Ol Sakrefaes Blong Presem Jeova We Hem i Glad Long Hem
Ol Sakrefaes Blong Presem Jeova We Hem i Glad Long Hem
“Yufala i mas givim olgeta laef blong yufala i go nomo long [God] olsem wan sakrefaes. Hemia i wan sakrefaes we i laef mo i tabu, mo we God i glad blong tekem.”—ROM 12:1.
1. ?Baebol i talem wanem long saed blong ol defren sakrefaes aninit long Loa blong Moses?
“LOA we God i givim long Moses, hem i pija nomo blong ol tru samting we i stap. Hem i no klia gud, i olsem sado nomo blong ol gudgudfala samting, we bambae i kamtru. Oltaem, long evri yia, ol pris oli stap mekem sakrefaes long sem fasin nomo, blong tekemaot sin blong man. Be long fasin ya, Loa ya i no save mekem ol man we oli stap kam long God oli stret gud.” (Hibrus 10:1) Long vas ya, Pol i makem bigfala poen ya se, ol sakrefaes aninit long Loa blong Moses, oli no save tekemaot sin blong man fulwan.—Kolosi 2:16, 17.
2. ?From wanem fasin blong traem kasem save ol smosmol poen long Baebol long saed blong ol sakrefaes aninit long Loa, hem i no blong nating nomo?
2 ?Samting ya i minim se ol presen mo sakrefaes we ol faef faswan buk blong Baebol oli tokbaot, oli no impoten long ol Kristin tede? Nogat. Bitim wan yia finis, olgeta we oli joen long Tiokratik Skul long ol kongregesen blong ol Witnes blong Jeova raon long wol, oli bin ridim tru long ol faef faswan buk blong Baebol. Sam long olgeta, oli bin traehad blong ridim mo kasem save long evri smosmol poen we oli ridim. ?Be, olsem wanem? ?Ol hadwok we oli mekem, hem i blong nating nomo? Nogat. From we “olgeta tok ya we [ol man] oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Be maet yumi askem se, ?Olsem wanem Loa long saed blong ol presen mo sakrefaes i save “tijim” yumi mo “mekem yumi harem gud”?
Oli Tijim Yumi Mo Oli Mekem Yumi Harem Gud
3. ?Wanem stamba samting we yumi rili nidim?
3 Tede, yumi no nidim blong mekem ol sakrefaes olsem Loa i talem. Nating se i olsem, yumi rili nidim wanem we sakrefaes i bin mekem long ol man Isrel bifo. Yes, yumi nidim we God i fogivim ol sin blong yumi mo i glad long yumi. Nao from we yumi no mekem ol sakrefaes olsem bifo, ?olsem wanem God i save fogivim ol sin blong yumi mo i glad long yumi? Afta we Pol i tokbaot wanem we sakrefaes blong anamol i no save mekem, hem i talem se: “Bifo, long taem ya we Kraes i rere blong kam long wol, hem i talem long God se, ‘Yu yu no wantem we ol man oli stap mekem sakrefaes, mo we oli stap tekem presen i kam blong givim long yu. Be yu yu mekem wan bodi blong mi i stap rere finis blong mi go long wol. Yu no glad long fasin ya we ol man oli stap bonem anamol i bon evriwan, blong mekem wosip long yu, mo we oli stap mekem sakrefaes blong tekemaot ol sin blong olgeta.’ Mo hem i talem bakegen se, ‘God, mi mi rere blong mekem ol samting ya we yu yu wantem, stret olsem we oli raetem long buk blong Loa blong yu, blong tokbaot mi.’”—Hibrus 10:5-7.
4. ?Olsem wanem Pol i yusum Ol Sam 40:6-8 blong tokbaot Jisas Kraes?
