?Weples Yu Save Faenem Pis Long Tingting?

Laef long taem blong Thoreau, we yumi tokbaot hem bifo, mo taem blong yumi i defren olgeta. Bigfala samting we i defren, hemia se tede i gat fulap advaes blong givhan long ol man olsem wanem blong faenem pis long tingting. Plante man oli talemaot tingting blong olgeta, olsem ol man blong stadi long fasin mo tingting blong man, mo olgeta we oli raetem ol buk wetem advaes blong kamgud moa, mo ol man blong raetem niuspepa tu. Maet advaes blong olgeta i givhan blong smoltaem; be blong halpem ol man blong long taem, i nidim wan samting we i gat moa paoa long laef blong man. Ol man ya, we yumi tokbaot olgeta long faswan haf, oli faenem samting ya.

ANTÔNIO, Marcos, Gerson, Vania, mo Marcelo, oli gruap long defren fasin mo ol problem blong olgeta tu oli defren. Be i gat trifala samting we oli sem mak. Faswan samting se, sam taem long laef blong olgeta oli harem se ‘oli no save God nating, mo oli no save putum tingting blong olgeta i stap strong long ol promes ya blong hem.’ (Efesas 2:12) Namba tu samting se, oli wantem tumas blong gat pis long tingting. Mo namba tri se, olgeta evriwan oli faenem pis ya, afta we oli stadi Baebol wetem ol Witnes blong Jeova. Taem oli gohed gud long stadi blong olgeta, oli luksave se God i rili kea long olgeta. Yes, olsem Pol i talem long ol man Atens, long taem blong hem, se “God ya i no stap longwe long yumi nating.”  (Ol Wok 17:27) I impoten tumas blong bilif long samting ya, sipos yumi wantem faenem pis long tingting.

From Wanem i No Gat Pis

Baebol i givim tu stamba risen from wanem i no gat pis long wol—olsem pis long tingting mo pis bitwin ol man. Jeremaea 10:23 i tokbaot faswan risen se: “Hae God. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” Man i no gat naf waes mo fasin luksave blong rul hem wan. Hem i nidim help, mo God nomo i rili naf blong halpem hem. Ol man we oli no lukaot help blong God, oli neva save faenem pis we i stap longtaem. Long tok blong Jon, yumi faenem seken risen from wanem i no gat pis se: “Olgeta man blong wol ya oli stap long paoa blong Setan.” (1 Jon 5:19) Sipos ol man oli no letem God i lidim olgeta, bambae “Setan,” we yumi no save luk be i rili stap—mo we i gat bigfala paoa—i spolem traehad blong olgeta.

From tufala risen ya se—bighaf blong ol man oli no wantem God i lidim olgeta mo Setan i wok strong long wol ya—olgeta man long wol oli trabol tumas. Pol i tokbaot samting ya taem hem i talem se: “Yumi save finis, we i kam kasem naoia, olgeta samting ya we God i mekem oli stap krae, from we olgeta oli stap harem nogud.” (Rom 8:22) ?Hu i no save agri long tok ya? Long ol kantri we oli rij mo ol kantri we oli pua, ol problem long famle, fasin blong brekem loa, kruked fasin, rao bitwin ol man, ekonomi, ol faet bitwin ol laen, fasin blong daonem man, ol sik, mo plante narafala samting bakegen oli spolem pis we man i gat long tingting blong hem.

Weples Blong Faenem Pis Long Tingting

Taem Antônio, Marcos, Gerson, Vania, mo Marcelo oli stadi long Tok blong God, Baebol, oli lanem plante samting we i jenisim laef blong olgeta. Wan samting we oli lanem, se wan dei fasin blong wol bambae i jenis. Hemia i no jes wan drim se evri samting bambae i oraet. Nogat. Hemia wan trufala hop, we i stanap long save se God i gat wan stamba tingting long saed blong fiuja blong ol man. Mo naoia tu yumi save kasem blesing from stamba tingting ya sipos yumi mekem samting we hem i wantem. Sloslou laef blong olgeta ya i kamgud moa, from we oli mekem samting we oli lanem long Baebol i wok long laef blong olgeta. Oli faenem glad mo pis we bifo oli ting se neva bambae oli save faenem.

Antônio i no moa joen long ol rao from ol wokman. Hem i luksave se ol jenis we oli kamaot from fasin ya oli smol nomo mo oli no blong longtaem. Man ya we bifo i lida blong ol wokman i kasem save long saed blong Kingdom blong God. Hemia Kingdom ya we plante milian man oli prea from, taem oli talem Prea blong Masta mo oli talem long God se: “Kingdom blong yu i kam.” (Matiu 6:10a, New International Version) Antônio i lanem se Kingdom blong God i wan trufala gavman long heven we bambae i givim pis long olgeta man.

