingdom. (Jon 4:35-38) Long evri jans we hem i gat, hem i planem ol sid blong gud nius. Nomata we hem i stap hang long pos, we klosap hem i ded, be hem i talemaot gud nius long saed blong paradaes wol we bambae i kamtru long fiuja. (Luk 23:43) Mo strong tingting ya we hem i gat blong talemaot gud nius i no stop taem hem i ded long pos. Bifo we hem i go antap long heven, hem i talem long ol aposol blong hem, blong oli gohed blong planem ol sid blong trutok blong Kingdom mo pulum ol man oli kam disaepol. Biaen, Jisas i mekem wan nambawan promes. Hem i talem se: “Yufala i mas save se mi bambae mi stap wetem yufala oltaem, gogo wol ya i finis.”—Matiu 28:19, 20.
7 Taem Jisas i talem ol tok ya, hem i mekem wan strong promes se bambae hem i sapotem, i lidim, mo i lukaotgud long wok blong talemaot gud nius “oltaem, gogo wol ya i finis.” Kam kasem taem blong yumi, Jisas i stap gohed blong soem intres long wok ya blong talemaot gud nius. Hem i Lida blong yumi, i stap lidim wok blong planem sid blong trutok blong Kingdom. (Matiu 23:10) Jisas we i Hed blong Kristin kongregesen, i mas mekem gud bigfala wok ya from we Jeova nao i putum wok ya long han blong hem.—Efesas 1:22, 23; Kolosi 1:18.
Ol Enjel Oli Talemaot Gud Nius We i Mekem Man i Glad
8, 9. (a) ?Olsem wanem ol enjel oli bin soem trufala intres long laef blong ol man? (b) ?Long wanem rod yumi save talem se yumi stap wok long wan bigfala platfom long fored blong ol enjel?
8 Taem Jeova i wokem wol ya, ol enjel “oli glad tumas, oli stap singsingaot.” (Job 38:4-7) Stat long taem ya i kam, ol enjel long heven oli bin soem bigfala intres long samting we i stap hapen long laef blong man. Jeova i bin yusum olgeta blong talemaot ol mesej blong hem long ol man. (Ol Sam 103:20) Samting ya i tru moa long saed blong wok ya blong talemaot gud nius long taem blong yumi. Taem aposol Jon i kasem ol samting we Jisas Kraes i soemaot long hem, hem i luk we “wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis. Hem i stap singaot bigwan, i talem se, ‘Yufala i mas ona gud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwota mo springwota, mo yufala i mas bodaon long fes blong hem blong mekem wosip long hem.’”—Revelesen 14:6, 7.
9 Baebol i tokbaot ol enjel se, oli olsem “spirit nomo, we oli stap mekem ol wok blong God. Hem i stap sanem olgeta blong oli kam givhan long ol man ya we bambae i sevem olgeta.” (Hibrus 1:14) Taem ol enjel oli stap gohed strong long wok we God i givim long olgeta, oli gat jans blong lukluk yumi mo wok we yumi stap mekem. I olsem we yumi stap antap long wan bigfala platfom, yumi stap wok long fored blong olgeta enjel blong heven. (1 Korin 4:9) !Yumi glad mo yumi haremgud tumas blong save se yumi no stap yumi nomo, taem yumi stap planem ol sid blong trutok blong Kingdom!
Yumi Holem Strong Tingting Blong Mekem Wok Ya
10. ?Olsem wanem yumi save folem nambawan advaes we i stap long Prija 11:6 long wok ya blong talemaot gud nius?
10 ?From wanem Jisas mo ol enjel oli intres bigwan long wok blong yumi? Jisas i givim wan risen taem hem i talem se: “Mi mi talem long yufala. . . . Ol enjel blong God oli glad tumas long wan man nomo we i man nogud, be i tanem tingting blong hem from sin blong hem.” (Luk 15:10) Yumi tu, yumi soem trufala intres long ol man. Taswe yumi traem bes blong yumi blong planem sid blong trutok blong Kingdom long evri ples. Taem yumi stap mekem wok ya, yumi save folem tok we i stap long Prija 11:6. Long vas ya, Baebol i givim advaes long yumi se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.” I tru, maet wan man i akseptem mesej we yumi talemaot be wan handred no wan taosen man oli no akseptem. Be olsem ol enjel, yumi glad tumas taem “wan man nomo we i man nogud” i akseptem mesej blong sef.
11. ?Ol buk we oli stanap long Baebol oli save wokgud olsem wanem?