4 Taem Pol i stap talem bakegen tok ya we i stap long Ol Sam 40:6-8, hem i soem se Jisas i no kam blong mekem ol man oli holemtaet fasin blong ‘bonem sakrefaes mo givim presen,’ fasin blong “bonem anamol i bon evriwan,” mo blong “mekem sakrefaes blong tekemaot ol sin.” Ol fasin ya, God i no moa agri long olgeta, long taem we Pol i raetem buk blong Hibrus. Be Jisas i kam wetem wan bodi we Papa blong hem long heven i mekem rere. Bodi ya i sem mak long bodi blong Adam, taem God i jes wokem hem. (Jenesis 2:7; Luk 1:35; 1 Korin 15:22, 45) Jisas we i Pikinini blong God, mo we i no gat sin, hem i “laen” blong woman ya we Jenesis 3:15 i tokbaot. Jisas nao i man ya we bambae i ‘smasem hed blong Setan,’ nating se hem i kasem ‘kil long leg blong hem.’ Long rod ya, Jisas i kam olsem man ya we Jeova i sanem i kam blong sevem olgeta man. Hem nao i man ya we olgeta man blong bilif, stat long taem blong Ebel, oli bin wet long hem.
5, 6. ?Wanem rod we i hae moa we ol Kristin oli gat blong kam klosap long God?
5 Pol i tokbaot spesel wok we Jisas i mekem. Hem i talem se: “Kraes i no mekem sin nating. Be blong sevem yumi, God i mekem hem i karem ol sin blong yumi, blong God i save givim stret fasin blong hem long yumi ya we yumi joen long Kraes, blong mekem yumi kam stret man long fes blong hem.” (2 Korin 5:21) Samtaem, oli tanem tok ya “karem ol sin blong yumi” se, ‘wan sakrefaes blong tekemaot sin.’ Aposol Jon i talem se: “Kraes ya, hem i man we i ded blong mekem rod blong God i tekemaot ol sin blong yumi. Mo i no blong yumi nomo, i blong olgeta man long wol.” (1 Jon 2:2) Taswe, nating se ol sakrefaes blong ol man Isrel i save givhan smol long olgeta blong oli kam klosap long God, ol Kristin oli gat wan rod blong kam long God—hemia sakrefaes blong Jisas Kraes. Rod ya i hae moa long sakrefaes blong ol man Isrel. (Jon 14:6; 1 Pita 3:18) Sipos yumi soemaot bilif long ransom sakrefaes we God i givim mo sipos yumi obei long Hem, bambae hem i fogivim ol sin blong yumi, i glad long yumi mo i blesem yumi. (Jon 3:17, 18) !Samting ya i mekem yumi harem gud tumas! ?Nao, olsem wanem blong soemaot se yumi bilif long ransom sakrefaes?
6 Afta we aposol Pol i eksplenem se ol Kristin oli gat wan rod blong kam klosap long God, we rod ya i hae moa, hem i tokbaot trifala rod we yumi save folem blong soem bilif mo fasin tangkiu from samting we Jeova i mekem wetem lav. Trifala rod ya, yumi save ridim long Hibrus 10:22-25. I tru se advaes ya, Pol i givim long olgeta we oli ‘gat raet blong go insaed long tabu ples’—hemia ol tabu Kristin we oli gat hop blong go long heven. Nating se i olsem, olgeta man we oli wantem kasem blesing from sakrefaes blong Jisas, oli mas lesin long ol tok ya we tabu spirit i pusum Pol blong raetem.—Hibrus 10:19, NW.
Givim Ol Sakrefaes We Oli Klin Mo We i No Gat Samting i Spolem
7. (a) ?Olsem wanem Hibrus 10:22 i soem samting we man i mas mekem long wan sakrefaes? (b) Man i mas mekem wanem blong God i glad long sakrefaes blong hem?
