‘Man We i Gat Tingting Daon Hem i Waes’

‘?Jeova i askem wanem long yu? . . . Yu mas wokbaot wetem God we tingting blong yu i stap daon.’—MAEKA 6:8, NW.

1, 2. ?Wanem ya tingting daon, mo olsem wanem hem i defren long tingting we i flas?

 WAN aposol we i gat bigfala wok, i no wantem pulum tingting blong ol man i kam long hem wan. Wan jaj blong Isrel we i no gat fasin fraet, i talem se hem i smol moa long ol narafala man long famle blong papa blong hem. Wan man we i hae moa long ol narafala man long wol, i luksave se hem i no gat raet long evri samting. Wanwan long olgeta man ya oli soemaot tingting daon.

² Tingting daon i defren olgeta long fasin flas. Man we i gat tingting daon hem i skelem tingting blong hem long saed blong wok we hem i naf blong mekem mo long saed blong hem wan. Man olsem, hem i no save tinghae long hem wan. Man we i gat tingting daon hem i no praod, hem i no tok flas, mo i no traem kasem haenem, hem i luksave se i gat sam samting we hem i no naf blong mekem. Taswe, hem i respektem mo i tingbaot filing mo tingting blong ol narafala.

3. ?Long wanem rod “man we i mekem tingting blong hem i stap daon, hem i wan waes man”?

³ Taswe, i stret nomo we Baebol i talem se: “Man we i mekem tingting blong hem i stap daon, hem i wan waes man.” (Ol Proveb 11:2) Man we i gat tingting daon, hem i waes from we hem i folem wan rod we God i glad long hem, mo hem i stap longwe long flas tingting we i save mekem hem i sem bigwan. (Ol Proveb 8:13; 1 Pita 5:5) Laef blong plante man blong God i pruvum se i waes blong gat tingting daon. I gud yumi luk moa long saed blong trifala eksampel ya we yumi bin tokbaot long faswan paragraf.

Pol—Wan ‘Man Blong Wok’ Mo ‘Man Blong Wokem Ol Plan’

4. ?Wanem ol spesel blesing we Pol i kasem?

⁴ Pol i wan impoten man long lukluk blong ol faswan Kristin, mo ating i stret we oli ting olsem. Long minista wok blong hem, hem i wokbaot plante taosen kilometa long solwota mo long graon, mo hem i stanemap plante kongregesen. Antap long samting ya, Jeova i blesem Pol taem i mekem se Pol i luk ol vison mo i kasem presen ya blong toktok long ol defren lanwis. (1 Korin 14:18; 2 Korin 12:1-5) Mo tu, Jeova i givim tabu spirit long Pol blong raetem 14 leta we naoia oli stap long Kristin Grik haf blong Baebol. Yes yumi save talem se ol wok blong Pol oli bitim wok blong olgeta narafala aposol.—1 Korin 15:10.

5. ?Olsem wanem Pol i soem se hem i gat tingting daon?

⁵ From we Pol i stap lidim Kristin wok, maet samfala  oli ting se aposol ya i stap harem gud from gudnem we hem i gat, mo maet hem i tokflas from. Be, i no olsem, from we Pol i gat tingting daon. Hem i talem long saed blong hem wan se hem i “daon moa long ol narafala aposol,” mo i gohed i se: “I no stret nating blong ol man oli singaot mi, se aposol, from we fastaem, mi stap spolem ol man blong [“kongregesen,” NW] blong God.” (1 Korin 15:9) Fastaem, Pol i stap mekem trabol long ol Kristin. From samting ya, hem i neva fogetem se sipos God i no bin soemaot gladhat long hem, bambae hem i no save stap olsem wan fren blong God mo kasem ol spesel wok ya blong talemaot gud nius. (Jon 6:44; Efesas 2:8) Taswe, ol gudfala frut ya we Pol i kasem long wok blong prij oli no pulum hem blong ting se hem i hae moa long ol narafala.—1 Korin 9:16.

6. ?Olsem wanem Pol i soem tingting daon taem hem i kampani wetem ol Kristin long Korin?

