Talemaot Gud Nius Wetem Strong Tingting
Talemaot Gud Nius Wetem Strong Tingting
“Yufala i mas kam fulap wetem tabu spirit. Yufala i kam slef blong Jeova.”—ROM 12:11, NW.
1, 2. ?Ol Kristin oli mas traehad blong holemtaet wanem tingting taem oli stap talemaot gud nius?
WAN yangfala man i glad tumas from niufala wok we hem i jes kasem. Long faswan dei we hem i go long wok, hem i wantem tumas blong masta i talem ol wok long hem. Hem i rere blong mekem faswan wok, mo hem i rili tinghevi long wok ya. Hem i gat strong tingting blong mekem wok ya long beswan rod we hem i save mekem.
2 Long sem fasin, yumi ol Kristin, yumi save tingbaot yumi olsem man we i jes kasem wan wok. From we yumi gat hop blong laef olwe, i stret we yumi talem se yumi jes stat nomo blong mekem wok blong Jeova. I sua se Man ya we i Wokem yumi, hem i gat plante wok we hem i wantem yumi mekem gogo i no save finis. Be faswan wok we hem i givim long yumi, hemia blong talemaot gud nius blong Kingdom blong hem. (1 Tesalonaeka 2:4) ?Wanem filing blong yumi long saed blong wok ya we God i givim long yumi? !I gud yumi mekem wok ya olsem yangfala man ya we yumi tokbaot antap, long beswan rod we yumi naf blong mekem, wetem faea we i laet long yumi mo wetem glad—yes, wetem strong tingting!
3. ?Yumi mas mekem wanem sipos yumi wantem gohed olsem man blong talemaot gud nius?
3 I tru, i no isi nating blong holem gudfala tingting olsemia oltaem. I gat wok blong prij, be tu, yumi mas mekem ol narafala wok bakegen, we sam long ol wok ya oli save daonem paoa mo filing blong yumi. Plante taem, yumi save mekem olgeta wok ya mo long semtaem yumi spenem smol taem long wok blong prij. Be, blong mekem samting ya oltaem, i olsem we yumi mas faet strong. (Mak 8:34) Jisas i soemaot klia se sipos yumi wantem stap oltaem olsem wan Kristin, yumi mas traehad bigwan.—Luk 13:24.
4. ?Ol wari blong evri dei oli save gat wanem paoa long tingting we yumi gat long saed blong spirit?
4 Yumi gat plante samting blong mekem, taswe i isi nomo blong harem se ol samting ya oli hevi tumas mo yumi no moa gat paoa. Sipos yumi stap “tingting tumas long laef,” fasin ya i save mekem se yumi no moa gat strong tingting mo fasin tangkiu long ol tiokratik wok. (Luk 21:34, 35; Mak 4:18, 19) From we yumi sinman, maet lav blong yumi i kam kolkol, ‘yumi no moa lavem God olsem fastaem.’ (Revelesen 2:1-4) Maet sam long ol wok we yumi mekem long Jeova oli kam olsem kastom nomo. ?Olsem wanem Baebol i leftemap tingting blong yumi blong holem strong tingting oltaem long wok blong prij?
“I Stap Bon Olsem Faea” Insaed Long Hat Blong Yumi
5, 6. ?Wanem tingting blong aposol Pol long saed blong wok blong prij we hem i mekem?
5 Wok ya we Jeova i putum long han blong yumi, hem i sas tumas, yumi no mas ting nating long hem. Long tingting blong aposol Pol, wok ya blong talemaot gud nius i wan bigfala blesing. Hem i harem se hem i no naf blong mekem wok ya. Hem i talem se: “Mi mi no haeman, mi daon moa long ol narafala man blong God. Be long gladhat blong God, hem i givhan long mi blong mi mekem gudfala wok ya. Hem i putumap mi blong mi go long ol man we oli no laen blong Isrel blong talemaot gud nius blong ol gudgudfala samting ya blong Kraes, we i no gat man i save kaontem. Mo mi gat narafala wok blong mi tu. Mi mas mekem olgeta man oli save fasin we God i folem blong mekem plan ya blong hem we fastaem i stap haed, i kamtru. God ya we i mekem olgeta samting, hem i haedem plan ya blong hem, i stat bifo olgeta, i kam kasem tede.”—Efesas 3:8, 9.
6 Pol i soemaot nambawan eksampel long saed blong wok blong prij. Hem i luk wok ya wetem gudfala tingting oltaem. Long leta we hem i raetem i go long ol Kristin long Rom, hem i talem se: “Mi mi wantem tumas blong talemaot gud nius ya long yufala.” Yes, Pol i no sem nating blong talemaot gud nius. (Rom 1:15, 16) Hem i gat stret tingting mo i wantem tumas blong gohed long wok ya.
