Hop Blong Laef Bakegen i Givim Paoa Long Yumi
Hop Blong Laef Bakegen i Givim Paoa Long Yumi
“From Kraes, mi mi sakemaot olgeta samting ya blong laef blong mi bifo . . . blong mi savegud Kraes, mo blong mi kasem paoa ya we God i yusum blong mekem hem i laef bakegen long ded.”—FILIPAE 3:8-10.
1, 2. (a) ?Plante yia bifo, wan pasta i tokbaot laef bakegen olsem wanem? (b) ?Laef bakegen long ded bambae i hapen olsem wanem?
LONG stat blong ol yia 1890, ol niuspepa oli tokbaot wan spesel tok we wan pasta long Brooklyn, New York, Yunaeted Stet, i givim. Hem i talem se long taem we ol dedman oli laef bakegen, bambae God i joenem bakegen ol bun mo mit we bifo oli stap long bodi blong man, mo bambae hem i givim laef long olgeta, nating sipos faea i bin bonem ol bodi ya no oli kasem kil long wan aksiden, wael anamol i kakae olgeta no oli kam olsem graon. Pasta ya i bilif se long wan 24 aoa dei, bambae win i blak from we i fulap long ol han, leg, fingga, bun, string, mo skin blong plante milian man we oli ded. Ol haf blong bodi bambae oli traem faenem ol narafala haf blong semfala bodi. Biaen, ol sol bambae oli aot long heven mo long helfaea nao oli kambak insaed long ol bodi ya we oli laef bakegen.
2 I krangke nomo blong bilif se ol smosmol samting we oli kolem atom, we oli bin mekemap bodi blong man fastaem, oli save kam wanples olsemia blong bodi i laef bakegen. Mo antap long samting ya, ol man oli no gat wan sol we i no save ded samtaem. (Prija 9:5, 10; Esikel 18:4) Jeova, God we i mekem man i laef bakegen, hem i no nidim blong tekem ol atom we oli bin mekemap bodi blong man fastaem, oli kam wanples bakegen. Hem i save mekem wan niufala bodi blong olgeta we bambae oli laef bakegen. Jeova i givim paoa long Pikinini blong hem, Jisas Kraes, blong mekem ol dedman oli laef bakegen, wetem jans ya blong kasem laef we i no save finis. (Jon 5:26) Taswe Jisas i talem se: “Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef.” (Jon 11:25, 26) !Promes ya i mekem yumi haremgud tumas! Hem i givim paoa long yumi blong stanap strong long taem blong trabol, mo i mekem yumi rere blong ded from bilif blong yumi olsem ol trufala Witnes blong Jeova.
3. ?From wanem Pol i mas givim wan tok blong sapotem tijing blong laef bakegen?
3 Bilif long laef bakegen i no laenap wetem tingting ya se ol man oli gat wan sol we i no save ded samtaem—hemia tingting blong Plato, wan waes man blong Gris. From samting ya,?olsem wanem taem aposol Pol i prij long ol haeman blong Gris antap long Aeropagus long Atens, mo hem i tokbaot Jisas se God i mekem hem i laef bakegen? Baebol i talem se: “Nao taem olgeta oli harem tok ya we God i mekem wan man we i ded i laef bakegen, sam man oli laf nomo long hem.” (Ol Wok 17:29-34) Bighaf long olgeta we oli luk Jisas afta we hem i laef bakegen, oli laef yet long taem ya mo nating se ol narafala man oli laf, olgeta oli talemaot klia se, Jisas i laef bakegen. Be sam giaman tija we oli joen wetem kongregesen long Korin oli talem se ol dedman oli no save laef bakegen. Taswe, long 1 Korin japta 15, Pol i givim wan strongfala tok blong sapotem Kristin tijing ya. Taem yumi stadigud long ol tok blong hem, samting ya bambae i pruvum se hop ya blong laef bakegen hem i sua fulwan mo hem i gat bigfala paoa long yumi.
Strong Pruf We Jisas i Laef Bakegen
4. ?Hu ya olgeta we Pol i talem se oli luk Jisas afta we hem i laef bakegen?