⁶ Pol i soemaot klia se hem i gat tingting daon taem hem i wok wetem ol Kristin long Korin. I luk olsem se, sam long olgeta ya oli tinghae tumas long sam aposol. Long tingting blong olgeta, olgeta ya oli haeman, olsem Apolos, Pita, mo Pol tu. (1 Korin 1:11-15) Be, Pol i no bin pulum ol Kristin long Korin blong tingting olsem mo hem i no tekem jans ya blong leftemap hem wan. Taem hem i kamtru long olgeta, hem i no soemaot hem wan “long ol flas tok mo long ol waestok.” Defren olgeta, Pol i talem long saed blong hem wan mo ol fren we oli wok wetem hem, se: “I gud yufala i stap luk mifala olsem we mifala i man blong wok nomo blong Kraes. God i putumap mifala blong wokem ol plan blong hem we fastaem oli blong haed.” *—1 Korin 2:1-5; 4:1.

7. ?Olsem wanem Pol i soemaot tingting daon nating se hem i stap givim strong advaes?

⁷ Pol i soemaot tingting daon tu, taem hem i givim strongfala advaes mo i mas lidim narafala. Hem i tok long ol Kristin brata blong hem wetem ‘fasin sore blong God’ mo ‘long lav,’ i bitim we hem i yusum posisen we hem i gat olsem wan aposol. (Rom 12:1, 2, NW; Filimon 8, 9, NW) ?From wanem Pol i mekem olsem? From we hem i tingbaot se hem i ‘man blong wok’ nomo wetem ol brata blong hem, be hem i no man blong ‘mekem i strong long olgeta.’ (2 Korin 1:24) I sua se tingting daon we Pol i gat, hemia nao samting we i mekem se ol Kristin kongregesen blong faswan handred yia oli laekem hem tumas.—Ol Wok 20:36-38.

 Stret Tingting Long Ol Wok Blong Yumi

8, 9. (a) ?From wanem yumi mas gat tingting daon? (b) ?Olsem wanem olgeta we oli gat spesel wok oli save soemaot tingting daon?

⁸ Pol i soem wan gudfala eksampel long ol Kristin tede. Nomata wanem spesel wok we yumi kasem, i no gat wan long yumi we i gat raet blong ting se hem i hae moa long ol narafala. Pol i raetem se: “Sipos wan man i stap ting se, ‘Mi mi wan man ya,’ be hem i man nating nomo, hem i stap giaman nomo long hem.” (Galesia 6:3) ?From wanem? From we “evriwan oli mekem nogud finis, mo oli stap afsaed olgeta long ol gudgudfala fasin blong God.” (Rom 3:23; 5:12) Yes, yumi no mas fogetem se yumi evriwan i bon wetem sin blong Adam mo yumi stap ded. Ol spesel wok we yumi kasem, oli no save tekemaot yumi long sin ya we i stap long yumi. (Prija 9:2) Olsem Pol, yumi luksave se sipos yumi ol man yumi gat jans blong fren wetem God, mo blong kasem sam spesel wok tu, hemia from gladhat blong God nomo.—Rom 3:12, 24.

⁹ Wan man we i luksave samting ya, sipos hem i gat tingting daon, bambae hem i no save praod tumas, mo bambae hem i neva tok flas from ol wok we hem i bin mekem. (1 Korin 4:7) Taem hem i givim advaes no i stretem narafala, hem i mekem olsem we hem i wan man blong wok nomo wetem ol narafala—i no olsem wan masta. Tru ya, i rong sipos wan man, we i gat gudhan long wan wok, i pulum ol narafala blong presem hem no i yusum gudfala tingting we ol brata blong hem oli gat long saed blong hem, olsem wan jans blong leftemap hem wan. (Ol Proveb 25:27; Matiu 6:2-4) Ol tok blong presem yumi oli rili sas sipos oli kamaot long maot blong narafala—mo i nogud se yumi nao i pulum olgeta blong mekem olsem. Sipos ol tok ya oli kamaot long maot blong ol narafala, yumi no mas letem ol tok ya oli mekem yumi tinghae tumas long yumi.—Ol Proveb 27:2; Rom 12:3.