11 I gat fulap samting i joen long wok ya blong talemaot gud nius. Wan impoten tul we i save givhan long wok ya, hemia ol buk we oli stanap long Baebol, we ol Witnes blong Jeova oli stap yusum. Yumi save talem se ol buk ya oli olsem ol sid we yumi planem long evri ples. Yumi no save weples bambae ol buk ya oli karem frut. Samtaem, wan man i tekem wan buk, be narafala man i tekemaot buk ya long hem mo i ridim. Long ol defren rod, Jisas mo ol enjel oli save mekem se samting ya i hapen blong givhan long olgeta we hat blong olgeta i stret. Bambae yumi luk sam stori we oli soem olsem wanem Jeova i save mekem nambawan frut i kamaot tru long ol buk we yumi bin livim wetem ol man.
Wok Blong Trufala God
12. ?Olsem wanem wan olfala magasin i givhan long wan famle blong kasem save long Jeova?
12 Long 1953, Robert mo Lila, tufala i tekem ol pikinini blong tufala, nao oli aot long bigfala taon, oli go stap long wan olfala haos afsaed long Pennsylvania, Yunaeted Stet. Smoltaem afta we oli muf i go long ples ya, Robert i wantem mekem wan ples blong swim long wan smol rum aninit long ol step. Taem hem i tekemaot wol we i blokem smol rum ya, hem i faenem fulap doti we ol rat oli tekem i kam hivimap biaen long wol long ples ya. I gat ol olfala pepa, ol sel blong pinat, mo ol narafala smosmol doti. Long medel blong ol doti ya, hem i faenem wan kopi blong magasin ya Golden Age. Robert i intres tumas long wan haf insaed long magasin ya we i tokbaot fasin blong lukaot long pikinini. Hem i sapraes tumas long ol klia advaes blong Baebol we oli stap insaed long magasin ya, nao hem i talem long Lila se oli mas joenem “skul blong Golden Age.” Sam wik nomo biaen, ol Witnes blong Jeova oli kam long doa blong olgeta, be Robert i talem long olgeta se famle blong hem i intres nomo long “skul blong Golden Age.” Ol Witnes oli eksplenem se naoia, Golden Age i gat wan niufala nem, hemia Wekap! Robert mo Lila, tufala i stat blong stadi Baebol wetem ol Witnes, mo biaen tufala i tekem baptaes. Nao tufala i planem sid blong trutok long ol pikinini blong tufala mo tufala i kasem plante gudfala frut from. Tede, i gat moa long 20 memba blong famle ya, wetem ol seven pikinini blong Robert mo Lila, we oli baptaes, oli stap mekem wok blong Jeova God.
13. ?Wanem i pusum wan hasban mo waef long Puerto Rico blong gat intres long Baebol?
13 Samwe long 40 yia bifo, William mo Ada, wan hasban mo waef long Puerto Rico, tufala i no gat intres blong stadi Baebol. Taem ol Witnes blong Jeova oli kam kilkilim doa blong tufala, tufala i mekem olsem we i no gat man long haos. Wan dei, William i go long wan yad we ol man oli salem seken han samting long hem, blong pem sam samting blong fiksimap haos. Taem hem i stap rere blong gobak, hem i luk wan buk we i yala lelebet insaed long wan bigfala tin doti. Buk ya, nem blong hem, Religion, hem i wan buk we ol Witnes blong Jeova oli wokem long 1940. William i tekem buk ya i go wetem hem mo taem hem i ridim, hem i sapraes tumas blong faenemaot se trufala skul i defren olgeta long giaman skul. Ale biaen, taem ol Witnes blong Jeova oli kam long haos blong William mo Ada, tufala i glad blong lesin long mesej blong olgeta, mo tufala i stat blong stadi Baebol wetem olgeta. Sam manis biaen, long 1958, tufala i baptaes long Intenasnal Asembli ya, Wil blong God. Stat long taem ya i kam, tufala i bin givhan long 50 man blong joen long grup blong ol Kristin brata.
14. Olsem stori ya i soem, ?ol buk we oli stanap long Baebol oli save mekem wanem?
14 Karl i gat 11 yia nomo mo hem i wan boe we i stronghed tumas. I luk olsem se oltaem hem i stap kasem trabol. Papa blong hem, we i wan prija long Metodis Jos long Jemani, i tijim hem se taem ol man nogud oli ded, bambae oli go long helfaea. Taswe Karl i fraet tumas long hel. Wan dei long 1917, Karl i luk wan pis pepa long rod, we i gat raeting long hem, nao hem i pikimap pepa ya. Taem hem i stap ridim ol tok we oli stap long pepa ya, kwiktaem nomo ae blong hem i fas long kwestin ya se: “?Wanem ya hel?” Ol tok long pepa ya oli singaot ol man blong go long wan pablik tok we i tokbaot hel. Ol Baebol Studen, we tede oli karem nem ya ol Witnes blong Jeova, olgeta nao oli givim pablik tok ya. Samwe long wan yia biaen, afta we Karl i stadi smol long Baebol, hem i baptaes, mo i kam wan long ol Baebol Studen. Long 1925, Sosaeti i askem hem blong go wok long hedkwota blong ol Witnes blong Jeova—tede, hem i stap wok yet long ples ya. Yes, wan pis pepa nomo we hem i faenem long rod i mekem se hem i gohed long wan Kristin wok blong bitim 80 yia.