4 Makemgud olsem wanem Pol i statem toktok blong hem. (1 Korin 15:1-11) Ol man Korin oli no kam man blong bilif long nating nomo, taswe oli save holemtaet gud nius we i blong sevem ol man. Kraes i ded from sin blong yumi, oli berem hem, mo hem i girap i laef bakegen long ded. Yes, afta we Jisas i laef bakegen, hem i kamtru long Kefas (Pita), mo biaen hem i kamtru “long ol twelef man blong hem.” (Jon 20:19-23) Samwe long 500 man oli luk Jisas, maet long taem ya we hem i givim oda se: “Yufala i mas go long ol man long olgeta ples long wol, blong pulum olgeta oli kam man blong mi.” (Matiu 28:19, 20) Jemes i luk hem, mo ol narafala aposol we oli stap strong long hem, olgeta tu oli luk hem. (Ol Wok 1:6-11) Klosap long Damaskas, Jisas i kamtru long Sol ‘we hem i olsem wan pikinini we i no bon long stret taem blong hem’—i olsem we Sol i laef bakegen finis olsem wan spirit man. (Ol Wok 9:1-9) Ol man Korin oli kam man blong bilif from we Pol i prij long olgeta, mo oli lesin long gud nius.
5. ?Wanem poen we Pol i yusum blong pulum tingting blong ol man long 1 Korin 15:12-19?
5 Makemgud fasin we Pol i yusum blong winim tingting blong ol man. (1 Korin 15:12-19) From we plante man we oli luk Jisas wetem prapa ae blong olgeta, oli talemaot se hem i laef bakegen long ded, ?olsem wanem nao ol man oli save talem se ol dedman oli no save laef bakegen? Sipos Jisas i no girap long ded, wok blong prij blong yumi mo bilif blong yumi i blong nating nomo, mo yumi giaman mo yumi stap agensem God taem yumi talemaot se hem i mekem Jisas i laef bakegen. Mo sipos ol dedman oli no laef bakegen ‘yumi stap yet long ol sin blong yumi,’ mo ol man blong Kraes we oli ded finis, olgeta ya oli lus olgeta. Antap long samting ya, “sipos yumi stap putum tingting blong yumi long Kraes, be blong laef ya long wol nomo, man, sore tumas long yumi. Hemia, yumi kasem trabol we i bitim ol narafala man long wol.”
6. (a) ?Pol i talem wanem blong pruvum se Jisas i laef bakegen? (b) ?Wanem ya “laswan blong ol enemi ya,” mo olsem wanem bambae God i winim enemi ya?
6 Pol i talem stret se Jisas i laef bakegen. (1 Korin 15:20-28) Long olgeta man we oli slip long ded, Kraes i olsem “fas kakae ya we i rere long garen.” Samting ya i minim se ol narafala man tu bambae oli save laef bakegen long ded. Ded i kamaot from we faswan man ya Adam i no obei, ale laef bakegen tu bambae i kam tru long wan man—hemia Jisas. Ol man we oli blong hem, bambae oli laef bakegen long taem ya we hem i stap olsem king. Kraes bambae “i spolem ol jif blong ol devel we oli stap olbaot long wol ya, mo ol gavman blong olgeta, wetem olgeta we oli gat paoa” we oli agensem Hae Rul blong God. Nao bambae hem i rul olsem king gogo kasem taem ya we Jeova i putum ol enemi blong hem oli stap aninit long leg blong hem. “Mo laswan blong ol enemi ya”—ded we yumi kasem long Adam—bambae God i winim hem tru long sakrefaes blong Jisas. Biaen, Kraes i givim Kingdom i gobak long God mo Papa blong hem, mo i putum hem i stap aninit long “paoa blong God ya we fastaem i putum olgeta samting oli stap aninit long paoa blong hem. Nao God bambae i holem paoa bakegen, blong i rul long olgeta samting.”
?Tekem Baptaes Long Bihaf Blong Ol Dedman?
7. ?Hu ya olgeta we oli “stap tekem baptaes blong kam ol dedman,” mo olsem wanem samting ya i gat paoa long laef blong olgeta?