10. Eksplenem olsem wanem samfala we oli no soemaot olgeta, be oli “rijman long fasin blong bilif.”

¹⁰ Taem yumi kasem wan spesel wok, tingting daon bambae i halpem yumi blong no tingting tumas long saed blong yumi wan, from we samting ya i save givim tingting se kongregesen i stap gru gud from ol wok mo traehad blong yumi nomo. Eksampel, maet yumi gat gudhan blong tij. (Efesas 4:11, 12) Be, sipos yumi gat tingting daon, yumi mas luksave se sam long ol bigfala lesen we kongregesen i lanem long wan miting, oli no kamaot long ol tok we ol brata oli givim. ?I no leftemap tingting blong yu taem yu luk wan mama no papa we i laef hem wan, i kam oltaem long ol miting wetem evri pikinini blong hem? ?Olsem wanem long olgeta we oli stap kam long evri miting, nating se oli harem nogud long tingting blong olgeta mo oli harem se oli nating nomo? Mo tingbaot ol yangfala we sloslou oli stap gru long saed blong spirit i nating sipos i gat ol traem long skul mo long ol narafala ples. (Ol Sam 84:10) Maet olgeta ya oli no stap long platfom blong evriwan i luk olgeta. Ol narafala oli no luksave ol traem we olgeta ya oli fesem. Be, maet olgeta ya oli “rijman long fasin blong bilif” sem mak olsem olgeta ya we oli gat spesel wok insaed long kongregesen. (Jemes 2:5) Tru ya, fasin blong holemstrong long bilif, hemia nao samting we i mekem se Jeova i glad.—Matiu 10:22; 1 Korin 4:2.

Gideon—Oli “No Kaontem” Hem Nating Long Famle Blong Hem

11. ?Long wanem rod Gideon i soem tingting daon taem hem i toktok wetem enjel blong God?

¹¹ Gideon, wan strongfala yangman long laen blong Manase, i laef long wan taem we laef long Isrel i raf lelebet. Blong seven yia, ol man blong God oli safa from hadtaem we ol man Midian oli givim long olgeta. Be, naoia i taem blong Jeova i sevem ol man blong hem. Taswe, wan enjel i kamtru long Gideon mo i talem se: “!Strong man blong faet! !Naoia Hae God i stap wetem yu!” Gideon i gat tingting daon, taswe hem i no harem gud long naesfala tok ya. Be, hem i toktok long enjel ya wetem respek, i se: “Yes fren, be yu luk. ?Sipos Hae God i stap wetem mifala, be from wanem ol samting ya oli stap kam long mifala olsem?” Enjel i mekem ol samting ol klia taem hem i talem long Gideon se: “Yu mas go tekemaot ol man ples ya blong yu we oli stap long han blong ol man Midian ya, yu mas sevem olgeta.” ?Gideon i mekem wanem nao? Hem i no tekem wok ya wantaem nomo olsem jans blong leftemap hem olsem sevia blong nesen blong Isrel. Nogat. Gideon i ansa se:  “?Masta, bambae mi mi sevem olgeta olsem wanem? Mifala ya ol laen blong Manase, be long laen ya famle blong mifala ya we i laen blong Abiesa, hem i smol moa long ol narafala famle blong laen ya. Mo bakegen, mi, long famle blong mi, oli no kaontem mi nating.” !Hemia nao fasin blong man we i rili gat tingting daon!—Jajes 6:11-15.

12. ?Olsem wanem Gideon i soem kwaet fasin taem hem i karemaot wok blong hem?

¹² Bifo we Jeova i sanem Gideon i go faet, hem i traem Gideon fastaem. ?Olsem wanem hem i mekem samting ya? Hem i askem Gideon blong brekemdaon olta blong Bal we papa blong hem i bin wokem, mo katemdaon tabu pos we i stanap klosap long olta ya. Gideon i nidim strong tingting blong mekem wok ya, be hem i soem tingting daon mo kwaet fasin tu. Gideon i no mekem wok ya long klia ples blong evri man i luk hem, be hem i mekem long naet, taem we ol man oli no luk hem. Mo tu, Gideon i tingtinggud bifo we hem i mekem wok ya. Hem i tekem ten slef wetem hem—ating hem i putum sam oli waj taem we ol narafala oli halpem hem blong spolem olta mo tabu pos. * Nomata i olsem wanem, Jeova i blesem Gideon nao i mekem se hem i finisimgud wok ya. Mo biaen, God i yusum hem blong mekem ol man Isrel oli fri long han blong ol man Midian.—Jajes 6:25-27.

Soemaot Tingting Daon Mo Waes

13, 14. (a) ?Olsem wanem yumi save soem tingting daon taem yumi kasem wan spesel wok? (b) ?Olsem wanem Brata A. H. Macmillan i soem wan gudfala eksampel long saed blong tingting daon?