7. ?Long leta we Pol i raetem i go long ol Kristin long Rom, hem i givim woning agens long wanem?
7 Aposol Pol i luksave se ol Kristin oli mas holemtaet strong tingting, taswe hem i givim advaes long ol Kristin long Rom se: “Yufala i mas wok had, i nogud yufala i stap les. Yufala i mas kam fulap wetem tabu spirit. Yufala i kam slef blong Jeova.” (Rom 12:11, NW) Grik tok we oli tanem i kam “les,” i karem tingting ya se “no moa wok strong, kam slak.” I tru, maet yumi no les blong go prij, be yumi evriwan i mas lukaotgud mo luksave kwiktaem ol samting we oli save mekem se yumi no moa wok strong long saed blong spirit. Nao yumi mas jenisim ol samting we yumi faenem se oli stap blokem yumi blong gohed.—Ol Proveb 22:3
8. (a) ?Wanem samting i kam olsem “faea we i stap bon” long tingting blong Jeremaea, mo from wanem? (b) ?Yumi lanem wanem long stori blong Jeremaea?
8 Tabu spirit blong God tu i save givhan long yumi taem tingting blong yumi i foldaon. Eksampel, wan dei tingting blong profet Jeremaea i foldaon bigwan, nao hem i wantem stop long wok olsem profet. Hem i tokbaot Jeova i se: “Naoia bambae mi fogetem Hae God mi no moa talemaot nem blong hem.” ?Samting ya i minim se hem i kam slak long saed blong spirit? Nogat. Jeremaea i strong long saed blong spirit, hem i lavem Jeova, mo i gat strong tingting long saed blong trutok. Samting ya i givim paoa long hem blong gohed blong talemaot profet tok. Hem i eksplenem se: “Ol tok blong yu [Jeova] i stap bon olsem faea insaed long tingting blong mi. Mi mi traem holem blong mi no talemaot, be mi no save mekem.” (Jeremaea 20:9) Samtaem, tingting blong ol trufala man blong God i save foldaon. Be, taem oli prea long Jeova blong i givhan long olgeta, Jeova i luk wanem we i stap long hat blong olgeta. Nao, sipos oli mekem olsem Jeremaea, we oli holem tok blong hem long hat blong olgeta, bambae hem i givim tabu spirit blong hem i go nomo long olgeta.—Luk 11:9-13; Ol Wok 15:8.
“No Traem Blokem Tabu Spirit”
9. ?Wanem i save blokem tabu spirit blong i no givhan long yumi?
9 Aposol Pol i givim advaes long ol Kristin long Tesalonaeka se: “Bambae yufala i no traem blokem [tabu spirit].” (1 Tesalonaeka 5:19) Yes, sipos ol fasin mo tingting blong yumi oli no laenap wetem ol rul blong God, samting ya bambae i blokem tabu spirit blong i no givhan long yumi. (Efesas 4:30) Tede ol Kristin oli gat wok ya blong talemaot gud nius. Yumi soem bigfala respek long wok ya. Yumi no sapraes taem olgeta we oli no save God oli ting nating long wok blong prij. Be sipos wan Kristin i ting nating long wok blong prij, fasin ya i save blokem tabu spirit blong God we i stap wok long laef blong hem.
10. (a) ?Olsem wanem tingting we yumi gat long ol man raonabaot long yumi i save gat paoa long yumi? (b) ?Wanem tingting long saed blong wok blong prij we 2 Korin 2:17 i tokbaot?
10 Sam man we oli no joen long Kristin kongregesen, maet oli ting se wok blong yumi i blong seremaot buk nomo. Sam narafala, maet oli talem se yumi stap go long ol haos wanwan jes blong kasem presen mane. Sipos yumi letem ol nogud tingting ya oli winim tingting blong yumi, samting ya i save blokem yumi, nao yumi no moa gohedgud long wok blong prij. Yumi no mas letem samting ya i hapen. Be i gud we yumi holemtaet tingting we God mo Jisas, tufala i gat long saed blong wok blong prij. Aposol Pol i tokbaot gudfala tingting ya, i se: “Mifala i no olsem plante narafala man we oli stap yusum tok blong God olsem rod blong winim mane blong olgeta, nogat. God i putumap mifala, mo from samting ya, oltaem mifala i stanap long fes blong hem, mo mifala i stap talemaot ol trutok nomo, from we mifala i man blong wok blong Kraes.”—2 Korin 2:17.