15. ?Taem Jeova i luk se i stret, hem i save mekem wanem samting?
15 I tru, yumi man i no naf blong faenemaot sipos ol enjel nao oli lidim ol samting long ol stori ya. Be yumi mas sua fulwan se Jisas mo ol enjel oli stap givhan bigwan long wok ya blong prij mo se Jeova i save lidim ol samting folem rod we hem i luk se i stret. Ol stori ya mo plante narafala stori bakegen, oli soemaot gudfala frut we i save kamaot taem yumi livim ol buk wetem olgeta man.
God i Putum Wan Gudfala Samting Long Han Blong Yumi
16. ?Yumi save lanem wanem long ol tok blong 2 Korin 3:7?
16 Aposol Pol i tokbaot ‘gudgudfala samting ya we God i givim long yumi ya we yumi olsem graonpot nomo.’ Gudfala samting ya, hemia wok blong prij we God i givim, mo graonpot, hemia ol man we Jeova i putum ol gudfala samting ya long han blong olgeta. Ol man ya oli no stret gud mo i gat sam mak we oli no naf blong kasem. Taswe Pol i gohed blong talem se God i givim wok ya long olgeta blong soem se “paoa ya we i bigfala tumas i blong God, i no blong mifala.” (2 Korin 4:7) Yes, yumi save sua se bambae Jeova i givim paoa we yumi nidim blong mekem wok we i stap fored long yumi.
17. ?Bambae yumi fesem wanem taem yumi stap planem ol sid blong trutok blong Kingdom, mo nating se i olsem, from wanem yumi mas gohed blong holem tingting we i stret?
17 Plante taem, yumi mas lego sam samting we yumi nomo i wantem. Maet i gat sam teritori we oli hadwok mo oli mekem yumi harem nogud blong prij long olgeta. Long sam ples, bighaf blong ol man oli no intres nating, mo maet oli gat fasin agens. Maet yumi mekem bigfala traehad long ol ples olsem mo yumi stap kasem smol frut nomo. Be sipos laef blong fulap man i stap long denja, ol bigfala traehad blong yumi oli no blong nating nomo. Rimemba se ol sid we yu planem long ol man i save givim glad long olgeta naoia mo tu i save givim laef we i no save finis long fiuja. Ol tok ya blong Ol Sam 126:6 oli bin kamtru plante taem se: “Ol man ya, taem oli go planem kakae long garen, oli stap harem nogud, oli stap krae. Be biaen, taem oli go tekemaot kakae long garen ya oli karem i kam, bambae oli singsing from we oli glad we oli glad long kakae ya.”
18. ?Olsem wanem yumi save lukaotgud oltaem long minista wok blong yumi, mo from wanem yumi mas mekem olsem?
18 Yes, wetem kaen fasin, i gud yumi tekem evri jans blong planem ol sid blong trutok blong Kingdom. Yumi neva mas foget se yumi planem sid mo putum wota long hem, be Jeova nao i mekem oli gru. (1 Korin 3:6, 7) Jisas mo ol enjel oli mekem saed blong olgeta long wok ya. Long saed blong yumi, Jeova i wantem se yumi mekem minista wok blong yumi fulwan olsem Jisas mo ol enjel. (2 Timoti 4:5) I gud we yumi lukaotgud long ol tok we yumi stap tijim ol man long hem, fasin blong yumi, mo strong tingting we yumi gat long wok blong prij. ?From wanem? Pol i givim ansa i se: “Sipos yu mekem olsem bambae yu save sevem yu, wetem ol man we oli stap lesin long yu.”—1 Timoti 4:16.
?Yumi Lanem Wanem?
• ?Olsem wanem wok blong yumi blong planem ol sid i karem gudfala frut?
• ?Olsem wanem Jisas mo ol enjel oli stap joen long wok blong talemaot gud nius tede?
• ?From wanem yumi mas gat strong tingting blong planem sid blong trutok blong Kingdom?
• ?Taem yumi faenem ol man we oli no intres no oli agensem yumi long wok blong prij, wanem i mas pusum yumi blong gohed?
[Kwestin]
[Tok blong pija long pej 15]
Ol Kristin tede oli planem plante sid blong trutok blong Kingdom, olsem ol man blong planem sid long Isrel bifo
[Tok blong pija long pej 16, 17]
Ol Witnes blong Jeova oli wokem mo oli seremaot plante defren buk we oli stanap long Baebol long 340 lanwis