7 Pol i askem long olgeta we oli no bilif se ol dedman oli save laef bakegen se: “?From wanem ol man oli stap tekem baptaes blong kam ol dedman?” (1 Korin 15:29, NW) Pol i no minim se olgeta we oli laef oli mas baptaes long bihaf blong ol dedman. Nogat. Ol disaepol blong Jisas wanwan oli mas kasem save, bilif, mo tekem baptaes. (Matiu 28:19, 20; Ol Wok 2:41) Ol Kristin we God i makemaot olgeta, oli “baptaes blong kam ol dedman” taem oli yusum ful bodi blong olgeta long wan fasin blong laef we bambae i lidim olgeta i go kasem taem we oli ded mo laef bakegen. Baptaes ya i stat taem spirit blong God i givim hop long olgeta blong laef long heven mo baptaes ya i finis taem oli laef bakegen olsem spirit man we i no save ded samtaem, long heven.—Rom 6:3-5; 8:16, 17; 1 Korin 6:14.
8. ?Ol Kristin oli save sua long wanem samting, nating sipos Setan mo ol man blong hem oli kilim olgeta i ded?
8 Olsem ol tok blong Pol oli soemaot, hop blong laef bakegen i givhan long ol Kristin blong rere oltaem blong fesem denja mo ded from wok blong talemaot gud nius blong Kingdom. (1 Korin 15:30, 31) Oli save se sipos Jeova i letem Setan mo ol man blong hem oli kilim olgeta i ded, Jeova i save mekem olgeta oli laef bakegen. God nomo i save spolem sol, no laef blong olgeta, long Gehena, we hem i pija blong ded blong olwe.—Luk 12:5.
Yumi Mas Lukaotgud
9. ?Blong hop blong laef bakegen i givim paoa long laef blong yumi, yumi mas lukaotgud long wanem samting?
9 Hop blong laef bakegen i givim paoa long Pol. Maet long taem we hem i stap long Efesas, ol enemi blong hem oli sakem hem i go long bigfala stad blong faet wetem ol wael anamol. (1 Korin 15:32) Sipos samting ya i tru, God i sevem hem, olsem we hem i bin sevem Daniel long ol laeon. (Daniel 6:16-22; Hibrus 11:32, 33) From we Pol i gat hop blong laef bakegen long ded, hem i no gat tingting olsem ol man Juda we oli lego tru wosip long taem blong Aesea. Olgeta ya oli talem se: “I gud yumi kakae, yumi dring from we tumora bambae yumi ded.” (Aesea 22:13, Septuagint) Blong hop ya i givim paoa long laef blong yumi, olsem we hem i mekem long laef blong Pol, yumi no mas kampani wetem ol man we oli gat nogud tingting ya. Pol i givim woning se: “Yufala i no go krangke. . . . Ol stret man nomo, be ol fren blong olgeta we oli no stret, oli save spolem fasin blong olgeta.” (1 Korin 15:33) I tru se, rul ya i stret long ol defren haf blong laef.
10. ?Olsem wanem yumi holem hop blong laef bakegen i stap strong long tingting blong yumi?
10 Pol i talem long olgeta we oli no bilif long laef bakegen long ded se: “Yufala i mas stretem tingting blong yufala, mo yufala i mas lego ol sin blong yufala. I gat sam long yufala we oli no save God nating. Mi talem olsem, be hemia bigfala sem blong yufala.” (1 Korin 15:34) Naoia, long “taem blong en” yumi nidim blong wok folem stret save long saed blong God mo Kraes. (Daniel 12:4; Jon 17:3) Samting ya bambae i halpem yumi blong holem hop ya blong laef bakegen i stap strong long tingting blong yumi.
?Laef Bakegen Long Wanem Kaen Bodi?
11. ?Pol i yusum wanem pijatok taem hem i tokbaot laef bakegen blong ol tabu Kristin?
11 Pol i gohed blong ansa long sam kwestin. (1 Korin 15:35-41) Maet wan man we i wantem mekem se yumi no bilif long laef bakegen, i askem se: “?Bambae ol dedman oli laef bakegen olsem wanem? ?Bambae bodi blong olgeta i olsem wanem?” Olsem Pol i soemaot, sid we man i planem long graon i mas ded fastaem, bifo we hem i gru i kam antap. Long sem fasin, wan man we tabu spirit i makemaot hem, hem tu i mas ded. Olsem gru we i kamaot long wan sid hem i wan niufala bodi, i sem mak long ol tabu Kristin ya we taem oli laef bakegen, bodi blong olgeta i defren long bodi blong man long wol. Nating se hem i gat semfala fasin we hem i gat bifo we hem i ded, hem i laef bakegen olsem wan niufala man wetem bodi blong spirit man, blong hem i save laef long heven. Olgeta we oli laef bakegen long wol nomo, bambae oli laef bakegen long bodi blong man.