7 Fastaem, Pol i talem strong long ol Kristin se: “I gud yumi kam klosap long God, we tingting blong yumi i klin, mo bilif blong yumi i strong, mo tingting blong yumi we fastaem i doti from ol sin blong yumi, i kam klin long blad blong Kraes, mo bodi blong yumi tu i klin, from we yumi swim finis long wota ya we i klin.” (Hibrus 10:22) I sua se vas ya i soem wanem we ol man oli mekem long wan sakrefaes aninit long Loa. Samting ya i stret nomo from we, blong God i glad long wan sakrefaes, man we i givim, i mas gat wan hat we i stret, mo sakrefaes blong hem i mas klin, mo we i no gat wan samting we i spolem. Anamol we oli mas givim olsem sakrefaes, hem i mas wan anamol olsem buluk, sipsip, nani, no wan pijin, hemia i minim ol anamol we oli klin, mo “we i no gat wan samting i rong long bodi blong hem.” Sipos oli mekem sakrefaes wetem pijin, pijin we oli mas tekem, hemia nawemba no sotleg. Nao sipos oli folemgud ol loa long saed ya, ‘bambae God i glad long sakrefaes ya se bambae i tekemaot sin blong man we i givim.’ (Levitikas 1:2-4, 10, 14; 22:19-25) Ol kakae long garen we i olsem presen, i no mas gat is long olgeta, we i saen blong sin, mo tu i no gat hani long olgeta, we maet i minim jus blong frut, we i save mekem ol kakae oli kam nogud. Taem oli putum sakrefaes ya long olta—anamol no kakae long garen—oli putum sol long hem blong mekem i stap longtaem.—Levitikas 2:11-13.
8. (a) ?Man we i stap givim sakrefaes i mas mekem wanem? (b) ?Olsem wanem blong mekem sua se bambae Jeova i glad long wosip blong yumi?
8 ?Olsem wanem long man we i mekem sakrefaes? Loa i talem se man we i kam long fored blong Jeova, hem i mas klin, mo i no gat poen long hem. Man we i no klin, fastaem hem i mas mekem wan sakrefaes blong tekemaot sin no rong blong hem, blong hem i save kam klin bakegen long fored blong Jeova. Olsem nao, bambae God i glad long sakrefaes we i blong bon evriwan mo sakrefaes we i blong frengud wetem God. (Levitikas 5:1-6, 15, 17) ?Yumi luksave from wanem i impoten tumas blong holem ol fasin we oli klin long fored blong Jeova? Sipos yumi wantem se God i agri long wosip blong yumi, yumi mas hareap blong stretem ol rong we yumi mekem agensem loa blong God. Yumi mas hareap tu blong yusumgud help we God i givim long yumi—hemia ‘ol elda blong kongregesen’ mo “rod blong God i tekemaot sin blong yumi,” hemia Jisas Kraes.—Jemes 5:14; 1 Jon 2:1, 2.
9. ?Wanem stamba samting we i soem se sakrefaes blong Jeova i defren olgeta long sakrefaes blong ol giaman god?
9 I impoten tumas blong stap klin long eni fasin we i save mekem yumi kam doti. Hemia nao stamba samting we i mekem se ol sakrefaes blong Jeova oli defren olgeta long ol sakrefaes blong ol giaman god blong ol nesen raonabaot long ol man Isrel. Wan buk i tokbaot olsem wanem sakrefaes aninit long Loa blong Moses i defren olgeta, i se: “Sakrefaes ya, oli no joen wetem rabis spirit no majik; krangke fasin blong skul, fasin we man i spolem hem wan, mo tabu fasin blong mekem woman blong rod, mo ol wael lafet we i blong mekem oli karem plante pikinini oli tabu; oli no kilim man blong mekem sakrefaes; no mekem sakrefaes long ol dedman.” Ol samting ya oli makem bigfala poen ya se: Jeova i tabu, mo hem i no save glad mo agri long sin mo eni fasin blong brekem loa. (Habakuk 1:13) Wosip mo sakrefaes we man i mekem i go long God, i mas klin, mo i no mas gat wan samting i spolem—long saed blong bodi, fasin, mo long saed blong spirit.—Levitikas 19:2; 1 Pita 1:14-16.
10. ?Folem advaes blong Pol long Rom 12:1, 2, yumi mas mekem wanem blong jekemap laef blong yumi wanwan?
