Ripot Long Wok Blong Kingdom

Olgeta We Oli Lavem Jeova Oli Sas Long Ae Blong Hem

LEBANON i wan ples we i fulap long ol gudgudfala samting long taem we oli raetem Baebol. (Ol Sam 72:16; Aesea 60:13) Samting we ol man oli laekem moa long Lebanon hemia ol bigfala seda tri blong hem. Plante man oli wantem tumas blong yusum ol tri ya blong bildim haos from we wud blong tri ya i naes, i smel gud, mo i save stap longtaem. Long faswan handred yia wan samting we i sas moa i kamaot long Lebanon. Gospel blong Mak i talemaot se long Taea mo Saedon, we bifo tufala i haf blong Lebanon, “ol man ya oli harem nius blong ol samting ya we Jisas i stap mekem, nao oli kam blong luk hem.”—Mak 3:8.

Long sem fasin tede, Lebanon i stap gohed blong karem frut we i sas long ae blong Jeova. Ol ekspiriens we oli kam biaen bambae oli soemaot samting ya.

• Long wan skul, tija i askem wan yangfala we nem blong hem Wissam blong givim wan tok blong 30 menet fored long evriwan long klasrum blong hem. Wissam i mekem disisen se bambae hem i yusum gudfala jans ya blong givim witnes long evriwan. Ale, hem i yusum buk ya Life—How Did It Get Here? By Evolution or by Creation? mo hem i rerem wan tok we i tokbaot olsem wanem God i wokem olgeta samting. Be taem tija blong Wissam i luk buk ya, hem i talem se tok ya i impoten mo se Wissam i save mekem tok blong hem i longwan kasem 45 menet.

Taem Wissam i statem tok blong hem, tija blong hem i stopem hem mo i go singaot hed misis. I no longtaem hed misis i kam mo Wissam i mas stat bakegen. Taem hem i stap lesin long ol kwestin we Wissam i askem long fastok blong hem, hed misis ya i sapraes mo hem i talem se evri studen oli mas kasem wan fotokopi blong tok ya.

Smoltaem biaen, wan narafala tija, we i pas klosap long klasrum ya, i luk we evriwan i glad tumas, mo hem i askem se wanem i stap hapen. Taem oli talem long hem, hem i askem sipos Wissam i stap traem blong pruvum we God i wokem olgeta samting no i stap traem blong pruvum evolusen. Ansa i kam long tija ya se: “God i wokem olgeta samting.” Taem hem i lanem se Wissam i wan Witnes blong Jeova, tija ya i talem long evriwan long klasrum ya se: “Bambae yufala i luk long tok blong hem se sayens i sapotem tingting ya se God i wokem olgeta samting, be i no evolusen.”

!Biaen oli faenemaot se tija ya we i wokbaot i kam pas, i gat Creation buk finis, mo hem i stap yusum buk ya blong tijim ol studen long yunivesiti! Bifo we hem i go, hem i askem long Wissam sipos hem i save kambak tumora wetem ol studen blong hem, blong Wissam i save givim tok long olgeta. From samting ya, Wissam i gat jans blong givim wan narafala bigfala witnes long saed blong Jeova.

• Nina, we i gat twanti tu yia, i tosta tumas blong kasem ol wota blong trutok. Wan dei, kasin brata blong hem i givim wan Baebol long hem mo i tokbaot Pentekostal Jos long hem. Nina i harem gud blong ridim Baebol ya mo hem i lanem se ol Kristin oli mas prij, taswe hem i stat blong toktok long ol fren blong hem. Evriwan we hem i toktok long olgeta oli askem hem se: “?Yu yu wan Witnes blong Jeova?” Samting ya i mekem tingting blong hem i fasfas.

Sikis yia biaen, ol Witnes blong Jeova oli kam blong storian long saed blong Kingdom wetem Nina long haos blong hem. Fastaem, hem i traem blong faenem fol long ol tijing blong olgeta. Be, hem i faenem se evri ansa blong olgeta i stret nomo mo i stanap long Baebol.

Sloslou wanem we Nina i lanem long saed blong nem blong God, Jeova, ol blesing blong Kingdom, mo plante narafala samting, i mekem hem i bilif strong se hem i faenem trutok. Hem i givim laef blong hem i go long God mo i tekem baptaes. Seven yia i pas nao we Nina i stap mekem wok blong prij fultaem. I tru tumas se Jeova i stap blesem olgeta we oli rili lavem hem.—1 Korin 2:9.