12. ?Wanem mining blong ol tok ya se ol “bodi blong heven” mo ol “bodi blong wol?”
12 Olsem Pol i talem, bodi blong man i no sem mak wetem bodi blong anamol. Mo ol wanwan anamol tu, oli gat bodi blong olgeta we i no sem mak long narafala anamol. (Jenesis 1:20-25) Ol “bodi blong heven” (NW) we oli blong ol spirit man, oli kasem glori we i defren long glori blong ol “bodi blong wol” (NW) we oli mit mo blad. Tingbaot san, mun, mo ol sta, olgeta tu oli defren, we sam oli karem moa glori i bitim ol narawan. Be glori blong ol tabu man we oli laef bakegen, i bigwan moa.
13. ?Olsem 1 Korin 15:42-44 i soemaot, wanem samting we oli putum long graon mo wanem samting i girap bakegen?
13 Afta we Pol i tokbaot olsem wanem we ol bodi oli defdefren, hem i talem se: “Sem mak taem man i laef bakegen long ded.” (1 Korin 15:42-44, NW) Hem i talem se: “Man we oli putum long graon, hem i roten. Be man we i girap bakegen i no moa save roten.” Long ples ya, Pol i stap tokbaot ol tabu man olsem wan kampani. Taem oli ded, bodi blong olgeta i roten, be oli laef bakegen long wan bodi we i no moa save roten, we i fri long sin. Nating se wol i no ona long olgeta, oli laef bakegen long heven mo oli kasem glori wetem Kraes. (Ol Wok 5:41; Kolosi 3:4) Taem wan long olgeta i ded mo “oli putum hem long graon, hem i wan bodi blong laef long wol” mo hem i laef bakegen long wan “bodi blong spirit man.” From we God i save mekem samting ya long ol tabu Kristin, yumi sua se hem i save mekem ol narafala tu oli laef bakegen long wol.
14. ?Olsem wanem Pol i soemaot se Kraes i defren long Adam?
14 Pol i gohed blong soemaot olsem wanem Kraes i defren long Adam. (1 Korin 15:45-49) Faswan man ya, Adam, “i kam wan laef sol.” (Jenesis 2:7, NW) “Las Adam”—Jisas—‘i kam wan spirit man we i save givim laef.’ Hem i givim laef blong hem olsem wan ransom sakrefaes, we i go fastaem long ol tabu man blong hem. (Mak 10:45) Taem oli man long wol ya, oli ‘holem finis fasin blong man ya we God i mekem long graon,’ be taem oli laef bakegen oli kam olsem las Adam. Be i tru se sakrefaes blong Jisas bambae i givhan long olgeta man we oli obei, i minim olgeta ya tu we bambae oli laef bakegen long wol.—1 Jon 2:1, 2.
15. ?From wanem ol tabu Kristin oli no laef bakegen long wan bodi we i gat mit mo blad, mo olsem wanem olgeta ya oli laef bakegen long taem ya we Kraes i stap rul?
15 Taem ol tabu Kristin oli ded, oli no laef bakegen wetem wan bodi we i gat mit mo blad. (1 Korin 15:50-53) Wan bodi blong mit mo blad, we i save roten, i no save go insaed long Kingdom blong heven. Sam long ol tabu man ya, bambae oli no nid blong slip longtaem long ded. Long taem ya we Jisas i stap rul finis, sipos i gat sam long olgeta ya we oli stap tru long God go kasem ded, bambae ‘wantaem nomo God i jenisim bodi blong olgeta.’ Wantaem nomo, bambae oli laef bakegen long glori blong spirit man we bodi blong olgeta i no moa save roten samtaem. Sloslou, olgeta we oli olsem woman blong Kraes long heven ‘we hem i promes blong mared long hem,’ bambae i kasem fulnamba blong olgeta, hemia 144,000.—Revelesen 14:1; 19:7-9; 21:9; 1 Tesalonaeka 4:15-17.
!Winim Ded!
