No Putum Mak We i Strong Tumas Blong Kasem

YUMI haremgud tumas taem yumi kasem mak we yumi bin putum mo taem ol plan blong yumi oli kamtru. Be plante taem long laef blong yumi, ol samting we yumi stap tingbaot no drim long olgeta, oli no kamtru olsem we yumi wantem. Taem i olsem, tingting i save foldaon mo yumi save kros long yumi wan, mo maet yumi kros long narafala tu. Wan waes man bifo i talem se: “Taem man i putum tingting blong hem i stap strong long wan samting, be samting ya i no kamtru, tingting blong hem i save foldaon.”—Ol Proveb 13:12.

?Wanem sam samting we i save mekem tingting i foldaon? ?Olsem wanem blong no putum ol mak we oli strong tumas blong kasem? Mo antap long samting ya, ?olsem wanem fasin ya i save givhan long yumi?

Ol Mak Mo Tingting We i Foldaon

Tede, fasin blong laef i spid tumas. Taswe, moa we yumi traehad blong mekem ol wok blong yumi, moa we yumi luksave se yumi no naf blong mekem evriwan. I gat fulap samting we yumi mas mekem oltaem we oli tekem taem mo paoa blong yumi. Mo taem yumi no naf blong finisim wok we yumi statem, i isi blong kam kros long yumi wan. Maet yumi stat blong tingting tu se yumi stap spolem ol narafala. Cynthia, wan waef mo mama we i savegud ol wari blong ol papa mama, i talem se: “Mi kros long mi wan taem mi luksave se mi no stap stretem pikinini blong mi long sem rod oltaem, mo taem mi harem se mi no naf blong trenem olgeta.” Stephanie, wan yangfala, i tokbaot edukesen blong hem se: “Mi no gat naf taem blong mekem evri samting we mi wantem mekem, mo samting ya i mekem se mi lusum longfala tingting blong mi.”

Sipos yumi putum ol mak we oli hae tumas, i isi nomo blong harem nogud, from we bambae yumi wantem we evri smol fasin blong laef blong yumi i stretgud. Ben, wan yangfala man we i mared, i talem se: “Taem mi skelem ol fasin, tingting, mo filing blong mi, oltaem mi luk se mi no mekem i gud i naf. Oltaem mi wantem se evri samting i stretgud, mo samting ya i mekem se mi lusum longfala tingting blong mi, mi harem nogud, mo tingting blong mi i foldaon.” Gail, wan Kristin waef, i talem se: “Taem yumi ting se yumi mas stretgud olgeta, yumi gat tingting ya se yumi no mas mestem. Mifala we i gat fasin ya, mifala i wantem mekem olsem we mifala i beswan mama mo beswan waef. Blong mifala i save glad, mifala i mas mekem plante samting, nao taem mifala i wokhad blong nating, mifala i save kam kros.”

Narafala samting we i save mekem tingting blong yumi i foldaon, hemia sipos yumi sik no kam olfala. Maet yumi no moa naf blong mekem plante samting from we yumi wokbaot nogud mo yumi no gat paoa olsem bifo. Samting ya i save mekem tingting blong yumi i foldaon. Elizabeth i talem se: “Mi no moa gat longfala tingting, from we mi no moa save mekem ol samting we bifo, taem we mi no sik yet, oli isi nomo long mi blong mekem.”

Ol samting we yumi jes tokbaot, oli sam long ol defren samting we i save mekem tingting i foldaon. Sipos yumi no lukaotgud, ol samting ya oli save lidim yumi blong ting se ol narafala oli no gat fasin tangkiu long ol hadwok blong yumi. From samting ya, ?yumi save mekem wanem blong winim tingting we i foldaon? ?Mo olsem wanem blong putum ol mak we oli no strong tumas blong kasem?

Ol Mak We Oli No Strong Tumas

Faswan samting blong tingbaot, hemia se Jeova i no stap mekem i strong tumas long yumi mo hem i kasem save long yumi. Ol Sam 103:14 i talem long yumi se: “Hem i savegud we hem i mekem yumi long graon. Oltaem hem i stap tingbaot we yumi kamaot long asis nomo.” Jeova i savegud wanem we yumi naf blong mekem mo wanem we yumi no naf blong mekem. Taswe, hem i wantem nomo se yumi mekem wanem we yumi naf blong mekem. Mo wan samting we hem i askem long yumi, hemia ‘blong wokbaot wetem hem we tingting blong yumi i stap daon.’—Maeka 6:8.