10 From samting ya, yumi mas jekemapgud laef blong yumi blong meksua se bambae Jeova i glad long wosip we yumi stap mekem i go long hem. Yumi neva mas ting se, from we yumi stap go long ol Kristin miting mo joen long wok blong prij, ol samting we yumi mekem long laef blong yumi oli nating nomo. Mo tu, yumi no mas ting se, from we yumi joen long Kristin wok, yumi no nid blong folem ol loa blong God long laef blong yumi. (Rom 2:21, 22) Yumi no mas ting se bambae God i blesem yumi mo i glad long yumi sipos yumi letem ol samting we oli no klin oli mekem tingting mo fasin blong yumi i kam doti long fes blong God. Tingbaot tok ya blong Pol se: “Ol brata mo sista. From we God i mekem i gud tumas long yumi long plante samting, mi mi talem strong long yufala, se plis yufala i mas givim olgeta laef blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem. Hemia nao prapa wosip we i stret nomo blong yufala i mekem long hem. Yufala i no mas letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.”—Rom 12:1, 2.
Givim Sakrefaes Blong Presem Jeova Wetem Fulhat
11. ?Long Hibrus 10:23, tok ya “talemaot finis long fes blong olgeta man” i minim wanem?
11 Long leta we Pol i raetem i go long ol Kristin man Hibru, hem i pulum tingting blong olgeta i go long wan narafala impoten haf blong trufala wosip. Hem i raetem se: “I gud yumi holemtaet fasin ya we yumi talemaot finis [long fes blong ol man] se i fasin blong yumi, we yumi putum tingting blong yumi i stap strong long God. I gud yumi mekem olsem, from we i tru, yumi save bilif long God, se hem bambae i save mekem ol promes blong hem i kamtru.” (Hibrus 10:23) Tok ya ‘talemaot finis long fes blong ol man’ i minim “tokbaot,” mo tu Pol i tokbaot ‘sakrefaes blong presem God.’ (Hibrus 13:15) Samting ya i mekem yumi tingbaot sakrefaes we Ebel, Noa, mo Ebraham, oli mekem i go long God.
12, 13. ?Wan man Isrel i luksave wanem taem hem i givim wan sakrefaes we i blong bon evriwan, mo yumi save mekem wanem blong soem sem tingting?
12 Taem wan man Isrel i givim sakrefaes ya we i blong bon evriwan, hemia i from we ‘hem i wantem mekem olsem long fored blong Jeova.’ I no gat wan man i fosem hem. (Levitikas 1:3) Taem hem i mekem sakrefaes ya, i olsem we, long fes blong olgeta man, hem i stap talemaot plante blesing we Jeova i stap givim long ol man blong hem wetem kaen fasin. Tingbaot se wan spesel samting long saed blong sakrefaes we i blong bon evriwan, hemia se sakrefaes ya, oli bonem fulwan long olta—wan saen blong soem se man i wosip long Jeova fulwan mo olgeta laef blong hem i blong God. Long sem fasin, yumi soemaot bilif mo fasin tangkiu from ransom sakrefaes, taem yumi rere blong ‘givim sakrefaes blong presem Jeova, long ol tok we yumi talem’ wetem fulhat blong yumi.
13 Nating we ol Kristin oli no mekem sakrefaes long anamol mo kakae, oli gat wok ya blong talemaot gud nius blong Kingdom mo blong pulum ol man oli kam disaepol blong Jisas Kraes. (Matiu 24:14; 28:19, 20) ?Yu yu stap yusumgud jans ya blong talemaot gud nius blong Kingdom, blong bambae plante moa man oli kasem save long ol nambawan samting we God i stap rere blong givim long ol man we oli obei long hem? ?Yu yu rere blong spenem taem mo paoa blong yu blong tijim ol man we oli intres mo blong halpem olgeta blong kam disaepol blong Jisas Kraes? Strong tingting we yumi gat blong joen long wok blong prij, hem i olsem gudfala smel blong sakrefaes ya we i blong bon evriwan, mo God i glad tumas long hem.—1 Korin 15:58.
