Yumi Man Blong Bilif

Talemaot Gud Nius Long Ol Plantesin Blong Raes Long Taewan

OL MAN long Taewan oli glad from we oltaem i gat plante ren, samting ya i mekem se tu taem wan yia ol man oli save hivimap fulap raes long plantesin blong olgeta. Be samtaem, ren i no kam long taem we i mas kam, mo ol sid oli ded. ?Taem samting ya i hapen fama i lego wok blong hem? Nogat. Fama ya i save se hem i nidim blong gohed. Hem i planem ol niufala sid insaed long ol bokis, nao taem oli kam bigwan lelebet, hem i planem olgeta long ol plantesin. Biaen, sipos weta i gud, fama i save hivimap ol gudfala kakae long plantesin blong hem. Fasin blong planem kakae mo hivimap kakae long saed blong spirit, i klosap sem mak.

Gohed Blong Hivimap Ol Kakae Long Saed Blong Spirit

Long olgeta yia we oli pas finis, ol Witnes blong Jeova long Taewan oli wok had blong planem ol sid mo hivimap ol kakae blong trutok blong Baebol, long sam eria we i luk olsem se i no save karem gudfala frut. Wan eksampel hemia long Miao-li County. Ol Witnes oli bin traehad oltaem blong prij long eria ya be smol man nomo oli lesin. Ale long 1973 oli sanem wan brata wetem woman blong hem we tufala i spesel paenia, tufala i kam wok fultaem long ples ya blong talemaot Kingdom. Long stat, sam oli soem intres long gud nius. Be, sloslou intres ya i lus. Biaen, oli sanem tufala spesel paenia ya i go long wan narafala ples.

Long 1991 oli sanem tu narafala spesel paenia i go long ples ya. Be bakegen ol samting we oli hapen biaen oli soemaot se i no stret taem yet blong ol samting long saed blong spirit oli gru. Afta we sam yia i pas, oli sanem ol spesel paenia ya oli go long sam narafala ples, we i gat hop se bambae i save karem moa frut. Taswe ples ya i stap nomo olsem, we oli no moa prij long hem blong longtaem.

Ol Niufala Traehad We Oli Karem Frut

Long Septemba 1998, i gat wan disisen i kamaot blong traehad bakegen blong lukaot ol eria long Taewan we oli save karem frut. Plante long ol eria ya oli no stap long ol teritori we ol Witnes oli stap wok long hem. ?Olsem wanem bambae oli save mekem wok ya fulwan? Oli sanem samwe long 40 spesel paenia blong oli wok smoltaem long ol teritori ya we i gat fulap man long hem. Hemia ol teritori we oli no bin prij long olgeta bifo.

Tufala taon we i joen tugeta long Miao-li County oli stap insaed long ol teritori we oli jusumaot blong prij long hem. Fo sista we oli no mared, oli go wok long ples ya blong tri manis blong lukluk sipos teritori ya i save karem frut. I no longtaem afta we oli kasem ples ya, oli raetem ol nambawan ripot we i soemaot se oli faenem plante man oli soem intres. Taem tri manis blong olgeta long ples ya, klosap i finis, oli mekem plante Baebol stadi finis. Oli statem wan grup blong buk stadi wetem help blong wan elda we i stap long wan kongregesen klosap long olgeta.

Tri long ol fo sista ya oli talem klia se oli wantem gohed blong lukaot long ol “smol sid” ya we oli no strong yet be oli stap gru gud. Biaen, tu long olgeta i kam spesel paenia, mo namba tri long olgeta i gohed blong wok long ples ya olsem wan fultaem paenia. Wan elda we i stap long kongregesen klosap, i muf i go long eria ya blong halpem olgeta. Moa long 60 man oli kam blong lesin long faswan pablik tok ya we wan seket elda i givim. Naoia kongregesen we i stap klosap long eria ya i stap halpem niufala grup ya blong mekem miting evri Sande, wetem sam miting blong buk stadi. I no longtaem maet bambae i gat wan niufala kongregesen long eria ya.

 Fasin Blong Wok Strong i Karem Blesing Long Sam Narafala Ples long Taewan

Ol gudfala frut oli kamaot tu long sam narafala eria bakegen. Long I-lan County long not is blong aelan ya, wan niufala Buk Stadi i stat. Hemia eria ya we ol spesel paenia oli bin wok long hem blong smoltaem.

Wan long ol paenia ya we i kam prij smoltaem long eria ya, i stap prij long ol haos wanwan long sapa, nao hem i mitim wan yangfala man mo i soem wan pepa long hem we i tokbaot taem blong ol miting. Kwiktaem nomo yangfala man ya i askem long hem se: “?Mi save kam long miting ya tumora naet? ?Sipos i olsem bambae mi werem wanem?” Naoia, paenia ya i stap mekem eit Baebol stadi evri wik wetem ol man we oli intres. Sam long ol Baebol studen ya oli mekem plan finis blong kam pablisa blong talemaot gud nius, wetem mak ya blong baptaes.

Wan woman long taon ya i stap go long jos blong plante yia finis, be hem i no save faenem wan man blong tijim hem long Baebol. Hem i tekem jans ya taem wan paenia i soemaot rod long hem blong mekem Baebol stadi. Paenia ya i leftemap tingting blong hem blong rerem ol lesen blong hem bifo long stadi. Taem paenia ya i kambak blong mekem Baebol stadi, hem i faenemaot se woman ya i mekem “homwok” blong hem finis. Hem i bin pem wan not buk mo i raetem olgeta kwestin blong stadi buk i go long not buk ya. Nao hem i raetem ol ansa blong wanwan kwestin i stap klosap long ol kwestin ya. Mo tu, hem i raetem olgeta vas long stadi buk blong hem i go insaed long not buk blong hem. Taem we sista ya i kam blong mekem faswan Baebol stadi long hem, woman ya i rerem finis tri faswan lesen insaed long stadi buk ya.

Sem samting i kamaot long taon blong Dongshih long sentrol Taewan. Ol spesel paenia we oli kam wok long ples ya blong tri manis, oli seremaot 2,000 buklet. Taem namba tri manis i kam, oli mekem moa long 16 Baebol stadi finis. Long Septemba 21, 1999, graon i seksek bigwan long sentrol Taewan mo i bin spolem bighaf blong taon ya. Be sam long olgeta we oli soem intres, oli gohed blong gru long saed blong spirit, nating se oli mas ron klosap wan aoa blong go long ol miting long Haos Kingdom we i stap klosap. Yes, i nidim fasin blong wok strong blong karem gudfala kakae long garen. Hemia tru long saed blong bodi mo long saed blong spirit tu.

[Map blong pija long pej 8]

(Lukluk niuspepa)

JAENA

Taewan Strait

TAEWAN

[Credit Line]

Mountain High Maps® Copyright © 1997 Digital Wisdom, Inc.