Jeova i askem yumi tu blong prea long hem oltaem. (Rom 12:12; 1 Tesalonaeka 5:17) ?Be, olsem wanem  prea i save givhan long yumi? Prea i mekem se yumi gat wan tingting we i stret mo i skelgud. Taem yumi prea wetem fulhat blong yumi, yumi soemaot se yumi nidim help—hemia wan fasin blong soem se yumi no naf mo yumi gat tingting daon. Jeova i glad blong ansa long ol prea blong yumi. Hem i rere blong givim tabu spirit, wetem ol frut blong tabu spirit olsem lav, kaen fasin, gudfala fasin, mo bos long tingting. (Luk 11:13; Galesia 5:22, 23) Prea i save halpem yumi tu blong winim wari mo tingting we i foldaon. Elizabeth i talem se, tru long prea, “yu save harem gud, mo i no gat wan narafala samting we i save givim filing ya.” Kevin i agri wetem tingting ya se: “Taem mi gat wan problem, mi prea long Jeova blong i givim wan tingting we i stap kwaet mo i klia, blong mi save fesem problem ya. Oltaem, Jeova i givhan long mi.” Aposol Pol i save se prea i impoten tumas. From samting ya, hem i givim advaes se: ‘Yumi mas prea long God from evri samting. . . . Nao pis we hem i givim, we i bigfala moa, i bitim save blong yumi, bambae hem i putum long tingting blong yumi, blong lukaot gud long yumi we i joen long Jisas Kraes.’ (Filipae 4:6, 7) Yes, fasin blong toktok wetem Jeova i save givhan long yumi blong no putum ol mak we oli strong tumas long saed blong yumi mo ol narafala.

Be samtaem yumi nidim we narafala i leftemap tingting blong yumi. Wan tok long stret taem blong hem i gud tumas. I gud blong storian wetem wan fren we i gat gudfala tingting mo we yumi save trastem hem. Bambae hem i givhan long yumi blong luk ol samting we oli save mekem yumi wari mo harem nogud. (Ol Proveb 15:23; 17:17; 27:9) Ol yangfala we oli stap traehad blong winim tingting we i foldaon, oli lanem se advaes blong papa mama blong olgeta i save givhan long olgeta blong gat stret tingting. Wetem fasin tangkiu, Kandi i talem se: “Advaes we papa mama blong mi i givim wetem lav, i givhan long mi blong mi gat stret tingting mo blong mi skelgud, mo from samting ya ol fren blong mi oli laekem mi moa.” Yes, advaes we i stap long Ol Proveb 1:8, 9 i stret long taem blong yumi se: “Pikinini blong mi, yu yu mas lesingud long ol samting we mi wetem mama blong yu, mitufala i stap tijim yu long hem, mo yu no mas lego ol samting ya. Ol tok ya bambae i givhan, blong mekem laef blong yu i gud moa. Bambae i olsem gudfala hat blong flasem hed blong yu, no gudfala jen blong flasem nek blong yu.”

Nogud frut we i save kamaot from we yumi gat tingting ya se evri samting i mas stretgud olgeta, i kamaot klia long waes tok ya se: “Man we i ting se evri samting long laef i mas stret olsem we hem i wantem, bambae man ya i harem nogud nomo.” Blong blokem samting ya, yumi mas jenisim tingting blong yumi. Yumi mas gat tingting we i no flas tumas mo i stap daon nomo, from we yumi savegud se yumi no naf blong mekem plante samting. Fasin ya bambae i givhan long yumi blong wantem kasem ol mak ya nomo we yumi naf blong kasem. Taswe, i stret nomo we Rom 12:3 i givim woning ya se: “Yufala i no mas letem tingting blong yufala i go antap.” Mo Filipae 2:3 i leftemap tingting blong yumi blong gat tingting daon mo blong luk ol narafala olsem we oli gud moa long yumi.