11. ?Wanem i givhan long ol faswan Kristin blong holemtaet strong tingting nating se ol man oli mekem i nogud tumas long olgeta, mo olsem wanem eksampel blong olgeta i save gat paoa long yumi?
11 Smoltaem afta we Jisas i ded, ol disaepol blong hem long Jerusalem, oli fesem wan taem we ol man oli mekem i nogud tumas long olgeta. Ol man ya oli tok strong long olgeta mo givim woning long olgeta blong no moa talemaot gud nius. Be Baebol i talem se taem ol disaepol oli “prea finis, haos ya we oli stap long hem, i seksek, mo [tabu spirit] i kam fulap long olgeta, nao oli stat talemaot tok blong God we oli no fraet nating.” (Ol Wok 4:17, 21, 31) Sam yia biaen, Pol i raet long Timoti mo i tokbaot strong tingting we ol Kristin oli mas gat oltaem. Hem i talem se: “Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, i blong mekem yumi lavem ol man, mo i blong mekem yumi naf blong blokem ol samting we yumi nomo i wantem. Nao from samting ya, bambae yu no sem blong tokbaot Masta blong yumi. Mo bambae yu no sem long mi tu, we mi stap kalabus from hem. God i mekem yu yu strong, mo yu mas rere blong harem nogud tu from gud nius ya blong Kraes.”—2 Timoti 1:7, 8.
?Yumi Gat Wanem Kaon Long Ol Man Raonabaot Long Yumi?
12. ?Wanem stamba risen we yumi gat blong talemaot gud nius?
12 Blong gat stret tingting long saed blong Kristin minista wok blong yumi, wanem we i pusum yumi blong mekem wok ya i mas stanap long samting we i stret. ?From wanem yumi prij? Man blong raetem Sam i talemaot stamba risen ya, i se: “Hae God. Olgeta samting ya we yu yu mekem, bambae oli presem yu, mo olgeta man blong yu bambae oli talem tangkiu long yu. Yu yu King, mo bambae oli stap tokbaot ol gudgudfala samting we yu yu mekem long paoa blong yu, mo bambae oli stap talemaot bigfala paoa we yu yu gat, blong olgeta man bambae oli save ol bigbigfala wok blong yu, mo ol gudgudfala samting blong hae nem blong yu.” (Ol Sam 145:10-12) Yes, yumi prij blong presem Jeova mo blong givim ona long hem long fes blong olgeta man. Nomata we smol man nomo i lesin, fasin ya blong gohed oltaem blong talemaot mesej blong sevem man i givim ona long nem blong Jeova.
13. ?Wanem samting i mas pusum yumi blong talemaot hop blong sef long ol narafala?
13 Mo tu, yumi prij from we yumi lavem ol man mo blong mekem se yumi no gat fol from blad blong olgeta. (Esikel 33:18, Mak 6:34) From samting ya, Pol i tokbaot olgeta we oli no joen wetem Kristin kongregesen, i se: “Mi mi harem se God i givim wok ya long mi we mi mas mekem blong givhan long olgeta man, nating we oli man blong taon, no oli man blong bus, no oli man we oli gat save, no oli man we oli no save samting.” (Rom 1:14) Pol i harem se hem i gat kaon long olgeta man, hem i mas talemaot gud nius long olgeta, from we God “i wantem sevem olgeta man.” (1 Timoti 2:4) Tede, yumi mas gat sem filing olsem Pol. Yumi mas lavem ol man raonabaot long yumi mo mekem wok ya we i blong givhan long olgeta. Jeova i lavem tumas ol man ya, taswe hem i sanem Pikinini blong hem i kam long wol blong i ded from olgeta. (Jon 3:16) Hemia i rili wan bigfala sakrefaes. Yes, i gud we yumi mekem olsem Jeova, mo soem lav long ol man raonabaot long yumi. Blong mekem olsem, yumi mas spenem moa taem mo traehad moa blong storian wetem olgeta long saed blong gud nius ya blong sevem man, we i stanap long sakrefaes blong Jisas.
14. ?Olsem wanem Baebol i tokbaot ol man we oli no joen long Kristin kongregesen?
14 Long tingting blong ol Witnes blong Jeova, evri man raonabaot long olgeta i gat jans blong joen long kampani blong ol Kristin brata. Yumi mas prij wetem strong tingting, be strong tingting ya i no blong agensem ol man. I tru, Baebol i yusum ol strong tok taem hem i stap tokbaot olgeta fasin blong wol. Pol i yusum tok ya “wol” taem hem i tok agensem ‘waes blong wol ya’ mo ‘ol samting we ol man blong wol ya oli wantem tumas.’ (1 Korin 3:19; Taetas 2:12) Mo tu, Pol i talem bakegen long ol Kristin long Efesas se taem oli “holem ol fasin nogud blong wol ya,” i olsem we oli “ded” long saed blong spirit. (Efesas 2:1-3) Ol tok ya wetem ol narafala tok olsem, oli laenap wetem wanem we aposol Jon i talem, se: “Olgeta man blong wol ya oli stap long paoa blong Setan.”—1 Jon 5:19.