Harem Gud Long Kampani Blong God Mo Ol Man
14. ?Olsem wanem tok blong Pol long Hibrus 10:24, 25, i laenap wetem sakrefaes we i blong frengud wetem God?
14 Laswan samting se, Pol i pulum tingting blong yumi i go long fasin blong frengud wetem ol Kristin taem yumi stap wosip long God. “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [“kongregesen,” NW], olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.“ (Hibrus 10:24, 25) Ol tok ya, “givgivhan long yumi blong mekem yumi strong blong lavem ol man, mo blong mekem ol gudfala fasin,” “ol miting,” mo “leftemap tingting blong yumi,” oli mekem yumi tingbaot wanem we sakrefaes blong ol man Isrel, we i blong frengud wetem God, i mekem long ol man blong God.
15. ?Olsem wanem sakrefaes we i blong frengud wetem God i sem mak long ol Kristin miting?
15 Tok ya “ol sakrefaes blong frengud wetem God,” samtaem oli tanem i kam “ol sakrefaes blong mekem pis.” Long ples ya, Hibru tok we oli tanem i kam “pis,” i soem se pis ya i no wetem wan man nomo, be wetem plante man. Maet samting ya i soem se, taem man i mekem sakrefaes ya, hem i save gat pis wetem God mo wetem ol Kristin man we oli wosip long God. Wan man blong mekem dip stadi i tokbaot sakrefaes ya we i blong frengud wetem God, i se: “Hemia i rili wan taem blong harem gud long kampani blong God ya blong mekem Promes. Long taem ya, Hem i mekem tingting blong hem i kamdaon, i joen wetem ol man Isrel blong kakae ol kakae blong sakrefaes, nating we Hem i Man ya we oltaem, i singaot olgeta oli kam kakae wetem hem.” Samting ya i mekem yumi tingbaot promes blong Jisas se: “Long weples we tu no tri man oli joen wanples long nem blong mi, mi mi stap wetem olgeta.” (Matiu 18:20) Evritaem we yumi go long wan Kristin miting, yumi harem gud tumas long fasin joen ya we i bildimap bilif blong yumi, ol tijing we oli leftemap tingting, mo from tingting ya se Masta Jisas Kraes i stap wetem yumi. Ol samting ya oli mekem se wan Kristin miting i kam olsem wan taem blong harem gud mo blong mekem bilif blong yumi i strong.
16. ?Taem yumi tingbaot sakrefaes we i blong frengud wetem God, wanem i mekem se ol Kristin miting oli givim moa glad?
16 Long sakrefaes ya we i blong frengud wetem God, olgeta gris blong anamol—ol gris blong ol gat, tufala kidni wetem ol gris blong tufala, gudfala haf blong leva, mo tel blong sipsip we i gat gris—oli givim i go long Jeova, taem oli bonem evriwan blong mekem i smok long olta. (Levitikas 3:3-16) Ol man Isrel oli tingbaot ol gris ya olsem beswan haf blong anamol we i sas tumas. Taem oli bonem long olta olsem sakrefaes, hemia i wan saen blong soem se oli givim beswan i go long Jeova. Wanem we i mekem se ol Kristin miting oli kam wan taem blong haremgud, hemia se hem i wan ples blong kasem tijing, be tu i wan ples blong presem Jeova. Yumi mekem samting ya taem yumi joen—givim beswan wetem tingting daon—blong singsing wetem fulhat, lesingud, mo givim ansa. Man blong raetem Ol Sam i talem se: “!Yumi presem Hae God! Yumi ya, yumi ol man blong hem. I gud yumi wokem wan niufala singsing, yumi kam wanples long fes blong ol narafala man blong hem, yumi sing long hem blong presem hem.”—Ol Sam 149:1.