¹³ Yumi save lanem fulap samting long tingting daon we Gideon i soemaot. Eksampel, ?yumi mekem wanem taem yumi kasem wan spesel wok? ?Yumi tingbaot fastaem, olsem wanem wok ya bambae i leftemap yumi mo givim gudnem long yumi? ?No yumi gat tingting daon, yumi prea mo tingbaot sipos yumi naf blong mekemgud wok ya? Brata A. H. Macmillan, we i finisim ol wok blong hem long wol ya long 1966, i soemaot wan nambawan eksampel long saed ya. Wan taem,  C. T. Russell, faswan presiden blong Watch Tower Sosaeti, i askem long Brata Macmillan se hu man we hem i ting se bambae i naf blong lukaot long wok taem we Russell i no stap. Long storian blong tufala, Brata Macmillan i no leftemap hem wan, nating se maet hem i gat jans blong mekem olsem. Biaen, Brata Russell i askem Brata Macmillan blong tingbaot sipos hem i rere blong tekem wok ya. Plante yia biaen, Brata Macmillan i raetem se: “Mi sapraes bigwan we mi no moa save se bambae mi mekem wanem. Yes, mi bin tingting gud long saed ya, mo mi prea longtaem bifo we mi talem long hem se mi glad blong givhan long hem olsem we mi naf blong mekem.”

¹⁴ I no longtaem afta long taem ya, Brata Russell i ded, mekem se Watch Tower Sosaeti i no moa gat presiden. From we Brata Macmillan i bin stap lukaot long wok ya taem Brata Russell i go long trep blong hem blong prij, wan brata i talem long hem se: “Mac, yu yu gat bigfala jans blong kasem wok ya. Brata Russell i bin yusum yu long ples blong hem taem hem i aot, mo hem i talem long mifala evriwan blong folem evri samting we yu yu talem long mifala blong mekem. Naoia hem i go, we bambae i no moa save kambak. I luk olsem se yu nao bambae i gohed long wok ya.” Brata Macmillan i ansa se: “Brata, i no stret blong tingbaot bisnes ya olsem. Wok ya hem i wok blong Masta, mo wanem posisen we yu kasem long ogenaesesen blong Masta hem i dipen long wanem we Masta i tingting se i stret blong givim long yu; mo mi mi sua se mi mi no man blong mekem wok ya blong presiden.” Ale, Brata Macmillan i tokbaot wan narafala man we hem i ting se bambae i naf blong lukaot long wok ya. Olsem Gideon, brata ya i gat tingting daon long saed blong hem wan—hemia wan tingting we yumi evriwan i mas traehad blong kasem.

15. ?Wanem sam gudfala rod blong soemaot fasin luksave taem yumi prij long ol man?

¹⁵ Yumi tu, yumi mas soemaot tingting daon long ol fasin blong yumi taem yumi stap mekem ol spesel wok we yumi kasem. Gideon i wok long kwaet fasin, mo hem i traehad blong no mekem ol enemi blong hem oli kam kros blong nating nomo. Long sem fasin, taem yumi mekem wok blong prij, yumi mas gat tingting daon mo kwaet fasin taem yumi toktok wetem ol man. I tru, yumi joen long wan faet long saed blong spirit we i minim se yumi mas “brekemdaon ol giaman toktok” mo “samting we ol man oli stap stanemap long flas blong olgeta.” (2 Korin 10:4, 5) Be yumi no mas tok blong daonem ol narafala no pulum olgeta blong oli go agensem mesej blong yumi. Defren olgeta, yumi mas respektem tingting blong olgeta, agri long eni tingting we oli talem we i laenap wetem tingting blong yumi, mo pulum tingting i go long gudfala nius we yumi stap talemaot.—Ol Wok 22:1-3; 1 Korin 9:22; Revelesen 21:4.

Jisas—Nambawan Eksampel Blong Tingting Daon

16. ?Olsem wanem Jisas i soem se hem i gat tingting daon?

¹⁶ Beswan eksampel long saed blong tingting  daon, hemia Jisas Kraes. * Nating se Jisas i gat wan strongfala fasin fren wetem Jeova, oltaem hem i luksave se i gat sam samting we hem i no gat raet blong mekem. (Jon 1:14) Eksampel, taem mama blong Jemes mo Jon i askem sipos tufala pikinini blong hem oli save sidaon klosap long Jisas long kingdom, Jisas i talem se: “Man we bambae i sidaon long raet saed blong mi mo man we bambae i sidaon long lef saed blong mi, mi mi no gat raet blong jusumaot tufala.” (Matiu 20:20-23) Long wan narafala taem, Jisas i talem klia se: “Mi mi no save mekem wan samting nating long tingting blong mi nomo . . . mi no traem mekem olsem we mi nomo mi wantem, mi stap traem mekem olsem we Papa blong mi we i sanem mi mi kam, hem i wantem.”—Jon 5:30; 14:28; Filipae 2:5, 6.

17. ?Olsem wanem Jisas i soem tingting daon taem hem i kampani wetem ol narafala?