Elizabeth, we yumi tokbaot antap, i kros long hem wan from we hem i kam sik. Ale, sloslou hem i luksave tingting blong Jeova long saed ya, se Jeova i no fogetem ol wok we hem i mekem, nao hem i harem gud bakegen. Colin i no save wokbaot from wan sik we i karemaot olgeta paoa blong hem. Taem hem i kam sik, hem i stap skelem wok we hem i mekem wetem wanem we hem i mekem bifo, taem hem i no sik yet. Hem i harem se minista wok blong hem i nating nomo. Be taem hem i tingting dip long ol vas blong Baebol olsem 2 Korin 8:12, hem i lan blong sakemaot nogud filing ya. Vas ya i talem se: “Sipos yufala i glad blong givim, bambae God i glad blong tekem presen long ol samting nomo we yufala i gat. Hem i no save askem long yufala, blong yufala i givim ol samting we yufala i no gat.” Colin i gohed, i talem se: “Nating se mi no gat tumas blong givim, mi save givim yet, mo samting ya nao Jeova i glad long hem.” Hibrus 6:10, i talem long yumi se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.”

?Be, olsem wanem blong faenemaot sipos ol mak we yumi wantem kasem oli stret no oli no stret? I gud yu askem long yu wan se: ‘?Samting we mi wantem mekem, hem i laenap wetem samting we God i wantem mi mi mekem?’ Galesia 6:4 i talem se: “Olgeta man wanwan oli mas traem ol wok we olgeta nomo oli mekem. Nao oli save makem we oli kam man olsem wanem from ol wok blong olgeta nomo, i no from wok blong sam narafala man.” Tingbaot, Jisas i talem se: “Yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” Yes, yumi ol Kristin, yumi gat wan yok blong karem, be hem i “isi nomo” mo i “no hevi,” mo Jisas i promes se bambae yumi faenem pis long laef blong yumi sipos yumi karem yok ya long fasin we i stret.—Matiu 11:28-30.

 Ol Mak We Oli Stret Oli Givim Blesing

Taem yumi lesin mo obei long ol advaes we oli kamaot long Tok blong God, i gud yumi putum ol mak we oli no strong tumas blong kasem. Nao i stat naoia, bambae yumi save kasem sam blesing we oli stap longtaem. Faswan blesing se, ol mak olsem oli save givhan long helt blong yumi. Jennifer, we hem i kasem blesing from advaes blong Jeova, i talem se: “Mi gat moa paoa mo mi glad moa long laef blong mi.” Taswe, i stret nomo we Ol Proveb 4:21, 22 i pusum yumi blong yusum ae mo hat blong yumi blong kasem save long ol tok blong Jeova, from we “man we i savegud ol tok ya, hem i gat gudfala laef, mo i no save sik.”

Wan narafala blesing we yumi save kasem, hemia se yumi harem gud long tingting mo filing blong yumi. Theresa i talem se: “Taem mi tekem Tok blong God long tingting mo hat blong mi, mi faenem se oltaem mi glad.” I tru se samtaem i gat ol samting oli hapen long laef blong yumi we yumi no save winim, nao yumi harem nogud. Be bambae i isi moa blong fesem olgeta. Jemes 4:8 i givim advaes long yumi se: “Yufala i mas stap klosap long God, nao hem bambae i kam stap klosap long yufala.” Mo tu long wan narafala vas blong Baebol, Jeova i promes blong givim paoa long yumi blong fesem ol traem long laef, mo hem i promes tu blong blesem yumi wetem pis.—Ol Sam 29:11.

Taem yumi putum ol mak we oli no strong tumas, samting ya i givhan long yumi blong skelgud long saed blong spirit. Hemia tu i wan blesing. I isi moa blong putum tingting i stap long ol samting we oli impoten moa long laef blong yumi. (Filipae 1:10) Mo ol mak we yumi wantem kasem, oli stret long yumi mo yumi naf blong kasem olgeta. Samting ya i givim moa glad long yumi mo yumi harem gud. Bambae yumi rere moa blong putum laef blong yumi long han blong Jeova, from we yumi save se Jeova i lukaot blong evri samting bambae i oraet. Pita i talem se: “Yufala i mas putum yufala i stap daon, aninit long han blong [God]. Nao long taem we hem i luk se i stret, hem bambae i leftemap yufala.” (1 Pita 5:6) ?I gat wan samting long laef blong yumi we yumi save harem gud moa long hem, bitim we Jeova i ona long yumi? Nogat.

[Tok blong pija long pej 31]

Taem yumi putum ol mak we oli no strong tumas, samting ya bambae i givhan long yumi blong fesem ol trabol we i mekem tingting i foldaon