Marcos i lan blong mekem waes advaes blong Baebol long saed blong mared i wok long laef blong hem. From samting ya, man blong politik bifo, i joengud bakegen wetem waef blong hem. Hem i putum tingting blong hem i stap strong long taem ya we i klosap, we bambae Kingdom blong God i mekem niufala fasin we i gud moa, i tekem ples blong fasin blong wol we i griri mo man i tingbaot hem wan nomo. Naoia hem i kasem save gud long ol tok long Prea blong Masta se: “Mekem ol samting we yu yu wantem oli kamaot long wol, olsem oli kamaot finis long heven.” (Matiu 6:10b, NIV) Taem ol samting we God i wantem i kamaot long wol, bambae ol man oli haremgud long fasin blong laef we neva oli luk bifo.

?Be olsem wanem long Gerson? Hem i no moa stap wokbaot long ol taon olbaot mo hem i no moa stil. Laef blong man ya we bifo i pikinini blong rod i gat mining naoia, mo hem i yusum paoa blong hem blong givhan long ol narafala blong olgeta tu oli faenem pis ya. Olsem ol stori ya oli soemaot, wan man we i stadi long Baebol mo i mekem wanem we Baebol i talem i wok long laef blong hem, i save mekem se laef blong hem i kamgud moa.

 Pis Long Tingting Long Wan Wol We i Trabol

Jisas Kraes, i nambawan man long histri, we i mekem stamba tingting blong God i kamtru. Mo taem ol man oli stadi Baebol wetem ol Witnes blong Jeova, oli kasem plante save long saed blong hem. Long naet we Jisas i bon, ol enjel oli singsing blong presem God se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.” (Luk 2:14) Taem Jisas i gruap, hem i wari long ol man, i wantem se laef blong olgeta i kamgud moa. Hem i kasem save long filing blong olgeta mo hem i soemaot bigfala sore long olgeta we oli harem nogud mo we oli sik. Mo, olsem ol tok we ol enjel oli talem, hem i givim pis long tingting blong olgeta we oli gat tingting daon. Long en blong minista wok blong hem, hem i talem long ol disaepol blong hem se: “Naoia we klosap mi mi gowe long yufala, mi mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim, i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.”—Jon 14:27.

Jisas i no jes wok blong givhan long man long saed blong bodi nomo. Hem i tokbaot hem wan olsem man blong lukaotem sipsip, mo ol man blong hem oli olsem ol sipsip se: “Mi mi kam blong mekem rod blong ol sipsip oli save gat laef, mo blong laef ya blong olgeta i save fulap gud long evri samting. Mi nao, mi olsem gudfala man ya blong lukaot long sipsip. Gudfala man ya blong lukaot long sipsip, hem i glad nomo blong i ded blong sevem ol sipsip blong hem.” (Jon 10:10,11) Yes, defren olgeta long plante lida tede, we oli lukaot fastaem long olgeta wanwan, Jisas i givim laef blong hem from ol sipsip blong hem.

?Olsem wanem yumi save kasem gudfala frut from samting we Jisas i mekem? Plante man oli save gud tok blong Jisas se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Blong soemaot bilif long Jisas, yumi nidim fastaem, save long saed blong hem mo Papa blong hem Jeova. Save long saed blong God mo Jisas Kraes i save halpem yumi blong frengud wetem Jeova God, mo samting ya nao bambae i givim pis long tingting blong yumi.

Jisas i talem se: “Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi. Mo mi mi givim laef ya long olgeta we i no save finis.Olgeta oli no save ded samtaem, mo i no gat man i save pulumaot olgeta long han blong mi.” (Jon 10:27, 28) !Ol tok ya oli nambawan mo oli mekem yumi haremgud! I tru se, Jisas i talemaot ol tok ya finis klosap tu taosen yia bifo, be ol tok ya oli save gat semfala paoa long laef blong man naoia olsem bifo. Yumi no mas fogetem se, Jisas Kraes i laef i stap mo i gohed strong long wok blong hem. Naoia, hem i rul olsem King long Kingdom blong God long heven. Olsem long taem we hem i wokbaot long wol plante yia bifo, hem i wari yet long ol man we oli gat tingting daon, we oli wantem tumas blong gat pis long tingting. Antap long samting ya, hem i mekem wok yet olsem Man blong lukaot long ol sipsip blong hem. Sipos yumi biaen long hem, bambae hem i halpem yumi blong faenem pis ya. Samting ya i minim tu se yumi gat sua hop blong luk se ful wol bambae i gat pis long fiuja—mo fasin raf, faet, mo fasin blong brekem loa bambae oli finis.

