?Olsem Wanem Blong Stretem Rao?

EVRI dei yumi joen wetem ol defren man we oli gat prapa fasin blong olgeta. Plante taem, samting ya i givim glad mo niufala tingting long yumi. Be samtaem, hem i save mekem rao i kamaot, sam long ol rao ya i bigwan, sam oli smolsmol rao nomo we i gohed evri dei. Nating se i olsem wanem, fasin we yumi folem blong stretem ol rao ya i save gat paoa long yumi long tingting, filing, mo long saed blong spirit.

Bambae yumi harem gud moa long laef mo frengud wetem ol narafala long pis, sipos yumi traem bes blong yumi blong stretem ol problem. Wan waestok blong bifo i talem se: “Hat blong man we i kwaet, hem i givim laef long bodi.”—Ol Proveb 14:30, NW.

Samting we i defren olgeta, hemia trutok ya se: “Sipos yu no save holem kros blong yu, bambae i no gat man i save givhan long yu. Bambae yu kam olsem taon we i no gat bigfala stonwol i goraon long hem, we i isi nomo blong ol enemi blong hem oli kam mekem faet long hem.” (Ol Proveb 25:28) I no gat wan long yumi we i wantem gat nogud tingting, nao i isi blong hem i mekem wan nogud samting—ol samting we i save mekem trabol long ol narafala, mo long yumi wan. Man we i ansa wetem kros, hem i save mekem trabol ya i kamaot. Long Bigfala Toktok antap long Hil, Jisas i talem se yumi mas jekemap ol fasin blong yumi. Maet samting ya i save gat paoa long yumi taem yumi stap stretem eni rao we yumi gat wetem ol narafala. (Matiu 7:3-5) I nogud we yumi jajem ol narafala, be i moa gud we yumi tingbaot olsem wanem blong wokem mo holemtaet wan gudfala fasin fren wetem olgeta we oli gat defren tingting mo fasin blong laef.

Fasin Blong Yumi

Faswan step blong stretem wan smol rao no wan bigfala rao, hemia blong luksave se yumi evriwan i save mestem long tingting mo fasin blong yumi. Baebol i talem bakegen long yumi se, yumi evriwan i mekem sin finis “mo [yumi] stap afsaed olgeta long ol gudgudfala fasin blong God.” (Rom 3:23) Antap long hemia, fasin luksave bambae i soemaot long yumi se i no narafala man we i stamba blong problem blong yumi. Blong luk moa long saed ya, i gud yumi tokbaot stori blong Jona.

Jona i folem oda we Jeova i givim long hem, nao i go long Nineve mo i talemaot jajmen blong God we i stap kam long ol man long taon ya. Gudfala frut we i kamaot, hemia se olgeta man Nineve oli tanem tingting from ol sin blong olgeta mo oli bilif long trufala God. (Jona 3:5-10) Jeova i luk se i stret blong fogivim olgeta, from we oli tanem tingting blong olgeta. Taswe, hem i no spolem olgeta. “Be Profet Jona i no glad nating from samting ya, mo hem i kros tumas.” (Jona 4:1) Tingting we Jona i soemaot from fasin sore we Jeova i gat, i narakaen olgeta. ?From wanem Jona i kros long Jeova? I klia nomo se Jona i stap tingbaot hem wan nomo, hem i ting se ol man long komuniti ya bambae oli no moa tinghae long hem. Hem i no gat fasin tangkiu from fasin sore we Jeova i soem. Wetem kaen fasin, Jeova i tijim Jona long wan rod we i givhan long Jona blong jenisim tingting blong hem mo blong luk nambawan fasin sore blong God. (Jona 4:7-11) Yes, i no Jeova we i mas jenisim tingting blong hem. Be Jona, hem nao i mas mekem olsem.

 ?Olsem wanem long yumi? ?Samtaem i nidim we yumi jenisim tingting blong yumi long saed blong sam bisnes? Aposol Pol i givim advaes se: “Oltaem yufala i mas rere blong ona long yufala.” (Rom 12:10) ?Pol i minim wanem? Hem i stap leftemap tingting blong yumi blong no mekem i strong tumas long ol narafala Kristin, be yumi mas soem dip respek mo ona long olgeta. Samting ya i minim se yumi mas luksave se wanwan long yumi i gat prapa jus blong hem. Pol i talem long yumi se: “Evri man i gat wok blong hem.” (Galesia 6:5) !Taswe, bifo we wan rao i kamaot, i waes blong luk sipos yumi nidim blong jenisim tingting blong yumi! Yumi mas wok had blong soemaot tingting blong Jeova mo blong holemtaet pis wetem ol narafala we oli rili lavem Jeova.—Aesea 55:8, 9.