Klosap Nao Bambae Jeova i Blesem Yumi Bigwan
17, 18. (a) ?Wanem bigfala sakrefaes we Solomon i mekem long taem ya we oli dediketem tempel long Jerusalem? (b) Ol man oli kasem wanem blesing from seremoni we oli mekem blong dediketem tempel?
17 Taem ol man Isrel oli dediketem tempel long Jerusalem, long namba seven manis blong yia 1026 B.K.T., * King Solomon i mekem ‘wan bigfala sakrefaes long fored blong Jeova.’ Hem i “bonem ol sakrefaes ya we i blong bonem olgeta i bon evriwan, wetem ol kakae blong garen, we oli bonem wetem ol sakrefaes ya, mo ol gris blong ol sakrefaes ya we oli bonem haf oli kakae haf blong soemaot we oli stap fren gud wetem Hae God.” Antap long ol samting we oli givim olsem sakrefaes blong kakae long garen, oli givim 22,000 buluk mo 120,000 sipsip blong mekem sakrefaes long taem ya.—1 King 8:62-65.
18 Traem tingbaot olgeta samting we oli givim mo bigfala wok we oli mas mekem long saed blong seremoni ya. Hemia wan samting blong sapraes. Nating se i olsem, ol blesing we ol man Isrel oli kasem i plante moa i winim ol samting we oli givim. Long en blong lafet ya, Solomon “i sanem olgeta oli gohom. Olgeta evriwan oli luksave we Hae God i mekem i gud tumas long King Deved we i man blong wok blong hem bifo, mo long olgeta tu, nao oli stap prea long hem blong i blesem King Solomon, mo oli gohom we oli glad we oli glad tumas from ol samting ya we Hae God i mekem.” (1 King 8:66) Yes, hemia i stret nomo wetem tok blong Solomon se, “sipos Hae God i stap mekem i gud long man, fasin ya bambae i mekem man ya i kam rijman, mo hem i no save mekem man ya i trabol.”—Ol Proveb 10:22.
19. ?Yumi save mekem wanem blong kasem ol bigfala blesing blong Jeova naoia mo blong olwe?
19 Yumi stap laef long taem we “ol tru samting” oli tekem ples blong ol samting we i “olsem sado nomo blong ol gudgudfala samting, we bambae i kamtru.” (Hibrus 10: 1) Jisas Kraes, we i stap wok olsem bigfala Hae Pris, i go insaed finis long heven mo i givim praes blong blad blong hem we i blong tekemaot sin blong olgeta we oli soem bilif long hem. (Hibrus 9:10, 11, 24-26) Sipos yumi bilif long bigfala sakrefaes ya, mo presem Jeova long fulhat blong yumi, we i olsem sakrefaes we i klingud mo i no gat wan samting i spolem, yumi tu, yumi save ‘glad tumas,’ taem yumi stap wet long plante blesing we bambae Jeova i givim.—Malakae 3:10.
[Futnot]
^ B.K.T. i minim Bifo Kristin Taem.
?Bambae Yu Ansa Olsem Wanem?
• ?Olsem wanem ol sakrefaes mo ol presen aninit long Loa oli save tijim yumi mo leftemap tingting blong yumi?
• ?Wanem faswan samting we man i mas mekem blong God i glad long sakrefaes blong hem, mo samting ya i gat wanem mining long yumi?
• ?Yumi save givim wanem we i olsem sakrefaes ya we i blong bon evriwan?
• ?Long wanem rod ol Kristin miting oli save kam olsem wan sakrefaes we i blong frengud wetem God?
[Kwestin]
[Tok blong pija long pej 18]
Jeova i sanem Jisas i kam blong givim laef blong hem olsem ransom sakrefaes blong sevem olgeta man
[Tok blong pija long pej 20]
Sipos yumi wantem se God i agri long wosip blong yumi, yumi no mas mekem eni samting we i save mekem yumi kam doti
[Tok blong pija long pej 21]
Taem yumi joen long wok blong prij, yumi soem long olgeta man se yumi luksave ol gudfala fasin blong Jeova