16. Olsem Pol mo ol profet bifo oli talem, ?wanem bambae i hapen long ded we yumi kasem from sin blong Adam?
16 Pol i talemaot se God bambae i winim ded olgeta. (1 Korin 15:54-57) Taem bodi ya we i save ded, i jenis i kam we i no moa save ded samtaem, mo bodi ya we i blong lus i jenis i kam we i no moa save lus samtaem, tok ya bambae i kamtru we i se: “Ded. God i spolem yu finis. !Hem i winim yu olgeta! ?E, ded, olsem wanem yu save win? ?Olsem wanem yu save spolem mifala?” (Aesea 25:8; Hosea 13:14) Ded i kasem paoa blong hem blong spolem yumi long sin, mo sin i kasem paoa blong hem long Loa, mo Loa i jajem ol sinman se oli mas ded. Be from sakrefaes mo laef bakegen blong Jisas, ded we yumi kasem from sin blong Adam bambae i no moa save winim yumi.—Rom 5:12; 6:23.
17. ?Olsem wanem ol tok blong 1 Korin 15:58 oli stret long yumi tede?
17 Pol i gohed i talem se: “Ol gudgudfala brata mo sista. Yufala i mas stanap strong. Yufala i no mas slak. Oltaem yufala i mas wok strong long ol wok ya blong masta blong yumi, from we yufala i save finis, se taem yufala i wok blong Masta ya blong yumi, be wok ya bambae i mas gat frut blong hem.” (1 Korin 15:58) Ol tok ya oli stret long ol man we tabu spirit i makemaot olgeta, we oli stap yet long wol tede, mo i stret tu long “ol narafala sipsip” blong Jisas, nating sipos oli ded long taem blong ol lasdei ya. (Jon 10:16) Wok blong olgeta olsem ol man blong talemaot Kingdom, i no blong nating, from we bambae oli laef bakegen. Taswe, olsem ol man blong Jeova, yumi mas wok strong long wok blong Masta mo wet long dei ya we yumi save singaot from glad se: “?E, ded, olsem wanem yu save win?”
!Hop Blong Laef Bakegen i Kamtru!
18. ?Hop blong Pol, long saed blong laef bakegen, i strong olsem wanem?
18 Ol tok blong Pol long 1 Korin japta 15 oli soemaot klia se hop blong laef bakegen i gat paoa long laef blong hem. Hem i sua fulwan se Jisas i laef bakegen long ded mo we ol narafala tu bambae oli aot long beregraon blong ol dedman. ?Bilif blong yu i strong olsem bilif blong Pol? Pol i tingbaot ol samting blong laef blong hem “olsem rabis nomo” mo hem i “sakemaot olgeta samting ya” blong bambae hem i ‘savegud Kraes mo blong hem i kasem paoa ya we God i yusum blong mekem hem i laef bakegen long ded.’ Aposol ya i rere blong ded olsem Kraes, from we hem i gat hop blong “kasem laef bakegen long ded, wetem olgeta we oli laef bakegen fastaem long ol narafala.” Baebol i tokbaot samting ya tu olsem “laef bakegen long ded fastaem,” hemia laef bakegen we ol 144,000 tabu man blong Jisas oli kasem. Yes, olgeta bambae oli laef bakegen olsem spirit man long heven, be “ol narafala dedman” bambae oli laef bakegen long wol.—Filipae 3:8-11; Revelesen 7:4; 20:5, 6.
19, 20. (a) Hu ya sam long olgeta we Baebol i tokbaot we bambae oli laef bakegen long wol? (b) ?Yu yu stap wet blong hu ya i laef bakegen?
19 Olgeta we tabu spirit i makemaot olgeta, we oli holem bilif gogo oli ded, oli luk nambawan hop blong olgeta blong laef bakegen finis. (Rom 8:18; 1 Tesalonaeka 4:15-18; Revelesen 2:10) Olgeta we oli sef long “bigfala trabol” bambae oli luk hop blong laef bakegen i kamtru long wol, taem “olgeta man we oli ded long solwota, oli aot long solwota oli kam. Mo olgeta narafala dedman tu oli kam. Ded wetem [“Hades,” NW] tufala i no moa save holem olgeta, olgeta evriwan oli aot long tufala, oli kam.” (Revelesen 7:9, 13, 14; 20:13) Bambae Job i stap long medel blong olgeta ya we bambae oli laef bakegen long wol. Hem i bin harem nogud taem hem i lusum ol seven pikinini boe mo trifala gel blong hem. !Tingbaot bigfala glad blong hem taem hem i welkamem olgeta—mo olgeta tu bambae oli glad tumas blong luk se oli gat seven moa brata mo tri naesfala sista bakegen!—Job 1:1, 2, 18, 19; 42:12-15.
