?Laef Blong Yu i Save Gat Moa Mining?

I NO oltaem we wan sas samting i luk olsem se hem i sas. Long Yunaeted Stet, i gat wan pepa mane we i karem namba blong 10,000 dola. Be, pepa we oli yusum blong wokem mane ya long hem, praes blong hem i smol we i smol nomo.

?Samtaem yu bin tingting sipos wan pis pepa we i no gat bigfala praes long hem i save givim trufala mining long laef blong yu? Plante milian man oli tingting se ol pepa ya oli save mekem olsem. Oli wok long dei mo long naet, oli traem bes blong olgeta blong kasem fulap mane. Samtaem, fasin blong ronem mane i mekem se oli no moa kea long helt blong olgeta, ol fren blong olgeta, mo famle blong olgeta tu. ?Oli winim wanem? ?Mane—no ol samting we yumi pem wetem mane—i save givim trufala glad blong olwe?

Sam man blong stadi oli talem se, moa we yumi lukaot glad tru long ol samting long saed blong bodi, moa we bambae yumi lusum glad blong yumi. Alfie Kohn, wan man blong raetem niuspepa, i talem se “yumi no save pem trufala glad. . . . Ol man we oli wantem tumas blong gat fulap sas samting, plante taem oli wari bigwan, tingting blong olgeta i no save spel, mo tu helt blong olgeta i nogud.”—International Herald Tribune.

 Ol man we oli stadi long saed ya, oli luksave se mane i no save givim wan laef we i gat mining. Be, plante man oli no bilif long tingting ya. Hemia i no wan samting blong sapraes from we evri dei, ol man we oli stap laef long ol kantri long Wes oli stap luk samwe long 3,000 pablisiti. Nomata we ol pablisiti ya oli blong pulum ol man blong pem ol trak no ol swit samting blong kakae, be bigfala tingting we i stap biaen long hem, hemia se: ‘Yu pem samting ya, nao bambae yu glad moa.’

?Wanem i kamaot from fasin ya we oltaem, ol man oli stap leftemap ol sas samting long saed blong bodi? !Yes, plante taem ol man oli fogetem ol sas samting long saed blong spirit.! Wan ripot insaed long magasin ya Newsweek, i talem se, i no longtaem i pas, ajbisop blong Cologne, Jemani, i talem se “long ples blong mifala, ol man oli no moa storian long saed blong God.”

Maet yu givim fulpaoa blong yu blong kasem ol samting we yu nidim long laef. Mo maet yu harem we yu gat no gat taem blong mekem narafala samting. Be samtaem, maet yu harem se i mas gat moa samting long laef i bitim fasin blong bisi long ol wok gogo kasem we yu kam olfala mo helt blong yu i nogud, nao yu stop.

?Olsem wanem sipos yu spenem moa taem long ol samting long saed blong spirit? ?Bambae samting ya i givim moa glad long yu? ?Wanem i save givim moa mining long laef blong yu?