Fasin We Yumi Mekem Blong Stretem Wan Rao

Tingbaot tu pikinini we tufala i stap faet from wan doli, wan i pulum, narawan i pulum, wanwan long tufala i wantem doli ya. Maet tufala i sakem sam tok kros long narawan long tufala, gogo kasem we wan i lego doli ya, no wan narafala man i kam stopem tufala.

Stori blong Jenesis i soemaot se wan dei, Ebraham i harem nius se ol man blong lukaot long sipsip blong hem wetem olgeta blong nefiu blong hem, Lot, oli stap rao. Ebraham i tekem faswan step, nao i girap i go luk Lot mo i talem long hem se: “Lot. Yumitufala i wan famle nomo, be oltaem, ol man blong mi mo ol man blong yu oli stap raorao long olgeta. Hemia i no stret ya.” Ebraham nao i gat strong tingting blong no letem wan rao i spolem fasin fren blong olgeta. ?Hem i lego wanem blong stretem bisnes ya? Nating se hem nao i olfala moa, hem i rere blong letem narafala i jus fastaem; hem i rere blong lego wan samting. Ebraham i letem Lot blong jusum weswan ples hem i wantem blong karem ol anamol mo famle blong hem oli go stap long hem. Nao Lot i jusum grin ples ya we i stap long Sodom mo Gomora. Ebraham mo Lot wetem ol man blong tufala, oli seraot long pis.—Jenesis 13:5-12.

Yes, blong holemtaet gudfala fasin fren blong yumi wetem ol narafala, yumi mas mekem olsem Ebraham. Stori ya blong Baebol i soem wan nambawan eksampel we yumi save folem taem yumi stap stretem wan rao. Ebraham i talemaot se: “Ol man blong mi mo ol man blong yu oli stap raorao long olgeta. Hemia i no stret ya.” Ebraham i wantem tumas blong stretem rao ya long pis. I sua se, taem man i askem blong holemtaet fasin fren we hem i gat wetem narafala, samting ya i halpem hem blong sakemaot olgeta tingting we oli no stret. Biaen, Ebraham i talem tok ya se: “Yumitufala i wan famle nomo.” ?From wanem yumi wantem letem prapa jus blong yumi no fasin flas i spolem fasin fren blong yumi wetem narafala we i sas tumas? Oltaem Ebraham i tingbaot wanem we i impoten. Hem i mekem olsem long rod we i soem respek mo ona long hem wan, mo long semtaem hem i soem ona long nefiu blong hem.

!Sipos i gat wan bigfala rao i kamaot, mo i nidim we narafala i givhan blong stretem, i moa gud blong no stretem rao ya long fes blong plante man! Jisas i leftemap tingting blong yumi blong tekem faswan step blong go mekem pis wetem brata blong yumi, mo talem sore sipos i nidim. * (Matiu 5:23, 24) I nidim blong gat tingting daon. Pita i raetem se: “Yufala i mas mekem tingting blong yufala i stap daon. Nao long fasin ya, yufala i save givhan gud long yufala. Baebol i talem se, ‘God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.’” (1 Pita 5:5) Fasin we yumi mekem long ol brata sista blong yumi, i gat bigfala paoa long fasin fren we yumi gat wetem God.—1 Jon 4:20.

Insaed long Kristin kongregesen, maet yumi mas lego sam samting we yumi gat raet long hem, blong holemtaet pis. Long ol laswan faef yia we oli pas, i gat wan bigfala namba blong man oli kam joen wetem  ol Witnes blong Jeova, olsem wan famle we i stap mekem trufala wosip long God. !Samting ya i mekem yumi glad tumas! I sua se fasin blong yumi i gat bigfala paoa long olgeta ya mo tu long olgeta we oli stap long kongregesen. Hemia nao risen from wanem yumi mas tingting gud long ol samting we yumi jusum, olsem pleplei, ol samting we yumi mekem blong spel, mo ol wok. I gud yumi tingbaot tingting we narafala i gat long saed blong yumi. ?Ol fasin mo toktok blong yumi oli hafhaf long tingting blong narafala, we i mekem se oli foldaon?