20 !Hemia wan nambawan blesing, taem we Ebraham mo Sera, Aesak mo Rebeka—yes, plante narafala bakegen, wetem “ol profet blong bifo” tu—oli girap oli laef bakegen long wol! (Luk 13:28) Daniel i wan long ol profet ya we God i promes blong mekem hem i laef bakegen long taem we Mesaea i rul. Daniel i stap slip long beregraon blong klosap 2,500 yia finis, be long paoa blong laef bakegen, bambae i no longtaem hem i ‘laef bakegen blong kasem pei blong hem’ olsem wan long ‘ol prins ya blong olgeta ples long wol.’ (Daniel 12:13; Ol Sam 45:16, NW) Bambae yumi glad tumas blong welkamem ol man blong bilif. !Be i no olgeta nomo, bambae yumi welkamem ol papa, mama, boe mo gel blong yumi tu, wetem ol narafala man we yumi laekem tumas, we oli lus long ded!
21. ?From wanem yumi no mas wet blong mekem i gud long ol narafala?
21 Sam long ol fren mo famle blong yumi oli mekem wok blong Jeova long plante yia finis mo naoia oli kam olfala. From we oli olfala, maet i hadwok long olgeta blong winim ol problem blong laef. !Yumi save soem lav long olgeta, taem yumi traem bes blong yumi blong givhan long olgeta naoia, taem oli laef yet! Long rod ya, taem we oli ded, bambae yumi no sore from we yumi harem se yumi no bin mekem wok blong yumi blong givhan long olgeta. (Prija 9:11; 12:1-7; 1 Timoti 5:3, 8) Yumi save sua se Jeova bambae i no save fogetem ol gudfala samting we yumi mekem blong givhan long ol narafala, nating sipos oli olfala no oli yangfala, no laef blong olgeta i olsem wanem. Pol i talem se: “Oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.”—Galesia 6:10; Hibrus 6:10.
22. ?Go kasem taem ya we ol dedman oli laef bakegen, yumi mas gat strong tingting blong mekem wanem?
22 Jeova i “Papa blong yumi we i gat sore, hem i God we i stamba blong fasin blong givhan.” (2 Korin 1:3, 4) Tok blong hem i mekem yumi haremgud mo i givhan long yumi blong mekem ol narafala tu oli haremgud from hop blong laef bakegen we i givim paoa. Go kasem taem we yumi luk hop ya i kamtru mo ol dedman oli laef bakegen long wol, yumi mas olsem Pol we i bilif se ol dedman bambae oli laef bakegen. Antap moa, yumi mas folem eksampel blong Jisas, we i luk hop blong hem i kamtru finis, taem God i yusum paoa blong hem blong mekem hem i laef bakegen. I no longtaem, bambae olgeta we oli stap long beregraon oli harem voes blong Kraes mo oli kamaot. Samting ya bambae i mekem yumi haremgud, mo i givim glad long yumi. !Be antap long samting ya, i gud yumi gat fasin tangkiu long Jeova, we i winim ded tru long Masta blong yumi Jisas Kraes!
?Wanem Ansa Blong Yu?
• ?Hu ya olgeta we Pol i talem se oli luk Jisas i laef bakegen?
• ?Wanem ya “laswan blong ol enemi ya,” mo olsem wanem bambae God i winim enemi ya?
• ?Long saed blong ol tabu Kristin, wanem ya samting we oli putum long graon mo samting we i girap bakegen?
• ?Hu ya ol man we Baebol i tokbaot, we yu yu laekem blong mitim olgeta afta we oli laef bakegen long wol?
[Kwestin]
[Tok blong pija long pej 16]
Aposol Pol i givim wan strongfala tok blong sapotem bilif blong laef bakegen
[Tok blong pija long pej 20]
!Bigfala glad bambae i kamaot taem Job, famle blong hem, mo plante narafala man bakegen, oli laef bakegen long ded!