15. ?Wanem samting we yumi no mas mekem long ol man we oli no joen long Kristin kongregesen, mo from wanem?
15 Be tingbaot se ol vas ya oli stap tokbaot ol man long wol ya we oli stap longwe long God, olsem wan grup, i no tokbaot ol wanwan man. Ol Kristin oli no mas jajem wan man se bambae hem i no save lesin long gud nius, from we oli no gat pruf we i soemaot se man ya i wan nani. Tru ya, i no wok blong yumi blong talem risal we bambae i kamaot taem Jisas i seraotem “ol sipsip blong hem long ol nani blong hem.” (Matiu 25:31-46) Jisas nao i man ya we God i putumap blong jajem ol man, be i no yumi. Antap long hemia, ol trufala stori oli soem se sam man we bifo, fasin blong olgeta i nogud we i nogud, oli lesin long mesej blong Baebol, nao oli jenisim laef blong olgeta, mo oli kam ol Kristin we laef blong olgeta i klin. Taswe, taem yumi kampani wetem ol man olsem, yumi no mas fraet, be yumi mas tekem jans blong tokbaot hop blong Kingdom long olgeta. Ol man we oli no bilif yet, Baebol i bin tokbaot sam long olgeta se ‘oli stret blong oli kasem laef we i no save finis.’ Biaen, ol man ya oli kam man blong bilif. (Ol Wok 13:48) Yumi no save man we hat blong hem i stret, gogo kasem taem we yumi prij long hem—we maet yumi mas mekem olsem plante taem bakegen mo bakegen. I gud we oltaem yumi tingbaot samting ya. Olsem nao, bambae yumi save gat “fasin we i kwaet” mo “bigfala respek” long ol man we oli no bilif yet, mo hop se maet sam long olgeta bambae oli lesin long mesej blong laef.—2 Timoti 2:25; 1 Pita 3:15, NW.
16. ?Wanem wan risen we i mekem se yumi wantem ‘tijimgud’ ol narafala?
16 Yumi mas lanem blong gat gudhan blong tij. Samting ya bambae i givhan long yumi blong talemaot gud nius wetem strong tingting. Tingbaot eksampel ya: Wan man i no save intres long wan pleplei no spot sipos hem i no save olsem wanem blong mekem pleplei no spot ya. Be man we i savegud pleplei no spot ya, hem i haremgud tumas long hem. Long sem fasin, ol Kristin we oli lanem blong “tijimgud” narafala, oli haremgud tumas long Kristin minista wok. (2 Timoti 4:2; Taetas 1:9) Pol i givim advaes long Timoti se: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.” (2 Timoti 2:15) ?Olsem wanem yumi save lanem blong gat gudhan blong tij?
17. ?Olsem wanem yumi save wokem fasin ya blong “wantem tumas” ol save blong Baebol, mo olsem wanem ol save ya bambae oli givhan long yumi long wok blong prij?
17 Wan rod, hemia blong gohed moa blong kasem stret save. Aposol Pita i leftemap tingting blong yumi se: “Yufala i mas kam we yufala i wantem tumas tok blong God we i klin gud, olsem pikinini we i jes bon i wantem titi tumas. Tok ya i save mekem yufala i kam strong, nao bambae God i sevem yufala.” (1 Pita 2:2) Wan bebi we i helti, hem i wantem titi tumas. Hemia fasin we hem i bon wetem. Be wan Kristin i mas wokem fasin ya blong “wantem tumas” blong kasem ol save blong Baebol. Blong mekem olsem, hem i mas gat wan program blong stadi mo blong rid. (Ol Proveb 2:1-6) Sipos yumi wantem gat gudhan blong tijim Tok blong God, yumi mas traehad mo gat fasin blong stretem yumi wan. Nao fasin traehad ya bambae i gat frut blong hem. Yes, glad we yumi kasem taem yumi stadi long Tok blong God bambae i mekem se yumi kam fulap long tabu spirit blong God, nao yumi gat strong tingting blong serem ol save we yumi lanem wetem ol narafala.
18. ?Olsem wanem ol Kristin miting oli save givhan long yumi blong talemaot trutok long fasin we i stret gud?