Aposol Pol i talem se: “Yufala i stap talem se, ‘I fri blong yumi mekem evri samting,’ be i no evri samting we oli gud blong yumi mekem. Yufala i stap talem se, ‘I fri blong yumi mekem evri samting,’ be i no evri samting we oli save givhan long yumi. I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man tu we oli stap raonabaot long yumi.” (1 Korin 10:23, 24) Yes, yumi ol Kristin yumi wantem givhan blong mekem se lav mo fasin joen blong ol Kristin brata blong yumi i kam strong moa.—Ol Sam 133:1; Jon 13:34, 35.

Ol Tok Blong Mekem Man i Harem Gud

Ol toktok oli gat paoa blong mekem man i harem i gud. “Man we i kaen gud, tok blong hem i olsem gudfala kakae. Taem man i kakae, hem i harem i swit, mo i mekem bodi blong hem i strong.” (Ol Proveb 16:24) Stori blong Gideon, taem hem i stap toktok wetem ol laen blong Efrem blong blokem wan rao we i save kam wan faet, i soemaot se proveb ya i tru nomo.

Gideon, we i stap mekem wan bigfala faet agensem ol man Midian, hem i askem help long laen blong Efrem. Be taem faet i finis, ol laen blong Efrem oli tanemraon long Gideon, oli komplen se Gideon i no bin askem olgeta blong joen long stat blong faet ya. Stori i soem se “oli stap tok strong tumas long hem from.” Gideon i ansa se: “No be samting ya we mifala i mekem i smol nomo, i no kasem mak nating blong samting ya we yufala i mekem. Yufala i luk wok blong yufala se i smol, be i moa long olgeta wok we ol laen blong mi oli mekem. Tufala king ya blong ol man Midian, King Oreb mo King Seheb, God i putum tufala long han blong yufala, mo yufala i kilim tufala finis. ?Wanem nao mifala i mekem we i kasem mak blong wok ya we yufala i mekem?” (Jajes 8:1-3) Gideon i jusum gud ol toktok we hem i talem, mo i toktok long kwaet fasin. Long rod ya, Gideon i blokem wan bigfala faet we i save kamaot bitwin tufala laen. Maet ol laen blong Efrem, oli tinghae tumas long olgeta mo oli flas. Be samting ya i no blokem Gideon blong traehad blong mekem se i save gat pis. ?Yumi save mekem sem mak olsem Gideon?

Maet ol narafala oli kam kros mo oli traem blong agensem yumi. I gud blong kasem save long filing blong olgeta, mo traehad blong kasem save tingting blong olgeta. ?Yumi nao we i gat fol, yumi mekem se hem i harem nogud olsem? Sipos yes, i gud blong talemaot stret long hem mo soemaot klia se yumi sore from samting we yumi bin mekem. Smol toktok nomo we yumi tingting gud long hem fastaem, hem i save mekem wan fasin fren we i brok i kam gud bakegen. (Jemes 3:4) Samfala we oli kros, yumi mas toktok long olgeta wetem kaen fasin. Baebol i talem klia se: “Sipos i no moa gat faeawud, bambae faea i ded.” (Ol Proveb 26:20) Yes, sipos yumi jusum gud ol tok, mo talem long wan fasin we i stret, samting ya ‘i save mekem kros i godaon’ mo i save mekem man harem i gud bakegen.—Ol Proveb 15:1.

Aposol Pol i talem se: “Oltaem, long saed blong yufala, yufala i mas traehad blong faenem rod blong yufala i gat pis wetem olgeta man.” (Rom 12:18) I tru se yumi no save bos long ol filing blong ol narafala, be yumi save mekem sam samting blong holem pis i stap. Yumi save tekem aksin naoia blong folem ol gudfala rul blong Baebol, i bitim we yumi letem prapa tingting blong yumi we i no stret, no tingting blong ol narafala, i lidim yumi. Sipos yumi stretem ol rao long rod blong Jeova, bambae yumi gat pis mo yumi harem gud blong olwe.—Aesea 48:17.

[Futnot]

[Tok blong pija long pej 24]

?Oltaem yumi strong long narafala blong mekem samting folem prapa tingting blong yumi?

[Tok blong pija long pej 25]

Ebraham i soem wan nambawan eksampel blong lego sam samting blong hem wan blong i stretem wan rao