¹⁷ Jisas i hae moa long olgeta sinman, mo Papa blong hem, Jeova, i givim moa raet long hem i bitim olgeta man. Nating se i olsem, Jisas i gat tingting daon taem hem i kampani wetem ol man blong hem. Hem i no traem blong winim olgeta wetem bigfala save blong hem. Nogat. Hem i soem filing, mo wetem fasin sore, hem i tingbaot nid blong olgeta. (Matiu 15:32; 26:40, 41; Mak 6:31) Taswe, nating se Jisas i stretgud olgeta, hem i no putumap ol strong rul blong mekem se evri samting oli mas ron long fasin we i stretgud olgeta. Hem i neva askem ol disaepol blong hem blong givim moa long wanem we oli naf blong givim. Mo hem i neva putum plante wok long olgeta i bitim wanem we oli naf blong mekem. (Jon 16:12) !From samting ya nao, plante man we oli kam long hem oli harem gud!—Matiu 11:29.

Folem Eksampel Blong Jisas Long Saed Blong Tingting Daon

18, 19. ?Olsem wanem yumi save folem eksampel blong Jisas taem (a) yumi tingbaot yumi wan, mo (b) taem yumi kampani wetem ol narafala?

¹⁸ Sipos man ya we i hae moa long olgeta man, i soem tingting daon, yumi mas traehad tu blong soem fasin ya. Plante taem ol sinman oli no wantem talemaot se oli no gat paoa blong mekem evri samting. Be, ol Kristin we oli folem eksampel blong Jisas, oli traehad blong gat tingting daon. Oli no praod tumas, mekem se oli rere blong givim wok long narafala we oli gat gudhan moa long wok ya; mo oli no flas mo stronghed blong lesin long advaes we narafala i mas givim long olgeta. Oli soem gudfala tingting blong wok tugeta, oli traehad blong mekem evri samting long kongregesen oli gohed “long fasin we i stret gud, we ol man oli glad long hem.”—1 Korin 14:40.

¹⁹ Tingting daon i givhan long yumi tu blong no bitim mak long wanem we yumi wantem narafala blong mekem mo i givhan long yumi blong tingbaot nid blong olgeta. (Filipae 4:5) Maet yumi gat gudhan mo save blong mekem wan samting we ol narafala oli no gat. Be, sipos yumi gat tingting daon, bambae yumi no ting se ol narafala oli mas wok folem rod we yumi wantem. From we yumi save se evri man i gat mak we hem i no naf blong kasem, bambae yumi gat tingting daon blong luksave se oli save mestem samtaem. Pita i raetem se: “Antap long ol narafala samting, yufala i mas lavlavem yufala. Yufala i no mas kam slak long samting ya, from we man we i stap lavem narafala man, oltaem hem i save fogivim hem from ol sin blong hem.”—1 Pita 4:8.

20. ?Yumi save mekem wanem sipos yumi luk se yumi no gat tingting daon?

²⁰ Olsem we yumi lanem finis, man we i gat tingting daon hem i waes. ?Olsem wanem nao sipos yu luksave se yu slak lelebet long fasin ya no maet yu flas? Yu no mas letem tingting blong yu i foldaon. Defren olgeta, i gud yu folem eksampel blong Deved, we i prea se: “Plis yu blokem mi blong mi no mekem stronghed blong mi blong mekem ol fasin nogud, mo yu no letem ol fasin ya i kam bos long mi.” (Ol Sam 19:13) Taem yumi gat bilif olsem Pol, Gideon, mo—antap long olgeta evriwan—Jisas Kraes, bambae yumi wanwan i stat luksave se tok ya i tru tumas we i talem se: “Man we i mekem tingting blong hem i stap daon, hem i wan waes man.”—Ol Proveb 11:2.

[Ol futnot]

?Yu Yu Tingbaot?

• ?Wanem ya tingting daon?

• ?Olsem wanem yumi save folem eksampel blong Pol long saed blong tingting daon?

• ?Wanem samting we yumi lanem long saed blong tingting daon taem yumi ridim stori blong Gideon?

• ?Olsem wanem Jisas i soem beswan eksampel blong tingting daon?

[Kwestin]

[Tok blong pija long pej 15]

Pol i gat tingting daon, taswe ol brata oli lavem hem tumas

[Tok blong pija long pej 17]

Gideon i yusum fasin waes taem hem i mekem wanem we God i wantem hem blong mekem

[Tok blong pija long pej 18]

Jisas, Pikinini blong God, i soem tingting daon long olgeta samting we hem i mekem