18 Ol Kristin miting tu oli givhan bigwan long yumi blong gat gudhan blong yusum Tok blong God. Taem wan brata i ridim wan vas long pablik tok no ol narafala tok, i gud we yumi folem vas ya long prapa Baebol blong yumi. I waes we yumi lesingud long ol defren haf blong miting, ol haf ya tu we oli tokbaot wok blong prij. Yumi neva mas ting nating long ol pleplei we oli laenap wetem wok blong prij, yumi mas folemgud olgeta. Bakegen, i nidim fasin blong stretem yumi wan mo no letem tingting blong yumi i flae olbaot long taem blong miting. (1 Timoti 4:16) Ol Kristin miting oli bildimap bilif blong yumi, oli givhan long yumi blong wantem tumas Tok Blong God, mo oli trenem yumi blong gat strong tingting blong talemaot gud nius.
Yumi Sua Se Bambae Jeova i Givhan Long Yumi
19. ?From wanem i impoten blong joen oltaem long wok blong prij?
19 Ol Kristin we oli “fulap wetem tabu spirit” mo we oli gat strong tingting blong talemaot gud nius, oli traehad blong joen oltaem long wok blong prij. (Efesas 5:15, 16) I tru, ol samting long laef blong yumi oli no sem mak mo yumi evriwan i no save kasem semfala mak blong aoa long wok ya blong sevem laef. (Galesia 6:4, 5) Samting we i moa impoten, i no ol aoa we yumi spenem long wok blong prij, be hemia fasin blong gohed oltaem blong tokbaot hop blong yumi wetem ol narafala. (2 Timoti 4:1, 2) Moa we yumi prij, moa we bambae yumi luksave se wok ya i impoten tumas. (Rom 10:14, 15) Bambae yumi gat fasin sore mo filing taem yumi faenem ol man we oli rili harem nogud, oli stap krae from we oli no gat hop.—Esikel 9:4, Rom 8:22.
20, 21. (a)?Wanem wok we yumi mas gohed yet blong mekem long fiuja? (b)?Olsem wanem Jeova i givhan long yumi long ol traehad we yumi stap mekem?
20 Jeova i putum gud nius long han blong yumi blong talemaot. Hemia i faswan wok we hem i putum long han blong yumi, mo i olsem we yumi “stap joen wetem God blong mekem wok blong hem.” (1 Korin 3:6-9) Yumi gat strong tingting blong givim ful laef blong yumi mo mekem wok ya we God i givim, go kasem mak we yumi naf blong kasem. (Mak 12:30; Rom 12:1) Long wol ya, i gat plante man yet we hat blong olgeta i stret, oli stap hanggri from trutok. I gat fulap wok blong mekem, be yumi sua se bambae Jeova i givhan long yumi taem yumi mekem wok blong hem fulwan.—2 Timoti 4:5.
21 Jeova i givim tabu spirit blong hem long yumi mo i mekem se yumi nafgud blong yusum “naef blong faet we tabu spirit i givim,” hemia Tok blong God. Jeova i save givhan long yumi blong ‘yumi no seksek, mo yumi save talemaot gud nius blong Kraes, we fastaem i stap haed.’ (Efesas 6:17-20) I gud we yumi talem sem tok ya we aposol Pol i raetem i go long ol Kristin long Tesalonaeka se: “Taem mitrifala i tekem gud nius i kam long yufala, mifala i no toktok nating nomo. Mifala i toktok, mo mifala i stap mekem ol merikel long paoa blong [tabu spirit], mo mifala i bilif strong se gud nius ya i tru.” (1 Tesalonaeka 1:5) !Yes, i gud yumi talemaot gud nius wetem strong tingting!
Wan Sotfala Tingtingbak
• ?From ol wari blong laef, wanem i save hapen long strong tingting we yumi gat long wok blong prij?
• ?Long wanem rod, strong tingting we yumi gat long wok blong prij i save kam olsem “faea we i stap bon” insaed long tingting blong yumi?
• ?Yumi mas blokem wanem nogud tingting long saed blong wok blong prij?
• ?Wanem tingting yumi mas gat long saed blong olgeta we oli no gat sem bilif wetem yumi?
• ?Olsem wanem Jeova i givhan long yumi blong holem strong tingting oltaem long saed blong wok blong prij?
[Kwestin]
[Tok blong pija long pej 9]
Ol Kristin oli save folem eksampel blong Pol mo Jeremaea we tufala i wok wetem strong tingting
[Tok blong pija long pej 10]
Lav we yumi gat long God mo ol man raonabaot long yumi i pusum yumi blong gat strong tingting blong prij