Bambae yumi save kasem blesing from save mo bilif se Jeova, tru long Jisas, bambae i givhan long yumi. Tingbaot Vania, we taem hem i yangfala nomo, wok blong hem i hevi tumas mo hem i harem se God i lego hem. Naoia Vania i kasem save se God i no lego hem. Hem i talem se: “Mi lan we God i wan trufala man we i gat ol gudfala fasin. Lav we hem i gat i pulum hem blong sanem pikinini blong hem long wol blong givim laef long yumi. I impoten tumas blong kasem save long samting ya.”

Marcelo i talem se hem i gat wan trufala fasin fren wetem Jeova. Yes, man ya we bifo i laekem tumas blong lafet i talem se: “Plante taem ol yangfala oli no save wanem blong mekem, mo from samting ya oli mekem ol samting we oli kasem kil from. Sam oli yusum drag, olsem we mi bin mekem. Mi hop se plante moa yangfala bambae oli kasem blesing, olsem  mi, from we oli lanem trutok long God mo Pikinini blong hem.”

Taem tufala ya, Vania mo Marcelo, i stadigud long Baebol, tufala i wokem wan strongfala bilif long God mo trastem hem blong wantem halpem tufala blong winim ol problem. Sipos yumi mekem olsem tufala—stadi long Baebol mo mekem Baebol i wok long laef blong yumi—bambae yumi save faenem pis long tingting blong yumi, olsem tufala. Long taem ya gudfala tok blong aposol Pol i stret long yumi se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaotgud long yufala ya we i joen long Jisas Kraes.” Filipae 4:6, 7.

Faenem Trufala Pis Tede

Jisas Kraes i lidim ol man we oli hanggri from trutok, long rod blong kasem laef blong olwe long wan wol we i paradaes. Taem hem i lidim olgeta long trufala wosip blong God, olgeta oli faenem pis we Baebol i tokbaot se: “Bambae i no moa gat wan samting blong spolem tingting blong olgeta. Bambae olgeta oli no moa wari, oli save stap gud long ol haos blong olgeta, we i no gat samting i save spolem olgeta, laef blong olgeta bambae i stap gohed gud nomo.” (Aesea 32:18) Mo samting ya i soemaot smol nomo pis we bambae oli haremgud long hem long fiuja. Yumi save ridim long Baebol se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting. Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:11, 29.

?Yumi save faenem trufala pis ya tede? Yes. Antap long samting ya, yumi save sua se long fiuja we i klosap, God bambae i blesem olgeta man we oli obei long hem, wetem pis we neva bifo oli kasem. ?From wanem yu no prea long God, mo askem blong hem i givim pis ya long yu? Sipos yu gat sam problem we oli spolem pis blong yu naoia, prea folem toktok blong King Deved se: “Plis yu tekemaot ol samting we i stap mekem mi mi wari tumas, mo yu sevem mi long ol trabol blong mi. Yu tingbaot mi. Mi mi trabol tumas, mi harem nogud, plis yu fogivim mi, yu tekemaot ol sin blong mi.” (Ol Sam 25:17, 18) Yumi mas bilif strong se God i lesin long ol prea ya. Hem i stretem han blong hem i kam long ol man, mo i givim pis long olgeta we oli rili wantem faenem pis ya. Tok blong God i leftemap tingting blong yumi wetem lav se: “Oltaem hem i stap klosap long olgeta we oli stap krae i go long hem, we hemia olgeta ya we oli wantem tru blong hem i givhan long olgeta. Olgeta we oli stap ona long hem, oltaem hem i stap givim ol samting long olgeta, we oli sot long hem, oltaem hem i stap harem krae blong olgeta, mo i stap sevem olgeta.”—Ol Sam 145:18, 19.

[Tok blong makem poen long pej 5]

Man i no gat naf waes no fasin luksave blong rul hem wan, hem i nidim help, mo God nomo i naf blong halpem hem

[Tok blong makem poen long pej 6]

Save long saed blong God mo Jisas Kraes i save halpem yumi blong frengud wetem Jeova God mo samting ya nao i givim pis long tingting blong yumi

[Tok blong pija long pej 7]

Fasin blong folem ol advaes blong Baebol i givhan long yumi blong gat pis long famle